Чьлә

Иса Мәсиһ дӧрʹутийа сәрԝеред религи бь мерхаси әшкәрә дькьр у ԝана сущдар дькьр. Мәсәлә, әԝи дӧрʹутийа Ферьсийа әшкәрә дькьр, йед кӧ ԛәдре де у баве хԝә нәдьгьртьн, ле дькʹәтьн пәй тьштед бьчʹук, мәсәлә әʹдәтед дәстшуштьне (Мәтта 15:1-11). Бәле, Иса Мәсиһ изьн нәдьда кӧ ньһерʹандьна нәрʹаст йа сәрԝеред религи рʹийа ԝи бьгьрә у бьбә сәбәб кӧ әԝ рʹастийе нәбежә. Ӧса жи, Иса Мәсиһ һинкьрьнед ԛәлп әшкәрә дькьрьн. Әԝи нәгот кӧ Хԝәде һʹәму баԝәрийа ԛәбул дькә, ле әԝи гот: «Гәләки тәнг ә әԝ дәри у зәʹмәт ә әԝ рʹийа кӧ дьбә бәрбь жийине у һьндьк ьн әԝед кӧ ԝе рʹейе дьбиньн» (Мәтта 7:13, 14). Ӧса жи, әԝи әшкәрә кьр кӧ һьнә кәсед кӧ ча хьзмәткʹаред Хԝәде хԝә дьдьнә кʹьфше бь рʹасти хԝәстьна Хԝәде найньн сери. Иса ӧса гот: «Һʹәвза хԝә жь пʹехәмбәред дәрәԝ бькьн. Әԝе бь пʹосте пез бенә щәм ԝә, ле һьндӧрʹва гӧред пʹәрʹани нә. Һуне ԝана жь бәред ԝан нас бькьн» (Мәтта 7:15-20). w21.05 9 ¶7-8

Һаннайе мерәки бь наве Әлкана станд, йе кӧ гәләк ле һʹьз дькьр. Ле һәԝийа Һаннайе бь наве Пенина һәбу. Ль гора Кʹьтеба Пироз, «зарʹокед Пәниннайе һәбун, ле зарʹокед Һаннайе тʹӧнәбун». Ләма жи Пенинайе дьле Һаннайе тʹьме дешанд у жь бо ве йәке «Һанна дьгьрийа у нан нәдьхԝар». Диса жи, Кʹьтеба Пироз набежә кӧ Һаннайе дьхԝәст һʹәйфе һьлдә. Һаннайе дьле хԝә Йаһоԝарʹа вәкьр у баԝәр бу кӧ Хԝәде ԝе али ԝе бькә. Кʹьтеба Пироз әшкәрә накә кӧ паше ве йәке Пенина һатә гӧһастьне йан на. Ле әм заньн ԝәки әʹдьлайи у рʹьһʹәти кʹәтә дьле Һаннайе (1 Самуйел 1:2, 6, 7, 10). Әм дькарьн жь сәрһатийа Һаннайе чь дәрсе һин бьн? Һәгәр кәсәк тәрʹа бькʹәвә һʹӧщәте, нәлазьм ә кӧ тӧ бькʹәви бәр байе ԝи. Дәԝса кӧ жь бәр хьрабийева хьрабийе бькьн, һәр тьшти  бькә кӧ һун ль һәв бен (Рʹомайи 12:17-21). Һәгәр әԝ ньһерʹандьна хԝә нәгӧһезә жи, шабуна хԝә ӧнда нәкә, чьмки тә жь алийе хԝәда һәр тьшт кьр. w21.07 17 ¶13-14

Гава Иса Щьһудайе Исхәрйоти ча шандийе хԝә бьжарт, әԝ мәрьвәки баш бу (Луԛа 6:13, 16). Әшкәрә йә кӧ әԝ мәрьвәки аԛьл у зен бу, чьмки Иса Мәсиһ ԛӧтʹийа пʹәра тʹәсмили ԝи кьр. Ле сәд һʹәйф кӧ ԝәʹдә шунда, Щьһуда ширәтед Иса йед дәрһәԛа тьмайе пьшт гӧһе хԝәва авит у дәстпекьр дьзийе бькә (Марԛос 7:22, 23; Луԛа 11:39). Чәндәк пешийа мьрьна Иса Мәсиһ, тьмайа Щьһуда ида әшкәрә бу. Иса, Мәртʹа, хушка ԝе Мәрйәм у чәнд шагьртед дьн меванти чубунә мала мәрьвәки бь наве Шьмһʹун. Ԝәʹде хԝарьне, Мәрйәме рʹунәки бинхԝәш у бьһа ль сәре Иса рʹьжанд. Һьнге шагьртед ԝи һерс кʹәтьн, чьмки әԝана дьфькьрин кӧ әв рʹун дькарьбун бона нетәкә дьһа баш бьһата хәбьтандьн. Ле нета Щьһуда тьштәки дьн бу. «Чьмки әԝ дьз бу», әԝи дьхԝәст әв пʹәрә бьдьзийа (Йуһʹәнна 12:2-6; Мәтта 26:6-16; Луԛа 22:3-6). w21.06 18 ¶12-13

Гәло щабдарийед тә гәләк ьн? Гәло әв щарна бона тә дьбьн баргьрани? Щабдарийед Паԝлосе шанди жи гәләк бун. Әԝи нә тʹәне бона щьватәке, ле бона һʹәму щьвата хәм дькьр у бәрхԝә дькʹәт (2 Корьнтʹи 11:23-28). Гәло нәхԝәшикә тә шабуне жь тә дьстинә? Те кʹьфше кӧ нәхԝәшикә Паԝлос жи һәбу, чьмки әԝи гот кӧ дь бәдәна ԝида «стьрийәк» һәйә, у әԝи гәләк дьхԝәст жь ве бьфьльтә (2 Корьнтʹи 12:7-10). Гәло тӧ щарна сәва кемасийед хԝә әʹщьз дьби? Паԝлос жи сәва кемасийед хԝә әʹщьз дьбу, ләма әԝи ӧса гот: «Әз чь мәрьвәки һесир-бәләнгаз ьм!» (Рʹомайи 7:21-24). Нава ван проблем у тәнгасийада, Паԝлос бәрдәԝам дькьр Йаһоԝарʹа хьзмәт кә. Гәло чь али ԝи дькьр? Паԝлос һьлбәт һаш жь кемасийед хԝә һәбу, ле ԝи баԝәрийа хԝә ԛӧрбана Иса дьани. w21.04 22 ¶7-8

