ПЬРСА 3
Чаԝа Зьман Де-Баве Хԝәрʹа Бьвиньм?
ТӦЙЕ ЧЬ БЬКИ?
Ве дәрәще бьдә бәр чʹәʹве хԝә: Щефри, кӧ 17 сали йә, чаршәме еваре шьхӧлед мале, кӧ дабунә ԝи, ани сери. Ньһа әԝ дькарә һеса бә! Әԝ телевизийоне ведьхә, щики рʹьһʹәт рʹудьне, сәва кӧ TV бьньһерʹә.
Ле ньшкева баве ԝи дәрда те, у чаԝа те кʹьфше әԝ һерс ә.
«Щефри! Тә чь хԝә дайә бәр телевизийоне, дәԝса ԝе йәке тӧ дькари али бьре хԝә бьки, ԝәки дәрсед мәкʹтәбе һин бә! Тӧ ԛә найни сери ԝе йәке чь кӧ тәрʹа дьбежьн!»
Щефри бәр хԝәда дькә бьрмә-бьрм у дьбежә: «Диса дәстпекьр», у бав әԝе йәке дьбьһе.
Бав дьбежә: «Тә чь гот?»
Щефри нәԛайил щаба хԝә дьдә у дьбежә: «Тьштәк на, Баво».
Бав һерс дькʹәвә у дьбеже: «Кʹе изьн дайә тә, кӧ ӧса тʹәви мьн хәбәр ди!»
Һәрге тӧ дәԝса Щефри буйайи, тәйе чь бькьра, сәва кӧ сәре хԝә жь ԝе хәтайе дәрхьста?
БЬСӘКЬНӘ У БЬФЬКЬРӘ!
Һәләԛәтийа тʹәви де-бава мина ажотьна әʹрәбе йә. Чахе тӧ дьбини, ԝәки рʹе һатийә дадане тӧйе дәстпеки рʹекә дьн бьгәрʹи.
МӘСӘЛӘ:
Кәчʹькәкә бь наве Лийа дьбежә: «Мьнрʹа гәләк чәтьн ә тʹәви баве хԝә хәбәр дьм. Щарна ӧса дьбә, ԝәки әз ԝирʹа тьштәки гьли дькьм, ле әԝ мьнрʹа дьбежә: ‹Бьбахшинә, тә мьнрʹа тьштәк гот?›»
БАЛ ЛИЙА СЕ ДӘРӘЩӘ ҺӘЙӘ, ЧЬ КӦ ӘԜ ДЬКАРӘ БЬКӘ.
А. Тʹәви баве хԝә һерс хәбәр дә.
Лийа һерс дькʹәвә, «Чьма тӧ гӧһ нади мьн, әԝ йәк гәләк фәрз ә! Гӧһ бьдә мьн!»
Б. Ида баве хԝәрʹа тьштәки гьли нәкә.
Лийа сафи дькә, дәрһәԛа проблема хԝә ида тʹәви баве хԝә хәбәр нәдә.
В. Мәщала баш бьгәрʹә у паше гьли кә.
Лийа мәщала баш дьвинә у паше тʹәви баве хԝә хәбәр дьдә, йан жи әԝ дәрһәԛа проблема хԝә нәʹмеда дьньвисә.
Ча тӧ дьфькьри, кʹижан мәщал дьһа баш ә, ԝәки Лийа бьжберә?
БЬФЬКЬРӘ: Баве Лийа кʹәтийә мьтала у навинә, ԝәки ԛиза ԝи хәмгин буйә. Ләма жи, һәрге Лийа Мәщала А бьдә хәбате у һерсә-һерс баве хԝәрʹа хәбәр дә, бав ԝе фәʹм нәкә чьма ԛиза ԝи һерс кʹәтийә. У ӧса әԝе ԛәдьр нәдә кʹьфше һьндава баве хԝә (Әфәси 6:2). Демәк, әԝ мәщала нәбаш ә.
Мина ԝе йәке, чаԝа тӧ дәстпедьки рʹекә тʹәзә бьгәри, һәма ӧса тӧ гәрәке мәщале бьгәрʹи, сәва кӧ дьһа незики де-баве хԝә би
Мәщала Б һеса йә, ле нә һаԛас баш ә. Чьма? Чьмки сәва кӧ чәтьнайа хԝә сафи кә, Лийайерʹа лазьм ә тʹәви баве хԝә хәбәр дә. Бав ԝе бькарьбә али ԝе бькә, һәрге бьзаньбә чәтьнайа ԝе чьда нә. Ләма жи гава әԝ хԝә кәр кә, чәтьнайи ԝе нәйе сафикьрьне.
Бь сайа Мәщала В, Лийа изьне надә чәтьнайа, ԝәки рʹийа ԝе бьгьрьн тʹәви баве хԝә хәбәр дә. Әԝе сафи кьрийә рʹожәкә дьн тʹәви ԝи хәбәр дә. У һәрге Лийа сафи кә баве хԝәрʹа нәʹме бьньвисә, ԝе хԝә дьһа баш тʹәхмин кә.
Нәʹмеда Лийа дькарә һеса дәрһәԛа дьл-фькьред хԝә әʹйан кә. Гава бав нәʹме бьхунә, әԝе фәʹм бькә ԛиза ԝи чь дьхԝазә бежә, у ԝирʹа ԝе һеса бә дьһа рʹьнд фәʹм кә. Мәщала Щ ԝе дьһа керһати бә, ча сәва Лийайе ӧса жи сәва баве ԝе. Һәрге Лийа тʹәви баве хԝә хәбәр дә, йан нәʹме ԝирʹа бьньвисә ӧса әԝе бьдә кʹьфше, ԝәки дьжи бь сайа ширәтед жь Кʹьтеба Пироз «һьндава һәвда сәр нета әʹдьлайийе» бьн (Рʹомайи 14:19).
Гәло Лийа диса чь дькарә бькә?
Бьфькьрә дәрһәԛа ԝе йәке, диса чь щурʹә мәщал тӧ дькари бьди хәбате. Паше бьньвисә ахьрийа ԝе йәке ԝе ча бә.
ФЬКЬРЕД ХԜӘ ЗӘЛАЛ ӘʹЙАН КӘ
Бир нәкә, щарна де-бав тьштәки дьн фәʹм дькьн, нә кӧ әԝ чь кӧ тӧ дьхԝази бежи.
МӘСӘЛӘ:
Де-баве тә дьпьрсьн чьрʹа тӧ хәмгин буйи. Ле тӧ ӧса щаба ван дьди: «Әз нахԝазьм дәрһәԛа ԝе йәке хәбәр дьм».
Ӧса жи де-баве тә жь тә гьлийед ӧса сәдькьн: «Әз итʹбарийа хԝә ԝә найньм. Дәрһәԛа чәтьнайед хԝә әзе тʹәви һәвалед хԝә хәбәр дьм, нә кӧ тʹәви ԝә».
Бьдә бәр чʹәʹве хԝә, ԝәки тӧ кʹәти чәтьнайе у де-баве тә дьхԝазьн али тә бькьн. Ле тӧ дьбежи ԝан: «Бәр хԝә нәкʹәвьн, әзе хԝәха һәр тьшт сафи кьм».
Де-баве тә ԝе чь сәр хԝә тʹәхмин кьн?
Чь ԝе дьһа баш бә, ԝәки тӧ бежи?