Шьхӧлкʹарийа Тʹәви Хwәде Шабунәкә Мәзьн Тинә

1. Йаһоwа чьрʹа йед дьн тʹәглиф дькә кӧ тʹәви wи бьхәбьтьн, нә әw Хwәдайе Һьмзор ә?

ЙАҺОWА Хwәдайе Һьмзор, Әʹфьрандаре һʹәму тьшти йә, у билани у qәwата беһʹәсаб тʹәне йа Wи йә. Чахе Йаһоwа али Ибо кьр кӧ әwе йәке фәʹм кә, Ибо гьлийед ӧса wирʹа гот: «Тӧ дькари һәр тьшти бьки, әз пе дьзаньм у мьразәки тә жи найе сәкьнандьн» (Иб. 42:2). Әм заньн кӧ Йаһоwа дькарә бе аликʹарийа тʹӧ кәси, бинә сери һәр тьшти чь кӧ әw бьхwазә бькә. Ле жь бо һʹьзкьрьне әw йед дьнена тʹәглиф дькә кӧ тʹәви wи бьхәбьтьн, сәва кӧ qьрара wи бе сери.

2. Йаһоwа Кӧрʹе хwә тʹәглиф кьр кӧ кʹижан шьхӧле фәрз бькә?

² Әʹфьрине Хwәдейи пешьн, Кӧрʹе wи бу. Йаһоwа изьн да Кӧрʹе хwә, wәки дь әʹфьрандьна һәр тьштед дьнда әw али wи бькә (Йуһʹн. 1:1-3, 18). Дәрһәqа Иса Паwлос ньвиси: «Бь дәсте wи һәр тьштед ль әʹрд у әʹзмана әʹфьринә, чь кӧ хӧйа дьбьн, чь кӧ хӧйа набьн, һәгәр кʹӧрси йан хӧданти бьн, һәгәр сәрwерти йан һʹӧкӧмәти бьн, һәр тьшт бь дәсте wи у бона wи әʹфьринә» (Колс. 1:15-17). Йаһоwа нә кӧ тʹәне qәдьрәки мәзьн да Кӧрʹе хwә кӧ әʹфьрандьнеда кʹар бькә, ле әwи ӧса жи рола wийә фәрз йед дьненарʹа әʹйан кьр.

3. Йаһоwа Адәм тʹәглиф кьр кӧ чь бькә у чьрʹа?

³ Йаһоwа ӧса жи мәрьв тʹәглиф кьрьн, кӧ тʹәви wи шьхӧлкʹарийе бькьн. Мәсәлә, әwи изьн да Адәм, кӧ нав бьдә сәр һʹәйwана (Дәстп. 2:19, 20). Адәм шабунәкә мәзьн дьстанд, чахе пәй һʹәйwана дьньһерʹи, сәва кӧ дәрһәqа wан рʹьнд бьзаньбә у сафи кә һәла чь нави бьдә сәр кʹижани. Йаһоwа хwәха дькарьбу әw йәк бькьра, чьмки әwи һʹәйwан әʹфьрандийә. Ле йәкә, Йаһоwа бь һʹьзкьрьне изьн да Адәм сәва кӧ нав бьдә сәр һʹәйwана. Хwәде ӧса жи изьн да Адәм кӧ тʹәмамийа әʹрде бькә щьнәт (Дәстп. 1:27, 28). Ле йазьх, Адәм сафи кьр кӧ шьхӧлкʹарийе тʹәви Хwәде нәкә, жь бо wе йәке әwи qәзийа һьн хwәрʹа, һьн жи зӧрʹәта хwәрʹа ани (Дәстп. 3:17-19, 23).

4. Чаwа йед дьн тʹәви Хwәде шьхӧлкʹари дькьрьн сәва кӧ qьрара wи биньн сери?

