Рʹуспи Хәм Дькьн Бона Шабуна Мә

1. Мьзгинийа дәрһәԛа чь, шабуне кьрә дьле Паԝлос?

САЛА 55 Д.М., Паԝлосе шанди шәһәре Тройайеда бу, ле диса жи дьфькьри дәрһәԛа Корьнтʹе. Ве сале әԝ гәләки дьлтәнг бу, гава пеһʹәсийа дәрһәԛа шәрʹ-дәʹԝед хушк-бьред Корьнтʹеда. Паԝлосе шанди чаԝа бав бона ԝан бәр хԝә дькʹәт, ләма жи нәʹма ԝанрʹа ньвиси, сәва кӧ ԝана ширәт кә (1 Корн. 1:11; 4:15). Әԝи ӧса жи һәвалкʹаре хԝә Тито шандә щәм ԝан. У паше ԝе йәке Паԝлос һивийа Тито бу, ԝәки бьбьһе һале хушк-бьред Корьнтʹе чаԝа йә. Ле йазьх Тито нәһат. Ԝи чахи Паԝлос чь кьр? Әԝ пе гәмийе гьһиштә Макәдонйайе у ԝедәре рʹасти Тито һат. Тито гьли кьр, кӧ хушк-бьред жь Корьнтʹе гӧһ данә ширәта Паԝлос у хԝәстьн ԝи бьвиньн. Чахе Паԝлос әԝе мьзгинийе бьһист, «шабун» кʹәтә дьле ԝи (2 Корн. 2:12, 13; 7:5-9).

2. (а) Паԝлос щьвата Корьнтʹерʹа, дәрһәԛа баԝәрийе у шабуне чь ньвиси? (б) Ве готареда, әме кʹижан пьрса шеԝьр кьн?

² Һьнә ԝәхт шунда Паԝлос нәʹма дӧда щьвата Корьнтʹерʹа ньвиси. Әԝи готә ԝан: «Әм һʹӧкӧми сәр баԝәрийа ԝә накьн, чьмки һун баԝәрийеда шьдийайи нә, ле әм тʹәви ԝә дьхәбьтьн бона шабуна ԝә» (2 Корн. 1:24). Бь ԝан гьлийа Паԝлос чь дьхԝәст бьгота? У чаԝа рʹуспийед рʹожа иройин гәрәке хәбәред Паԝлос һьлдьнә һʹәсаб?

БАԜӘРИ У ШАБУНА МӘ

3. (а) Бь ԝан гьлийа «һун баԝәрийеда шьдийайи нә» Паԝлос чь дьхԝәст бьгота? (б) Рʹожа иро рʹуспийед щьвате чьда чʹәʹв дьдьнә Паԝлос?

³ Паԝлос дьгот, кӧ баԝәри у шабун әԝ дӧ тьштед сәрәкә нә, һʹәбандьна мәда. Дәрһәԛа баԝәрийе әԝи ӧса ньвиси: «Әм һʹӧкӧми сәр баԝәрийа ԝә накьн, чьмки һун баԝәрийеда шьдийайи нә». Бь ԝан гьлийа Паԝлос дьхԝәст бьгота, кӧ хушк-бьред Корьнтʹе нә кӧ бь сайа баԝәрийа ԝи йан кәсед дьн амьн ман, ле бь сайа баԝәрийа һьндава Хԝәде. Ләма жи Паԝлос нәдьхԝәст баԝәрийа ԝан контрол кә. Әԝ дӧдьли нәдьбу, кӧ әԝана Мәсиһийед амьн бун у дьхԝәстьн рʹаст бьжин (2 Корн. 2:3). Иро рʹуспийед щьвате чʹәʹв дьдьнә Паԝлос ԝе йәкеда, кӧ баԝәрийа хушк-бьрада дӧдьли набьн у хирәта ԝан хьзмәтийеда накьнә бьн шьке (2 Тʹеслн. 3:4). Рʹуспи хԝәха рʹебәрийа кʹьфш накьн, әԝана принсипед жь Кʹьтеба Пироз һьлдьдьн һʹәсаб у пәй рʹебәрийа тʹәшкиләта Йаһоԝа дьчьн. Рʹуспи сәрԝертийе ль сәр баԝәрийа хушк-бьред хԝә накьн (1 Пәт. 5:2, 3).

