Тӧ Дькари Йәктийа Мәйә Мәсиһити Qәwи ки Чь Щурʹәйи?
«Жь wи тʹәмамийа бәдәне һәвва нә у һʹәму жи бь севька һәвва гьредайи нә» (ӘФӘС. 4:16).
1. Жь дәстпека әʹфьрандьнеда шьхӧлед Хwәде ча дьһатьнә кьрьне?
ДӘСТПЕБУНА әʹфьрандьнеда Йаһоwа у Иса йәктийеда бун. Йаһоwа пешийа һәр тьшти Иса әʹфьранд. Ле һʹәму тьштед дьн Хwәде тʹәви Иса әʹфьранд. Иса гот: «Әз рʹож бь рʹож, бь кʹефхwәшийева тʹьжи бум, ль бәр wи» (Мәтʹлк. 8:30). Бав у Кӧрʹ тʹәви һәв һәвкʹари дькьрьн, wана щурʹә-щурʹә бинбәред дьн жи әʹфьрандьн чь кӧ иро әм дьвиньн. Әw йәкти ӧса жи дьһатә кʹьфше нава хьзмәткʹаред Хwәдеда. Мәсәлә, чахе Нӧһ тʹәви нәфәред хwә гәми ава дькьр. Ӧса жи, чахе щьмәʹта Хwәде ль бәрʹийеда щигӧһасти дьбун, тʹәвайи Коне Пироз тʹоп дькьрьн, һәвдәрдьхьстьн, у щигӧһасти дькьрьн. Әw һәвкʹари һьн жи һәбу чахе пʹарьстгәһеда тʹәвайи пәсьне Йаһоwа дьдан бь кʹьлама у һащәтед музикайе. Әw һәр тьшт щьмәʹта Хwәде дькарьбу бькьра, чьмки йәкти нав wанда һәбу (Дәстп. 6:14-16, 22; Жьмар 4:4-32; 1 Дир. 25:1-8).
2. а) Бь чь әʹйан бу щьвата Мәсиһитийә пешьн? б) Дь ве тʹемайеда кʹижан пьрс wе бенә шьровәкьрьне?
2 Qьрʹна йәкеда щьвата Мәсиһитийә пешьн жи йәктийеда бу. Әw щьват бьн рʹебәрийа Сәре щьвате, демәк Иса Мәсиһда бу. Паwлосе шанди шьровәкьр, кӧ рʹаст ә «щурʹә-щурʹә пʹешкʹешед» Мәсиһийед рʹункьри һәнә у ӧса жи «щурʹә-щурʹә qӧльх», «щурʹә-щурʹә карин», ле йәкә әw һʹәмушк пʹарәкә бәдәнәке нә, демәк әwана йәктийеда ньн. (Бьхунә 1 Корьнтʹи 12:3-6, 12.) Ле чь әм дькарьн бежьн дәрһәqа рʹожа иройин? Ча әм дькарьн йәктийеда бьн шьхӧле бәлакьрьна мьзгинеда? У әм ча дькарьн һәвкʹарийе бькьн щьватеда у ӧса жи малбәтеда?
ЙӘКТИ БӘЛАКЬРЬНА МЬЗГИНЕДА
3. Йуһʹәннайе шанди чь дитьнок дит?
3 Qьрʹна йәкеда Д.М., Йуһʹәннайе шанди дитьнок дит дәрһәqа һʹәфт мьлйакʹәта, кӧ жь wан һәр кәси дәнге борʹийе дьһат. Чахе мьлйакʹәте пенща борʹийе хьст, Йуһʹәнна «стәйркәк» дит жь әʹзмен кʹәти сәр рʹуйе әʹрде. Бал wи стәйрки һәбу кʹьлита дәре гәлийе һәйwайе. Әwи дәре гәлийе һәй-wайе вәкьр, у ду-духан дәркʹәт у жь wе ду-духане кӧли дәркʹәтьн. Әw кӧлийед симболик, дәwса кӧ зийане бьдьнә шинкайе, әwана зийане дьдьнә «wан мәрьвед кӧ мора Хwәде ль сәр әʹнийа wан тʹӧнәйә» (Әʹйан. 9:1-4). Бешьк, Йуһʹәнна заньбу wәки кӧли зийана мәзьн дькарьн биньн. Нә һена Мусада, wәʹде бәлаки, кӧлийа тʹәмамийа wәлате Мьсьре гьрт (Дәркʹ. 10:12-15). Әw кӧлийед симболик, кʹижан кӧ Йуһʹәнна дит, тенә һʹәсабе Мәсиһийед рʹункьри, йед кӧ рʹелигийед qәлпрʹа әʹлам дькьн дәрһәqа диwана Йаһоwа. Милйона мәрьв баwәрийа кʹижана һәйә кӧ бьжин ль сәр әʹрде, wи шьхӧлида тʹәви wан ьн. Тʹәви һәв әwана хьзмәткьрьнеда һәвкʹарийе дькьн. У әw йәк али гәләк мәрьва дькә, кӧ рʹелигийа qәлп бьһельн у хwә жь һʹӧкӧме Шәйтʹан хьлаз бьн!
