Гәло Һун Дькарьн жь Рʹастийед Сәрәкә йед Кʹьтеба Пироз Дәрсед Тʹәзә Һин бьн?

1. Гава әм рʹастийед сәрәкә йед Кʹьтеба Пироз пеһʹәсийан, әв йәк ча сәр мә һʹӧкӧм кьр?

ӘʹМЬРЕ мә бь сайа рʹастийед сәрәкә йед Кʹьтеба Пироз һатийә гӧһастьне. Мәсәлә, чахе мә бьһист кӧ наве Хԝәде Йаһоԝа йә, мә гава пешьн авит сәва кӧ бьбьнә достед ԝи (Ишайа 42:8). Чахе әм пеһʹәсийан кӧ паши мьрьне чь дьԛәԝьмә, әм ида бәр хԝә нәдькʹәтьн кӧ мәрьвед мәйи һʹәзкьри дьчәрчьрьн (Ԝаиз 9:10). У гава әм пеһʹәсийан кӧ Хԝәде ԝе әʹрде бькә Щьнәт, гӧман кʹәтә дьле мә. Әм баԝәр ьн кӧ әʹмьре мә ԝе ида нә тʹәне 70 йан 80 сал бә, ле әме һʹәта-һʹәтайе бьжин (Зәбур 37:29; 90:10).

2. Чаԝа 2 Пәтрус 1:12, 13 нишан дькә, кӧ хушк-бьред рʹӧһʹанида гьһишти жи дькарьн жь рʹастийед сәрәкә йед Кʹьтеба Пироз кʹаре бьстиньн?

² Әм гәрәке тʹӧ щар бир нәкьн кӧ рʹастийед сәрәкә йед Кʹьтеба Пироз чьԛас ԛимәт ьн. Пәтрусе шанди нәʹма хԝәйә дӧда ԝан хушк-бьрарʹа ньвиси, йед кӧ рʹастийеда «һʹимгьрти» бун (Бьхунә 2 Пәтрус 1:12, 13). Ле щьватеда кәсед хьраб һәбун, йед кӧ дьхԝәстьн шагьртед Иса жь рʹастийе дур хьн (2 Пәтрус 2:1-3). Ләма жи, нета Пәтрус әв бу кӧ ԛәԝате бьдә хушк-бьра, ԝәки әԝана һьмбәри ван щерʹьбандьна ԛәԝи бьсәкьньн. Бона ве йәке, әԝи һьнә рʹастийед кӧ ԝана ида заньбу, диса кьрә бира ԝан. Әв рʹастийед сәрәкә ԝе али ԝан бькьра һʹәта хьлазийе амьн бьминьн.

3. Чьма лазьм ә кӧ әм бәрдәԝам кьн сәр рʹастийед сәрәкә йед Кʹьтеба Пироз бьфькьрьн? Мәсәле бинә.

³ Чьԛас әм рʹӧһʹанида гьһишти дьбьн, һаԛас әм дькарьн жь рʹастийед сәрәкә йед Кʹьтеба Пироз, дәрсед тʹәзә һин бьн. Ве мәсәле бьдә бәр чʹәʹве хԝә: Ашпежәки щерʹьбанди у ашпежәки тʹәзә бона һазьркьрьна хԝарьнәке, сәбзәйед мина һәв дьдьнә хәбате. Ле йе щерʹьбанди ида һин буйә кӧ ча сәбзә бь щурʹәки ӧса һазьр кә, ԝәки хԝарьн хԝәш бә. Мина ве йәке, дьбәкә ньһерʹандьна кәсед рʹӧһʹанида щерʹьбанди у ньһерʹандьна йед рʹастийеда тʹәзә, сәр һинкьрьнед сәрәкә йед Кʹьтеба Пироз, жь һәв щӧдә бә. Жь ԝәʹде ньхӧмандьна мә, дәрәщед әʹмьре мә у щабдарийед мәйә щьватеда, дьԛәԝьмә һатьнә гӧһастьне. Һәрге әм сәр рʹастийед кӧ зудава заньн, бьфькьрьн, дьбәкә әм дәрсед тʹәзә бьстиньн, йед кӧ бона дәрәщед мәйә ньһа керһати нә. Ԝәрә әм шеԝьр кьн, ԝәки кәсед кӧ ида гәләк сал ә Йаһоԝарʹа хьзмәт дькьн, чь дькарьн һин бьн жь се рʹастийед сәрәкә йед Кʹьтеба Пироз.