4. (а) Бь ԝан гьлийа «Әм тʹәви ԝә дьхәбьтьн бона шабуна ԝә», Паԝлос чь дьхԝәст бьгота? (б) Чьда рʹуспийед щьвате иро чʹәʹв дьдьнә Паԝлос?

⁴ Паԝлос ӧса жи гот: «Әм тʹәви ԝә дьхәбьтьн бона шабуна ԝә». Бь ԝан гьлийа әԝи дәрһәԛа хԝә у ԝан кәса дьгот, йед кӧ тʹәви ԝи һәвкʹарийе дькьрьн. Чьрʹа әм дькарьн ӧса бежьн? Ԝе нәʹмеда Паԝлос ӧса жи дьгот дәрһәԛа дӧ һәвалкʹаред хԝә. Әԝи дьгот: «Иса пе мә ԝәрʹа һатә даннасинкьрьне, (бь мьн, Силас у Тимотʹейо)» (2 Корн. 1:19). Хенщи ԝе йәке, чахе Паԝлос нәʹмада хәбәра «тʹәви ԝә» дьньвиси, әԝи ӧса жи бәʹса ԝана дькьр, йед кӧ хьзмәтийеда али ԝи дькьрьн, мәсәлә, Аполо, Әкила, Прьскила, Тимотʹейо, Тито у йед дьн (Рʹом. 16:3, 21; 1 Корн. 3:6-9; 2 Корн. 8:23). Бь ԝан гьлийа, «Әм тʹәви ԝә дьхәбьтьн бона шабуна ԝә», Паԝлос тʹәви һәвалкʹаред хԝә щьвата Корьнтʹе дьда баԝәркьрьне, ԝәки әԝана дьхԝазьн һәр тьшти бькьн бона шабуна хушк-бьра. Иро рʹуспийед щьвате жи чʹәʹв дьдьнә Паԝлос. Чь жь дәсте ԝан те, әԝана һәр тьшти дькьн, сәва кӧ али хушк-бьра бькьн «бь шабуне Хӧдан бьһʹәбиньн» (Зәб. 100:2; Фили. 1:25).

5. Щаба сәр кʹижан пьрси әме шеԝьр кьн у дәрһәԛа чь әм гәрәке бьфькьрьн?

⁵ Һьнә ԝәхт пешда һьнә хушк-бьред хирәтрʹа, йед кӧ щурʹә-щурʹә ԝәлатада дьжин пьрсәкә ӧса дан: «Кʹижан хәбәр йан кьред рʹуспийа ԝә хԝәш тен?» Щаба ԝан хушк-бьра йа кӧ һуне пебьһʹәсьн, бәрамбәри щаба хԝә бькьн. Ԝәрен әм ӧса жи шеԝьр кьн, кӧ һәр кәс жь мә чь дькарә бькә, ԝәки щьватеда шабуне пешда биньн.a

«СЬЛАВЕ БЬДЬНӘ ПӘРСИСЕЙА ДӘЛАЛ»

6, 7. (а) Рʹуспи чьда дькарьн чʹәʹв бьдьнә Иса, Паԝлос у хьзмәткʹаред дьн? (б) Чьрʹа хушк-бьра ша дьбьн чахе наве ԝан бир накьн?

