Кʹӧлфәтед кӧ Шәʹдед Йаһоԝа нә, Мьзгинийе Бәла Дькьн?

Бәле, сәр тʹәмамийа дьнйайе нав Шәʹдед Йаһоԝада бь милйона кʹӧлфәтед хьзмәткʹар һәнә. Әԝана мьзгинванед Пʹадшатийа Хԝәде нә. Зәбур 68:11-да дәрһәԛа ве йәке һатийә пʹехәмбәртикьрьне: «Хӧдан дькә фәрмани, кʹӧлфәт дьбьнә мьзгиндаред пʹьрʹани».

Ле хьзмәта кʹӧлфәтед Шәʹдед Йаһоԝа щӧдә дьбә жь хьзмәта кʹӧлфәтед религийед дьн. Фьрԛикә мәзьн ортʹа ԝанда һәйә. Гәло фьрԛийа ԝан чьда нә?

Фьрԛик әԝ ә кӧ әԝана кʹе һин дькьн. Рола кʹӧлфәтед хьзмәткʹар жь религийед дьн, илаһи йед дера Мәсиһийа, әԝ ә кӧ әԝана нава щьватеда һин дькьн, у гӧһдарванед ԝан әндәмед дера ԝан ьн. Ле рола кʹӧлфәтед хьзмәткʹар, йед кӧ Шәʹдед Йаһоԝа нә, әԝ ә кӧ жь щьвате дәр һин кьн, демәк мәрьвед кӧ ԝәʹде хьзмәтийа ԝанә мал бь мал йан жи щийед дьн рʹасти ԝан тен.

Фьрԛийа дӧда әԝ ә, ԝәки кʹӧлфәтед хьзмәткʹар, йед кӧ Шәʹдед Йаһоԝа нә, чь шьхӧли дькьн. Религийед дьнда кʹӧлфәтед хьзмәткʹар әндәмед дера хԝә һин дькьн у рʹебәрийа ԝан дькьн. Ле щьвата Шәʹдед Йаһоԝада кʹӧлфәт һин накьн чахе меред ньхӧманди һәнә. Тʹәне меред кʹьфшкьри дькарьн щьватеда һин кьн (1 Тимотʹейо 3:2; Аԛуб 3:1).

Ль гора Кʹьтеба Пироз щабдари тʹәне мерарʹа һатийә дайине, ԝәки рʹебәрийа щьвате бькьн. Дина хԝә бьдьне, Паԝлос Титорʹа, йе кӧ бәрпьрсийар бу, чь ньвисийә: «Бона ԝе йәке мьн тӧ ль Кьретайе һьшти, ԝәки . . . һәр бажарәкида бәрпьрсийара кʹьфш ки». Паше Паԝлос ӧса жи гот, ԝәки һәр мерәки щабдар гәрәке «беләкʹә бә, мере жьнәке бә» (Тито 1:5, 6). Паԝлос фькьра ԝи щурʹәйи Тимотʹейорʹа жи ньвиси нәʹма хԝәда: «Һәгәр тәме йәки ль сәрԝертийе һәйә, әԝ шьхӧләки ԛәнщ дьхԝазә. Аԝа сәрԝер гәрәке беԛӧсур бә, мере жьнәке бә . . . һинкьрьнеда сәрхԝә бә» (1 Тимотʹейо 3:1, 2).

Гәло чьрʹа щабдарийед щьватеда тʹәне мер гәрәке биньн сери? Паԝлос дьбежә: «Әз изьне надьмә кʹӧлфәт, кӧ һин бькә, нә жи һʹӧкӧми сәр мер бькә, ле бьра дәнг нәкә. Чьмки пешийе Адәм хӧльԛи, паше Һеԝа» (1 Тимотʹейо 2:12, 13). Әԝ йәк кӧ Хԝәде мер пешийе әʹфьрандийә, дьдә кʹьфше ԝәки ль гора ԛьрара Хԝәде кʹе гәрәке һин кә у рʹебәрийе бькә.

Һʹәму хьзмәткʹаред Йаһоԝа чʹәʹв дьдьнә Рʹебәре хԝә Иса Мәсиһ. Луԛа, шагьрте Иса дәрһәԛа ԝи ньвиси: «Гӧнд у бажара дьгәрʹийа, даннасин дькьр, Мьзгинийа Пʹадшатийа Хԝәде дьда». Паше, Иса тʹәми да шагьртед хԝә ԝәки әԝана жи ӧса хьзмәт бькьн. «Шагьрт рʹабун, гӧнд-гӧнд гәрʹийан у һәр дәра Мьзгини дан» (Луԛа 8:1; 9:2-6).

Иро хьзмәткʹаред Йаһоԝа, ча мер ӧса жи жьн, бь хирәт әԝи шьхӧли дькьн, дәрһәԛа кʹижани Иса пʹехәмбәрти кьр: «Әв Мьзгинийа Пʹадшатийе ԝе ль нав тʹәмамийа дьнйайе бе даннасинкьрьне, кӧ һʹәму мьләтарʹа бьбә шәʹдәти у һьнге хьлази ԝе бе» (Мәтта 24:14).