Гава мәрьве пешьн Адәм гӧнә  кьр, әԝи һьм хԝә һьм жи зарʹед хԝә тʹәсмили мьрьне кьрьн. Әԝи бь һʹәмде хԝә гӧнә кьр, ле әв йәк нә суще зарʹед ԝи бу. Диса жи, ԝана гӧнә у мьрьн жь Адәм стандьн (Рʹомайи 5:12, 14). Гәло чь дькарьбу әԝана жь мьрьне хьлаз бькьрана? Дәмәкә кьн паши гӧне Адәм, Йаһоԝа гав бь гав әшкәрә дькьр кӧ әԝе бь милйона зарʹед Адәм чаԝа жь гӧнә у мьрьне бьфьльтинә (Дәстпебун 3:15). Әм чьԛас гӧнәкʹар бьн жи, ԛӧрбана Иса рʹе вәкьрийә кӧ әм бьбьн достед Йаһоԝа. Бь сайа ве ԛӧрбане, кьред Мире-щьна ԝе бь тʹәмами бен хьрабкьрьн (1 Йуһʹәнна 3:8). Бь сайа кʹьрʹине, Йаһоԝа ԝе нета хԝә йа бона дьнйайе бинә сери. Рʹожәке, тʹәмамийа дьнйайе ԝе бьбә щьнәт. w21.04 14 ¶1; 19 ¶17

Рʹожа Пенщийе Һʹәсабе йа сала 33 Д.М., тьштәки әʹщеб ԛәԝьми. Гәләк мәрьвед жь щурʹә-щурʹә ԝәлат у мьләта бона щәжьнәке һатьбун Оршәлиме. Ньшкева, һьнә Щьһуйа дәстпекьр бь зьманед ԝан хәбәр дьн. Тьштед кӧ ԝана дьгот гәләк һʹәԝас бун. Ԝана дьготьнә мәрьва кӧ һәгәр әԝана баԝәрийа хԝә Иса Мәсиһ биньн, әԝе бькарьбьн хьлаз бьн. Ве хәбәре дьле ԝан гьрт, у ԝана пьрси: «Әм чь бькьн?» Пәтрусе шанди ӧса щаб да: «Бьра жь ԝә һәр йәк . . . бе ньхӧмандьне» (Кʹаред Шандийа 2:37, 38). Ԝе рʹоже, ԝәкә 3 000 кәс һатьн ньхӧмандьне у бь ве йәке бунә шагьртед Иса Мәсиһ. Шьхӧле бәлакьрьна мьзгине, кӧ Иса дабу шагьртед хԝә, ԝе рʹоже дәстпебу. Әв шьхӧл һʹәта ньһа жи бәрдәԝам дьбә. w21.06 2 ¶1-2

Дьԛәԝьмә дәшта мәда чәтьн ә һинбунед Кʹьтеба Пироз дәстпекьн. Дьбәкә әм рʹасти гәләк кәсед ӧса тен, йед кӧ нахԝазьн гӧһ бьдьн мьзгине. Гәло чь дькарә али мә бькә кӧ әм диса жи ньһерʹандьна позитив хԝәй кьн? Бир нәкә, ԝәки дәрәщед дьнйайе зу тенә гӧһастьне, жь бо ве йәке фькьр у ньһерʹандьнед мәрьва жи дькарьн бенә гӧһастьне. Кәсед кӧ бәре нәдьхԝәстьн гӧһ бьдьнә мьзгине, дьԛәԝьмә тедәрхьн, ԝәки һʹәԝщәйи Хԝәде нә (Мәтта 5:3). Һьнә кәсед кӧ бәре әʹдәбйәтед мә тʹьме инкʹар дькьрьн, ԝәʹдә шунда дәстпедькьрьн Кʹьтеба Пироз һин бьн. Ӧса жи, әм заньн ԝәки Йаһоԝа йә Хԝәйе зәвийе (Мәтта 9:38). Әԝ дьхԝазә ԝәки әм бәрдәԝам кьн тʹохьм бьрʹәшиньн у ав дьн, ле диса жи йе кӧ тʹохьма мәзьн дькә, Әԝ ә. Хенщи ве йәке, әм заньн кӧ һәгәр мәрьв һинбуна Кʹьтеба Пироз ԛәбул нәкьн жи, Йаһоԝа ԝе хирәта мә хәлат бькә. Бәле, хирәта мә дьһа фәрз ә нә кӧ чьԛас һинбун әм дәрбаз дькьн! w21.07 6 ¶14

Йаһоԝа мәрьв пе мәщала зарʹанине әʹфьрандьнә у щабдари дайә ԝан, ԝәки зарʹед хԝә һин бькьн Хԝәде һʹьз кьн у ԝирʹа хьзмәт кьн. Һәла бьфькьрә, Йаһоԝа гәләк рʹумәт дайә мәләка, ле диса жи әԝи мәщаләкә ӧса нәдайә ԝан. Ләма жи ԛимәта ве пʹешкʹеше бир нәкә у бьшекьринә. Хԝәде дьхԝазә ԝәки де-бав мәзьнкьрьна зарʹа ча щабдарикә пироз һʹәсаб кьн у зарʹед хԝә «бь ширәт у һинкьрьна Хӧдан мәзьн кьн» (Әфәси 6:4; Ԛануна Дӧщари 6:5-7). Сәва кӧ али де-бава бькьн, тʹәшкиләта Йаһоԝа гәләк һащәтед ль сәр һʹиме Кʹьтеба Пироз дәрхьстьнә, мәсәлә әʹдәбйәт, видео, мьԛам у готаред сәр малпәре. Бәле, һьм Баве мәйи әʹзмана һьм жи Кӧрʹе ԝи зарʹ у щаһьлед мә гәләк һʹьз дькьн (Луԛа 18:15-17). Гава де-бав баԝәрийа хԝә Йаһоԝа тиньн у чь жь дәсте ԝан те дькьн, ԝәки зарʹед хԝә бь щурʹе лапи баш мәзьн бькьн, Йаһоԝа гәләк ша дьбә. Де-бавед ӧса зарʹед хԝәрʹа рʹе вәдькьн, ԝәки әԝана жи һʹәта-һʹәтайе бьбьн пʹара малбәта Йаһоԝа! w21.08 5 ¶9