⁶ Гәләк хушк-бьред мә дьбежьн, кӧ ԝана хԝәш те чахе рʹуспи шәхси дина хԝә дьдьнә ԝан. Әԝ йәк дьдә кʹьфше, ԝәки рʹуспи чʹәʹв дьдьнә Даԝьд, Әлиһ у Иса (2 Самуйел 9:6; Ибо 33:1; Луԛа 19:5 бьхунә). Әԝ хьзмәткʹаред Йаһоԝайә амьн, шәхси бона мәрьва хәм дькьрьн у чахе тʹәви ԝан хәбәр дьдан наве ԝан һьлдьдан. Паԝлос жи бир нәдькьр дәрһәԛа ԝе йәке, кӧ гәрәке шәхси дина хԝә бьдә хушк-бьра у наве ԝан бир нәкә. Хьлазийа нәʹмәкә хԝә Паԝлос наве 25 хушк-бьра ньвиси, кʹерʹа пьрс-сьлава дьхԝәст бьшанда. Әԝи ӧса жи наве Пәрсисе ньвиси у гот: «Сьлаве бьдьнә Пәрсисейа дәлал» (Рʹом. 16:3-15).

⁷ Һьнә рʹуспийарʹа чәтьн ә наве хушк-бьра бира хԝәда хԝәй кьн. Ле чахе әԝана ԛәԝате дьдьнә хәбате, кӧ наве ԝан бира хԝәда хԝәй кьн бь ве йәке дьдьнә кʹьфше, кӧ хушк-бьра ԛимәт дькьн (Дәркʹ. 33:17). Ԝәʹде һинбуна «Бьрща Ԛәрәԝьлийе» йан жи щьватед дьн, хушк-бьра ве ша бьн һәрге рʹуспи наве ԝан һьлдьн, чахе әԝана бьхԝазьн щаба хԝә бьдьн (Бәрамбәр кьн Йуһʹн. 10:3).

ӘԜЕ «ГӘЛӘКИ ХУДАН РʹЕТИЙӘ БОНА ХӦДАН»

8. Паԝлос чьда чʹәʹв дьда Йаһоԝа у Иса?

⁸ Хенщи ԝе йәке Паԝлос, бона хушк-бьра хәм дькьр бь ве йәке, кӧ бь дьл у щан пʹайе ԝан дьда у әԝ йәк шабуне дькьрә дьле ԝан. Һәма ԝе нәʹмеда кʹижанеда әԝи дьгот, кӧ бь шабуне һәвкʹарийе дькә тʹәви хушк-бьра, Паԝлос ӧса жи ньвиси: «Гәләки пе ԝә фьрʹнаԛ дьбьм!» (2 Корн. 7:4). Әԝ хәбәред дьлгәрм шабуне кьрьнә дьле хушк-бьред Корьнтʹе. Паԝлос ӧса жи пʹайе хушк-бьред щьвата дьн дьда (Рʹом. 1:8; Фили. 1:3-5; 1 Тʹеслн. 1:8). Нәʹма хԝәда Паԝлос ӧса жи дьньвиси дәрһәԛа Пәрсисе, йа кӧ жь щьвата Рʹоме бу. Әԝи дьгот: «[Әԝе] гәләки худан рʹетийә бона Хӧдан» (Рʹом. 16:12). Һәмьки Пәрсисейе ԝе хԝәш бьһата хәбәред ӧса дьлгәрм бьбьһиста! Паԝлос чʹәʹв дьда Йаһоԝа у Иса бь ве йәке, кӧ пʹайе хушк-бьра дьда (Марԛос 1:9-11; Йуһʹәнна 1:47 бьхунә; Әʹйан. 2:2, 13, 19).

9. Чаԝа пʹайидайин һелане дьдә у шабуне дькә щьвате?