⁴ Паше Йаһоwа мәрьвед дьн тʹәглиф дькьр, сәва кӧ тʹәви wи бьхәбьтьн. Нӧһ гәми ава кьр, сәва кӧ хwә у малбәта хwә wәʹде Селафе хьлаз кә. Муса щьмәʹта Исраел жь Мьсьре аза кьр. Йешу әw щьмәʹт бьрә Әʹрде Создайи. Сьлеман дь Оршәлимеда пʹарьстгәһ ава кьр. Мәрйәм бу дийа Иса. Һәр жь wан хьзмәткʹаред амьн у гәләкед дьн тʹәви Хwәде шьхӧлкʹари дькьрьн, сәва кӧ qьрара wи биньн сери.

5. Дь кʹижан шьхӧлида әм дькарьн кʹар бькьн, у гәло Йаһоwа һʹәwще аликʹарийа мә бу? (Бьньһерʹьн шькьле әʹwльн.)

⁵ Рʹожа иройин, Йаһоwа мә тʹәглиф дькә, wәки әм бь тʹәмами пьштгьрийа Пʹадшатийа wи бькьн. Иро щурʹә-щурʹә хьзмәткьрьн һәйә. Рʹаст ә һʹәму Мәсиһи нькарьн бь щурʹәки Хwәдерʹа хьзмәт кьн, ле һәр кәс жь мә дькарә мьзгина Пʹадшатийе бәла кә. Һьлбәт, Йаһоwа һʹәwщә нибу әwи шьхӧли бьдә мә. Әwи дькарьбу тʹәви мәрьва жь әʹзмен хәбәр да. Иса гот wәки Йаһоwа дькарьбу ӧса бькьра, кӧ һәла һе кәвьр жи wе бькьрана qирʹин дәрһәqа Пʹадшайе Пʹадшатийа Хwәде (Луqа 19:37-40). Ле йәкә Йаһоwа изьне дьдә мә wәки әм «һәвпаред» wи бьн (1 Корн. 3:9). Паwлосе шанди ньвиси: «Әм жи чаwа һәвал-хәбатед Хwәде иди һиви жь wә дькьн, йед кӧ кʹәрәма Хwәде стандьнә, нәһельн кӧ әw кʹәрәм бефәйдә бә» (2 Корн. 6:1). Әw qәдьрәки мәзьн ә кӧ Йаһоwа мә тʹәглиф кьрийә сәва кӧ тʹәви wи шьхӧлкʹарийе бькьн. Wәрен бьньһерʹьн чәнд мәʹнийа, кӧ чьрʹа әw йәк мәрʹа шабунәкә мәзьн тинә.

ШЬХӦЛКʹАРИЙА ТʹӘВИ ХWӘДЕ ШАБУНӘКӘ МӘЗЬН МӘРʹА ТИНӘ

6. Ча Кӧрʹе Хwәде әʹйан кьр, кӧ әwи чь тʹәхмин дькьр чахе тʹәви Баве хwә шьхӧлкʹари дькьр?

⁶ Шьхӧлкʹарийа тʹәви Йаһоwа, шабунәкә мәзьн дьани хьзмәткʹаред wирʹа. Кӧрʹе Хwәдейи тайе тʹәне пешийа wе йәке кӧ бьһата сәр әʹрде, ӧса гот: «Хӧдан дь дәстпека рʹейа хwәда хwәдийе мьн бу . . . Әз бь сәр һостәйи ль щәм wи бум у әз рʹож бь рʹож, бь кʹефхwәшийе вә тʹьжи бум, ль бәр wи, һәртʹьм бь щошийе вә кʹәтьм» (Мәтʹлк. 8:22, 30). Чахе Иса шьхӧлкʹари дькьр тʹәви Баве хwә, әw гәләк ша дьбу чьмки әwе йәке бькә, у заньбу кӧ Йаһоwа wи һʹьз дькә. Ле чь әм дькарьн бежьн дәрһәqа мә?

7. Чьрʹа шьхӧле бәлакьрьна мьзгине шабуне мәрʹа тинә?