Һьнә кәс дьфькьрьн кӧ баԝәри әв ә,  гава мәрьв тьштәки бе избат у чʹәʹвгьрти баԝәр дькә. Ле ль гора Кʹьтеба Пироз, баԝәрийа рʹаст ӧса нинә. Кʹьтеба Пироз нишан дькә, ԝәки баԝәри һьндава тьштед кӧ найен дитьн,  мәсәлә баԝәри һьндава Йаһоԝа, Иса Мәсиһ у Пʹадшатийа әʹзмана – сәр һʹиме избаткьрьна йә (Ибрани 11:3). Бийокʹимйазанәки кӧ Шәʹде Йаһоԝа йә ӧса дьбежә: «Баԝәрийа мә кор нинә, у рʹастийед зандарийе инкʹар накә». Әм дьбәкә бәрхԝә дькʹәвьн: «Һәгәр һаԛас избат һәнә кӧ Хԝәде һәйә, чьрʹа гәләк мәрьв баԝәр накьн кӧ Хԝәде жийин әʹфьрандийә?» Сәбәб щарна әв ә ԝәки һьнә мәрьва избаткьрьн ԛәт леколин нәкьрьнә. Роберт, йе кӧ ньһа Шәʹде Йаһоԝа йә, дьбежә: «Мәкʹтәбеда мәрʹа тʹӧ щара нәдьготьн ԝәки жийин һатийә әʹфьрандьн, ләма жи әз дьфькьрим кӧ жийин бь рʹасти нәһатийә әʹфьрандьн. Ле гава әз 22 сали бум, мьн дит ԝәки Кʹьтеба Пироз чаԝа бь логики нишан дькә кӧ һәр тьшт һатийә әʹфьрандьн». w21.08 15 ¶4-5

Мина ве йәке, гава әм Кʹьтеба Пироз дьхуньн, йан гава кәсед дьн бәʹса кʹәрәмед хԝә дькьн, әм дәрһәԛа ԛәнщийа Йаһоԝа һьнә тьшта педьһʹәсьн. Ле һәгәр әм ԛәнщийа Йаһоԝа хԝәха «тәʹм кьн», әме бьвиньн кӧ Йаһоԝа чьԛас ԛәнщ ә. Бьдә бәр чʹәʹве хԝә: Тӧ дьхԝази хьзмәта һәртʹьм дәстпеки, ле сәва кӧ тӧ бькарьби бьгьһижи ве нете, гәрәке тӧ жийина хԝә дьһа сьвьк ки. Әм заньн дәрһәԛа ве созе Иса, кӧ һәгәр әм бәре пешьн Пʹадшатийа Хԝәде бьгәрʹьн, Йаһоԝа ԝе бона һʹәму һʹәԝщед мә хәм бькә. Дьԛәԝьмә һʹәта ньһа тә жийина хԝәда нәдитийә кӧ Йаһоԝа ве созе хԝә чаԝа тинә сери (Мәтта 6:33). Ле чьмки тӧ баԝәрийа хԝә созе Иса тини, тӧ хәрщед хԝә у хәбата хԝә дьһа кем дьки у бь тʹәмами дина хԝә дьди хьзмәта хԝә. Һьнге тӧ дьвини кӧ Йаһоԝа бона һʹәԝщед тә чаԝа хәм дькә у тӧ хԝәха ‹тәʹм дьки› ԝәки Йаһоԝа чьԛас ԛәнщ ә. w21.08 26 ¶2

Гәло әв проблем иро жи һәйә? Бәле. Гәләк сәрԝеред религи фьрнаԛ дьбьн, гава кәсед дәԝләмәнд, навдар у йед кӧ жь алийе дьнйайева ча кәсед билан тен дитьн, дьбьнә әндәмед щьватед ԝан. Бона ԝан, ԛәт фьрԛи тʹӧнә кӧ жийина ван әндәмед тʹәзә ль гора принсипед Хԝәде йә йан на. Хенщи ве йәке, сәрԝеред религи хьзмәткʹаред Йаһоԝа йед хирәт, кӧ хԝә ль принсипед намусийе дьгьрьн, бәр тьштәки һʹәсаб накьн, чьмки әԝана бәр чʹәʹве дьнйайе кәсед навдар ниньн. Ле ча Паԝлосе шанди готьбу, Хԝәде кәсед кӧ жь алийе дьнйайева «йед нә тʹӧ тьшт» ьн, хԝәрʹа дьжберә (1 Корьнтʹи 1:26-29). Бәле, Йаһоԝа һʹәму хьзмәткʹаред хԝә йед амьн ԛимәт дькә. Гәрәке әм чь бькьн ԝәки ньһерʹандьна дьнйайе йа нә рʹаст сәр мә һʹӧкӧм нәкә? (Мәтта 11:25, 26). Бьра ньһерʹандьна дьнйайе йа ль сәр хьзмәткʹаред Хԝәде сәр тә һʹӧкӧм нәкә. Бир нәкә кӧ Йаһоԝа тʹәне мәрьвед мьлук ча хьзмәткʹаред хԝә ԛәбул дькә (Зәбур 138:6). Сәрда жи, бьфькьрә кӧ Йаһоԝа бь дәсте кәсед кӧ дьнйа нәзан у нәхԝәнди дьвинә, шьхӧлед чьԛас мәзьн дькә! w21.05 8 ¶1; 9 ¶5-6

Паԝлосе шанди бона аликʹарийа кӧ әԝи жь кәсед дьн дьстанд, шекьрдар бу, әԝ нәдьфькьри ԝәки әԝ һʹәԝще аликʹарийа хушк-бьра нинә (Филипи 2:19-22). Гәло тӧ ча дькари нишан ки, ԝәки тӧ бона хушк-бьред щаһьл шекьрдар и? Мәсәлә, һәгәр әԝана тә тʹәглиф кьн бь әʹрәбе тә бьвьн щики йан бона тә һәрʹьн дькʹане, аликʹарийа ԝан бь рʹазибуне ԛәбул кә. Бь рʹасти аликʹарийа ԝан нишан дькә, ԝәки Йаһоԝа тә һʹьз дькә у бона тә хәм дькә. Сәрда жи, кәсед кӧ али тә дькьн ԝе дьбәкә ԝәʹдә шунда бьбьнә достед тәйә незик. Ӧса жи, тӧ дькари али ԝан бьки, ԝәки әԝана дьһа незики Йаһоԝа бьн. Ԝанрʹа бежә ԝәки дьле тә чьԛас ша дькә әв йәк кӧ әԝана хьзмәта хԝә зедә дькьн. Тʹәви ԝан ԝәʹдә дәрбаз кә у бәʹса сәрһатийед хԝә бькә. Бь ви щурʹәйи тӧ дькари нишан ки, ԝәки тӧ бона хушк-бьред щаһьл шекьрдар и, йед кӧ Йаһоԝа кʹьшандьнә щьвате (Колоси 3:15; Йуһʹәнна 6:44; 1 Тʹесалоники 5:18). w21.09 11-12 ¶12-13