⁹ Рʹожа иройин рʹуспи жи фәʹм дькьн кӧ чьԛас фәрз ә бь гьлийа рʹазибуне хушк-бьрарʹа бьдьнә кʹьфше (Мәтʹлк. 3:27; 15:23). Мәсәлә чахе рʹуспи хәбәред ӧса дьбежьнә хушк-бьра: «Әз шьхӧлед тәйә баш дьбиньм у әз тәрʹа фьрнаԛ дьбьм», бь ве йәке әԝана дьдьнә кʹьфше кӧ кьред ԝан тʹәхмин дькьн. Һәр кәс щьватеда һʹәԝще хәбәред дьлгәрм ьн. Хушкәкә кӧ зедәтьри 50 сали йә, хәбәред ӧса гот: «Сәр хәбате нә һәртʹьм пʹайе мьн дьдьн. Ԝедәре мәрьв чʹәʹвнәбарийа һәв дькьн у һьндава һәв сар ьн. Ләма жи чахе рʹуспи пʹайе мьн дьдә сәва шьхӧлед кӧ әз щьватеда дькьм, әз дьлгәрм дьбьм! Ԝи чахи әз һʹьзкьрьна Әʹфьрандаре хԝә сәр хԝә тʹәхмин дькьм». Бьраки кӧ тʹәне дӧ зарʹед хԝә мәзьн дькә, һәма әԝ йәк сәр хԝә тʹәхмин кьрьбу. Рʹуспи гьлийед ширьн жерʹа гот. Гәло әԝ йәк ча сәр ԝи һʹӧкӧм кьр? Әԝи гьлийед ӧса гот: «Хәбәред рʹуспи гәләк мьн ԛәԝи у һелан кьрьн!» Чахе рʹуспи бь дьл у щан пʹайе хушк-бьра дьдьн, әԝана һелан дьбьн у бь шабуне тʹьжә дьбьн. У әԝ йәк һелане дьдә хушк-бьра, кӧ рʹийа жийинерʹа һәрʹьн у нәԝәстьн (Иша. 40:31).

«ШЬВАНТИЙЕ ЩЬВИНА ХԜӘДЕ БЬКЬН»

10, 11. (а) Чьда рʹуспи дькарьн чʹәʹв бьдьнә Нәһәмийайе? (б) Чь али рʹуспийа дькә кӧ «пʹешкʹешәкә рʹӧһʹани» ԝәʹде сәрледана шьвантийе дәрбази хушк-бьра бькьн?

¹⁰ Гәло рʹуспи чь гәрәке бькьн, һәрге әԝана дьхԝазьн шәхси дина хԝә бьдьнә хушк-бьра у шабуне бькьнә щьвате? Бона ԝе йәке лазьм ә гава пешьн бавежьн, сәва кӧ һелане бьдьнә ԝан кʹе һʹәԝще ԝе йәке йә (Кʹаред Шандийа 20:28 бьхунә). Гава рʹуспи ӧса дькьн бь ԝе йәке әԝана чʹәʹв дьдьнә шьванед ԝәʹде бәре. Ԝәрен әм бькьнә бира хԝә Нәһәмийа у бьньһерʹьн әԝи чь кьр чахе дит, кӧ һьнә жь хушк-бьред ԝийә Щьһу, рʹӧһʹанида сьст бьбун. Кʹьтеба Пирозда те готьне, кӧ әԝи перʹа-перʹа ԝана һелан кьр (Нәһәм. 4:14). Рʹожа иройин рʹуспи жи дьхԝазьн һәма ӧса бькьн. Әԝана әԝ щабдари һьлдьдьнә сәр хԝә кӧ али хушк-бьра бькьн, ԝәки әԝана рʹӧһʹанида ԛәԝи бьминьн. Һәрге дәрәщә дәст дьдә әԝана тʹәсәлийа хушк-бьра дькьн, сәва кӧ һелане бьдьнә ԝан. Ԝәʹде сәрледанед шьвантийе әԝана «пʹешкʹешәкә рʹӧһʹани» дьдьнә ԝан (Рʹом. 1:11). Чь али рʹуспийа дькә ԝәки әве йәке бькьн?

¹¹ Рʹуспи, пешийа кӧ һәрә щәм хушкәке йан бьраки сәва кӧ сәрледана шьвантийе бькә, гәрәке дәрһәԛа ԝи йан ԝе пешда бьфькьрә. Мәсәлә, чь чәтьнайи бал ԝи йан ԝе һәнә? Кʹижан фькьр ԝе хушк йан бьра ԛәԝи кьн? Кʹижан рʹез йан мәсәла жь Кʹьтеба Пироз ԝе бона дәрәща ԝи йан ԝе керһати бә? Һазьркьрьна ви щурʹәйи ԝе али рʹуспи бькә, ԝәки хәбәрдана ԝи керһати бә у кʹаре бинә. Ԝәʹде сәрледана шьвантийе рʹуспи бь тʹәмами гӧһ дьдә ԝи йан ԝе, сәва кӧ әԝ бькарьбә һеса дьле хԝә вәкә (Аԛуб 1:19). Хушкәк ӧса гот: «Гәләк мьн хԝәш те, чахе рʹуспи бь дьл у щан гӧһ дьдә мьн» (Луԛа 8:18).

