ПЬРСЕД ЩАҺЬЛА
Чь Бькьм Һәрге Де-Бав Синоред Сәрт Мьнрʹа Датиньн?
«Чахе әз 15 сали бум мьн һеса ԛәбул дькьр синоред кӧ де-баве мьн мьнрʹа датанин. Ле ньһа әз ида 19 сали мә у һе зедә азайе дьхԝазьм» (Силвийа).
Дьбә кӧ тӧ жи мина Силвийайе дьфькьри. Ширәтед жь ве готаре ԝе али тә бькьн һеса де-баве хԝәрʹа дәрһәԛа ве йәке хәбәр ди.
Тӧ чь гәрәке бьзаньби
Пешийа кӧ де-баве хԝәрʹа дәрһәԛа синора хәбәр ди, ԝе баш бә дәрһәԛа һьнә тьшта бьфькьри:
Бе синора, жийина мә ԝе бе тʹәрбәт буйа. Бьдә бәр чʹәʹве хԝә рʹийа бе синор, бе нишан у һәр кәс чаԝа бьхԝазә ӧса әʹрәбе бажо. Бешьк жь бо ве йәке ԛәзи ԝе бьԛәԝьмә! Демәк, сәва кӧ һәр тьшт бь тʹәрбәти бә, лазьм ә, чаԝа малда ӧса жи сәр рʹе, синор һәбьн.
Синор дьдьнә кʹьфше, ԝәки де-бав бона тә хәм дькьн. Һәрге де-баве тә тʹӧ синор данәнйана, ԝе ӧса бьһата кʹьфше, ԝәки әԝана ԛә сәва тә хәм накьн. Һьм жи әве йәке ԝе нишан кьра, кӧ бь рʹасти әԝана тә һʹьз накьн!
ТӘ ЗАНЬБУ? Бь рʹасти де-баве тә жи гәрәке ль гора һьнә синора бьжин! Баԝәр наки? Бьхунә Дәстпебун 2:24; Ԛануна Дӧщари 6:6, 7; Әфәси 6:4; у 1 Тимотʹейо 5:8.
Ле һәрге тӧ диса жи дьфькьри, ԝәки де-баве тә синоред сәрт тәрʹа датиньн, ԝи чахи тӧ чь дькари бьки?
Тӧ чь дькари бьки
Пешийе бьфькьрә. Тә чь нав бәр де-баве хԝә ԛазанщ кьрийә? Һәрге тӧ тʹьме ширәтед де-баве хԝә дьтʹәрьбини, ԝе нәбаш бә ньһа незики ԝан би у һе зедә азайе бьхԝази. Һе баш ә, әве готаре бьхуни «Әз Гәрәке Чь Бькьм ԝәки Де-Баве Мьн Итʹбарийа Хԝә Мьн Биньн?»
Ле һәрге тӧ гӧрʹа де-баве хԝәда буйи, ԝи чахи тӧ гәрәке пешда бьфькьри чь де-баве хԝәрʹа бежи. Бона хԝә бьԝәкʹьлинә йан жи бьньвисә ԝан тьшта, чь кӧ тӧ дьхԝази. Ӧса тӧйе бькарьби тедәрхи, кӧ хԝәстьна тә бь сәрԝахти йә йан на. Паше тʹәви де-баве хԝә сафи кә кӧ кʹидәре у чь чах һун һәврʹа хәбәр дьн, ԝәки гьшкарʹа дәст бьдә. Ԝәʹде хәбәрдане ԝан тьшта бира хԝәда хԝәйи кә:
Бь ԛәдьр бә. Кʹьтеба Пироз дьбежә: «Готьна һʹьшк һерсе рʹадькә» (Мәтʹәлок 15:1). Ләма жи бир нәкә: Һәрге тӧ тʹәви де-баве хԝә бькʹәви һʹӧщәте йан жи шәрʹа бавежи ԝан, кӧ әԝана һьндава тәда гәләк сәрт ьн, хәбәрдана ԝә ԝе баш дәрбаз нәбә.
«Чахе әз һьндава де-баве хԝә ԛәдьр дьдьмә кʹьфше, әԝана жи һьндава мьнда бь ԛәдьр ьн. Дәрәщед ӧсада һеса йә ортʹа зерʹин бьвиньн» (Бийанка, 19 сали).
