Порнографийа Зийане Тинә йан на?

Иро дьнйа бь порнографийайе тʹьжә йә.a Әв һʹәму дәра бәлабуйи йә. Мәсәлә рекламада, модеда, синәмада, кʹьламада, рʹожнамада, бәрнамед телевизийонеда, видеолистькада, һащәтед әләктроникида у Интернетеда. Ле ԝан пашԝәхтийа порнографийайе пе шькьлед бь онлайн жи һәврʹа дьшиньн. Ӧса те кʹьфше, кӧ порнографийа буйә пʹара култура иройин. Пешийа ве йәке әв ӧса бәлабуйи нибу ча ньһа. Иро һе зәʹф мәрьв порнографийайе дьньһерʹьн (Бьньһерʹә чаргошә «Һʹәсабед Порнографийайе»).

Хенщи ԝе йәке ԝәʹдә чьԛас дьчә, щурʹе порнографийайе жи те гӧһастьне. Зандар Гейл Дайнс дьньвисә: «Иро шькьл дьһа нәщайиз тенә чекьрьне у әԝ бь бенамусийе тʹьжә нә. Чь кӧ бәре һʹәсаб дькьрьн ча порнографийа бесинор, иро буйә тьштәки нормал».

Һун сәр ԝан һʹәму тьшта ча дьньһерʹьн? Порнографийа ԝәʹдәдәрбазкьрьнәкә бехоф ә йан жәʹра зийандар ә? Иса Мәсиһ гот: «Дара ԛәнщ бәре ԛәнщ дьдә, ле дара хьраб бәре хьраб дьдә» (Мәтта 7:17). Порнографийа чь пәй хԝә тинә? Сәва кӧ әве йәке пебьһʹәсьн, ԝәрә һьнә пьрсед сәрәкә дәрһәԛа порнографийайе шеԝьр кьн.

Порнографийа чаԝа сәр мәрийа һʹӧкӧм дьбә?

ЛЕКОЛИНКʹАР ЧЬ ДЬБЕЖЬН: Мәрьв зу һини порнографийайе дьбьн у һеса ԝева тенә гьредане. Һьнә леколинкʹар у дохдьр порнографийайе һәла һе бәрамбәри наркотика ԛайим жи дькьн.

Брайан,b йе кӧ Интернетеда порнографийайе дьньһерʹи у пева һатьбу гьредане, гьли дькә: «Бона мьн тʹӧ синор тʹӧнә бун. Әз ча бежи нә сәр һʹьше хԝә бум. Әз дьһʹәжийам у сәре мьн жь еше дьтʹәԛийа. Мьн дьхԝәст тʹәрка ве йәке бьдьм, ле сал чьԛас дәрбаз дьбун, мьнрʹа дьһа чәтьн дьбу тʹәрка ве йәке бьдьм».

Мәрьвед кӧ порнографийайе дьньһерʹьн, гәләк щар ԝи хәйсәте хԝә вәдьшерьн. Әԝана ча бежи нав хԝәда гьрти нә у дьлсах ниньн. Әʹщебмайи нинә, кӧ гәләк мәрьвед ӧса зәʹф дьчәрчьрьн жь тʹәнебуне, шәрме, хәмгинийе, депресийайе у һерсе. Һьнә мәрьв һәла һе жи фькьринә кӧ хԝә бькӧжьн. Сергей, йе кӧ һәр рʹож пе тʹела хԝә порнографийа дьньһерʹи, дьбежә: «Мьн хԝә жь мәрьва дур дьгьрт у дьлтәнг дьбум. Әз бәр чʹәʹве хԝә рʹәш бьбум, мьн тʹәнебун тʹәхмин дькьр у тʹӧ чʹарә нәдьдит. Шәрм у тьрсе рʹийа мьн гьртьбун кӧ аликʹарийе бьхԝазьм».