ЙАҺОԜА ӘʹФЬРАНДАР Ә

4. Әв йәк кӧ әм заньн ԝәки Йаһоԝа Әʹфьрандаре мә йә, сәр мә ча һʹӧкӧм дькә?

⁴ Кʹьтеба Пироз дьбежә: «Йе һәр тьшт әʹфьрандийә, Хԝәде йә» (Ибрани 3:4). Әм заньн кӧ Хԝәде әʹрд у әʹзман чекьрийә. Билани у ԛәԝата Хԝәде бесинор ә. Ӧса жи, әԝ йәк кӧ әԝи мә әʹфьрандийә, нишан дькә ԝәки әԝ мә рʹьнд нас дькә у сәва мә хәм дькә. Бь сайа ве йәке кӧ әм заньн ԝәки Йаһоԝа Әʹфьрандаре мә йә, әʹмьре мә алийе башда һатийә гӧһастьне у мә нета жийине дитийә.

5. Кʹижан рʹасти али мә дькә мьлуктийе пешда биньн? (Ишайа 45:9-12)

⁵ Рʹастийа кӧ Йаһоԝа Әʹфьрандаре һәр тьшти йә, мә һин дькә кӧ әм гәрәке мьлук бьн. Гава Ибо бь зедәйи дина хԝә дьда һʹале хԝә у кәсед дьн, Йаһоԝа ани бира ԝи кӧ Әʹфьрандаре әʹрд у әʹзмана кʹи йә (Ибо 38:1-4). Бь сайа гьлийед Йаһоԝа, Ибо фәʹм кьр кӧ һʹәму кьред Йаһоԝа рʹаст ьн. Чәнд ԛьрʹнә шунда, Ишайа пʹехәмбәр ӧса ньвиси: «Гәло гьл дькарә кәсе шькьл дьдерʹа бежә: ‹Тӧ чь чедьки?›» (Бьхунә Ишайа 45:9-12).

6. Илаһи кʹәнге лазьм ә кӧ әм биньн бира хԝә, ԝәки Йаһоԝа Әʹфьрандаре мә йә? (Бьньһерʹә ӧса жи шькьл.)

⁶ Чьԛас әм рʹӧһʹанида щерʹьбанди дьбьн, һаԛас хофи һәйә кӧ әм дьһа зедә хԝә бьсперьн фькьр у ньһерʹандьнед хԝә, нә кӧ рʹебәрийа Йаһоԝа у Кʹьтеба Пироз (Ибо 37:23, 24). Гәло чьма керһати йә кӧ әм дәрәща ӧсада, дәрһәԛа биланийа у мәзьнайа Әʹфьрандаре мә бьфькьрьн? (Ишайа 40:22; 55:8, 9) Әв рʹастийа сәрәкә дькарә али мә бькә кӧ әм мьлук бьминьн у бир нәкьн, ԝәки фькьр у ньһерʹандьна Йаһоԝа жь йа мә бьльндтьр ә.

7. Раһелайе чь кьр сәва кӧ һини гӧһастьнәке бә?