⁷ Иса гот кӧ мәрьв бәхтәwар дьбә чахе дьдә у чахе дьстинә (Кʹар. Шанд. 20:35). Чахе әм рʹастийа дәрһәqа Хwәде пеһʹәсийан, әм гәләк ша бун, у әм шабуне дьстиньн гава әм әве рʹастийе бәла дькьн. Чахе әм мәрьварʹа рʹастийа Кʹьтеба Пироз гьли дькьн, әм дьвиньн чаwа әwана бь емосийа у бь рʹазибуне тʹьжә дьбьн һьндава Хwәде у рʹастийа wи кӧ Хәбәра wида йә. Бәлакьрьна мьзгина Хwәде гәләк фәрз ә бона әʹмьр. Әw рʹийа жийина һʹәта-һʹәтайе вәдькә бона wан мәрьва, кʹе кӧ һазьр ә незики Хwәде бә (2 Корн. 5:20). Әм чахе шьхӧле бәлакьрьна мьзгине дькьн, әм шабунәкә мәзьн дьстиньн, чьмки бь сайа wи шьхӧли мәрьв дькарә әʹмьре һʹәта-һʹәтайе бьстинә.

8. Һьнәк чь дьбежьн дәрһәqа wе шабуне, кʹижан кӧ wана дьстанд дь шьхӧлкʹарийа тʹәви Йаһоwада?

⁸ Чахе әм али мәрьва дькьн кӧ дәрһәqа Хwәде пебьһʹәсьн, әм ша нә кӧ бь wе йәке әм дьле Йаһоwа ша дькьн у ӧса жи кӧ әw qимәт дькә qәwата мә кӧ әм дьдьнә хәбате дь хьзмәткьрьнеда. (Бьхунә 1 Корьнтʹи 15:58.) Марко кʹижан дь Италйайеда дьжи, дьбежә: «Әз шабунәкә мәзьн дьстиньм, чахе әз йа һәрә баш дьдьмә Йаһоwа, нә кӧ wан кʹе дькарә зу бир кә». Ӧса жи Франко кʹижан кӧ дь Италйайеда хьзмәт дькә, дьбежә: «Йаһоwа бь Хәбәра хwә у бь хwарьна рʹӧһʹани, һәр рʹож дькә бира мә кӧ әw мә һʹьз дькә. У һәр тьште кӧ әм бона wи дькьн фәрз ә бона wи, wи чахи жи чахе әм дьфькьрьн кӧ кьрьна мә qә тьштәк нинә. Ләма жи әз бәхтәwар ьм кӧ тʹәви Йаһоwа шьхӧлкʹарийе дькьм у нета әʹмьре мьн жи һәйә».

ШЬХӦЛКʹАРИЙА ТʹӘВИ ХWӘДЕ МӘ НЕЗИКИ WИ У ЙЕД ДЬНЕНА ДЬКӘ

9. Чь һәләqәти һәбу ортʹа Йаһоwа у Иса, у чьрʹа?

⁹ Чахе әм шьхӧлкʹарийе дькьн тʹәви wан кʹижана әм һʹьз дькьн, әм һе незики wан дьбьн, у һе гәләк педьһʹәсьн дәрһәqа wан у һʹӧнӧред wан. Һьн жи әм педьһʹәсьн дәрһәqа нетед wан, у ӧса жи кӧ әwана ча дьхwазьн нетед хwә биньн сери. Иса тʹәви Йаһоwа wәкә милиард сала шьхӧлкʹари дькьр. Һʹьзкьрьна wан у һәләqәтийа wан һьндава һәвдӧ, ӧса qәwи дьбу кӧ тʹӧ тьшти нькарьбу зийане бьда һәләqәтийа wан. Иса гот: «Әз у Бав йәк ьн» (Йуһʹн. 10:30). Иса бь wан гьлийа да кʹьфше кӧ һәләqәтийа wи тʹәви Баве wи чьqас незик ә. Wана жь ве һәләqәтийа незик, шабун дьстандьн у тʹәвайи әʹдьлайеда шьхӧлкʹари дькьрьн.

10. Чьрʹа хьзмәткьрьн мә незики Йаһоwа у йед дьнена дькә?