Йаһоԝа хушк-бьред мә һʹьз дькә. Ле мәрʹа щара дькарә чәтьн бә ԝәки һʹьзкьрьна хԝә һәвдӧрʹа әʹйан кьн. Чьрʹа? Чьмки әм жь щурʹә-щурʹә култура нә, мина һәв нәһатьнә мәзьнкьрьне у хәйсәтед мә жи жь һәв щӧдә дьбьн. Хенщи ве йәке, щар-щара әм шашийед ӧса дькьн кӧ дьле хушк-бьра дьешиньн йан жи ԝана әʹщьз дькьн. Ле диса жи әм дькарьн һʹьзкьрьна нав малбәта хԝәйә рʹӧһʹанида дьһа ԛәԝи кьн. Гәло чаԝа? Гәрәке әм һʹьзкьрьнеда чʹәʹв бьдьнә Баве хԝәйи әʹзмана (Әфәси 5:1, 2; 1 Йуһʹәнна 4:19). Мәрьве рʹәʹм у дьлшәԝат мәщала дьгәрʹә ԝәки али кәсед дьн бькә у дьле ԝан рʹьһʹәт кә. Иса бь хәбәрдан у кьред хԝә нишан дькьр, кӧ Йаһоԝа ча бона мәрьва хәм дькә (Йуһʹәнна 5:19). Щарәке, гава Иса әʹлаләт дит, «гӧне ԝи ль ԝан һат, чьмки әԝана мина пәзе бе шьван, бәрʹәдайи у бәлабуйи бун» (Мәтта 9:36). Ләма, әԝ һазьр бу али ԝан бькә. Мәсәлә, әԝи кәсед нәхԝәш ԛәнщ дькьрьн у рʹьһʹәти дьда йед «ԝәстийайи у баргьран» (Мәтта 11:28-30; 14:14). w21.09 22 ¶10-11

Рʹәʹма Йаһоԝа һʹьзкьрьна ԝива гьредайи йә. Паԝлосе шанди жь бина бәр Хԝәде ньвиси кӧ Хԝәде «хԝәйе рʹәʹма дәԝләмәнд ә». Ве контекстеда, Паԝлос зәлал дькьр кӧ Хԝәде жь рʹәʹма хԝә һевийа жийина сәр әʹзмана дьдә һьнә хьзмәткʹаред хԝәйә гӧнәкʹар (Әфәси 2:4-7). Ле Йаһоԝа рʹәʹма хԝә кәсед дьнрʹа жи әʹйан дькә. Даԝьд Пʹадша ӧса ньвиси: «Хӧдан бона һʹәмуйа ԛәнщ ә, рʹәʹма Ԝи сәр һʹәму әʹфьринед Ԝи йә» (Зәбур 145:9). Йаһоԝа мә һʹьз дькә, у һәма ча мәщал дькʹәвә дәсте ԝи, әԝ рʹәʹма хԝә мәрʹа әʹйан дькә. Иса Мәсиһ жь һәр кәси баштьр занә кӧ Йаһоԝа чьԛас дьлрʹәʹм ә. Пешийа кӧ Иса һатә дьнйайе, әԝи тʹәви  Баве хԝә гәләк ԝәхт дәрбаз кьрьбу (Мәтʹәлок 8:30, 31). Иса гәләк щар дитьбу ԝәки Баве ԝи һьндава мәрьвед гӧнәкʹар ча рʹәʹма хԝә дьда кʹьфше (Зәбур 78:37-42). Гава Иса һин дькьр, әԝи гәләк щар дина мәрьва дькʹьшанд сәр ви һʹӧнӧре хԝәш йе Баве хԝә. w21.10 8-9 ¶4-5

Йаһоԝа жь әʹзмана щаб да  у гот ԝәки әԝе наве хԝә бьльнд у рʹумәт кә. Иса һәр тʹьм наве Баве хԝә хьзмәтийеда рʹумәт дькьр (Йуһʹәнна 17:26). Ләма жи, Мәсиһийед рʹаст наве Хԝәде бь сәрбьльнди дьдьнә хәбате у мәрьварʹа әʹлам дькьн. Ԛьрʹна йәке Д.М.-да, ԝәхтәкә кьн паши кӧ щьвата шагьртед Иса Мәсиһ һатьбу сазкьрьн, Йаһоԝа «рʹәʹма хԝә ль нәщьһуйа кьрьбу, кӧ жь нава ԝан щьмәʹтәке дәрхә, ԝәки наве ԝи һьлдьнә сәр хԝә» (Кʹаред Шандийа 15:14). Мәсиһийед ԛьрʹна йәке наве Хԝәде бь сәрбьльнди дьданә хәбате у мәрьварʹа әʹлам дькьрьн. Ԝана наве Хԝәде хьзмәтеда у ньвисаред хԝәда дьданә хәбате. Ԝана избат дькьр, ԝәки әԝана әв щьмәʹт ьн, кӧ наве Хԝәде һьлдабунә сәр хԝә у мәрьварʹа әʹлам дькьрьн (Кʹаред Шандийа 2:14, 21). Иро жи Шәʹдед Йаһоԝа щьмәʹта бона рʹумәткьрьна наве Йаһоԝа йә. w21.10 20-21 ¶8-10

Һʹьзкьрьна Хԝәдейә амьн һʹәта-һʹәтайе йә. Зәбура 136, 26 щара бәʹса ви һʹӧнӧри дькә. Мәсәлә, рʹеза пешьн ӧса дьбежә: «Шькьрийе бьдьнә Хӧдан, чьмки Әԝ ԛәнщ ә у һʹӧба Ԝи һʹәта-һʹәтайе йә» (Зәбур 136:1). Әв гьли һʹӧба ԝи, демәк һʹьзкьрьна ԝийә амьн «һʹәта-һʹәтайе йә», жь рʹеза 2 һʹәта 26 те ԝәкʹьландьне. Гава әм ве зәбуре дьхуньн, әм дьвиньн  ԝәки Йаһоԝа һʹьзкьрьна хԝәйә амьн тʹьме у щурʹә-щурʹә алийава нишан дькә. Ԝәкʹьландьна ван гьлийа, ԝәки һʹьзкьрьна ԝийә амьн «һʹәта-һʹәтайе йә», мә дьдә баԝәркьрьне кӧ Йаһоԝа ԝе һәр у һәр хьзмәткʹаред хԝә һʹьз бькә, у әԝе тʹӧ щара тʹәрка ԝан нәдә. Әԝ тʹьме кʹеләка хьзмәткʹаред хԝә йә, илаһи гава әԝана дькʹәвьнә тәнгасийе. Занәбуна ве йәке кӧ Йаһоԝа тʹьме кʹеләка мә йә, шабун у ԛәԝата мә  зедә дькә, ԝәки әм һьмбәри тәнгасийа сәбьр кьн у сәр рʹийа жийине бьминьн (Зәбур 31:7). w21.11 4 ¶9-10

