Тә Чь Нет Данийә Пешийа Хԝә?

ФЕРНАНДОa бәрхԝә дькʹәт. Дӧ рʹуспийа готьне кӧ дьхԝазьн тʹәви ԝи хәбәр дьн. Паши чәнд сәрледанед бәрпьрсийаре мьһале, рʹуспийа ида тʹәви ԝи хәбәр дабун у готьне кӧ чьда әԝ дькарә пешда һәрʹә, сәва кӧ щьватеда щабдарийа бьстинә. Ԝәʹдә дьчу у Фернандо ида дӧдьли дьбу кӧ ԝе ча рʹуспи ԝи кʹьфш кьн. У ԝан пашԝәхтийада бәрпьрсийаре мьһале диса сәрледана щьвата ԝи кьр. Гәло ве щаре рʹуспи ԝе чь жерʹа бежьн?

Фернандо рʹьнд гӧһ дьда гьлийед рʹуспики. Әԝ бьра бәʹса 1 Тимотʹейо 3:1 кьр у гот, ԝәки рʹуспийе щьвате нәʹма стандьнә, кʹидәреда те готьне ԝәки әԝ ча рʹуспи һатийә кʹьфшкьрьне. Фернандо әʹщебмайи ма у пьрси: «Тә чь гот?». Бьра диса гьлийед хԝә ԝәкʹьланд, у дәрберʹа бәшәра Фернандо хԝәш бу. Гава щьватеда дәрһәԛа кʹьфшкьрьна ԝи әʹлам кьрьн, гьшк ша бун.

Гәло тьштәки хьраб ве йәкеда һәйә, кӧ бьхԝазьн щьватеда щабдарийа бьстиньн? На. Ль гора 1 Тимотʹейо 3:1, «һәгәр тәме йәки ль сәрԝертийе һәйә, әԝ шьхӧләки ԛәнщ дьхԝазә». Гәләк бьра әԝ ширәт ԛәбул дькьн, рʹӧһʹанида пешда дьчьн у дьбьн мәсәлед баш ве йәкеда, кӧ щьватеда щабдарийед хԝә рʹьнд тиньн сери. Бь сайа ве йәке, бь сәда һʹәзара рʹуспийед сәрԝахт у бәрдәстийед щьвате бона щьмәʹта Хԝәде бунә пʹешкʹеш. Ле чьмки щьват һе зедә дьбьн, һʹәԝщәтийа бьра дьһа зедә һәйә, йед кӧ дьхԝазьн щабдарийа һьлдьнә сәр хԝә. Ле ча әԝана дькарьн ве нете дайньн пешийа хԝә у бь щурʹе рʹаст бьгьһижьнә ве нете? Гәло лазьм ә ԝәки бьред кӧ дьхԝазьн щабдарийа бьстиньн, мина Фернандо бәрхԝә кʹәвьн?

ЧЬ ТЕ ҺʹӘСАБЕ «ТӘМ»?

Кʹьтеба Пирозда хәбәра Йунани кӧ һатийә ԝәлгәрʹандьне ча «тәм» те һʹәсабе «тьштәки гәләк бьхԝазьн, демәк бьгьһижьнә тьштәки». Әԝ мина ве йәке йә, кӧ чахе тәʹме мәрьв дькʹьшинә емишәкә сәр бахе, әԝ хԝә дьрежи ве емише дькә ԝәки бьԛәтинә. Ле әв найе һʹәсабе ԝәки мәрьв жь бо тьмайе дьхԝазә щабдарийа бьстинә. Чьрʹа? Чьмки әԝед кӧ дьхԝазьн ча рʹуспи хьзмәт кьн, гәрәке бьхԝазьн «шьхӧләки ԛәнщ» бькьн, нә кӧ щьватеда хԝә бьльнд кьн.

Йәке Тимотʹейо 3:​2-7 у Тито 1:5-9-да дәрһәԛа һьнә дәʹԝакьрьна те готьне. Дәрһәԛа ԝан дәʹԝакьрьнед бьльнд, бьраки бь наве Раймонд, йе кӧ гәләк ԝәхт ча рʹуспи хьзмәт дькә, дьбежә: «Әз дьфькьрьм ԝәки дьһа фәрз ә, ԝәки әм чь щурʹә мәрьв ьн. Һәмьки лазьм ә ԝәки бьра готарван у дәрсдаред баш бьн, ле йәкә әԝ тьшт пʹучʹ ьн һәрге мәрьв беԛьсуртийе хԝәй нәкә, хԝәгьрти, аԛьлда гьран, маԛул, меванһʹьз у бәрбьһер нибә».

