Ньһерʹандьна Хԝәде сәр Шәрʹ Рʹожа Иро

Рʹаст әԝ ә кӧ Хԝәде тәнгасийа мәрьва дьвинә у әԝ бона ԝе йәке тьштәки дькә (Зәбур 72:13, 14). Дь Хәбәра хԝәда, демәк Кʹьтеба Пирозда Хԝәде соз дьдә кӧ йед тәнгасийеда ньн ԝе «бьдә һесакьрьне». Ле әв ԝәʹдә ԝе кʹәнге бе? «Гава Хӧдан Иса тʹәви мьлйакʹәтед хԝәйә зор жь әʹзменва . . . хӧйа бә, ԝәки һʹәйфе жь ԝан һьлдә, йед кӧ нахԝазьн Хԝәде нас кьн у гӧрʹа Мьзгинийа Хӧдане мә Иса накьн» (2 Тʹесалоники 1:7, 8). Иса ԝе ахьрийеда хӧйа бә у Кʹьтеба Пироз әве рʹоже нав дькә «шәрʹе ԝе Рʹожа Мәзьнә Хԝәдейе Һʹәму Зорайийе» у ӧса жи Һармәгәдон (Әʹйанти 16:14, 16).

Бона ԝи шәрʹе кӧ ахьрийеда ԝе бьбә, Хԝәде ԝе мәрьва нәдә хәбате, ле Кʹӧрʹе хԝә Иса Мәсиһ у мьлйакʹәта, сәва кӧ мьԛабьли зӧлмийе шәрʹ бькьн. Әԝана ԝе хьлазийа һʹәму тәнгасийа биньн (Ишайа 11:4; Әʹйанти 19:11-16).

Һʹәта рʹожа иро жи, ньһерʹандьна Хԝәде ль сәр шәрʹ нәһатийә гӧһастьне. Әԝ тʹәне бона ԝе йәке шәрʹа ԛәбул дькә кӧ хьлазийа зорбәтийе у зӧлмийе бинә. Ле жь тʹәрихийе әʹйан те кʹьфше кӧ тʹәне изьна Хԝәде һәйә сафи кә кʹәнге шәрʹ бьбә у кʹе шәрʹ бькә. Ча әм пеһʹәсийан, Хԝәде ида сафи кьрийә кӧ ахьрийеда шәрʹ бьбә, сәва кӧ зӧлмийе у зорбәтийе бьдә һьлдане. У әԝ ԝе әве йәке бь сайа Кӧрʹе хԝә Иса Мәсиһ бькә. Демәк әԝ һʹәму шәрʹ кӧ иро дьԛәԝьмьн Хԝәде ԛәбул накә, дьхԝази әԝ шәрʹ бь нете баш бьн жи.

Ԝәред бьньһерʹьн мәсәләке: Бьдьнә бәр чʹәʹве хԝә дӧ бьра дәстпедькьн шәрʹ дькьн чахе баве ԝан малда нинә. Әԝана шәрʹе хԝә дьдьнә сәкьнандьне у баве хԝәрʹа тʹеле дьхьн. Жь ԝан йәк дьбежә кӧ йе дьн дәстпекьр шәрʹ бькә, ле йе дьн дьбежә кӧ әԝи дәстпекьр. Һәрдӧ жи баве хԝәрʹа шькийата дькьн, у һәр йәк жь ԝан баԝәр дькә кӧ бав ԝе пьштгьрийа ԝи бькә. Ле паше чахе бав гӧһ да һәрда жи, әԝи ԝанрʹа гот кӧ шәрʹ нәкьн у һивийа ԝи бьн, һʹәта кӧ әԝ бе мал у әве проблеме сафи кә. Әԝ дӧ бьра һьнә ԝәʹдә һивийе дьсәньн, ле паше диса дәстпедькьн шәрʹ дькьн. Чахе бав те мал, әԝ жь ԝан һәрда жи рʹази нинә, у ԝана щәза дькә чьмки ԝана гӧрʹа ԝи нәкьр.

