Аликʹари сәва кӧ Кʹьтеба Пироз Фәʹм кьн

Бьдьнә бәр чʹәʹве хԝә кӧ һун щара пешьн дьчьнә ԝәлатәки хәриб. Ԝедәре ԝәрʹа нәнас ьн мәрьв, әʹдәт, хԝарьн, у тьштед дьн. Фәʹмдари йә кӧ һун дьбәкә жь бо ве йәке дьлтәнг бьн.

Ӧса жи чахе һун Кʹьтеба Пироз щара пешийе дьхуньн, дьбәкә һун дьлтәнг бьн. Чьмки һун те бежи дькʹәвьнә дьнйакә бәре кӧ ԝәрʹа хәриб ә. Ль ԝедәре, һун рʹасти щьмәʹта Фьлистийа тен, педьһʹәсьн дәрһәԛа әʹдәтед кӧ бона ԝә әʹщеб ьн, мәсәлә кʹьнща сәр хԝә дьԛәлешьн, йан жи һун педьһʹәсьн дәрһәԛа хԝарьна кӧ нав дькьрьн мана (Дәркʹәтьн 16:31; Йешу 13:2; 2 Самуйел 3:31). Әԝ һʹәму тьшт дькарә нәфәʹмдари бә. Чаԝа ԝе дәрәщеда кӧ һун дьчьнә ԝәлатәки хәриб, гәло һуне рʹази нибьн аликʹарийе бьстиньн жь ԝи мәрьви, кʹижан кӧ дькарә ԝәрʹа тьшта шьровәкә?

АЛИКʹАРИ ԜӘʹДЕ БӘРЕ

Жь ԝи ԝәʹдәйи чахе Ньвисаред Пироз һатьнә ньвисаре ԛьрʹна 16 Б.Д.М., мәрьва аликʹари дьстандьн сәва кӧ әԝе тексте фәʹм бькьн. Мәсәлә, Муса кʹижан кӧ рʹебәре щьмәʹта Исраеле йе әʹԝльн бу, «дәст бь шьровәкьрьна» ньвисаре дькьр (Ԛануна Дӧщари 1:5, ПКʹМ).

Дәһә ԛьрʹнә шунда жи һәбун мәрьвед щерʹьбанди, кӧ али мәрьва дькьрьн ԝәки Ньвисаред Пироз фәʹм кьн. Сала 455 Б.Д.М., гәләк Щьһу, ӧса жи гәләк зарʹ, ль мәйдана шәһәре Оршәлиме тʹоп бун. У әԝед кӧ Кʹьтеба Пироз мәрьв һин дькьрьн, диса жи «жь пʹьртуке [Ньвисаред Пироз] . . . бь әшкәрәти» хԝандьн. Ԝана нә кӧ тʹәне хԝәндьн, ле «мәʹна ԝе дан у тьштед кӧ хԝәндьнә жь ԝанрʹа равә кьрьн [шьровәкьрьн]» (Нәһәмийа 8:1-8).

Паши пенщ ԛьрʹна, ӧса жи Иса Мәсиһ шьхӧле һинкьрьне дькьр. Бь рʹастийе, әԝ нава мәрьвада нас бу чаԝа дәрсдар (Йуһʹәнна 13:13). Әԝи ча әʹлаләта мәзьн ӧса жи башԛә мәрьв һин дькьрьн. Щарәке чахе әԝи сәр чʹийе әʹлаләтәкә мәзьн һин дькьр, әԝ «әʹлаләт сәр һинкьрьна ԝи зәндәгьрти ман» (Мәтта 5:1, 2; 7:28). Бьһаре сала 33 Д.М., Иса рʹева тʹәви дӧ шагьртед хԝә хәбәрдьда, чахе незики шәһәре Оршәлиме дьбу, у ԝанрʹа «ньвисар шьровәдькьрьн» (Луԛа 24:13-15, 27, 32).

Шагьртед Иса жи Хәбәра Хԝәде мәрьварʹа шьровәдькьрьн. Щарәке ԝәзире Етйопийайе пʹарәк жь Ньвисаред Пироз дьхԝәнд, у һьнге шагьрте бь наве Филипо незики ԝи бу у жь ԝи пьрси: «Чь кӧ тӧ дьхуни фәʹм дьки?» Әԝи щаба Филипо да: «Әзе чаԝа бькарьбьм фәʹм бькьм, һәгәр йәк мьнрʹа шьровәнәкә?» У Филипо ԝирʹа шьровәкьр кӧ әԝ пʹар чь те һʹәсабе (Кʹаред Шандийа 8:27-35).

АЛИКʹАРИ РʹОЖА ИРОЙИН

Чаԝа ԝәʹде бәре һәбун дәрсдар кӧ Кʹьтеба Пироз мәрьварʹа шьровәдькьрьн у һин дькьрьн, иро Шәʹдед Йаһоԝа нав тʹәмамийа дьнйайе дь 239 ԝәлатада ԝи шьхӧле һинкьрьна Кʹьтеба Пироз дькьн (Мәтта 28:19, 20). Һәр һʹәфтийе Шәʹдед Йаһоԝа али нәһә милйон мәрьва зедәтьр дькьн, кӧ Кʹьтеба Пироз фәʹм бькьн. Гәләк жь ԝан мәрьва нә жь религийа мәсиһийа нә. Әԝ һинбун бе пʹәрә йә. Һун дькарьн әԝе һинбуне дәрбаз бьн щийе кӧ ԝәрʹа дәст дьдә. Һьнәка хԝәш те чахе әԝе һинбуне тʹәви ԝан бь тʹеле йан бь компӧтәре дәрбаз дькьн.

Жь кʹәрәма хԝә текли бьн тʹәви Шәʹдед Йаһоԝа, сәва кӧ пебьһʹәсьн кӧ һун чаԝа дькарьн кʹаре бьстиньн жь һинбуна Кʹьтеба Пироз. Һуне пебьһʹәсьн кӧ Кʹьтеба Пироз әԝ кʹьтеб нинә кӧ нәйе фәʹмкьрьне, ле әв «керһати йә бона һинкьрьне, леһьлатьне, рʹасткьрьне у ширәткьрьна жийина рʹастийеда», сәва кӧ һун «бона һʹәму кьрьнед ԛәнщ һазьр» бьн (2 Тимотʹейо 3:16, 17).