4. Щьмәʹта Хwәде чь шьхӧли гәрәке бинә сери, у кʹижан рʹекә тʹәк һәйә wәки әwи шьхӧли биньн сери?
4 Щьмәʹта Йаһоwарʹа тʹәми һатийә дайине, wәки «мьзгинийа Пʹадшатийе» бәла кьн нав тʹәмамийа дьнйайеда, һʹәта хьлази нәһатийә (Мәт. 24:14; 28:19, 20). Әw йәк те һʹәсабе тʹәглиф кьн wан йед кӧ «тʹи» нә, сәва кӧ «ава жийине» беһәq бьстиньн (Әʹйан. 22:17). Чаwа әндәмед щьвата Мәсиһити, әм ча дькарьн һе пешда һәрʹьн wе йәкеда? Әме бькарьбьн пешда һәрʹьн, һәрге йәктийе хwәй кьн у щьватеда һәвкʹарийе бькьн (Әфәс. 4:16).
5, 6. Әм ча йәктийеда ньн чахе мьзгине бәла дькьн?
5 Сәва кӧ чьqас дькарьн гәләкарʹа мьзгине бәла кьн, әм гәрәке пешда хwә һазьр кьн бона хьзмәткьрьне. Ве йәкеда али мә дькьн рʹебәрийед кӧ әм щьвата хwәда дьстиньн. Паши щьвата даннасинкьрьне, әм дьчьнә хьзмәткьрьне у мәрьварʹа гьли дькьн дәрһәqа мьзгина Пʹадшатийе. Әм ӧса жи wанрʹа бәла дькьн әʹдәбйәтед сәр һʹиме Кʹьтеба Пироз. Щара рʹебәрийе дьдьнә мә кӧ кампанйед хьзмәткьрьнеда кʹар бькьн. Чахе һун кʹар дькьн wан кампанйада, бь ве йәке һун йәктийеда ньн тʹәви милйона хушк у бьра, йед кӧ әве мьзгине бәла дькьн. Һьн жи, һун һәвкʹарийе дькьн тʹәви мьлйакʹәта, йед кӧ али щьмәʹта Хwәде дькьн бәлакьрьна мьзгинеда (Әʹйан. 14:6).
6 Чахе әм кʹьтеба «Һәрсалида» дьхуньн кӧ шьхӧле мәйи бәлакьрьна мьзгине чь кʹаре тинә, әw йәк мәрʹа шабуне тинә! Ӧса жи бьфькьрьн, дәрһәqа йәктийа мә чахе тʹәвайи нав тʹәмамийа дьнйайеда бәла дькьн тʹәглифкьрьнед сәр щьватед мәзьн. Сәр wан щьвина әм готаред һеланкьрьне дьбьһен, ӧса жи драма у тʹәмаша дьньһерʹьн. Әw һʹәму тьшт дьдьнә кʹьфше, кӧ ча Хwәде бь һʹьзкьрьне мә тʹәглиф дькә, wәки бь тʹәмамийа дьле хwә wирʹа хьзмәт кьн. Евара Биранина мьрьна Иса жи мә дькә йәктийе. Әм һәр сал 14 Нисане паши кӧ рʹо дьчә ава, тʹоп дьбьн сәва бьдьнә кʹьфше рʹазибуна хwә бона дьлрʹәʹмийа Хwәде һьндава мә, у ӧса жи бьдьнә кʹьфше гӧһдарибуна хwә һьндава тʹәмийа Иса (1 Корн. 11:23-26). Ле нә кӧ тʹәне йед ньхӧманди дькарьн бен сәр ве qәwьмандьне. Чәнд һʹәфти пешийа Евара Биранине әм дәртен хьзмәткьрьне, сәва кӧ чьqас дькарьн гәләк мәрьва тʹәглиф кьн сәр wе qәwьмандьна мәхсус.
7. Чахе әм тʹәвайи һәвкʹарийе дькьн, әм чь дькарьн бькьн?
