Бәла кьн Мьзгинийа Дәрһәqа Qәнщийа Нәһeжа жь Хwәдe

1, 2. Чаwа Паwлосe шанди нишан кьр, кö әw рʹази йә бона qәнщийа нәһeжа жь Хwәдe?

ПАWЛОСЕ ШАНДИ дькарьбу бь исафа тʹәмьз бьгота: «Кʹәрәма [Хwәдe] кö бь мьнрʹа йә, бош-бәтал нибу». (Бьхунә 1 Корьнтʹи 15:9, 10.) Паwлос рʹьнд фәʹм дькьр, кö әw һeжайи рʹәʹмтийа Хwәдe нибу, чьмки әwи бәрe Мәсиһи дьзeрандьн.

² Чахe Паwлос ида әʹмьрда мәзьн бу, әwи Тимотʹeйорʹа ньвиси: «Әз жь Мәсиһ Исайe Хöданe мә рʹази мә, йe кö qәwат да мьн, әз амьн һʹәсаб кьрьм, данимә сәр вe хьзмәткʹарийe» (1 Тимтʹ. 1:12-14). Лe гәло әw чь щурʹә хьзмәткьрьн бу? Паwлос готә рʹуспийeд щьвата Әфәси: «Әз әʹмьрe хwә лайиqи тʹö тьшти накьм, тʹәнe дькьм бьгьһижьмә мәрәмe хwә у we qöльха кö мьн жь Хöдан Иса стандийә биньмә сeри, аwа готи Мьзгинийа кʹәрәма Хwәдe бь мәʹрифәти даннасин кьм» (Кʹар. Шанд. 20:24).

3. Кʹижан хьзмәтийа мәхсус Паwлосрʹа һатә дайинe? (Бьньһeрʹә шьклe әʹwльн.)

³ Чь «мьзгини» Паwлос бәла дькьр, кʹижан кö кʹәрәма Хwәдe, дeмәк qәнщийа нәһeжа әʹйан дькьр? Әwи готә Мәсиһийeд Әфәсида: «Wә бьһистьбә, кö әв wәкʹилти жь кʹәрәма Хwәдe бона wә мьнрʹа һатийә дайинe» (Әфәс. 3:1, 2). Паwлосрʹа һатә готьнe, wәки әw гәрәкe мьзгинe бәла кә мәрьвeд нәщьһурʹа. Чьмки ида рʹe вәбу бона мәрьвeд жь мьләтeд дьн, сәва әwана жи Пʹадшатийа Хwәдeда тʹәви Иса Мәсиһ сәрweртийe бькьн. (Бьхунә Әфәси 3:5-8.) Паwлос бь хирәт хьзмәт дькьр, у бона Мәсиһийeд иройин әwи мәсәләкә гәләк баш һишт. Әwи әʹйан кьр кö qәнщийа Хwәдe һьндава wи, «бош-бәтал» нибу.

QӘНЩИЙА НӘҺЕЖА ЧЬДА МӘ ҺЕЛАН ДЬКӘ?

4, 5. Чьрʹа әм дькарьн бeжьн кö «мьзгинийа Пʹадшатийe» у мьзгинийа qәнщийа нәһeжа жь Хwәдe, йәк ә?

⁴ Wан рʹожeд ахьрийeда щьмәʹта Йаһоwа бәла дькьн «мьзгинийа Пʹадшатийe . . . кö һʹәму мьләтарʹа бьбә шәʹдәти» (Мәт. 24:14). Әw «мьзгини» кö әм бәла дькьн, әw öса жи тe һʹәсабe мьзгинийа qәнщийа нәһeжа жь Хwәдe. Лe чьрʹа әм дькарьн әwe йәкe бeжьн? Чьмки һʹәму кʹәрәм, кʹижан кö әмe бьстиньн бь сайа Пʹадшатийа Хwәдe, жь qәнщийа Йаһоwа тe (Әфәс. 1:3). Бәлe, Паwлос гәләк рʹази бу жь Йаһоwа бона qәнщийа wи. Лe һун рʹази нә жь Хwәдe сәва qәнщийа нәһeжа, кö әw һьндава мә дьдә кʹьфшe? (Бьхунә Рʹомайи 1:14-16.)