⁷ Гава хушка мә Раһела, йа кӧ Словенйайеда дьжи, дәрһәԛа Әʹфьрандар дьфькьрә, жерʹа дьһа һеса дьбә кӧ гӧһастьнед тʹәшкиләте ԛәбул кә. Әԝ дьбежә: «Щарна бона мьн һеса нибу гӧһастьнед тʹәшкиләте ԛәбул кьм. Мәсәлә, рʹаст ә мьн заньбу кӧ ль гора Әʹламәтийа жь Кʹома Рʹебәрийе №8 йа сала 2023 изьна бьра һәйә ԝәки рʹуйе хԝә бәрʹдьн, ле диса жи гава мьн щара пешьн бьраки бь рʹу дит, кӧ пе готаре дәркʹәтьбу, әз әʹщебмайи мам у әв йәк мьн хԝәш нәһат. Ләма жи мьн Йаһоԝарʹа дӧа кьр, ԝәки әԝ али мьн бькә һини ве гӧһастьне бьм». Раһелайе фәʹм кьр кӧ Йаһоԝа, ча Әʹфьрандаре әʹрд у әʹзмана, дькарә рʹебәрийа рʹаст бьдә тʹәшкиләта хԝә. Һәрге тәрʹа жи чәтьн ә кӧ һини гӧһастьна би, гәло ԝе баш нибә ԝәки тӧ бь мьлукти сәр билани у ԛәԝата мәзьн йа Әʹфьрандаре мә, Йаһоԝа, кʹур бьфькьри (Рʹомайи 11:33-36).

ХԜӘДЕ ЧЬМА ДЬҺЕЛӘ ԜӘКИ КӦЛ-ДӘРД ҺӘБЬН?

8. Әв йәк кӧ әм сәбәбе кӧл-дәрда заньн, ча сәр мә һʹӧкӧм дькә?

⁸ Гәло Хԝәде чьма дьһелә ԝәки кӧл-дәрд һәбьн? Һьнә мәрьвед кӧ щаба ве пьрсе ньзаньн, сәр Хԝәде һерс кʹәтьнә йан жи бунә атеист (Мәтʹәлок 19:3). Ле тӧ пеһʹәсийайи ԝәки сәбәбе кӧл-дәрда чь йә. Тӧ зани ԝәки Йаһоԝа нәһәԛ нинә, ле мәрьв дьчәрчьрьн у дьмьрьн жь бо ве йәке кӧ гӧнәкʹар ьн. Ӧса жи, тӧ пеһʹәсийайи ԝәки бь сайа сәбьра Йаһоԝа, бь милйона мәрьва ԝи нас кьрьнә, у әԝана ида заньн ԝәки ча Йаһоԝа ԝе кӧл-дәрда сәр һʹәта-һʹәтайе кʹӧта кә (2 Пәтрус 3:9, 15). Бь сайа ван рʹастийа, дьле тә рʹьһʹәт ә у тӧ дьһа незики Йаһоԝа буйи.

9. Илаһи кʹәнге лазьм ә ԝәки әм биньн бира хԝә, кӧ Йаһоԝа чьма изьне дьдә ԝәки әм рʹасти кӧл-дәрда бен?

⁹ Әм фәʹм дькьн кӧ әм гәрәке бь сәбьр һивийе бьн һʹәта кӧ Йаһоԝа кӧл-дәрда кʹӧта кә. Ле гава мәрьвәки мәйи һʹәзкьри дьмьрә йан жи гава әм рʹасти тәнгаси у нәһәԛийе тен, дьбәкә әм бьфькьрьн кӧ чьма Йаһоԝа тьштәки накә (Һәбаԛуԛ 1:2, 3). Чахе тьштед ӧса дьԛәԝьмьн, ԝәрә әм биньн бира хԝә кӧ чьма Йаһоԝа изьне дьдә ԝәки кәсед рʹаст бьчәрчьрьнa (Зәбур 34:19). Ӧса жи, ԝәрә әм тʹӧ щара бир нәкьн кӧ рʹожәке әԝе һʹәму кӧл-дәрда сәр һʹәта-һʹәтайе кʹӧта кә.

10. Чь али Аннайе кьр кӧ паши мьрьна дийа хԝә дьлрʹьһʹәтийе бьстинә?