Беԛьсуртийа бьре кӧ дьхԝазә щьватеда щабдарийа бьстинә ԝе бе кʹьфше ве йәкеда, һәрге әԝ хԝә жь ԛәлпийе у бенамусийе дур бьгьрә. Әԝ гәрәке йәки хԝәгьрти бә, аԛьлда гьран, маԛул у сәрԝахт бә. Хушк-бьра ԝе итʹбарийа хԝә рʹебәрийа ԝи биньн у аликʹарийе жь ԝи бьхԝазьн. Бьре ӧса меванһʹьзийе дьдә кʹьфше, кәсед щаһьла у йед кӧ тʹәзә һатьнә нава рʹастийе, дьшьдинә у ԛәԝи дькә. Әԝ аликʹарийе дьдә нәхԝәша у кәсед әʹмьрда мәзьн, чьмки әԝ ԛәнщийе һʹьз дькә. Әԝ бона кʹара мәрьвед дьн ван хәйсәт һʹӧнӧра нав хԝәда пешда тинә, нә кӧ ԝәки бе кʹьшфкьрьне.b

Чахе бьрак дьхԝазә щабдарийа бьстинә, рʹуспийед щьвате бь шабуне али ԝи дькьн у ширәта дьдьнә ԝи. Ле ви бьрайива гьредайи йә һәла әԝе ван ширәта бьдә хәбате у ван хәйсәт-һʹӧнӧра нав хԝәда пешда бинә, ԝәки кʹьфшкьрьне бьстинә, йан на. Бәрпьрсийарәки щерʹьбанди бь наве Һенри, дьбежә: «Һәрге тӧ дьхԝази щабдарийа бьстини, бь дьл у щан сәр хԝә бьхәбьтә ԝәки бьди кʹьфше кӧ тӧ дәʹԝакьрьнед жь Кʹьтеба Пироз тини сери». Әԝ бьра бәʹса рʹеза Ԝаиз 9:10 дькә, у дьбежә: «‹Жь бо хәбате һәр чь бь дәсте тә бькʹәвә, тӧ бь һʹәму һеза [ԛәԝата] хԝә ԝе бькә›, ИМ. Рʹуспи чь шьхӧли жи бьдьнә тә, бь дьл у щан бькә. Һәр шьхӧле щьвате һʹьз бькә, һәла һе шуштьна пола жи. Ԝәʹдә шунда кәсед дьн ԝе шьхӧл у щәфе тә бьвиньн». Һәрге тӧ дьхԝази бьби рʹуспи, шьхӧлһʹьз бә у һʹәму шьхӧлед хьзмәтийа пирозда хирәт бә у һәр тьшти ча лазьм ә бькә, ԝәки мәрьв итʹбарийа хԝә тә биньн. Тӧ гәрәке мьлук би, нә кӧ хԝәһʹьз би (Мәт. 23:8-12).

ЖЬ НЬҺЕРʹАНДЬН У РʹАБУН-РʹУНЬШТЬНА НӘРʹАСТ ДУР БӘ

Һьнәкед кӧ дьхԝазьн бьбьнә рʹуспи, дәрһәԛа хԝәстьна хԝә нә кӧ рʹастә-рʹаст дьбежьн, ле гьлийа давежьн, йан жи дьбәкә дьхԝазьн сәр кʹома рʹуспийа һʹӧкӧм кьн, ԝәки ԝана кʹьфш кьн. Һьнәк жи анщах ширәтед рʹуспийа ԛәбул дькьн. Бьред ӧса гәрәке пьрс бьдьнә хԝә: «Гәло әз дьхԝазьм тʹәне йа хԝә бькьм, йан әз бь мьлукти дьхԝазьм али пәзед Йаһоԝа бькьм?».