⁵ Тʹeма пeшьнда әм пeһʹәсийан, кö рʹаст ә әм мәрьвнә гöнәкʹар ьн, лe жь qәнщийа Йаһоwа әм гәләк щурʹә кʹарe дьстиньн. Мә гәләк кʹәрәм стандийә жь Йаһоwа, ләма әм борщдар ьн мәрьвeд дьнeнарʹа жи гьли кьн дәрһәqа һʹьзкьрьна Йаһоwа. Әм öса жи wанрʹа гәрәкe гьли кьн, кö чь кʹарe әwана дькарьн бьстиньн жь һʹьзкьрьна wи. Лe ча әм дькарьн али мәрьвeд дьн бькьн, кö әwана рʹази бьн сәва qәнщийа нәһeжа, кö Хwәдe дьдә кʹьфшe.

БӘЛА КЬН МЬЗГИНИЙА ДӘРҺӘQА КʹЬРʹИНЕ

6, 7. Чахe әм мәрьварʹа гьли дькьн дәрһәqа кʹьрʹинe, бь вe йәкe әм ча мьзгинe бәла дькьн дәрһәqа qәнщийа Хwәдe?

⁶ Иро, qә хәма мәрьва нинә чахe әwана гöнә дькьн. Ләма әwана фәʹм накьн кö чьрʹа әwана һʹәwщe кʹьрʹинe нә. У әw мәрьв һe зeдә у зeдә избат дьбьн, кö жийина wан бәхтәwарийe wанрʹа найнә. Гәләк жь wана фәʹм накьн кö чь йә гöнә, у ча әw сәр мә һʹöкöм дькә. Тʹәнe паши хәбәрдана тʹәви Шәʹдeд Йаһоwа, әwана әвe йәкe фәʹм дькьн. Әwана öса жи ньзаньн кö чь wанрʹа лазьм ә, сәва әwана жь һʹöкöмe гöнә аза бьн. Лe чахe әwана пeдьһʹәсьн кö Йаһоwа Кöрʹe хwә шандә сәр әʹрдe, у сәва мә qöрбан кьр, әw мәрьвeд дьлсах гәләк жь Хwәдe рʹази дьбьн. Әwана дьлша дьбьн кö әw кʹьрʹин һатә дайинe, сәва һʹәму мәрьв жь гöнә у мьрьнe хьлаз бьн. У әwана фәʹм дькьн кö Йаһоwа әв йәк кьр, жь бо һʹьзкьрьна хwәйә мәзьн у qәнщийа нәһeжа (1 Йуһʹн. 4:9, 10).

⁷ Дина хwә бьдьнe, кö Паwлос чь гот дәрһәqа Кöрʹe Йаһоwайи һʹьзкьри: «Йәктийа wида [Исада] әм аза бунә бь хуна wи, аwа готи афубуна гöна стандийә. Әва йәка жь дәwләмәндтийа кʹәрәма wи [Йаһоwа] йә» (Әфәс. 1:7). Qöрбана Иса избат дькә һʹьзкьрьна Хwәдe у qәнщийа Wийә мәзьн һьндава мә. Чьqас әм дьлрʹьһʹәт дьбьн кö әм заньн, wәки һәргe әм баwәрийа хwә qöрбана Иса тиньн, гöнeд мә we бeнә бахшандьнe. Хeнщи we йәкe, исафа мә we бәр Хwәдe тʹәмьз бә (Ибрн. 9:14). Бь рʹастийe жи, әw чьqас мьзгиникә баш ә, кʹижан кö әм дькарьн мәрьварʹа гьли кьн!

АЛИ МӘРЬВА БЬКЬН СӘВА ӘWАНА НЕЗИКИ ХWӘДЕ БЬН

8. Чьрʹа мәрьвeд гöнәкʹаррʹа лазьм ә тʹәви Хwәдe ль һәв бeн?