Гава тӧ ԛьркьрьна религийа ԛәлп, һʹьщума Гоге жь Магоге у шәрʹе Һармәгәдоне тини бәр чʹәʹве хԝә, гәло тьрс дькʹәвә дьле тә? Тә әв пьрс ԛә дайә хԝә: «Гава тәнгасийа мәзьн дәстпебә, гәло әзе бькарьбьм амьн бьминьм?» Һәгәр тӧ щарна ӧса дьфькьри, готьнед Иса жь рʹеза ве рʹоже, ԝе али тә бькьн. Иса шагьртед хԝәрʹа ӧса готьбу: «Бьра дьле ԝә нәԛьлԛьлә. Хԝәде баԝәр бькьн». Баԝәрикә ԛәԝи ԝе али мә бькә кӧ әм ахьрийе нәтьрсьн. Әв йәк кӧ әм нава щерʹьбандьнед иройин чаԝа хԝә дьдьнә кʹьфше, әʹйан дькә һәла гәрәке әм кʹижан алийава баԝәрийа хԝә дьһа ԛәԝи кьн. Һәр щар гава әм нава щерʹьбандьнада амьн дьминьн, баԝәрийа мә һе ԛәԝи дьбә. Әв йәк дькарә али мә бькә ԝәʹде щерʹьбандьнед ахьрийеда жи амьн бьминьн. w21.11 20 ¶1-2

Паԝлосе шанди һәвале хԝә Тимотʹейо у һʹәму шагьртед Иса Мәсиһ һелан кьрьбун кӧ әԝана хьзмәта хԝә биньн сери (2 Тимотʹейо 4:5). Ле әв йәк щарна һеса нинә. Мәсәлә, һьнә ԝәлатада, шьхӧле бәлакьрьна мьзгине ԛәдәхәкьрийә. Гәләк тьшт дькарьн мерхасийа хьзмәткʹаред Йаһоԝа бьшкеньн. Мәсәлә, бона гәләка һеса нинә кӧ әʹбура мала хԝә бькьн. Әԝана гәләк дьхԝазьн хьзмәта хԝә зедә бькьн, ле ль хьлазийа һʹәфтийе ида ԛәԝата ԝан наминә. Һьнә хушк у бьред мә жи бь нәхԝәшийед кʹроник дьчәрчьрьн йан ида кал у пир бунә, у ләма, һьнә жь ԝан ида нькарьн жь мале дәркʹәвьн. Һьнә кәс жи хԝә беԛимәт һʹәсаб дькьн. Һʹале мә чь бә жи, Йаһоԝа дькарә ԛәԝате бьдә мә кӧ әм бькарьбьн  ль һьмбәри тәнгасийед хԝә сәбьр бькьн у чьԛас жь дәсте мә те ԝирʹа хьзмәт бькьн. w21.05 20 ¶1-3

Щарна кәсед дьн, зоре мә бькьн ԝәки әм тьштед ӧса бькьн, чь дьле Йаһоԝа найе. Гава тьштәки ӧса дьԛәԝьмә, гәрәке әм сафикьрьна рʹаст бькьн. Һәла дина хԝә бьдә ве принсипа кӧ Ԛануна Кʹаһинтийе 19:19-да те готьне: «Кʹьнща бь дӧ щурʹә тʹела чекьри хԝә нәкә». Бь сайа ве ԛануне, Исраели жь мәрьвед мьләтед дьн щӧдә дьбун. Иро, һьлбәт проблем нинә ԝәки кʹьнщед жь щурʹә-щурʹә кӧдӧра ль хԝә бькьн, мәсәлә кʹьнщед жь пәмбу у полйәстәре. Ле әм нахԝазьн бьбьнә мина мәрьвед кӧ баԝәри у кьред ԝан мьԛабьли Кʹьтеба Пироз ьн. Әм һьлбәт мәрьвед хԝә һʹьз дькьн, у әм щинаред хԝә жи һʹьз дькьн. Ле чь жи һәбә, нета мә әв ә кӧ әм гӧһ бьдьн Йаһоԝа, у һазьр ьн кӧ жь кәсед дьн щӧдә бьн. Ләма жи сәва кӧ әм пироз бьн, гәләк фәрз ә ԝәки әм жь мәрьвед дьн щӧдә бьн (2 Корьнтʹи 6:14-16; 1 Пәтрус 4:3, 4). w21.12 5 ¶14; 6 ¶16

Мәрьв дькарә ве рʹийа жийине бьвинә! Иса гот: «Һәгәр һун сәр һинкьрьна мьн бьминьн, һуне рʹаст шагьртед мьн бьн. Һуне рʹастийе нас кьн у рʹастийе ԝә аза кә» (Йуһʹәнна 8:31, 32). Чьԛас баш ә кӧ тӧ нәкʹәти бәр байе гәләка, ле тӧ рʹастийе гәрʹийайи. Тә Хәбәра Хԝәде һур у кʹур леколин кьрийә, ԝәки хԝәстьна Хԝәде пебьһʹәси, у тә гӧһдарийа Иса Мәсиһ кьрийә. Тӧ һин буйи кӧ Йаһоԝа дьхԝазә ԝәки әм хԝә жь дине ԛәлп у жь әʹрф-әʹдәтед пʹутпʹарьстийе дур бьгьрьн. Ӧса жи, тә фәʹм кьрийә ԝәки һеса нинә мәрьв хԝәстьна Йаһоԝа бинә сери у хԝә жь әʹдәтед кӧ әԝ ԛәбул накә, дур бьгьрә (Мәтта 10:34-36). Дьԛәԝьмә тәрʹа һеса нибу кӧ тӧ жийина хԝә бьгӧһези. Ле чьмки тӧ Йаһоԝа һʹьз дьки, тә хирәта хԝә бәрʹнәдайә. Хирәта тә бешьк Йаһоԝа гәләк хԝәш те! (Мәтʹәлок 27:11) w21.12 22 ¶3; 23 ¶5