¹⁰ Иса дӧайе хwәда жь Йаһоwа һиви дькьр, кӧ шагьртед wи хwәй кә. Ле мәʹни чь бу? Әwи дӧайе хwәда ӧса гот: «Wәки бьбьн йәк, чаwа әз у тӧ йәк ьн» (Йуһʹн. 17:11). Һәрге әм тʹәмийед Хwәде биньн сери у дь хьзмәткьрьнеда кʹар бькьн, әме бькарьбьн пебьһʹәсьн дәрһәqа һʹӧнӧред wийи баш. У ӧса жи дәрһәqа wе йәке, чьрʹа әм гәрәке баwәрийа хwә wи биньн у пәй рʹебәрийа wи һәрʹьн. Һәрге әм незики Хwәде бьн, әw жи wе незики мә бә. (Бьхунә Аqуб 4:8.) Әме ӧса жи бькарьбьн незики хушк-бьра бьн, чьмки әм жи wәк wан рʹасти щерʹьбандьна у шабуне тен, у нете мә жи йәк ьн. Бәле, әм тʹәвайи дьхәбьтьн, тʹәвайи ша дьбьн, у тʹәвайи сәбьр дькьн. Октавиа кʹижан кӧ дь Британйайеда дьжи, дьбежә: «Шьхӧлкʹарийа тʹәви Йаһоwа мьн һе зәʹф незики йед дьн дькә, чьмки һәвалтийа мьн тʹәви wан нә кӧ тʹәне әw ә кӧ әз wана нас дькьм, ле нет у мәрәмед мә йәк ьн». Тӧ жи ӧса дьфькьри? Дьбәкә тӧ жи тʹәхмин дьки кӧ тӧ ләма незики йед дьн дьби, чьмки дьвини кӧ әwана гәләк qәwате хәрщ дькьн сәва кӧ дьле Йаһоwа ша кьн.

11. Чьрʹа дьнйа тʹәзәда әме һе незики Йаһоwа у хушк-бьра бьн?

¹¹ Рʹаст ә һʹьзкьрьна мә һьндава Хwәде у хушк-бьра ньһа qәwи йә, ле дьнйа тʹәзәда wе һе qәwи бә. Бьдә бәр чʹәʹве хwә әwе хәбате, кʹижан кӧ дь ахьрийеда һивийа мә йә! Wедәре wе мәрьв жь мьрьне рʹабьн, әме бь шабуне рʹасти wан бен у дәрһәqа Йаһоwа wана һин кьн. Әме әʹрде бькьнә щьнәт. Әw шьхӧл нә һеса нә, ле әw йәк wе шабунәкә мәзьн бә, чьмки әме тʹәвайи бьхәбьтьн у бәрбь беqьсуртийе һәрʹьн бьн Пʹадшатийа Хwәдеда! Мәрьв wе незики һәвдӧ у незики Хwәдейе хwә бьн, кʹижан кӧ wе «дахwаза һәр жийандари бь щиһ» бинә (Зәб. 145:16, ИМ).

ШЬХӦЛКʹАРИЙА ТʹӘВИ ЙАҺОWА МӘ ХWӘЙ ДЬКӘ

12. Чьда шьхӧле хьзмәткьрьне мә хwәй дькә?

¹² Әм гәрәке рʹӧһʹанийа хwә хwәй кьн. Чьмки әм дьжин ве дьнйайеда кӧ бьн һʹӧкӧме Шәйтʹанда йә, у һьн жи әм гӧнәкʹар ьн, ләма жи һеса дькарьн дәстпекьн нәрʹаст бьфькьрьн у бьжин ӧса ча әв дьнйа. Әм дькарьн рʹӧһʹе wе дьнйайе бәрамбәри чʹем бькьн, кʹижан кӧ мә дькʹьшинә ль wедәре, кʹидәре кӧ әм нахwазьн һәрʹьн. Сәва кӧ ава чʹем мә нәбә алики дьн, әм гәрәке хwә аве хьн мьqабьли qәwата аве. Бь wи щурʹәйи әм гәрәке qәwате бьдьнә хәбате, сәва кӧ рʹӧһʹе wе дьнйайе мә нәбә алики дьн. Wәʹде хьзмәтийе, әм дина хwә дьдьн сәр тьштед рʹӧһʹани кӧ керһати нә, нә кӧ сәр wан тьшта кʹижан кӧ дькарьн баwәрийа мә сьст кьн (Фили. 4:8). Бәлакьрьна мьзгине баwәрийа мә һе qәwи дькә, у дькә бира мә дәрһәqа созед Хwәде у принсипед wийи бь һʹьзкьрьн. Әw йәк ӧса жи али мә дькә кӧ һащәте хwәйә рʹӧһʹани хwәй кьн. (Бьхунә Әфәси 6:14-17.)