Әԝед кӧ дьхԝазьн щабдарийа бьстиньн, гәрәке бир нәкьн дәрһәԛа ве дәʹԝакьрьне кӧ «нәхше ԛәнщ нишани кери кьн» (1 Пәт. 5:1-3). Бьре кӧ бона щьвате мәсәлә йә, гәрәке фькьред ԝи ԛәлп нибьн у әԝ гәрәке ԛәлпийе нәкә. Әԝ гәрәке бь сәбьр бә, фьрԛи тʹӧнә щабдарийа ԝи һәйә йан на. Гава бьра дьбә рʹуспи, әԝ ньшкева жь һʹәму кемасийед хԝә аза набә (Жьмар 12:3; Зәб. 106:32, 33). Хенщи ве йәке, дьбәкә әԝ бьра нав хԝәда кемасийа навинә, ле йед дьн дьбәкә щурʹәки майин дьфькьрьн у кемасийед ԝи дьвиньн (1 Корн. 4:4). Ләма жи һәрге рʹуспи жь дьл ширәтәкә сәр һʹиме Кʹьтеба Пироз дьдьнә тә, әʹщьз нәбә, ле гӧһ бьдә ԝан у ширәте ԛәбул кә.

ЛЕ ҺӘРГЕ ТӦ ГӘЛӘК ԜӘХТ ҺИВИЙЕ ЙИ?

Һьнә бьрарʹа дькарә бе кʹьфше ԝәки әԝана ида гәләк ԝәхт һивийа кʹьфшкьрьна хԝә нә. Дьԛәԝьмә тӧ жи гәләк дьхԝази бьби рʹуспи у бәрхԝә дькʹәви, чьмки ида чәнд сал ә һивийа ве йәке йи. Һәрге ӧса нә, дина хԝә бьдә ван гьлийед жь Кʹьтеба Пироз: «Гӧмана кӧ дәрәнги дьбә, дьл дешинә, ле гьһиштьна мәрәм, мина дара жийине йә» (Мәтʹлк. 13:12).

Гава мәрәма дьле мәрьв найе сери, дьле ԝи дьшке. Мәсәлә, Бьраһим хԝә ӧса тʹәхмин дькьр. Йаһоԝа ԝирʹа соз да кӧ ԝе кӧрʹәки бьдә ԝи, ле сал дәрбаз дьбун ԝирʹа у Сарайерʹа зарʹ нәдьбун (Дәстп. 12:1-3, 7). Каләмертийа хԝәда Бьраһим гот: «Йа Хԝәй Хӧдан! Те чь бьди мьн? Әзи ва бе зӧрʹәт мамә . . . Тә кӧ зӧрʹәт нәда мьн». Йаһоԝа ԝи да баԝәркьрьне кӧ әԝе әʹсәйи созе хԝә бинә сери у ԝе жерʹа кӧрʹ бьдә. Ле лапи кем 14 сал дәрбаз бу һʹәта кӧ әԝ соз һатә сери (Дәстп. 15:2-4; 16:16; 21:5).

Гәло Бьраһим шабуна хԝә ӧнда кьр һʹәта кӧ созе Хԝәде һатә сери? На. Әԝ тʹӧ щар дӧдьли нәдьбу кӧ Хԝәде хԝәйе созе хԝә йә. Ләма жи әԝ бь сәбьр һивийа ве рʹожа хԝәш бу. Паԝлосе шанди гот: «Бьраһим бь думька дьреж гьһиштә созе Хԝәде» (Ибрн. 6:15). Ахьрийа-ахьрийе Хԝәдайе Һьмзор, ԝи мере амьн ӧса кʹәрәм кьр кӧ әԝи нә жи дьда бәр чʹәʹве хԝә. Гәло тӧ жь Бьраһим дькари чь һин би?

Һәрге тӧ дьхԝази бьби рʹуспи, ле сал дәрбаз дьбьн у тә кʹьфш накьн, бәрдәԝам кә итʹбарийа хԝә Йаһоԝа бинә. Шабуна хԝә хьзмәтийеда ӧнда нәкә. Варрен, йе кӧ али гәләк бьра кьрийә ԝәки рʹӧһʹанида пешда һәрʹьн, дьбежә кӧ әв йәк чьрʹа ӧса фәрз ә: «Ԝәхт лазьм ә сәва кӧ әшкәрә бә һәла бьра һазьр ә щабдарийа һьлдә сәр хԝә йан на. Фәрәсәт у ньһерʹандьна ԝи, һеди-һеди рʹабун-рʹуньштьна ԝида әʹйан дьбә у ве йәкеда, кӧ әԝ чь щурʹәйи ԝан шьхӧла тинә сери, йед кӧ дьдьнә ԝи. Һьнә бьра дьфькьрьн кӧ әԝана ԝе тʹәне һьнге пешдачуйи бьн, һәрге кʹьфшкьрьнәкә мәзьн бьстиньн. Әв ньһерʹандьна нәрʹаст, дькарә сәр һʹьш-аԛьле мәрьва һʹӧкӧм кә. Ле пешдачуйина рʹаст әв ә, кӧ тӧ Йаһоԝарʹа бь амьни хьзмәт ки, фьрԛи тʹӧнә тӧ кʹидәре би у чь бьки».