7 Кӧлик тʹәне нькарә тьштәки мәзьн бькә. Ӧса жи мәрьвәк тʹәне нькарә һʹәму мәрьварʹа мьзгине бәла кә. Ләма жи әм тʹәви һәв һәвкʹарийе дькьн, сәва кӧ али милйона мәрьва бькьн әwана нас кьн wи, кʹе кӧ һежайи пәсьна у шькьрийе йә. Әw һәйә Йаһоwа! Ле мәщалед дьн жи һәнә бь чь жи әм дькарьн тʹәви щьмәʹта Хwәде йәктийеда бьн.
ЙӘКТИ ЩЬВАТЕДА
8, 9. а) Паwлос чь мәсәлә ани сәва кӧ Мәсиһийа һин кә wәки әwана йәктийеда бьн? б) Әм ча дькарьн һәвкʹарийе бькьн щьватеда?
8 Паwлос нәʹма хwәда Әфәсийарʹа шьровәкьр, ча щьват сазкьри йә у лазьм ә щьватеда гьшк «һәр алийада бьгьһижьн». (Бьхунә Әфәси 4:15, 16.) Паwлос мәсәлә ани дәрһәqа бәдәне, сәва бьдә кʹьфше кӧ һәр Мәсиһи дькарә щьватеда йәктийе хwәй кә, кʹидәре Иса Мәсиһ рʹебәрийе дькә. Паwлос ӧса жи гьли дькә дәрһәqа һәвкʹарийа һәр «севька», кʹижан кӧ гәләк лазьм ьн. Ле ча һәр кәс жь мә, фьрqи тʹӧнә щаһьл йан мәзьн, qәwи йан сьст, дькарә йәктийе бькә щьвате?
9 Әме бькарьбьн, һәрге әм qәдьре wан дьгьрьн, йед кӧ Иса кʹьфш кьр, сәва әwана щьватеда рʹебәрийе бькьн. Әw һәнә рʹуспи (Ибрн. 13:7, 17). Рʹаст ә щарна әw йәк чәтьн ә. Ле әм дькарьн жь Хwәде рʹебәрийе һиви кьн. Рʹӧһʹе wийи пироз дькарә али мә бькә кӧ бь дьл у щан аликʹарийе бьдьн щьвате. Һәрге һʹәwаса мә тʹӧнә кӧ пәй рʹебәрийе һәрʹьн кʹижан кӧ әм щьватеда дьстиньн, әм гәрәке бьфькьрьн һәрге әм бь мьлукти һәвкʹарийе бькьн, әме йәктийе бькьнә щьвате. Хенщи wе йәке, һәвкʹарийа ӧса али мә бькә кӧ һʹьзкьрьна хwә һе мәзьн кьн.
10. Ча бәрдәстийе щьвате аликʹарийе дьдьн кӧ йәкти һәбә щьватеда? (Бьньһерʹә шькьле әʹwльн.)
10 Бәрдәстийе щьвате жи аликʹарийе дьдьн кӧ йәкти щьватеда һәбә. Фьрqи тʹӧнә әw бьра чәнд сали нә, әwана бь дьл у щан хьзмәтийеда рʹӧһʹе хwәqӧрбанкьрьне дьдьнә кʹьфше, сәва кӧ һʹәмуйарʹа кʹаре биньн. Мәсәлә әwана али рʹуспийа дькьн кӧ бьньһерʹьн һәла әʹдәбйәтед бона бәлакьрьне щьватеда тʹере дькьн йан на. Хенщи wе йәке, әwана аликʹари дьдьн бона тʹәмьзайа Ода Щьвата у хwәйкьрьна ве. Әwана ӧса жи дьсәкьньн у слав дькьн һʹәмуйа кʹе те щьвате. Әм чахе тʹәви wан бьра һәвкʹарийе дькьн, әм йәктийе хwәй дькьн у Йаһоwарʹа бь организә хьзмәт дькьн. (Бәрамбәр кьн Кʹаред Шандийа 6:3-6.)
11. Бьред щаһьл ча дькарьн аликʹарийе бьдьн кӧ щьватеда йәкти һәбә?