Гӧһдар бә. Кʹьтеба Пироз ширәте дьдә: «Хәбәрдан у һерскʹәтьнеда гьран бә» (Аԛуб 1:19). Бир нәкә, ԝәки нә тʹәне тӧ гәрәке хәбәр ди, ле һун тʹәвайи шеԝьр дькьн.
«Чахе мәзьн дьби, тәва ӧса те кʹьфше, кӧ тӧ де-бава рʹьндтьр зани ча бьжийи. Бь рʹасти әв йәк ӧса нинә! Ԝе баш бә гӧһ бьди ширәтед де-баве хԝә» (Девен, 20 сали).
Хԝә дайнә дәԝса де-баве хԝә. Бьхәбьтә, кӧ де-баве хԝә фәʹм бьки. Гӧһ бьдә ширәта Кʹьтеба Пироз кӧ дьбежә, ԝәки «тʹәне ль кʹара хԝә нәгәрʹьн, ле бьра һәр кәс ль кʹара һәвале хԝә жи бьгәрʹә» (Филипи 2:4).
Кʹижан жь ԝан метода ԝе дьһа керһати бә?
«Бәре мьн де-баве хԝә һʹәсаб дькьр ча нәйаред хԝә. Ле ньһа әз фәʹм дькьм, ԝәки әԝана һин дьбун бьбьнә де-баве баш, ӧса чаԝа кӧ әз һин дьбум бьбьмә мәрьвәки щабдар. Әԝана бь рʹасти мьн һʹьз дькьн у бона мьн хәм дькьн» (Щошуа, 21 сали).
Бежә, кӧ тәйе чаԝа проблем сафи кьра. Бьдә бәр чʹәʹве хԝә, ԝәки тӧ бь әʹрәбе гәрәке һәрʹи щәм һәвалед хԝә у рʹийа тә ԝе сьһʹәтәк бькʹьшинә. Ле де-баве тә изьне надьнә тә һәрʹи. Пебьһʹәсә мәʹни чь йә: дьбә кӧ әԝана бәрхԝә дькʹәвьн кӧ тӧ гәрәке әʹрәбе бажойи, йан жи мәʹни һәвалед тә нә?
Дьбә кӧ әԝана жь бо рʹе бәрхԝә дькʹәвьн. Һәрге ажоване щерʹьбанди ԝе тә пе әʹрәбе бьвә, дьԛәԝьмә де-баве тә ԛайил бьн, ԝәки тӧ һәрʹи?
Ле һәрге әԝана жь бо һәвалед тә нахԝазьн, ԝәки тӧ һәрʹи ԝедәре, ԝе баш бә ԝанарʹа бежи, кӧ ԝә диса кʹе тʹәглиф кьрийә у кʹе ԝе бона тʹәрбәтийе хәм бькә. Дьбә кӧ әв йәк али ԝан бькә, ньһерʹандьна хԝә бьгӧһезьн?
Бь ԛәдьр тʹәви де-баве хԝә хәбәр дә, бәрзәԛ нибә у гӧһ бьдә ԝан. Бь хәбәрдан у рʹабун-рʹуньштьна хԝә ԝанарʹа бьдә кʹьфше, ԝәки тӧ «ԛәдьре де у баве хԝә» дьгьри (Әфәси 6:2, 3). Әв йәк дькарә ньһерʹандьна ԝан бьгӧһезә, ле дьбәк жи на. Чь жи һәбә, тӧ гәрәке диса тьштәки бьки.
Бь ԛәдьр сафикьрьна де-баве хԝә ԛәбул кә. Әв йәк фәрз ә, чьмки ӧса де-бав дькарьн һелан бьн һе зедә азайе бьдьнә тә. Һәрге әԝана тьштәки изьне надьнә тә, сәр йа хԝә нәсәкьнә, чьмки ӧса те нәгьһижи хԝәстьна хԝә. Әв йәк дькарә һʹале тә дьһа хьраб кә у щарәкә дьн, тәрʹа дьһа чәтьн бә ԝанарʹа хәбәр ди. Ле һәрге тӧ һьндава сафикьрьнед ԝан бь ԛәдьр би у һазьр би гӧһ бьди ԝан, ԝәʹдә шунда әԝана ԝе һе зедә азайе бьдьнә тә.