Иро сәрԝеред кӧ тʹәви һәв шәрʹ дькьн, гәләк щар пьштгьрийе жь Хԝәде дьхԝазьн. Ле Хԝәде шәрʹед иройинда пьштгьрийа тʹӧ кәси накә. Дәԝсе әԝ дь Хәбәра хԝә Кʹьтеба Пирозда, әʹйан дьбежә: «Жь бәр хьрабийева хьрабийе ль тʹӧ кәси нәкьн», у «Һʹәйфе һьлнәдьн» (Рʹомайи 12:17, 19). Һьн жи, Хԝәде мәрʹа әʹйан кьрийә кӧ әм гәрәке бь сәбьр һивийа ԝи бьн, чахе әԝ дь Һармәгәдонеда мә хьлаз кә (Зәбур 37:7). Ле чахе мәрьв һивийа Хԝәде ниньн, дәԝсе хԝәда гӧман ьн у бь сәре хԝә шәрʹа дькьн, Хԝәде жь ԝан рʹази нинә у шәрʹед ӧса ԛәбул накә. Һармәгәдонеда Хԝәде ԝе һерса хԝә бьдә кʹьфше у нав тʹәмамийа дьнйайе һʹәму шәрʹа бьдә һьлдане (Зәбур 46:9; Ишайа 34:2). Демәк, Һармәгәдон әԝ һәйә шәрʹ, кʹижан кӧ ԝе хьлазийа һʹәму шәрʹа бинә.

Хьлазийа шәрʹа әԝ кʹәрәмәкә жь гәләк кʹәрәмед Пʹадшатийа Хԝәде. Иса дәрһәԛа ве Пʹадшатийе хәбәрда дь дӧада, кʹижан кӧ гәләкарʹа нас ә: «Пʹадшатийа тә бе, әʹмьре тә бә, чаԝа ль әʹзмен, ӧса жи ль сәр әʹрде» (Мәтта 6:10). Пʹадшатийа Хԝәде нә кӧ тʹәне ԝе шәрʹа бьдә һьлдане, ле әԝе кʹокева кʹӧта кә мәʹнийа шәрʹа, демәк зӧлмийеa (Зәбур 37:9, 10, 14, 15). Әʹщебмайи нинә кӧ пәйчуйед Иса гәләк һивийа кʹәрәмед Пʹадшатийа Хԝәде бун (2 Пәтрус 3:13).

Ле гәло әм чьԛас ԝәхт гәрәке һивийе бьн кӧ Пʹадшатийа Хԝәде һʹәму тәнгасийе, зорбәтийе, у зӧлмийе кʹӧта кә? Пʹехәмбәртийед Кʹьтеба Пироз әʹйан дьдьнә кʹьфше кӧ әм дьжин хьлазийа ԝе дьнйайе, демәк «рʹожед ахьрийеда» (2 Тимотʹейо 3:1-5).b Зутьрәке, бь сайа Пʹадшатийа Хԝәде рʹожед ахьрийе ԝе хьлаз бә бь шәрʹе Һармәгәдоне.

Чаԝа ида һатә готьне, әԝе кӧ дь ԝи шәрʹе хьлазийеда бенә кʹӧтакьрьне ԝе әԝ бьн, йед кӧ нахԝазьн «гӧрʹа Мьзгинийа Хӧдане мә Иса» бькьн (2 Тʹесалоники 1:8). Ле биньн бира хԝә, кӧ Хԝәде мьрьне тӧ кәсирʹа нахԝазә, у һәла һе йед зӧльмрʹа жи (Һәзәԛел 33:11). Әԝ «нахԝазә тʹӧ кәс ӧнда бә» дь шәрʹе Һармәгәдонеда. У ләма Хԝәде пешийа кӧ әԝ рʹож бе, хәм дькә кӧ мьзгина дәрһәԛа Иса Мәсиһ һʹәму мьләтарʹа «нав тʹәмамийа дьнйайе» бе бәлакьрьне (2 Пәтрус 3:8, 9; Мәтта 24:14; 1 Тимотʹейо 2:3, 4). Бәле, бь сайа шьхӧле бәлакьрьна мьзгине кӧ Шәʹдед Йаһоԝа дькьн, мәщала мәрьва һәйә кӧ Хԝәде нас кьн, мьзгина дәрһәԛа Иса ԛәбул кьн, у бьвиньн ве жийине кʹидәре кӧ ида шәрʹ ԝе тʹӧнә бьн.