11 Гәләк бьред щабдар бь сала щьватеда хьзмәт дькьн. Әwана дьqәwьмә ида нькарьн һаqаси бькьн чьqас кӧ бәре дькьрьн, чьмки әʹмьрда мәзьн ьн. Ле бьред щаһьл дькарьн бьбьнә аликʹарчи бона wан. Әwана дьбәкә щерʹьбанди ниньн, ле дькарьн бенә һинкьрьне, сәва һе зедә щабдарийа һьлдьнә сәр хwә. Чьqас баш ә чахе бәрдәстийе щьвате дьхәбьтә кӧ пешда һәрʹә у бьбә рʹуспи! (1 Тимтʹ. 3:1, 10). Һьнәк рʹуспийед щаһьл пешда чунә у дькарьн хьзмәт кьн ча бәрпьрсийаред мьһале, сәва кӧ гәләк щьватада али хушк-бьра бькьн. Әм гәләк рʹази нә кӧ әw бьред щаһьл һазьр ьн аликʹарийе бьдьн. (Бьхунә Зәбур 110:3; Wаиз 12:1.)
ЙӘКТИ МАЛБӘТЕДА
12, 13. Чь дькарә али нәфәред малбәте бькә сәва кӧ тʹәви һәв һәвкʹарийе бькьн?
12 Ньһа wәрә әм шеwьр кьн, ча әм дькарьн малбәтеда һәвкʹарийе бькьн, сәва йәкти һәбә малбәтеда. Гәләка тʹәхмин кьрьнә чахе Qӧльхкьрьна тʹәви Малбәте һәр һʹәфти дәрбаз дьбә, һәләqәтийа ортʹа щаһьла у мәзьна qәwи дьбә. Wәʹде ве щьвине, әм дәрһәqа тьштед рʹӧһʹани хәбәрдьдьн, у әw йәк йәктийе дькә малбәте. Чахе малбәт пешда хwә һазьр дькә бона хьзмәткьрьне, әw йәк али малбәте дькә кӧ мьзгине һе рʹьнд бәла кьн. У чахе әwана тʹәвайи дәрһәqа рʹастийе хәбәрдьдьн, у дьвиньн wәки гьшк малбәтеда Йаһоwа һʹьз дькьн у дьхwазьн дьле wи ша кьн, әwана һе незики һәв дьбьн.
Qӧльхкьрьна тʹәви малбәте һәләqәтийа ортʹа щаһьла у мәрьвед әʹмьрда мәзьн qәwи дькә (Бьньһерʹә абзаса 12, 15)
13 Щотед зәwаще чь дькарьн бькьн, сәва кӧ тʹәви һәв һәвкʹарийе бькьн, у пәсьне Йаһоwа бьдьн? Һәрге һәр йәк жь щотед зәwаще бь амьнийе Йаһоwарʹа хьзмәт кә, әwана wе бәхтәwар бьн у йәктийеда бьн. Бьраһим у Сәрайе, Исһаq у Рәбәкайе, Һаннайе у Әлкана, гьшк жи һьндава һәвдӧ һʹьзкьрьне дьданә кʹьфше. Әм жи гәрәке чʹәʹв бьдьнә wан, демәк һʹьзкьрьне бьдьнә кʹьфше щоте хwәрʹа (Дәстп. 26:8; 1 Сам. 1:5, 8; 1 Пәт. 3:5, 6). Әw йәк щотед зәwаще незики һәв дькә, у ӧса жи әwана һе зедә незики Баве хwәйи әʹзмана дьбьн. (Бьхунә Wаиз 4:12.)
14. Һәрге һәвалзәwаще(а) тә Йаһоwарʹа хьзмәт накә, тӧ чь дькари бьки сәва кӧ зәwаща тә qәwи бьминә?
14 Мәсиһи гәрәке хwә хwәй кьн, кӧ тʹәви нәбаwәра нәкʹәвьнә бьн нирәки (2 Корн. 6:14). Ле һәнә хушк у бьра, малбәта кʹижанада нәбаwәр һәнә. Һьнәк жь wан ида зәwащеда бун чахе һатьнә нава рʹастийе, ле һәвалзәwаще wана нәһатьнә нава рʹастийе. Ве дәрәщеда йәкә Мәсиһи дькарә малбәтеда әʹдьлайе хwәй кә, һәрге пе принсипед Хwәде бьжи. У ӧса жи әwана дькарьн тʹәвайи һәвкʹарийе бькьн у рʹе бьдьнә һәв. Рʹаст ә әw йәк дькарә чәтьн бә, ле бьфькьрьн әв кʹарәкә чьqас мәзьн тинә. Принсипед Кʹьтеба Пироз биньн сери щара дькарә чәтьн бә, илаһи һәрге һәвалзәwащәк щьвате дьһелә. Әw йәк qәwьмийә тʹәви хушкәке, наве кʹижане Мери йә. Әw у мере wе Девид тʹәвайи Хwәдерʹа хьзмәт дькьрьн, ле паше әwи щьват һишт. Мери бь хирәт дьчу сәр щьвата у щьватед мәзьн. Әw ӧса жи чьqас дькарьбу принсипед Кʹьтеба Пироз дьани сери малда у һинкьрьна шәш зарʹед хwәда. Чахе зарʹ мәзьн бун у жь мале чун, Мерийе хwә тʹәне тʹәхмин дькьр. Һьнге Девид дәстпекьр бьхунә әw журналед кӧ Мерийе жерʹа дьһишт. Щар-щара әw диса вәдьгәрʹийа сәр щьвине, кʹидәре кӧ нәбийе wийи шәш сали бона wи щи дьгьрт. Ле чахе Девид нәдьчу щьвине, нәби жерʹа дьгот: «Калко иро тӧ нәһатьбуйи щьвине, мьн бира тә дькьр». Паши 25 сала Девид вәгәрʹийа щьвате, у ньһа әw бь шабуне Йаһоwарʹа хьзмәт дькә, у Мери жи бәхтәwар ә чьмки әwана диса тʹәвайи Йаһоwарʹа хьзмәт дькьн.