Муса, паши шашикә мәзьн, һазьр бу ширәте ԛәбул кә. Щарәке, әԝ һерс кʹәт у рʹумәт нәда Йаһоԝа. Ләма жи, Йаһоԝа ԝирʹа гот, ԝәки әԝе нәкʹәвә Әʹрде Создайи (Жьмар 20:1-13). Чәнд сал шунда, Муса диса жи изьн хԝәст ԝәки бькʹәвә Әʹрде Создайи, ле Йаһоԝа гот: «Бәс ә! Вьр шунда бона ԝе йәке иди мьнрʹа нәбежә!» (Ԛануна Дӧщари 3:23-27). Гәло Муса әв ширәт ԛәбул кьр? Бәле. Әԝ нәхәйди, ле әԝи сафикьрьна Йаһоԝа ԛәбул кьр, у Йаһоԝа изьн да ԝи, ԝәки әԝ ча рʹебәре мьләте Исраеле бьминә (Ԛануна Дӧщари 4:1). Муса ширәт ԛәбул кьрьн у ԝе баш бә, кӧ әм ве йәкеда чʹәʹв бьдьнә ԝи. Паши ве йәке кӧ Йаһоԝа ԝирʹа гот, ԝәки әԝе нәкʹәвә Әʹрде Создайи, әԝи диса жи бь амьни Йаһоԝарʹа хьзмәт дькьр. Әм кʹарәкә мәзьн дьстиньн чахе чʹәʹв дьдьнә мәсәла Мусайе амьн (Мәтʹәлок 4:11-13). Гәләк хушк-бьред мә ида чʹәʹв данә ԝи у ширәт ԛәбул кьрьнә. w22.02 11 ¶9-10

Зьвьстане, сала 32 Д.М., достәки Иса бь наве Лазар нәхԝәш кʹәт у мьр (Йуһʹәнна 11:3, 14). Дӧ хушкед ԝи һәбун, Мәрйәм у Мәртʹа. Иса ве малбәте гәләк һʹьз дькьр. Гава Мәртʹайе бьһист кӧ Иса те, әԝ ләзә-ләз чу, ԝәки ԝи бьвинә. Гава әԝ рʹасти Иса һат, әԝе бь хәмгини ӧса гот: «Хӧдан, һәгәр тӧ вьр буйайи, бьре мьн нәдьмьр» (Йуһʹәнна 11:21, 32, 33). Дьле Иса шәԝьти гава әԝи дит, кӧ Мәрйәм у Мәртʹа шина бьре хԝә дькьн. Һәгәр тә жи һәвал йан мәрьвәки хԝә ӧнда кьрийә, Йаһоԝа һәстед тә фәʹм дькә. Иса һәр алийава чʹәʹв дьдә Баве хԝә у «хут мина һәйинтийа ԝи йә» (Ибрани 1:3). Гава Иса дьгьрийа, әԝи һәстед Баве хԝә әʹйан дькьр (Йуһʹәнна 14:9). Һәгәр тә мәрьвәки хԝәйи һʹьзкьри ӧнда кьрийә, баԝәр бә кӧ Йаһоԝа еша дьле тә дьвинә, у дьле ԝи сәр тә дьшәԝьтә. Әԝ дьхԝазә еша дьле тә сьвьк кә (Зәбур 34:18; 147:3). w22.01 15 ¶5-7

Һәгәр тӧ ԝәʹдә вәԛәтини ԝәки тʹәви Йаһоԝа хәбәр ди, гӧһ бьди ԝи у дәрһәԛа ԝи бьфькьри, әв йәк ԝе сәр тә гәләк баш һʹӧкӧм кә. Йа йәке, тӧйе сафикьрьнед дьһа баш бьки. Ль гора Кʹьтеба Пироз, «һәвале сәрԝахта сәрԝахт дәрте» (Мәтʹәлок 13:20). Йа дӧда, тӧйе бьби дәрсдарәки дьһа баш. Гава әм тʹәви кәсәки һинбуна Кʹьтеба Пироз дәрбаз дькьн, нетәкә мәйә сәрәкә әԝ ә, ԝәки али хԝәндәкʹаре хԝә бькьн кӧ әԝ незики Йаһоԝа бә. Чьԛас әм Баве хԝәйи әʹзманарʹа дӧа кьн у Хәбәра ԝи леколин бькьн, һаԛас зәʹф әме ԝи һʹьз бькьн. Ӧса жи, әме хԝәндәкʹаред хԝә һе рʹьнд һин бькьн, ԝәки әԝана жи Йаһоԝа һʹьз бькьн. Иса жи ӧса дькьр. Әԝи бь готьнед гәрм у ширьн дәрһәԛа Баве хԝә хәбәр дьда, у ве йәке али шандийед ԝи дькьр, кӧ әԝана жи Йаһоԝа һʹьз бькьн (Йуһʹәнна 17:25, 26). Йа сьсийа, баԝәрийа мә ԝе дьһа ԛәԝи бә. Гава әм жь Хԝәде рʹебәри, дьлбини у аликʹарийе дьхԝазьн у әԝ щаба ван дӧайед мә дьдә, баԝәрийа мә һе ԛәԝи дьбә (1 Йуһʹәнна 5:15). w22.01 30 ¶15-17

Йаһоԝа мә гәләк һʹьз дькә у дьхԝазә ԝәки әм жь жийине ләзәте бьстиньн, ләма әԝ мәрʹа дьбежә кӧ әм тʹәрка фькьр у хәйсәтед хьраб бьдьн (Ишайа 48:17, 18). Әԝ занә ԝәки мәрьвед кӧ дькʹәвьн бәр байе хԝәстьнед хьраб зьраре дьдьн хԝә у кәсед дьн, у әв йәк дьле Ԝи дешинә. Чахе әм сәр хԝә дьхәбьтьн ԝәки хәйсәте хԝә бьгӧһезьн, дьбәкә һьнә мәрьв у һәвалед мә ԛәрфед хԝә мә бькьн (1 Пәтрус 4:3, 4). Дьбәкә әԝана бежьн кӧ әм дькарьн ль гора дьле хԝә бькьн у гәрәке әм изне нәдьн, ԝәки кәсед дьн сәр сафикьрьнед мә һʹӧкӧм кьн. Ле кәсед кӧ ԛанунед Йаһоԝа инкʹар дькьн бь рʹасти аза ниньн. Әԝана һаш жь сәре хԝә жи тʹӧнә нә, ԝәки изне дьдьнә дьнйа Мире-щьна сәр ԝан һʹӧкӧм кә (Рʹомайи 12:1, 2). Ләма жи гәрәке әм сафи кьн: Гәло әме «мәрьве кәвьн», йе кӧ бьн һʹӧкӧме гӧнә у дьнйа Мире-щьнада йә, хԝәй кьн, йан әме изне бьдьн кӧ Йаһоԝа мә бьгӧһәрʹинә у али мә бькә бьбьнә мәрьвнә дьһа баш? (Ишайа 64:8) w22.03 3 ¶6-7