⁸ Һʹәта кö мәрьв баwәрийа хwә qöрбана Иса найньн, Хwәдe wана һʹәсаб дькә ча дьжмьнeд хwә. Ләма әм борщдар ьн wанрʹа гьли кьн кö әwана дькарьн бьбьнә достe Хwәдe. Йуһʹәннайe шанди ньвиси: «Әwe кö Кöрʹ баwәр дькә, жийина wийә һʹәта-һʹәтайe һәйә. Әwe кö гöрʹа Кöрʹ накә, әw жийинe набинә, лe хәзәба Хwәдe ль сәр wи дьминә» (Йуһʹн. 3:36). Әм бәхтәwар ьн кö qöрбана Иса мәщалe дьдә мә, кö әм бьбьнә достe Хwәдe. Паwлос дәрһәqа we йәкe гот: «Һун жи кö wәхтәкe жь дәст фькьр у кьрьнeд хwәйә хьраб, хәриб у нәйарeд Хwәдe бун, лe ньһа әwи бь мьрьна Мәсиһә бәдәни һун тʹәви хwә ль һәв анин» (Колс. 1:21, 22).

9, 10. а) Чь щабдари Мәсиһ дайә рʹункьрийа? б) Ча «пәзeд дьн» али рʹункьрийа дькьн?

⁹ Иса шьхöл да рʹункьрийeд сәр әʹрдe, кʹижан кö Паwлос нав дькә «qöльхe льһәванинe». Паwлос рʹункьрийeд qьрʹна йәкeрʹа гот: «Әв һәр тьшт жь Хwәдeда нә, кö әм бь Мәсиһ тʹәви хwә ль һәв анин у qöльхe льһәванинe да мә. Аwа готи Хwәдe бь Мәсиһ дьнйа тʹәви хwә ль һәв ани, нәһәqийeд wан wанрʹа нәһәqи һʹәсаб нәкьрьн у готьна льһәванинe спартә мә. Аwа әм жь алийe Мәсиһда qасьдийe дькьн, чаwа кö Хwәдe бь мә һиви жь wә дькә: ‹Әм алийe Мәсиһда рʹәща жь wә дькьн, тʹәви Хwәдe ль һәв wәрьн!›» (2 Корн. 5:18-20).

¹⁰ Бона «пәзeд дьн» әw qәдьрәки мәзьн, кö әwана дькарьн вe хьзмәтийeда али рʹункьрийа бькьн (Йуһʹн. 10:16). Чаwа «qасьдeд» Иса, «пәзeд дьн» гәләк кʹар дькьн шьхöлe бәлакьрьна мьзгинийeда. Әwана мәрьва рʹастийe һин дькьн у али wан дькьн кö әwана нeзики Хwәдe бьн у бьбьнә достe wи. Әw һәйә пʹарәкә шьхöлe бәлакьрьна мьзгинe дәрһәqа qәнщийа нәһeжа жь Хwәдe.

МЬЗГИНИЙЕ БӘЛА КЬН ДӘРҺӘQА ВЕ ЙӘКЕ КÖ ХWӘДЕ ДÖА ДЬБЬҺЕ

11, 12. Чьрʹа чахe мәрьв пeдьһʹәсьн кö әwана дькарьн Йаһоwарʹа дöа бькьн, әw йәк бона wан мьзгини йә?

¹¹ Гәләк мәрьв дöа дькьн, чьмки әwана паши дöа хwә баш тʹәхмин дькьн. Лe әwана баwәр накьн кö Хwәдe бь рʹастийe дöайeд wан дьбьһe. Әwана гәрәкe бьзаньбьн кö Йаһоwа әw кәс ә, йe кö дöа «дьбьһe». Даwьдe зәбурбeж ньвиси: «Әй тö, йe кö дöайан дьбьһизә, we һʹәму мьров бeн ба тә. Гöнә зора мьн дьбьн, һәрчи сәрһьлданeд мә . . . , тö wан дьбәхшини» (Зәб. 65:2, 3, ИМ).