Бьраки дәһ сала зедәтьр һивийе бу һʹәта кӧ бьбә рʹуспи. Әԝ гьли дькә кӧ жь кʹьтеба Һәзәԛел сәре йәке әԝ чь һин бу, кʹидәреда дәрһәԛа әʹрәба Йаһоԝа те готьне. «Йаһоԝа хԝәха дьжберә кӧ әʹрәба ԝи, демәк тʹәшкиләта ԝи ԝе бь чь ләзи һәрʹә. У фәрз нә әв ә кӧ ԝәʹдә бона мә ча дьчә, ле әв ә кӧ бона Йаһоԝа ча дьчә. Һәрге әз дьхԝазьм бьбьмә рʹуспи, йа лапә фәрз әв нинә, кӧ әз дьхԝазьм бьбьмә кʹе у чь нетед мьн һәнә. Хԝәстьнед мьн дькарьн щӧдә бьн жь ве йәке, кӧ бь ньһерʹандьна Йаһоԝа әз һʹәԝще чь мә».

Һәрге тӧ дьхԝази щабдарийа бьстини, һәр тьшти бькә, кӧ бьгьһижи ве нета хԝәйә ԛәнщ, у чьԛас дәсте тә те, шабуне бькә щьвате. Ле һәрге тӧ дьфькьри кӧ мәрәма дьле тә дәрәнги дькʹәвә, сәр хԝә бьхәбьтә ԝәки дьлтәнг нәби у сәбьр ки. Раймонд бәʹса кʹижани мә жоре кьр, дьбежә: «Мәрьве кӧ тʹәне пәй хԝәстьна хԝә дькʹәвә, әԝе тʹӧ щар һʹале хԝәрʹа рʹази нибә. Әԝед кӧ тʹьме бәрхԝә дькʹәвьн, ве шабуне ӧнда дькьн, йа кӧ хьзмәтийа Йаһоԝарʹа тинә. Бәре рʹӧһʹе пироз нав хԝәда пешда бинә, илаһи сәбьр. Чьԛас дәсте тә те рʹӧһʹанида хԝә ԛәԝи кә, демәк Кʹьтеба Пироз тʹьме леколин кә. Һе зедә хьзмәт кә, һинбунед Кʹьтеба Пироз тʹәви ԝан мәрьва дәстпекә, йед кӧ гӧһ дьдьнә рʹастийе. Малбәта хԝәда щабдарийед хԝәйә рʹӧһʹани бинә сери, у ԛӧльхкьрьна тʹәви малбәте дәрбаз кә. Чахе мәщал дькʹәвә дәсте тә, кӧ тʹәви хушк-бьра би, ве йәкерʹа ша бә. Һьнге әв рʹийа кӧ тә дьбә бәрбь нета тә, ԝе баргьран нибә у шабуне тәрʹа бинә».

Хут Йаһоԝа бьрарʹа әԝ мәщал дайә, ԝәки сәр хԝә бьхәбьтьн, кӧ бькарьбьн щьватеда щабдарийа һьлдьн сәр хԝә. Нә Йаһоԝа, нә жи тʹәшкиләта ԝи нахԝазьн, ԝәки бьред кӧ әв нет данә пешийа хԝә, дьлшкәсти бьн у шабуна хԝә ӧнда кьн. Хԝәде аликʹари у кʹәрәма хԝә дьдә ԝан, йед кӧ бь нетед рʹаст ԝирʹа хьзмәт дькьн. Тʹӧ кʹәрәма Ԝи «кʹәдәре сәрда зедә накә» (Мәтʹлк. 10:22).

Һәрге тӧ ида гәләк ԝәхт һивийа кʹьфшкьрьнәке йи, диса жи тӧ дькари рʹӧһʹанида дьһа пешда һәрʹи. Һәрге тӧ һʹӧнӧред лазьм нав хԝәда пешда бини, бь дьл у щан шьхӧлед щьвате бини сери, у ӧса жи бона малбәта хԝә хәм бьки, Йаһоԝа ԝе тʹӧ щар шьхӧле тә, кӧ тӧ бона ԝи дьки, бир нәкә. Фьрԛи тʹӧнә щабдарийа тә чь йә, бьра хьзмәтийа Йаһоԝа тʹьме шабунәкә мәзьн тәрʹа бинә.