Гава әм ль сәр Хәбәра Хԝәде кʹур дьфькьрьн, әв йәк дькарә али мә бькә кӧ әм ньһерʹандьна хԝә рʹаст кьн. Мәсәлә, хушкәкә кӧ мере хԝә ӧнда кьрьбу жь Кʹьтеба Пироз дьлбиникә мәзьн станд. Рʹуспики ԝерʹа готьбу кӧ ԝе баш бә ԝәки әԝ кʹьтеба Ибо бьхунә, ләма әԝе дәстпекьр ве кʹьтебе бьхунә. Серида, әԝе Ибо сәва фькред ԝи йед шаш сущдар дькьр. Әԝе ча бежи дьхԝәст Иборʹа ӧса бьгота: «Ибо, ща һаԛас нәкʹәвә һʹәйра проблемед хԝә!» Ле паше, әԝе тедәрхьст кӧ фькред ԝе мина фькред Ибо бун. Ве йәке али ԝе кьр кӧ әԝ ньһерʹандьна хԝә рʹаст бькә у ԛәԝат да ԝе кӧ әԝ сәбьр бькә. Йаһоԝа бь сайа хушк у бьра жи ԛәԝате дьдә мә. Паԝлосе шанди гәләк ԛимәт дькьр бәрдьлийа кӧ жь хушк у бьра дьстанд (Рʹомайи 1:11, 12). w21.05 22 ¶10-11; 24 ¶12

Ԝәʹде бәре Исраелийарʹа һатьбу готьне: «Сале се щара бьра һʹәму ԛьсьме тәйи нерин ль бәр Хӧдан Хԝәдейе тә ль ԝи щийе кӧ Хӧдане бьбьжерә, бьсәкьньн» (Ԛануна Дӧщари 16:16). Гава әԝана дьчунә щийе щьвине, гәло лазьм бу кӧ әԝана бона мал у мьлкʹ у зәвийед хԝә, бьтьрсийана? На! Йаһоԝа соз дабу ԝан: «Ԝәʹде кӧ тӧ сале се щара ль бәр Хӧдан Хԝәдейе хԝә бьсәкьни, тʹӧ кәсе чʹәʹв нәвежә ԝәлате тә» (Дәркʹәтьн 34:24). Кәсе кӧ Йаһоԝа һʹьз дькьр баԝәрийа хԝә ԝи дьани, у бәрдәԝам дькьр дьчу щәжьнед һәрсали. Әв йәк кʹарәкә гәләк мәзьн дьда ԝан. Бь сайа ван щәжьна, ԝана дькарьбу Ԛануна Хԝәде дьһа баш фәʹм кьрана, дәрһәԛа ԛәнщийа ԝи кʹур бьфькьрийана у жь һәвалтийа тʹәви хьзмәткʹаред Йаһоԝа шабун бьстандана. Чахе мәрʹа чәтьн ә, ле әм диса жи чь дәсте мә те дькьн, ԝәки щьвата бәрʹнәдьн, әм жи кʹарәкә мәзьн дьстиньн. Дә бьдьнә һʹәсабе хԝә, гава әм хԝә һазьр дькьн ԝәки щабед кьн у хԝәш бьдьн, Йаһоԝа чьԛас ша дьбә! w22.03 22 ¶9

Йаһоԝа Кӧрʹе хԝә Иса Мәсиһ һазьр дькьр кӧ әԝ бьбә Сәрәккʹаһине мә. Иса хԝәха дит кӧ чьԛас зор ә кӧ мәрьв ԝәʹде щерʹьбандьна гьран гӧрʹа Хԝәде бькә. Гава әԝ һат щерʹьбандьн, әԝи бь «кʹәсәр у бь һесьра» жь Хԝәде лава у рʹәща дькьр кӧ али ԝи бькә. Иса «щәфа кʹьшанд, һатә щерʹьбандьне», ләма жи «дькарә аликʹарийа ԝан бькә, йед кӧ дькʹәвьнә нава щерʹьбандьне». Әм Йаһоԝарʹа чьԛас шькьрдар ьн кӧ әԝи Сәрәккʹаһинәки дьлрʹәʹм кʹьфш кьрийә, йе кӧ кемасийед мә рʹьнд фәʹм дькә! (Ибрани 2:17; 4:14-16; 5:7-10). Йаһоԝа изьн да ԝәки Иса һаԛас еше бькʹьшинә, сәва кӧ щаба ве пьрсәкә фәрз бе дайин: Гәло инсан дькарә ль һьмбәри тәнгасийед гьран амьн бьминә? Шәйтʹан дьбежә кӧ әв йәк набә. Әԝ дьбежә кӧ мәрьв тʹәне бона кʹара хԝә Хԝәдерʹа хьзмәт дькьн, у тʹӧ кәс бь рʹасти Йаһоԝа һʹьз накә (Ибо 1:9-11; 2:4, 5). Иса Хԝәдерʹа амьн ма у избат кьр кӧ Мире-щьна дәрәԝин ә. w21.04 16-17 ¶7-8