¹² Иса шагьртeд хwәрʹа гот: «Һәгәр һун пe навe мьн тьштәки бьхwазьн әзe бькьм» (Йуһʹн. 14:14). Фәʹмдари йә, кö «тьштәки» ль wьр тe һʹәсабe, чь кö ль гора qьрара Йаһоwа йә. Йуһʹәнна гот: «Әм ль бәр Хwәдe рʹуспи нә, чьмки әм заньн, һәгәр әм тьштәки ль гора хwәстьна wи жe бьхwазьн, әw дәнгe мә дьбьһe» (1 Йуһʹн. 5:14). Чьqас әм ша дьбьн чахe әм мәрьва һин дькьн, wәки әwана бь дöа нeзики «тʹәхтe Хwәдeйи кʹәрәмe» дьбьн, дeмәк Йаһоwа! (Ибрн. 4:16). Әм гәрәкe wана һин кьн кö рʹаст дöа бькьн, Кәсe рʹастрʹа дöа бькьн, у бона тьштeд рʹаст дöа бькьн. Öса әмe али wан бькьн, кö әwана нeзики Йаһоwа бьн у wәʹдe чәтьнайа бәрдьлийe бьстиньн (Зәб. 4:1; 145:18).

QӘНЩИЙА НӘҺЕЖА ДЬНЙА ТʹӘЗӘДА

13, 14. а) Рʹункьри we чь qәдьрәки мәзьн ахьрийeда бьстиньн? б) Рʹункьри we чь шьхöләкә баш бькьн сәва инсанәтe?

¹³ Нава зәманeд кö we бeн, Йаһоwа wи чахи жи we qәнщийа хwә бьдә кʹьфшe. Лe чаwа? Хwәдe we qәдьрәки мәзьн бьдә 144 000, йeд кö сәр әʹзмана тʹәви Мәсиһ we сәрweртийe бькьн. Дәрһәqа we йәкe Паwлос ньвиси: «Хwәдeйe кö хwәйe рʹәʹма дәwләмәнд ә, бь һʹьзкьрьна хwәйә мәзьн, бь кʹижанe әм һʹьзкьрьн, гава әм һe жь дәст нәһәqийeд хwә мьри бун, әwи тʹәви Мәсиһ әм сах кьрьн. Бь кʹәрәмe һун хьлазбуйи нә! Йәктийа wида әм жь мьрьнe рʹакьрьн у тʹәви wи әм ль дийарe әʹзмана данә рʹуньштандьнe, бь сайа Мәсиһ Иса. Wи әв йәк кьр, wәки ль нава wан зәманeд кö we бeн, дәwләмәндтийа кʹәрәма хwәйә бeһьмбәр, һьндава мәда бь сайа Мәсиһ Иса, бь ширьнайи бьдә кʹьфшe» (Әфәс. 2:4-7).

¹⁴ Чәтьн ә әм бьдьнә бәр чʹәʹвe хwә, кö чьqас тьштeд баш Йаһоwа һазьр кьрийә бона Мәсиһийeд рʹункьри, чахe әwана сәр әʹзмана тʹәви Мәсиһ сәрweртийe бькьн (Луqа 22:28-30; Фили. 3:20, 21; 1 Йуһʹн. 3:2). Йаһоwа we һьндава рʹункьрийа «дәwләмәндтийа кʹәрәма хwәйә бeһьмбәр» бьдә кʹьфшe. Әwана we бь симболик бьбьнә «Оршәлима ну», йанe бука Мәсиһ (Әʹйан. 3:12; 17:14; 21:2, 9, 10). Әwана we тʹәви Иса «мьләта» qәнщ кьн. Әwана we али мәрьва бькьн кö жь гöнә у мьрьнe аза бьн, сәва кö бьбьнә бeqьсур. (Бьхунә Әʹйанти 22:1, 2, 17.)

15, 16. Ахьрийeда ча Йаһоwа we һьндава «пʹәзeд дьн» qәнщийа нәһeжа бьдә кʹьфшe?