12. Щьватеда кʹе һʹәԝще һеланкьрьне йә у чьма?

¹² Кʹе һʹәԝще сәрледана шьвантийе йә? Паԝлос рʹуспийа һелан кьр ԝәки әԝана «мьԛати . . . тʹәмамийа ԝи кәре пез бьн». Һәр кәс щьватеда һʹәԝще һелане йә, чаԝа мьзгинван ӧса жи пешәнг, йед кӧ бь амьни сал пәй саларʹа хьзмәт дькьн. Гәло чьрʹа әԝана һʹәԝще һелана рʹуспийа нә? Чьмки рʹожа иройин хьзмәткʹаред амьн жи рʹасти щурʹә-щурʹә чәтьнайа тен у һʹәԝще һеланкьрьне нә. Сәва кӧ әм фәʹм бькьн чьрʹа хушк-бьред рʹӧһʹанида ԛәԝи жи һʹәԝще һеланкьрьне нә, ԝәрен әм шеԝьр кьн дәрәщәк жь әʹмьре Даԝьд Пʹадша.

АБИШӘ «ДӘСТЕ ХԜӘ ДЬРЕЖ КЬР» КӦ АЛИ ԜИ БЬКӘ

13. (а) Даԝьд чь һʹалида бу чахе Ишби-Бәноб хԝәст ԝи бькӧжә? (б) Чаԝа Абишә Даԝьд хьлаз кьр?

¹³ Һьнә ԝәхт шунда, паши ве йәке ча Даԝьд кʹьфш кьрьн ча пʹадша, әԝ рʹасти Голйат һат, йе кӧ мәрьве тәрʹьки бу у жь рʹькʹьнийата Рьфайийа. Ле Даԝьде мерхас Голйат кӧшт (1 Сам. 17:4, 48-51; 1 Дир. 20:5, 8). Саләк паши ве дәрәще, ԝәʹде шәрʹе тʹәви Фьльстийа Даԝьд диса рʹасти мәрьвәки тәрʹьки һат. Наве ԝи Ишби-Бәноб бу, әԝ жи жь рʹькʹьнийата Рьфайийа бу (2 Сам. 21:16; спартьн). Ле ве щаре һьндьк мабу мәрьве тәрʹьки Даԝьд бькӧшта. Гәло чьма? Чьмки Даԝьд ԛәԝата хԝә ӧнда кьр, ле нә жь бо ве йәке кӧ тьрсийа. Кʹьтеба Пирозда ӧса те готьне: «Даԝьд ԝәстийайи кʹәт». У чаԝа Ишби-Бәноб тедәрхьст кӧ Даԝьд сьст бу, әԝ фькьри «әз ль Даԝьд бьхьм». Ле һʹәта кӧ әԝи рʹьма хԝә сәр Даԝьд һьлшанд, «Абишайе лаԝе Тсәруйа аликʹарийе бь Даԝьдрʹа кьр у ль йе Фьльсти хьст у ԝи кӧшт» (2 Сам. 21:15-17). Даԝьд хофийеда бу! Ле Даԝьд чьԛас ша бу кӧ Абишә незики ԝи бу у һатә һәԝара ԝи, гава ԝирʹа аликʹари лазьм бу! Жь ве сәрһатийе әм чь дькарьн һин бьн?

14. (а) Бь сайа чь әм дькарьн сәркʹәвьн бәр чәтьнайед кӧ мина Голйат тәрʹьки нә? (б) Чаԝа рʹуспи али хушк-бьра дькьн ԝәки әԝана диса ԛәԝат у шабуне бьстиньн? Мәсәле бинә.

