ПЬРСЕД ЩАҺЬЛА
Чьма Де-Баве Мьн Синора Мьнрʹа Датиньн?
Һәвалед тә тʹоп дьбьн кӧ ԝәʹдә дәрбаз кьн у тә жи тʹәглиф дькьн. Тӧ изьне жь де-баве хԝә дьхԝази, ле әԝана тәрʹа дьбежьн, «На». Ле әв йәк бона тә әʹщебмайи нинә, чьмки щаба ԝан һәр гав ӧса йә.
Ве готареда
Чьма де-баве мьн һәр гав мьнрʹа дьбежьн на?
Жь бо ве йәке кӧ де-баве тә тʹьме сәр хԝәстьнед тә дьбежьн на, тӧ дькари бьфькьри ԝәки әԝана ԛә нахԝазьн тӧ ԝәʹдә дәрбаз ки.
Кәчʹькәкә бь наве Мари, бь ви щурʹәйи хԝә тʹәхмин кьр, гава жерʹа щара пешийе тʹел кʹьрʹин. Әԝ ӧса дьбежә: «Баве мьн изьн нәдьда әз гәләк тьшт бькьм. Мәсәлә мьн нькарьбу һәр тьшти чь мьн дьхԝәст сәр тʹела хԝә бьдьмә кʹьшандьне. Ӧса жи баве мьн дьготә мьн тʹәв кʹе мьн дькарьбу һәвалтийе бькьра у чьԛас ԝәʹдә тʹәви ԝан хәбәр да. Ле һәвалед мьн чь дьхԝәстьн, ве йәке жи дькьрьн!»
Бьфькьрә: Гәло баве Мари дьхԝәст ԝәки ԛиза ԝи ԛә ԝәʹдә дәрбаз нәкә? Диса дәрһәԛа чь дьԛәԝьмә әԝ бәр хԝә дькʹәт?
Синора бона ажотьна әʹрәбе дьԛәԝьмә азайе жь тә дьстинә, ле әв тә жь зийане дьпʹарезә; һәма ве йәке дькарьн бежьн дәрһәԛа синоред кӧ де-бав датиньн
Ширәт: Бьдә бәр чʹәʹве хԝә тӧ де йан бав и у зарʹа тә һәйә, кʹижанерʹа тә тʹел кʹьрʹийә. Тӧйе дәрһәԛа чь бәр хԝә кʹәви? Чь ԛәдәхәкьрьн тәйе данийа, сәва кӧ зарʹа хԝә бьпʹараста? Тәйе чь бьгота, һәрге зарʹа тә бьгота кӧ тӧ наһели ԝәки әԝ ԝәʹдә дәрбаз кә?
«Баве мьн тʹьме дьготә мьн, ‘Хԝә дәԝса мьн дайнә’. Чахе мьн ӧса дькьр, әв йәк али мьн дькьр фәʹм бькьм, ԝәки әԝ ԛәдәхәкьрьн бе мәʹни нәдьһатьнә дайине. Һәрге зарʹед мьн һәбуна, мьне жи ве йәке жь ԝана дәʹԝа кьра, чь кӧ баве мьн жь мьн дәʹԝа дькә»—Танйа.
Чь әз дькарьм бькьм, ԝәки әԝана мьнрʹа бежьн әре?
«Бь ԛарʹә-ԛарʹа тә тʹӧ тьшт ԝе нәйе гӧһастьне, дәԝсе де-баве тә у тӧ алийе емосийалида бьԝәстьн. Һәрге тӧ һерс кʹәви, де-баве тә ԝе сафи кьн, кӧ тӧ һе һазьр нини азабуне бьстини»—Ричард.
«Де-баве мьн, мьн һʹәз дькьн, ләма жи һьнә тьшта ԛәдәхә дькьн. Нета де-баве мьн әԝ нинә, ԝәки әз ԛә ԝәʹдә дәрбаз нәкьм, дәԝсе әԝана дьхԝазьн ԝәки әз ԝәʹдәдәрбазкьрьнед ӧса бьжберьм, йед кӧ ԝе проблема пешда нәйиньн»—Айви.
Принсипа Кʹьтеба Пироз: «Ахмах һʹәму һерса хԝә дьдә дәр, ле йе сәрԝахт хԝәда зәфт дькә» (Мәтʹәлок 29:11).
«Мьн һәр тьшти дькьр, ԝәки ве йәке бькьм чь кӧ баве мьн ԛәдәхә кьрьбу бона тʹела мьн. Мьн щурʹә-щурʹә рʹе дьгәрʹийа, ԝәки шәв һәвалед хԝәрʹа бьньвисьм у тʹела хԝәда тьштед ӧса бьдьмә кʹьшандьне, кʹижан кӧ баве мьн изьн нәдьда мьн. Ахьрийе, баве мьн диса жи пеһʹәсийа у һе зедә тьшт мьнрʹа ԛәдәхә кьр, чьмки әԝи ида итʹбарийа хԝә мьн нәдьани. Мьн фәʹм кьр, һәрге тьшта дьзива бьки, әв йәк тʹӧ кʹаре найнә»—Мари.
«Сәбьре бьдә кʹьфше. Дьԛәԝьмә ԝәʹдә лазьм бә, ԝәки де-баве тә диса бьһельн тӧ ԝан тьшта бьки, чь кӧ ԝана ԛәдәхә кьрийә. Ле һәрге тӧ бәрдәԝам ки гӧрʹа ԝан бьки, әԝана ԝе зедә азайе бьдьнә тә»—Мелинда.
Принсипа Кʹьтеба Пироз: «Һәр тьштида гӧрʹа де у баве хԝәда бьн» (Колоси 3:20).
«Һәрге тӧ сәр йа хԝә бьсәкьни у бьки кӧтә-кӧт, диса жи те ве йәке нәстини, чь кӧ дьхԝази»—Натали.
«Де-баве тә дьхԝазьн избат бьн, ԝәки тӧ бь сәрԝахти сафикьрьна дьки. Ләма жи чахе әз тʹәви де-баве хԝә хәбәр дьдьм, әз емосийед хԝә контрол дькьм. У әз дьвиньм, ԝәки чахе әз тʹәви ԝан бь логики хәбәр дьдьм, ԝи чахи де-баве мьн изьне дьдьнә мьн ве йәке бькьм, чь кӧ әз дьхԝазьм бькьм»—Щозеф.
Принсипа Кʹьтеба Пироз: «Ԛәдьре де у баве хԝә бьгьрә» (Әфәси 6:2).