Жь Хәбәра Хԝәде Һин Бьн
Чь йә Рʹожа Ахрәте?
Ве готареда те шеԝьркьрьне пьрсед ӧса, йед кӧ дьбәкә бал тә жи пешда һатьнә, у те кʹьфшкьрьне ԝәки щаба ԝан пьрса Кʹьтеба Пирозда кʹидәре дькари бьвини. Һәрге тӧ дьхԝази, Шәʹдед Йаһоԝа дькарьн тʹәви тә щаба ԝан пьрса шеԝьр кьн.
1. Нета Рʹожа Ахрәте чь йә?
Чаԝа жь шькле мьле рʹасте те кʹьфше, гәләк мәрьв дьфькьрьн, ԝәки Рʹожа Ахрәте, рʹӧһʹед бь милйона мәрьва ԝе бәр тʹәхте Хԝәде бьсәкьньн, у бона кьред хԝәйә бәре бенә диԝанкьрьне. Һьнәк жь ԝан ԝе бенә хәлаткьрьне, демәк әʹмьре әʹзмани бьстиньн, ле йед дьн ԝе щәʹньмеда бьчәрчьрьн. Ле Кʹьтеба Пироз дьбежә, ԝәки нета Рʹожа Ахрәте әԝ ә, кӧ мәрийа жь нәһәԛийе аза кә (Зәбур 96:13). Иса алийе Хԝәдеда һатийә кʹьфшкьрьне ча Һʹакьм, ԝәки бона мәрийа һәԛийе вәгәрʹинә (Бьхунә Ишайа 11:1-5; Кʹаред Шандийа 17:31).
2. Рʹожа Ахрәте ԝе ча һәԛи бе вәгәрʹандьне?
Чахе мәрьвед пешьн Адәм, бь һʹәмде хԝә мьԛабьли Хԝәде гӧнә кьр, әԝи тʹәмамийа зӧрʹәтед хԝә кьрә диле гӧнә, щәфа у мьрьне (Рʹомайи 5:12). Иса ԝе бь милйарда мәрьва жь мьрьне рʹакә, сәва кӧ һәԛийе вәгәрʹинә. Хәбәра Хԝәдеда, кʹьтеба Әʹйанти дьдә кʹьфше, ԝәки әв йәк ԝе ԝәʹде һʹәзарсалийа сәрԝертийа Иса Мәсиһ, бьԛәԝьмә (Бьхунә Әʹйанти 20:4, 11, 12).
Мәрьвед кӧ жь мьрьне рʹабьн, ԝе бенә диԝанкьрьне нә кӧ ль сәр һʹиме кьред хԝәйә бәре, ле сәр һʹиме кьред хԝәйә паше, чахе «кʹьтебада ньвисар» вәбьн. Дәрһәԛа ԝан кʹьтеба Әʹйанти сәре 20-да те готьне (Рʹомайи 6:7). Паԝлосе шанди жи гот, ԝәки «һʹәму һәԛ у нәһәԛе жь мьрьне рʹабьн». Әԝана ԝе мәщале бьстиньн ԝәки дәрһәԛа Хԝәде һин бьн (Бьхунә Кʹаред Шандийа 24:15).
3. Чь ԝе бьԛәԝьмә Рʹожа Ахрәте?
Әԝед кӧ мьрьн ә, ле тʹӧ щар Йаһоԝа нас нәкьрьнә у ԝирʹа хьзмәт нәкьрьнә, ԝе мәщале бьстиньн, кӧ бенә гӧһастьне у тьштед баш бькьн. Һәрге әԝана хԝә ль Хԝәде бьгьрьн, рʹабуна ԝан ԝе бьбә «бона жийине». Ле һьнәк жь ԝан йед кӧ бенә сахкьрьне, ԝе нәхԝазьн дәрһәԛа Йаһоԝа һин бьн. Рʹабуна ԝан мәрийа ԝе «бона диԝане» бә (Бьхунә Йуһʹәнна 5:28, 29; Ишайа 26:10; 65:20).
Йаһоԝа, ԝе хьлазийа Рʹожа Диԝана хԝә, йа кӧ ԝе һʹәзар сали бькʹьшинә, бона инсанәта гӧһдар кʹамьлийе вәгәрʹинә у ӧса ԛьрара хԝәйә пешьн бинә сери (1 Корьнтʹи 15:24-28). Бьдьнә бәр чʹәʹве хԝә, ԝәки һьнге жийина мәрьвед гӧһдар ԝе чьԛас һʹәԝас бә! Ԝәʹде щерʹьбандьна хьлазийе, Хԝәде ԝе Мире-щьна бәрʹдә, кʹижан кӧ гәлийе һәй-ԝайеда ԝе һʹәзар сали гьрти бә. Һьнге Мире-щьна ԝе диса бьхԝазә мәрийа жь Йаһоԝа дур хә. Әԝед кӧ гӧрʹа ԝи нәкьн, ԝе һʹәта-һʹәтайе сәр әʹрде бьжин (Бьхунә Ишайа 25:8; Әʹйанти 20:7-9).
4. Кʹьтеба Пироз диса дәрһәԛа кʹижан рʹожа ахьрәте хәбәр дьдә?
Кʹьтеба Пироз хәбәра «Рʹожа Ахрәте», демәк рʹожа диԝане ӧса жи дьдә хәбате сәва кӧ ԝе ԛәԝьмандьне бьдә кʹьфше, кʹижан кӧ ԝе кʹӧтасийа дьнйа зӧлм бинә. Әԝ рʹож жи ԝе ньшкева бьԛәԝьмә, чаԝа Селава ԝәʹде Нӧһ, кʹижане кӧ һʹәму мәрьвед нәгӧһдар кʹӧта кьр. Бь кʹӧтакьрьна «мәрьвед нәпʹак», рʹийа мәрьвед гӧһдар ԝе рʹаст бә у сәр дьнйайе «рʹастийе бьминә» (Бьхунә 2 Пәтрус 3:6, 7, 13).