¹⁰ Әв йәк кӧ әм мәʹнийа кӧл-дәрда заньн, али мә дькә ԝәки әм тәйах кьн. Хушка мә Анна, йа кӧ сәр гьрава Майоттайе дьжи, ӧса дьбежә: «Чәнд сал пешда, кʹәнге дийа мьн мьр, әз гәләк дьлтәнг бум. Ле әз һәртʹьм тиньм бира хԝә ԝәки сәбәбе кӧл-дәрда Йаһоԝа нинә. Әԝ жь дьл дьхԝазә һʹәму кӧл-дәрда кʹӧта кә у мәрьвед мәйи һʹәзкьри жь мьрьне рʹакә. Фькьрандьна сәр ван рʹастийа, дьле мьн гәләк рʹьһʹәт дькә».

11. Әв йәк кӧ әм сәбәбед кӧл-дәрда заньн, мә бәрбь чь һелан дькә?

¹¹ Занәбуна ве йәке, кӧ Хԝәде чьма дьһелә ԝәки кӧл-дәрд һәбьн, мә һелан дькә бәрдәԝам кьн мьзгинийе бәла кьн. Чахе Пәтрус шьровәкьр, ԝәки сәбьра Йаһоԝа рʹе вәдькә кӧ кәсед тʹобәкʹар хьлаз бьн, паше әԝи зедә кьр: «Һун гәрәке мәрьвнә чаԝа бьн? Гәрәке һун жийина һʹәлал у хԝәденасийеда бьмәшьн» (2 Пәтрус 3:11). Йәк жь тьштед кӧ нишан дькьн ԝәки әм Хԝәдерʹа амьн ьн, әв ә кӧ әм мьзгинийе бәла дькьн. Мина Баве мәйи әʹзмана, әм жи мәрьва һʹәз дькьн у дьхԝазьн ԝәки әԝана жи дьнйа тʹәзәда бьжин. Йаһоԝа бь сәбьр мәщале дьдә мәрьвед дәр-дора мә, кӧ ԝи бьһʹәбиньн. Ԛәдьрәки чьԛас мәзьн ә кӧ әм һәвалкʹаред Хԝәде нә! Пешийа хьлазийа ве дьнйайе, әм дькарьн али мәрьва бькьн ԝәки әԝана Йаһоԝа нас бькьн (1 Корьнтʹи 3:9).

ӘМ РʹОЖЕД ХЬЛАЗИЙЕДА ДЬЖИН

12. Занәбуна ве йәке кӧ әм рʹожед хьлазийеда дьжин, чь кʹаре мәрʹа тинә?

¹² Кʹьтеба Пирозда гәләк сал пешда һур бь һур һатьбу ньвисаре, ԝәки рʹожед хьлазийеда, мәрьв ԝе чь щурʹәйи бьн (2 Тимотʹейо 3:1-5). Гава әм дәр-дора хԝә дьньһерʹьн, әм бь чʹәʹве хԝә дьвиньн ԝәки әв пʹехәмбәрти ча те сери. Һʹале мәрьва чьԛас хьраб дьбә, һаԛас әм дьһа баш дьвиньн ԝәки Кʹьтеба Пироз кʹьтебәкә бь итʹбар ә (2 Тимотʹейо 3:13-15).

13. Ль гора мәсәла Иса жь Луԛа 12:15-21, ԝе баш бә кӧ әм жь хԝә чь бьпьрсьн?

