Чь Бькьн сәва кӧ Хәмгин Нәбьн

Хәмгинийа бь зедәйи дькарә алийе физики у емосийалида, мә ԛьдум бьехә. Хәмгинийа ӧса дькарә мә бәрбь проблемед дьһа мәзьн бьвә, нә кӧ дәрһәԛа чь мә серида бәрхԝә дькʹәт.

Ширәтед кӧ дькарьн али мә бькьн бь зедәйи хәмгин нәбьн

• 

  Дәрһәԛа информасийа негатив кем пебьһʹәсә. Әʹсәйи нинә кӧ тӧ һәр тьшт һур бь һур бьзаньби. Һәрге тӧ информасийа негатив бь зедәйи педьһʹәси, әв йәк хәмгинийа тә ԝе дьһа зедә кә.

  Принсипа Кʹьтеба Пироз: «Дьле хәм у хәйал һʹьшкбуна һәстуйа йә» (Мәтʹәлок 17:22).

  «Һеса йә информасийа негативва кӧ дәнг-бәʹсада гьли дькьн, бей гьредане. Ле әв хәйсәтәкә хьраб ә. Чахе мьн сафи кьр нучәйа кем бьньһерʹьм, хәмгинийа мьн жи кем бу» (Щон).

  Бьфькьрә: Гәло ԝәрʹа бь рʹасти лазьм ә, кӧ тʹьме дәнг-бәʹса бьньһерʹьн?

• 

  Хԝә ль графике бьгьрә. Бьхәбьтә ԝәки ԝәʹдәда һʹьшйар би, нан бьхԝи, шьхӧле мале бьки у ԝәʹдәда бькʹәви нав-щийа. Һәрге графика тә һәбә у тӧйе пешда бьзаньби кӧ чь у кʹәнге бьки, һьнге жийина тә ԝе дьһа рʹьһʹәт бә у хәмгинийа тә жи кем бә.

  Принсипа Кʹьтеба Пироз: «Тʹьвдира мәрьве хирәт әʹсә кʹаре тинә, ле һәр кәсе ләз кʹәти әʹсә зьраре тинә» (Мәтʹәлок 21:5).

  «Чахе пандәмийа COVID-19 дәстпебу, мьн ԛәт хԝә ль графике нәдьгьрт у гәләк ԝәʹдә бадиһәԝа сәр ԝәʹдәдәрбазкьрьна хәрщ дькьр. Мьн дьхԝәст ԝәʹде хԝә дьһа керһати у бь биланийе дәрбаз кьм, ләма жи мьн хԝәрʹа график чекьр, кӧ һәр рʹож чь шьхӧла әз гәрәке бькьм» (Щозеф).

  Бьфькьрә: Гәло тә графикәкә ӧса хԝәрʹа чекьрийә кӧ чахе тӧ хԝә ль ве дьгьри, тӧ хԝә дьһа баш у бәхтәԝар тʹәхмин дьки?

• 

  Дина хԝә бьдә тьштед позитив. Һәрге тӧ бәрхԝә дькʹәви бона тьштед кӧ тә бәре кьрьбу у дьфькьри кӧ ахьрийеда ԝе тьштед хьраб бьԛәԝьмьн, ӧса тӧйе дьһа хәмгин би. Дәԝсе, бьфькьрә дәрһәԛа һәма дӧ йан се тьшта, бона чь тӧ шекьрдар и.

  Принсипа Кʹьтеба Пироз: «Шекьрдар бьн» (Колоси 3:15).

  «Хԝәндьна Кʹьтеба Пироз али мьн дькә жь информасийа негатив хԝә дур бьгьрьм у дина хԝә бьдьмә тьштед позитив. Әв метод гәләк һеса те кʹьфше, ле әв йәк бь рʹасти керһати йә!» (Лиза)

  Бьфькьрә: Дьԛәԝьмә тә хԝәрʹа кьрийә хәйсәт, ԝәки дәрһәԛа тьштед негатив кӧ жийина тәда дьԛәԝьмьн, бьфькьри у дина хԝә нади тьштед позитив?

• 

  Дәрһәԛа мәрьва бьфькьрә. Гава тӧ хәмгин и, жь бо дәрде хԝә һеса йә хԝә жь мәрьва дур бьгьри. Ле дәԝса ԝе йәке, бьфькьрә кӧ ча тӧ дькари али ԝан мәрьва бьки, кʹижан кӧ һʹәԝще аликʹарийе нә.

  Принсипа Кʹьтеба Пироз: «Тʹәне ль кʹара хԝә нәгәрʹьн, ле бьра һәр кәс ль кʹара һәвале хԝә жи бьгәрʹә» (Филипи 2:4).

  «Чахе әз али мәрьва дькьм, әз хԝә дьһа бәхтәԝар тʹәхмин дькьм. Гава әз дьвиньм кӧ мьн дьле ԝан ша кьр, дьле мьн жи бь шабуне тʹьжә дьбә у кем хәмгин дьбьм. Бь рʹасти, ԝәʹде мьн жи наминә кӧ бәрхԝә кʹәвьм» (Мариа).

  Бьфькьрә: Гәло жь мәрьвед кӧ тӧ нас дьки, һәнә йед ӧса кʹижан кӧ һʹәԝще аликʹарийе нә? Һәрге бәле, бьфькьрә кӧ тӧ ча дькари али ԝан бьки.

• 

  Мьԛати сьһʹәт-ԛәԝата хԝә бә. Чьԛас лазьм ә спортева мьжул бә у һеса бә. Хԝарьна керһати бьхԝә. Һәрге тӧ пәй сьһʹәт-ԛәԝата хԝә дьньһерʹи, әв йәк ԝе али тә бькә ньһерʹандьна позитив хԝәйи ки у зәʹф бәрхԝә нәкʹәви.

  Принсипа Кʹьтеба Пироз: «Һиндарийа ԛальб кери һьндьк тьшти те» (1 Тимотʹейо 4:8).

  «Әз у кӧрʹе мьн нькарьн һәрʹьн щики кӧ спортева мьжул бьн, ләма жи мә хԝәрʹа кьрийә хәйсәт кӧ һәр рʹож малда спортева мьжул бьн. Әв йәк али мә дькә хԝә баш тʹәхмин кьн у һьндава һәвда дьһа һʹәйф у бь сәбьр бьн» (Катерина).

  Бьфькьрә: Дьԛәԝьмә тәрʹа лазьмә хәйсәтед хԝәйә һьндава хԝарьне у спорте бьгӧһези ԝәки дьһа сьһʹәт-ԛәԝат би?

Гәләк мәрьв кӧ ԝан ширәта әʹмьре хԝәда данә хәбате, карьбун хәмгинийе кем кьн. Ле ӧса жи әԝана дьлрʹьһʹәт бун гава жь Кʹьтеба Пироз дәрһәԛа ахьрийа баш пеһʹәсийан. Бьньһерʹьн готар «Пʹадшатийа Хԝәде ԝе Чь Бькә?»