13. Хушкәк жь Австралйайе чь дьшьрмиш дьбә дәрһәqа хьзмәткьрьне?

¹³ Һәрге әм дь хьзмәткьрьнеда у шьхӧлед дьнә рʹӧһʹанида кʹар бькьн, wи чахи wе wәʹде мә тʹӧнә бә хәм кьн дәрһәqа проблемед хwә, у әw йәк али мә дькә кӧ әм хwә хwәй кьн. Щоел, кӧ дь Австралйайеда дьжи дьбежә: «Шьхӧле бәлакьрьна мьзгине али мьн дькә wәки бь реали сәр тьшта бьньһерʹьм. Әв тинә бира мьн кӧ мәрьв һʹаләки чьqас хьрабда ньн у әз чь кʹаре дьстиньм чахе бь принсипед Хwәде дьжим. Шьхӧле хьзмәткьрьне али мьн дькә кӧ мьлук бьм, у ӧса жи мәщале дьдә мьн кӧ итʹбарийа хwә Йаһоwа у хушк-бьра биньм».

14. Әw йәк кӧ әм бәрдәwам дькьн хьзмәт кьн, ча дьдә кʹьфше кӧ рʹӧһʹе Хwәдейи пироз тʹәви мә йә?

¹⁴ Бәлакьрьна мьзгине баwәрийа мә qәwи дькә кӧ рʹӧһʹе Хwәдейи пироз тʹәви мә йә. Бьфькьрә сәр wе мәсәле: Тәрʹа хәбат дан кӧ тӧ мьһалада нан бәла ки. Ле тӧйе сәва ве хәбате у хәрще хwә пʹәра нәстини. Хенщи wе йәке, тӧ дьвини кӧ гәләк мәрьв әwи нани нахwазьн, у һәла һе һьнәк жи тә нәфрʹәт дькьн жь бо wе йәке кӧ тӧ әwи нани бәла дьки. Тәйе һʹәта кʹәнге әw хәбат бькьра? Жь бо реаксиа мәрьвайә нәбаш тӧйе дьлтәнг буйайи, у wе qәwата тә тʹӧнә буйа кӧ әw хәбат бәрдәwам кьра. Ле әм дәрһәqа хwә дькарьн бежьн, кӧ гәләк жь мә сал бь сал бәрдәwам дькьн бь хәрще хwә хьзмәт дькьн, у наньһерʹьн сәр пәйкʹәтьн у qәрфе мәрьвед бешекьр. Ле гәло әw йәк избат накә кӧ рʹӧһʹе Хwәдейи пироз сәр мә йә?

ШЬХӦЛКʹАРИЙА ТʹӘВИ ХWӘДЕ ДЬДӘ КʹЬФШЕ ҺʹЬЗКЬРЬНА МӘ ҺЬНДАВА WИ У ЙЕД ДЬН

15. Чаwа бәлакьрьна мьзгине гьредайи йә тʹәви qьрара Хwәде бона инсанәте?