¹³ Әм заньн ԝәки әм рʹожед хьлазийеда дьжин, ләма жи лазьм ә ԝәки әм ԝәʹде хԝә сәр шьхӧлед дьһа фәрз хәрщ кьн. Дина хԝә бьдьне, кӧ әм чь дькарьн һин бьн дәрһәԛа шьхӧлед дьһа фәрз жь мәсәла кӧ Иса ани, кʹижан кӧ кʹьтеба Луԛа 12:15-21-да ньвисийә (бьхунә). Гәло мере дәԝләти чьрʹа һатьбу навкьрьне ‹бефәʹм›? Нә жь бо ве йәке кӧ әԝ дәԝләти бу, ле жь бо ве йәке кӧ әԝи дина хԝә нәдьда тьштед дьһа фәрз. Әԝи ‹хьзнә хԝәрʹа тʹоп дькьр, ле чʹәʹве Хԝәдеда дәԝләти нибу›. Әв шашикә мәзьн бу, чьмки мьрьна ԝи ида незик бу. Иро жи чьԛас дьчә һаԛас әм дьһа незики хьлазийа ве дьнйайе дьбьн, ләма жи әм дькарьн жь хԝә бьпьрсьн: «Гәло нетед кӧ мьн хԝәрʹа данийә, дьдьнә кʹьфше ԝәки әз дина хԝә дьдьмә тьштед һәри фәрз? Әз зарʹед хԝә һелан дькьм ԝәки әԝана кʹижан нета дайньн пешийа хԝә? Гәло әз ԛәԝата хԝә, ԝәʹде хԝә у тьштед материали, һәри зедә бона хԝә хәрщ дькьм, йан сәва кӧ әз бәр чʹәʹве Хԝәде дәԝләти бьм?»

14. Чаԝа кӧ әм жь сәрһатийа Мики дьвиньн, чьма ԝе баш бә ԝәки әм бир нәкьн кӧ әм рʹожед хьлазийеда дьжин?

¹⁴ Гава әм избат дьбьн кӧ әм рʹожед ахьрийеда дьжин, әв йәк дькарә али мә бькә ньһерʹандьна рʹаст хԝәй кьн у сафикьрьнед баш бькьн. Мәсәлә, хушка мә Мики ӧса дьбежә: «Гава мьн мәкʹтәб хьлаз кьр, мьн дьхԝәст бона хԝәндьна зооложийе, демәк лекʹолина һʹәйԝана, һәрʹьм занингәһе. Һьм жи мьн дьхԝәст ча пешәнга һәртʹьм хьзмәт кьм у һәрʹьм щийе ӧса, кʹидәре кӧ хьзмәтийеда һʹәԝщәти һәйә. Һьнә хушк-бьра ширәт данә мьн, ԝәки әз рʹьнд бьфькьрьм һәла һинбуна занингәһеда ԝе мәщале бьдә кӧ әз бьгьһижьмә нетед хԝә бона хьзмәтийе. Ԝана ани бира мьн кӧ хьлазийа ве дьнйайе незик ә. Жь алийе дьнва, дьнйа тʹәзәда ԝе гәләк мәщалед мьн һәбьн кӧ әз һʹәйԝана лекʹолин кьм. Ләма жи мьн сафи кьр, ԝәки һинбунәкә ӧса бьстиньм, йа кӧ ԝе гәләк ԝәʹдә жь мьн нәстинә. Бь ви щурʹәйи, мьн хԝәрʹа хәбатәкә ӧса дит, йа кӧ дәст дьда ча пешәнга һәртʹьм хьзмәт кьм у паше бона хьзмәтийе дәрбази Әкԝадоре бьм». Иро Мики тʹәви мере хԝә, йе кӧ бәрпьрсийаре мьһале йә, тʹәсәлийа щьватед ԝедәре дькьн.

15. Чьма әм гәрәке гӧмана хԝә ԝан мәрьва нәбьрʹьн, йед кӧ һʹәта ньһа рʹасти ԛәбул нәкьрьнә? Мәсәле бинә. (Бьньһерʹә ӧса жи шькьл.)