Һәрге мәрьв сәники жи порнографийайе бьньһерʹә, әв йәк дькарә ахьрийа гәләк хьраб пәй хԝә бинә. Щудит Рейман, зандарәкә кӧ леколин дькә ԝәки порнографийа ча сәр мәрьва һʹӧкӧм дьбә, бәр комитетәкә Щьвака Дәԝләтед Йәкбуйи гот: «Шькьлед порнографи һʹьше мәрийада дьминьн у биохимийа һʹьш дьгӧһезьн. Әԝ шькьл мина ләкʹәкә ӧса нә, кӧ зәʹф чәтьн тʹәмьз дьбә, һәла һе жи дькарә тʹәмьз нәбә». Сийузана, йа кӧ 19 сали йә, дәрһәԛа порнографийайе, кʹижан кӧ чәнд щара интернетеда ньшкева дитьбу, ӧса дьбежә: «Әв шькьл ча бежи кʹур һʹьше мьнда рʹуньштьнә. Әԝана ньшкева тенә бәр чʹәʹве мьн. Әз хԝә ӧса тʹәхмин дькьм, кӧ әзе нькарьбьм бь тʹәмами ԝана жь һʹьше хԝә дәрхьм».

ТʹӘМАМКЬРЬН: Порнографийа мәрийа дькә диле хԝә у жийина ԝан хьраб дькә (2 Пәтрус 2:19).

Порнографийа ча сәр малбәта һʹӧкӧм дьбә?

ЛЕКОЛИНКʹАР ЧЬ ДЬБЕЖЬН: «Жь бо порнографийайе малбәт һәв бәла дьбьн» (гьлийе Ԝенди у Лари Малтз жь кʹьтеба «Тʹәлька Порнографийайе»).

Рʹийе порнографийайеда зәԝащ хьраб дьбә чьмки әԝ:

• Итʹбари, һәләԛәти у һʹьзкьрьна ортʹа жьн-мерда хьраб дькә (Мәтʹәлок 2:12-17).

• Нав мәрьвада һәстед хԝәһʹьзийе пешда тинә, һәвалзәԝаща алийе емосийалида жь һәв дур дьхә у әԝана ида һәврʹа рʹази набьн (Әфәси 5:28, 29).

• Хԝәстьн у фантазийа сексуалийә нәтʹәбийәти пешда тинә (2 Пәтрус 2:14).

• Хԝәстьнәкә ӧса пешда тинә кӧ зоре һәвалзәԝаще хԝә бькә, ԝәки тʹәвайи фантазийа ԝийә мьрʹдарʹ биньн сери (Әфәси 5:3, 4).

• Бәрбь нәмамийа физики у емосийали һелан дькә (Мәтта 5:28).

Кʹьтеба Пирозда зәлал те готьне ԝәки жьн-мер һьндава һәвда гәрәке амьн у һʹәлал бьн (Малахи 2:16). Бенамуси әв һәйә нәмами, кʹижан кӧ дькарә бәхтәԝарийе жь малбәте бьстинә у жьн-мер һәв бьԛәтинә. Жь бо дәрәщед ӧса зарʹ жи гәләк дьчәрчьрьн.

Порнографийа дькарә һе зедә зийане зарʹарʹа бинә. Брайан, бәʹса кʹижани кӧ мә жоре кьр, тинә бира хԝә: «Чахе әз 10 сали бум у мьн тʹәви зарʹа чʹәʹвгьртьнок дьлист, ньшкева мьн журналед баве хԝәйи порнографи дит. Мьн дәстпекьр дьзикава ԝан журнала бьньһерʹьм у мьн ԛә нә жи фәʹм дькьр, кӧ әв чьрʹа дина мьн ӧса дькʹьшиньн. Ӧса әз кʹәтьмә тʹәльке, жь кʹижани нькарьбум аза бума, һʹәта мәзьн бьбум жи». Леколинкьрьн дьдьнә кʹьфше, ԝәки зарʹед кӧ порнографийайе дьньһерʹьн, зу дәстпедькьн бь әʹмьре сексуали бьжин, ԝанарʹа фьрԛи тʹӧнә тʹәви кʹе бенамусийе бькьн, әԝана һәләԛәтийа сексуали бь зӧлмийе дькьн у алийе емосийали у психикида жи нәнормал дьбьн.

ТʹӘМАМКЬРЬН: Порнографийа һʹьзкьрьне жь малбәте дьстинә, мәрьва дьлшкәсти дькә у пәй хԝәрʹа тʹәне еше дьһелә (Мәтʹәлок 6:27).

Кʹьтеба Пирозда дәрһәԛа порнографийайе чь те готьне?