¹⁵ Бәлакьрьна мьзгине гьредайи йә тʹәви qьрара Хwәде бона инсанәте. Qьрара wи әw бу кӧ мәрьв әʹрде тʹьжә кьн у тʹӧ щар нәмьрьн. Рʹаст ә Адәм гӧнә кьр, ле йәкә qьрара Хwәде нәһатә гӧһастьне (Иша. 55:11). Хwәде ӧса кьр кӧ әм жь гӧнә у мьрьне аза бьн. Сәва кӧ qьрара Хwәде бе сәри, Иса һатә сәр әʹрде у әʹмьре хwә бона мәрьвед гӧһдар да. Ле мәрьвед гӧһдар гәрәке фәʹм бькьн кӧ Хwәде жь wана чь дәʹwа дькә. Ләма жи Иса мәрьв ӧса жи һин дькьрьн, кӧ Хwәде чь жь wан дәʹwа дькә, у тʹәми да кӧ шагьрте wи жи әве йәке бькьн. Гава әм али мәрьва дькьн незики Хwәде бьн, әм шьхӧлкʹарийе дькьн кӧ qьрара wи бе сери, демәк кӧ мәрьв хьлаз бьн жь гӧнә у мьрьне.

16. Ча шьхӧле бәлакьрьна мьзгине гьредайи йә тʹәви тʹәмийед Хwәдейә һәри мәзьн?

¹⁶ Чахе әм али мәрьва дькьн сәва кӧ әwана рʹийа һʹәта-һʹәтайе бьвиньн, бь wе йәке әм нишан дькьн һʹьзкьрьна хwә һьндава wан у Йаһоwа, кʹижан кӧ «дьхwазә һʹәму мәрьв хьлаз бьн у рʹастийе нас кьн» (1 Тимтʹ. 2:4). Чахе йәк жь qанунзана жь Иса пьрси кӧ qанунеда кʹижан ә тʹәмийа һәрә мәзьн, Иса гот: «‹Хӧдан Хwәдейе хwә һʹьз бькә бь тʹәмамийа дьле хwә, бь тʹәмамийа щанийа хwә у бь тʹәмамийа һʹьше хwә›. Әв ә тʹәмийа пешьн у һәрә мәзьн. У йа дӧда жи мина ве йә: ‹Һәвале хwә wәкә хwә һʹьз бькә›». (Мәт. 22:37-39). Чахе әм шьхӧле бәлакьрьна мьзгине дькьн, бь wе йәке әм нишан дькьн гӧһдарикьрьна хwә һьндава wан тʹәмийед Хwәде. (Бьхунә Кʹаред Шандийа 10:42.)

17. Һун чь дьфькьрьн дәрһәqа wи qәдьри кӧ әм дькарьн мьзгине бәла кьн?

¹⁷ Кʹәрәмәкә чьqас мәзьн ә кӧ Йаһоwа мәрʹа шьхӧләки ӧса дайә, кʹижан кӧ шабуне мәрʹа тинә, мә незики wи у йед дьнена дькә у рʹӧһʹанийа мә хwәй дькә. Һьн жи әw шьхӧл мәщале дьдә мә, кӧ әм һʹьзкьрьна хwә Хwәдерʹа у йед дьненарʹа бьдьнә кʹьфше. Нав тʹәмамийа дьнйайе щьмәʹта Хwәде щурʹә-щурʹә һʹалада дьжин, ле фьрqи тʹӧнә йә әw щаһьл ьн йан әʹмьрда мәзьн ьн, дәwләти нә йан кʹәсиб ьн, qәwи нә йан сьст ьн, йәке әwана һʹәму тьшти дькьн сәва кӧ мәрьв дәрһәqа мьзгине пебьһʹәсьн. Дьqәwьмә һун жи ӧса тʹәхмин дькьн чаwа кӧ Шантел, кʹижан дь Франсайеда дьжи. Әw дьбежә: «Кәсе Һәри Зор дь гәрдунеда, Әʹфьрандаре һʹәму тьшти, Хwәдейе шабуне, дьбежә мьн: ‹Һәрʹә! Хәбәрдә! Хәбәрдә дәрһәqа мьн, бь дьл у щан хәбәрдә. Әз дьдьмә тә qәwате, Хәбәра хwә Кʹьтеба Пироз, һәвалхәбаткарʹед сәр әʹзмана у сәр әʹрде, һинкьрьн, у рʹебәри wәʹдәда›». Бь рʹастийе жи, qәдьрәки чьqас мәзьн ә бона мә, кӧ әм wан тьшта дькьн, чь кӧ Йаһоwа жь мә дьхwазә у тʹәви wи шьхӧлкʹарийе дькьн!