¹⁵ Гава әм мьзгинийе бәла дькьн у мәрьв гӧһ надьнә мә, әм гәрәке бона ве йәке дьлтәнг нәбьн. Мәрьв дькарьн бенә гӧһастьне. Биньн бира хԝә сәрһатийа Аԛуб, йе кӧ бьре Иса бу. Әԝ тʹәви Иса мәзьн бьбу, дитьбу кӧ Иса ча бьбу Мәсиһ у ӧса жи дьдит, кӧ мина ԝи тʹӧ кәси һин нәдькьр. Диса жи гәләк сала Аԛуб нәбу шагьрте Иса. Тʹәне паши ве йәке чахе Иса жь мьрьне һатә сахкьрьне, әԝ бу шагьртәки ԝийи хирәтb (Йуһʹәнна 7:5; Галати 2:9). Ләма жи гӧмана хԝә ӧнда нәкә һьндава мәрьвед хԝә у кәсед дьн, йед кӧ һʹәта ньһа рʹастийа Кʹьтеба Пироз һе ԛәбул нәкьрьнә. Бир нәкә кӧ әм рʹожед хьлазийеда дьжин, ләма жи шьхӧле бәлакьрьна мьзгинийе гәләк фәрз ә. Тьштед кӧ тӧ ньһа ԝанрʹа дьбежи, дькарә паше сәр ԝан һʹӧкӧм кә, дьԛәԝьмә һәла һе паши дәстпекьрьна тәнгасийа мәзьн жи.c

БОНА РʹАСТИЙЕД СӘРӘКӘ ШЕКЬРДАР БӘ

16. Тә жь рʹастийед сәрәкә чь кʹар стандийә? (Ӧса жи бьньһерʹьн чаргоша бь наве «Бь Сайа Рʹастийед Кʹьтеба Пироз Али Мәрьва Бькә».)

¹⁶ Һьнә информасийа кӧ әм жь тʹәшкиләте дьстиньн, бона ԝан мәрьва йә, йед кӧ рʹастийед сәрәкә жь Кʹьтеба Пироз ньзаньн. Мәсәлә, готаред кӧ әм һәр һʹәфтийе щьватеда дьбьһен, һьнә тʹемед әʹдәбйәтед мәда у видеойед сәр малпәра мә jw.org у ӧса жи һьнә журналед мә, һәма бона кәсед ӧса тенә һазьркьрьне. Ле әм жи дькарьн жь ԝан кʹаре бьстиньн, чьмки әԝана али мә дькьн дьһа зедә Йаһоԝа һʹәз бькьн, баԝәрийа хԝә гьлийед ԝи биньн у рʹастийед сәрәкә мәрьва һин кьн (Зәбур 19:7).

17. Ԝе илаһи кʹәнге баш бә кӧ әм сәр рʹастийед сәрәкә йед Кʹьтеба Пироз бьфькьрьн?

¹⁷ Гава әм фәʹмкьрьна тʹәзә дәрһәԛа рʹастикә Кʹьтеба Пироз дьстиньн, әм гәләк ша дьбьн. Хенщи ве йәке, әм бона рʹастийед сәрәкә, йед кӧ мәʹнийа ве йәке бун кӧ әм һатьнә сәр рʹийа рʹастийе, шекьрдар ьн. Һәрге әм бьфькьрьн кӧ ньһерʹандьна мә сәр пьрсәки дьһа рʹаст ә, нә кӧ ньһерʹандьна тʹәшкиләта Йаһоԝа, ԝәрә әм биньн бира хԝә кӧ Хԝәде, ԛәԝат у биланийа кʹижани тʹера һәр тьшти дькә, рʹебәрийа тʹәшкиләте дькә. Һәрге әм йан жи мәрьве мәйә незик рʹасти тәнгасикә бен, ԝәрә әм сәбьр кьн у бир нәкьн кӧ Йаһоԝа чьма дьһелә ԝәки кӧл-дәрд бьԛәԝьмьн. Гава әм сафи дькьн кӧ ча ԝәʹдә у тьштед материйали хәрщ кьн, ԝәрә әм бир нәкьн ԝәки хьлазийа ве дьнйайе чьԛас незик ә. Бьра рʹастийед Кʹьтеба Пироз тʹьме ԛәԝат у биланийе бьдьнә мә, ԝәки әм Йаһоԝарʹа бь амьни хьзмәт кьн!