Хәма Нәкьн

ПРИНСИПА КʹЬТЕБА ПИРОЗ: «Бона әʹмьре хwә хәма нәкьн» (Мәтта 6:25).

Әw йәк чь те һʹәсабе? Әwан гьлийа Иса гот чахе әwи ль сәр чʹийе мәрьв һин дькьрьн. Ль гора фәрһәнгәкә Кʹьтеба Пироз, хәбәра Йунани кʹижан те wәлгәрʹандьне ча «хәмкьрьн», дькарә бе һʹәсабе «реаксиа мәрьвайә тʹәбийәти сәр кʹәсиббун, бьрчибун, у проблемед дьн, кʹижан кö дь әʹмьре wийи һәр рʹожида дьqәwьмьн». Хәмгини öса жи те һʹәсабе, бәрхwәкʹәтьн дәрһәqа ахьрийе. Әw йәк нормал ә, кö әм дәрһәqа тьштед материали у дәрһәqа һʹалхwәшийа мәрьвед хwәйи незик хәмгин дьбьн (Филипи 2:20). Ле чахе Иса гот «хәма нәкьн», әwи дьхwаст ширәт бьда шагьртед хwә, wәки әwана гәләк хәмгин нәбьн, чьмки хәмгинийа дәрһәqа рʹожа сьбе, дькарә шабуна рʹожа иройин жь мә бьстинә (Мәтта 6:31, 34).

Гәло әw ширәт рʹожа иройин жи керһати йә? Wе билани бә, wәки әм дина хwә бьдьнә ширәта Иса. Чьрʹа? Һьнә кʹьтебед медисинайе, дьбежьн кö чахе мәрьв гәләк бәрхwә дькʹәвьн у дьлтәнг дьбьн сәва һьнә тьшта, әw йәк сәр система нервед wан гәләк һʹöкöм дьбә, жь бо чь жи «нәхwәшийед öса пешда тен, мәсәлә нәхwәшийед зьк, дьльк, у öса жи асма».

Иса гот дәрһәqа wан мәʹнийа, чьрʹа әм гәрәке гәләк бәрхwә нәкʹәвьн: Әw йәк кʹаре найинә. Әwи гот: «Иди жь wә кʹи дькарә бь хәмед хwә дәqәке сәр әʹмьре хwәда зедә кә?» (Мәтта 6:27). Һәгәр әм гәләк дина хwә дьдьн сәр хәмгинед хwә, бь wе йәке әме нькарьбьн әʹмьре хwә дьреж кьн, йане һе баш кьн. Гәләк щар дьqәwьмә кö дәрһәqа чь әм пешда хәмгин дьбьн, нә жи дьqәwьмьн. Зандарәк дәрһәqа wе йәке öса дьбежә: «Хәмгини дәрһәqа ахьрийе бадиһәwа йә, чьмки öса дьqәwьмә кö ахьри бь рʹастийе öса хьраб набә, чаwа кö мә дьда бәр чʹәʹве хwә».

Ле чь бькьн wәки хәмгин нәбьн? Йа пешийе, итʹбарийа хwә Хwәде биньн. Һәрге Хwәде тәйрәдед әʹзмен тʹер дькә у дина хwә дьдә сосьнед чоле, ле чьqас зедә wе хәм бькә бона wан, кʹе баwәрийа хwә wи тиньн (Мәтта 6:25, 26, 28-32). Йа дöда, бьфькьрьн дәрһәqа рʹожа иройин, нә кö йа сьбе. Иса гот: «Иди бона рʹожа сьбе хәма нәкьн, чьмки рʹожа сьбе wе бона хwә хәма бькә». Һун ван гьлийарʹа qайил ьн: «Хәмед рʹоже бәси wе нә»? (Мәтта 6:34).

Һәрге әм әве ширәта Исайә билани бьдьн хәбате, бь wе йәке әме сьһʹәт-qәwата хwә жь зийане хwәй кьн. Һьн жи, әме дьлрʹьһʹәтийе бьвиньн, кʹижан кö Кʹьтеба Пироз нав дькә «әʹдьлайийа Хwәде» (Филипи 4:6, 7).