15. Ча щотед әʹмьрда мәзьн дькарьн али щотед щаһьл бькьн?
15 Рʹожа иройин Шәйтʹан пәй малбәта дькʹәвә, у ләма гәләк фәрз ә wәки хьзмәткʹаред Хwәде һәләqәтийа баш хwәй кьн зәwаща хwәда. Фьрqи тʹӧнә һун чьqас wәхт зәwащеда ньн, тʹьме бьфькьрьн һәла һун чь дькарьн бежьн йане бькьн, сәва зәwаща хwә һе qәwи кьн. Һәрге һун щотед әʹмьрда мәзьн ьн, һун дькарьн али щотед щаһьл бькьн. Һун дькарьн щотед щаһьл тʹәглифи мала хwә кьн, сәва кӧ тʹәвайи qӧльхкьрьна тʹәви малбәте дәрбаз кьн. Әwана дькарьн жь wә һин бьн, wәки фьрqи тʹӧнә әwана чьqас wәхт зәwащеда ньн, йәкә гәрәке һʹьзкьрьне һьндава һәвдӧ бьдьнә кʹьфше у йәктийеда бьн (Тито 2:3-7).
«WӘРЕН У ӘМ ҺЬЛКʹЬШЬН ЧʹИЙАЙЕ ХӦДАН»
16, 17. Хьзмәткʹаред Хwәде кӧ йәктийеда ньн һивийа чь нә?
16 Бьдә бәр чʹәʹве хwә Исраела wәʹде бәре, чахе щәжьна Оршәлимеда пәсьне Йаһоwа дьдан пʹарьстгәһеда. Wана һʹәму тьшт чь кӧ лазьм бу бона рʹеwитийе һазьр кьрьн, паше әwана тʹәвайи рʹекʹәтьн у али һәв дькьрьн. Пʹарьстгәһеда wана тʹәвайи пәсьне Йаһоwа дьдан у жерʹа хьзмәт дькьрьн (Луqа 2:41-44). Рʹожа иройин чаwа кӧ әм һазьр дьбьн бона жийина дьнйа тʹәзә, мәрʹа лазьм ә йәктийеда бьн у һʹәму тьшти бькьн чь кӧ дькарьн, сәва тʹәви һәв һәвкʹарийе бькьн. Сәва wе йәке лазьм ә тʹьме qәwате бьдьнә хәбате. Һәла бьфькьрьн һун ча дькарьн һе зедә бькьн сәва ве йәке?
17 Бьфькьрьн дәрһәqа кʹәрәмед кӧ һивийа мә нә! Әм ида жь ве дьнйа бетʹьфаq дур ьн. Әм ньһа пе чʹәʹве хwә дьвиньн кӧ ча пʹехәмбәртийа Ишайа у Миха тенә сери. Бь рʹастийе жи, щьмәʹта Хwәде бь йәкти һьлдькʹьшьнә сәр «чʹийайе Хӧдан». (Иша. 2:2-4; бьхунә Миха 4:2-4.) Рʹасти жи, хьзмәткьрьна мә Хwәдерʹа wан «рʹожед хьлазийеда» гәләк дьле wи ша дькә, у әw жь мә рʹази йә. Ле wәʹдәки, wе чьqас хwәш бә чахе әм бәхтәwар у ша бьн, чьмки әме бьжин wи wәʹдәйи кӧ һʹәму инсанәт әʹдьлайеда, йәктийеда у һәвкʹарийеда Йаһоwарʹа хьзмәт бькьн!