¹⁴ Рʹаст ә дьнйа Мире-щьн у пәйчуйед ԝи рʹе мә дьгьрьн кӧ Йаһоԝарʹа хьзмәт кьн, ле диса жи шьхӧле бәлакьрьна мьзгинийе ль сәр тʹәмамийа дьнйайе найе сәкьнандьне. Гәләк жь мә рʹасти чәтьнайед тәрʹьки ԝәк Голйат тен. Щарна чәтьнайед һәр рʹожи, ԛәԝат жь мә дьстиньн у мә һʹал дехьн, ле диса жи бь сайа ԛәԝата Йаһоԝа әм сәрдькʹәвьн. Рʹаст ә, әм дькарьн бәр щурʹә-щурʹә чәтьнайа сәбьр кьн, ле чахе әм сьст ьн, әм һеса дькарьн бенә алткьрьне. Ԝи чахи, рʹуспи дькарьн али мә бькьн кӧ әм шабуне у ԛәԝате бьстиньн. Хушкәк кӧ зедәтьри 60 сали йә, ӧса дьбежә: «Һьнә ԝәхт пешда, мьн хԝә нәбаш тʹәхмин дькьр у әз зу жь хьзмәткьрьне дьԝәстийам. Рʹуспики әԝе йәке тʹәхмин кьр у незики мьн бу. Бь сайа сәрһатийа жь Кʹьтеба Пироз әԝи мьн һелан кьр. Мьн ширәтед ԝи да хәбате, у әԝ йәк али мьн кьр». Әԝ бәрдәԝам дькә: «Әз гәләк жь ԝи бьрайи рʹази мә кӧ әԝи дина хԝә да һʹале мьн у бәр дьле мьнда һат!» Бь рʹасти жи дьлбиникә чьԛас мәзьн ә, кӧ рʹуспи дина хԝә дьдьнә мә у мина Абишайе һазьр ьн бенә һәԝара мә.

«ҺʹЬЗКЬРЬНА МЬНӘ ҺЬНДАВА ХԜӘДА ФӘʹМ БЬКЬН»

15, 16. (а) Чьма хушк-бьра Паԝлос һʹьз дькьрьн? (б) Чьма әм рʹуспийед щьвата хԝә һʹьз дькьн?

¹⁵ Рʹуспи гәләк хәма дькʹьшиньн. Щарна әԝана шәва рʹаназен, бона хушк-бьра хәм дькьн, Йаһоԝарʹа дӧа дькьн у аликʹарийа рʹӧһʹани дьдьнә ԝан (2 Корн. 11:27, 28). Ле диса жи рʹуспи мина Паԝлос бь дьл у щан у һʹәта хьлазийе шьхӧлед хԝә тиньн сери. Паԝлос хушк-бьред Корьнтʹерʹа ньвиси: «Әзе бь дьләки ша хԝә жи у мал-һʹале хԝә жи бона ԝә бьдьм» (2 Корн. 12:15). Паԝлос хушк-бьра һʹьз дькьр, ләма жи һазьр бу бона ԝан һәр тьшт бькә (2 Корьнтʹи 2:4 бьхунә; Фили. 2:17; 1 Тʹеслн. 2:8). У хушк-бьра гәләк ԝи һʹьз дькьрьн! (Кʹар. Шанд. 20:31-38)

¹⁶ Әм жи рʹуспийед хԝә һʹьз дькьн у дӧайед хԝәда бона ԝан жь Йаһоԝа рʹазибуне дьхԝазьн. Чахе әԝана шәхси бона мә хәм дькьн, бь ԝе йәке әԝана шабуне дькьнә дьле мә. Әм һелане дьстиньн чахе әԝана сәрледана шьвантийе дькьн. Әм гәләк жь ԝан рʹази нә, кӧ әԝана һазьр ьн бенә һәԝара мә, чахе әм рʹасти чәтьнайед ве дьнйайе тен. Рʹуспийед мәйә ԛимәт бь рʹасти жи хәм дькьн бона шабуна мә.