Пешийа кӧ хԝәндәкʹарәки Кʹьтеба Пироз бе ньхӧмандьне, гәрәке әԝ тьштед кӧ әԝ жь Кʹьтеба Пироз һин дьбә, пек бинә. Гава хԝәндәкʹарәк ве йәке дькә, әԝ дьбә мина «мәрьвәки сәрԝахт» жь мәсәла Иса, йе кӧ мала хԝә сәр кевьр чекьр (Мәтта 7:24, 25; Луԛа 6:47, 48). Али хԝәндәкʹаре хԝә бькә кӧ әԝ әʹмьре хԝәда гӧһастьна бькә (Марԛос 10:17-22). Иса заньбу кӧ бона мәрьвәки дәԝләмәнд чьԛас зор ә кӧ һʹәму мал у мьлкʹе хԝә бьфьрошә (Марԛос 10:23). Диса жи, Иса ви мерирʹа гот кӧ бьра әԝ жийина хԝә бьгӧһезә. Гәло чьма? Чьмки Иса ԝи һʹьз дькьр. Щарна, әм бәлки хԝә паш дьгьрьн у һьнә ширәта надьн хԝәндәкʹаре хԝә, чьмки әм дьфькьрьн кӧ әԝ һе һазьр нинә әʹмьре хԝәда гӧһастьна бькә (Колоси 3:9, 10). Ле тӧ ве пьрсе чьԛас зу вәки, һаԛас зу хԝәндәкʹаре тә ԝе гӧһастьнед лазьм бькә. Әв йәк кӧ тӧ бәʹса ван тьшта дьки нишан дькә ԝәки тӧ бона хԝәндәкʹаре хԝә хәм дьки (Зәбур 141:5; Мәтʹәлок 27:17). w21.06 3 ¶3, 5

Пәтрусе шанди һәри зедә дина мә дькʹьшинә сәр сәбра Иса Мәсиһ. Ле һьлбәт лазьм ә кӧ әм Иса  дь алийед дьнва жи хԝәрʹа бькьн мәсәлә (1 Пәтрус 2:18-25). Бь рʹасти, тʹәмамийа әʹмьре Иса, һʹәму готьн у кьрьнед ԝи мәрʹа мәсәлә нә. Әм мәрьвнә гӧнәкʹар ьн, гәло әм дькарьн чʹәʹв бьдьн мәсәла Исайе беԛьсур? Бәле! Әм һьлбәт нькарьн бь щурʹәки беԛьсур чʹәʹв бьдьнә Иса, ле йәкә әм дькарьн пʹегәһа ԝида һәрʹьн. Бона ве йәке, лазьм ә кӧ әм чь жь дәсте мә те бькьн ԝәки чʹәʹв бьдьнә ԝи. Йуһʹәннайе шанди ӧса готьбу: «Әԝе кӧ дьбежә: ‹Әз нава ԝида мә›, гәрәке ӧса бьжи, чаԝа Иса жит» (1 Йуһʹәнна 2:6). Һәгәр әм пʹегәһа Исада һәрʹьн, әме дьһа незики Йаһоԝа бьн. Ле чаԝа? Бь жийина хԝә, Иса мәрʹа мәсәлә һишт кӧ әм чаԝа дькарьн дьле Хԝәде ша бькьн (Йуһʹәнна 8:29). Ләма, һәгәр әм пʹегәһа Исада һәрʹьн, Йаһоԝа  ԝе жь мә рʹази бә. Әм дькарьн  баԝәр бьн кӧ һәгәр әм хирәт бькьн кӧ  бьбьн достед Хԝәде, әԝе дьһа незики мә бә (Аԛуб 4:8). w21.04 3 ¶4-6

Йаһоԝа һʹӧнӧред мә йед баш дьвинә, әԝ ӧса жи фәрәсәт у синоред мә занә, у әԝ мә дькʹьшинә бәрбь хԝә. Һәгәр әм ԝирʹа амьн бьминьн, әԝе һʹәта-һʹәтайе кʹеләка мә бә (Йуһʹәнна 6:44). Һәгәр әм баԝәр бьн кӧ Йаһоԝа мә һʹьз дькә у пьштгьрийа мә дькә, әв йәк ԝе али мә бькә кӧ әм ԝәʹде тәнгасийа бь дьл у щан ԝирʹа хьзмәт бькьн. Жь алийе дьнва жи, һәгәр әм дӧдьли бьн кӧ Хԝәде бона мә хәм дькә, ԛәԝата мә ԝе сьст бә (Мәтʹәлок 24:10). Сәрда, һәгәр әм мерхасийа хԝә ӧнда бькьн у баԝәр нәкьн кӧ Йаһоԝа мә һʹьз дькә, Шәйтʹан ԝе һеса бькарьбә һʹьщуми сәр мә бькә (Әфәси 6:16). Һьнә хушк-бьред мә сәва шькед хԝә алийе рʹӧһʹанида сьст бунә. Ләма, һәгәр дәрһәԛа һʹьзкьрьна Хԝәде шьк бькʹәвьн дьле мә, гәрәке әм ван шька зу жь дьле хԝә дәрхьн. Гәрәке әм аликʹарийе жь Йаһоԝа бьхԝазьн, кӧ «әʹдьлайийа Хԝәде» бьдә мә, кӧ һʹьш у дьле мә хԝәй кә (Зәбур 139:23; Филипи 4:6, 7). Ӧса жи, бир нәкә кӧ тӧ тʹәне нини. w21.04 20 ¶1; 21 ¶4-6

Тӧ чаԝа буйи Шәʹде Йаһоԝа? Йа пешьн, тә мьзгин жь кәсәки бьһист, дьбәкә жь де-баве хԝә, жь һәвалхәбатчи йан һәвалдәрсәки хԝә, йан жи кәсәк дәри мала тә хьст (Марԛос 13:10). Паше, кәсәк тʹәви тә гәләк ԝәхт дәрбаз дькьр у бь хирәт Кʹьтеба Пироз тә һин дькьр. Бь сайа һинбуна Кʹьтеба Пироз, тә Йаһоԝа нас кьр у һʹьз кьр, у тә фәʹм кьр кӧ әԝ жи тә һʹьз дькә. Йаһоԝа тӧ кʹьшанди бал хԝә у тӧ буйи шагьрте Иса Мәсиһ. Ньһа, тӧ һивийа жийина һʹәта-һʹәтайе йи (Йуһʹәнна 6:44). Тӧ бешьк жь Йаһоԝа шькьрдар и, чьмки Әԝи кәсәк шанд бал тә кӧ рʹастийе тә һин кә у паше ча хьзмәткʹарәки хԝә тӧ ԛәбул кьри. Әм ша нә кӧ рʹастийе заньн, у әм һазьр ьн кӧ али кәсед дьн бькьн, ԝәки әԝана жи бен сәр рʹийа жийине. Һьнә хушк у бьрарʹа дьбәкә һеса йә кӧ мьзгине мал бь мал бәла кьн, ле ԝанрʹа чәтьн ә һинбунед Кʹьтеба Пироз дәстпекьн у дәрбаз кьн. w21.07 2 ¶1-2