ХӘБӘРА ХԜӘДЕДА НЬВИСАР Ә: «Аԝа хԝәстьнед дьле хԝәйә ве дьне бькӧжьн: Бенамусийе, һʹәрамийе, тәме хьраб, дьлһавьжийа хьраб у тьмайе, кӧ пʹутпʹарьсти йә» (Колоси 3:5).

Һәрге рʹастә-рʹаст бежьн, Йаһоԝаc порнографийайе нәфрʹәт дькә. Ле әԝ найе һʹәсабе кӧ әԝ сексе ԛәдәхә дькә. Әԝи әм ӧса әʹфьрандьнә ԝәки жьн-мер бькарьбьн һʹәԝщәтийа һәв алийе сексуалида рʹази кьн, алийе емосийалида һәврʹа дьһа незик бьн у бькарьбьн жийина ну пешда биньн, демәк зарʹа дьне хьн (Аԛуб 1:17).

Чьма әм дькарьн баԝәр бьн, кӧ порнографийа бәр чʹәʹве Йаһоԝа һʹәрами йә? Дина хԝә бьдьн чәнд мәʹнийа.

• Йаһоԝа занә, кӧ порнографийа дькарә жийина мәрийа хьраб кә (Әфәси 4:17-19).

• Әԝ мә һʹьз дькә у дьхԝазә мә жь зийане бьпарезә (Ишайа 48:17, 18).

• Йаһоԝа дьхԝазә кӧ зәԝащ ԛәԝи бә (Мәтта 19:4-6).

• Әԝ дьхԝазә, ԝәки әм алийе нав-намусийеда тʹәмьз бьн у ԛәдьре изьна мәрийа бьгьрьн (1 Тʹесалоники 4:3-6).

• Әԝ дьхԝазә, ԝәки әм һәләԛәтийа сексуалида бь ԛәдьр у мәʹрифәт бьн (Ибрани 13:4).

• Йаһоԝа занә, кӧ жь бо порнографийайе мәрьв һәләԛәтийа сексуалида хԝәһʹьзийе дьдьнә кʹьфше у ньһерʹандьна щьна әʹйан дькьн (Дәстпебун 6:2; Щьһуда 6, 7).

ТʹӘМАМКЬРЬН: Порнографийа достийа мәрьва тʹәви Хԝәде хьраб дькә (Рʹомайи 1:24).

Йаһоԝа дьлшәԝатийе дьдә кʹьфше һьндава ԝан мәрийа, йед кӧ дьхԝазьн жь тʹәлька порнографийайе аза бьн. Кʹьтеба Пироз дьбежә: «Дьлшәԝат у рʹәʹм ә Хӧдан, хԝәйе сәбьр-ськʹане у һʹӧбеда хьнейо» (Зәбур 103:8, 14). Әԝ мәрьвед мьлук тʹәглиф дькә, «ԝәки рʹәʹме бьстиньн у кʹәрәме бьбиньн» гава әԝ һʹәԝщә бьн (Ибрани 4:16; бьньһерʹә чаргошә «Чаԝа Тʹәрка Порнографийайе Бьдьн»).

Гәләк мәрьва ида аликʹарийа жь Хԝәде ԛәбул кьрьнә. Гәло әве йәке чь ахьри анийә? Дина хԝә бьдьне, Кʹьтеба Пирозда чь те готьне дәрһәԛа һьнә мәрьвед кӧ карьбунә тʹәрка хәйсәтед хьраб бьдьн: «Жь гӧна һатьнә шуштьне, һун һатьнә бӧһӧрти-жьбарәкьрьне, һун рʹаст һатьнә һʹәсабе бь наве Хӧдан Иса Мәсиһ у бь Рʹӧһʹе Хԝәдейе мә» (1 Корьнтʹи 6:11). Мина Паԝлосе шанди, мәрьвед ӧса дькарьн бь мерхаси бежьн: «Әз һәр тьшти бь сайа ԝи дькарьм, йе кӧ ԛәԝате дьдә мьн» (Филипи 4:13).

Сийузан, кʹижане карьбу тʹәрка ви хәйсәте хьраб бьдә, дьбежә: «Тʹәне Йаһоԝа дькарә али тә бькә, кӧ тʹәрка порнографийайе бьди. Һәрге тӧ аликʹарийе жь ԝи дьхԝази у ширәтед ԝи дьгәрʹи, те бькарьби бәр чʹәʹве ԝи тʹәмьз би. Әԝ ԝе тʹӧ щар тә нәһелә».