¹⁵ Әфәси 2:7-да, әм дьхуньн кö «нава . . . зәманeд кö we бeн» Хwәдe we qәнщийа нәһeжа әʹйан кә. Бeшьк, Йаһоwа «дәwләмәндтийа кʹәрәма хwәйә бeһьмбәр», we дьнйа тʹәзәда жи сәр әʹрдe мәрьварʹа әʹйан кә (Луqа 18:29, 30). Йаһоwа we qәнщийа хwәйә лапә мәзьн бьдә кʹьфшe, чахe мәрьва жь мьрьнe рʹакә (Иб. 14:13-15; Йуһʹн. 5:28, 29). Лe кʹe нә әw мәрьв, йeд кö we жь мьрьнe рʹабьн? Әw һәнә мәрьвeд амьн йeд кö пeшийа мьрьна Иса мьрьнә, у öса жи «пәзeд дьн», кʹижан кö wәʹдe wан рʹожeд ахьрийeда мьрьнә. Әw һʹәму мәрьвeд амьн we вәгәрʹьнә жийинe, сәва бәрдәwам кьн Йаһоwарʹа хьзмәт кьн.

¹⁶ Öса жи бь милйона мәрьвeд кö дәрһәqа Хwәдe ньзаньбун у мьрьнә, we жь мьрьнe рʹабьн. Wанрʹа we мәщал бe дайинe кö сәрweртийа Йаһоwа qәбул кьн. Йуһʹәнна ньвиси: «Һьнгe мьн мьрийeд бьчʹук у мәзьн дитьн кö ль бәр тʹәхт сәкьни бун. Кʹьтeб вәбун у кʹьтeбәкә дьн жи вәбу, аwа готи кʹьтeба жийинe. Диwана мьрийа анәгори wан кьрeд wанә кʹьтeбада ньвисар һатә кьрьнe. Бәʹрe мьрийeд хwә дан, Мьрьнe у Дийарe Мьрийа жи мьрийeд хwә дан. Диwана һәр мәрьвәки жь wан анәгори кьрьнeд wан һатә кьрьнe» (Әʹйан. 20:12, 13). Бәлe, әw мәрьв we пeбьһʹәсьн дәрһәqа Йаһоwа, у бьзаньбьн чаwа әwана дькарьн принсипeд wи, кʹижан кö Кʹьтeба Пирозда һәнә, биньн сeри. Хeнщи вe йәкe, әwана we пe рʹeбәрийeд тʹәзә һәрʹьн, кʹижан кö we «кʹьтeбада» ньвисар бьн. Йаһоwа we пe wан рʹeбәрийeд тʹәзә жи, qәнщийа нәһeжа әʹйан кә.

БӘРДӘWАМ КЬН МЬЗГИНИЙЕ БӘЛА КЬН

17. Әм чь гәрәкe бира хwәда хwәй кьн, чахe мьзгинe бәла дькьн?

¹⁷ Хьлази гәләк нeзик ә. Ләма илаһи ньһа гәләк фәрз ә кö әм мьзгинийа Пʹадшатийe бәла кьн! (Марq. 13:10). Әв мьзгини әʹйан дькә qәнщийа нәһeжа жь Йаһоwа, у әwe йәкe әм гәрәкe бира хwәда хwәй кьн. Чахe әм мьзгинийe бәла дькьн, нeта мә әw ә кö Йаһоwа рʹумәт у һöрмәт кьн. Әм әвe йәкe дькарьн бькьн, чахe мәрьварʹа гьли дькьн дәрһәqа һʹәму кʹәрәмeд Йаһоwа, кʹижан кö дьнйа тʹәзәда әw we сәр мәрьвада бьбаринә. Әм гәрәкe мәрьварʹа бeжьн кö Хwәдe жь бо qәнщийа хwәйә мәзьн we wан һʹәму соза бинә сeри.

18, 19. Әм ча дькарьн рʹумәт кьн qәнщийа нәһeжа кö Йаһоwа дьдә кʹьфшe?

¹⁸ Чахe әм мәрьварʹа шәʹдәтийe дьдьн, әм дькарьн wанрʹа шьровәкьн кö бьн сәрweртийа Мәсиһ, инсанәт we бь тʹәмами кʹарe бьстинә жь кʹьрʹинe. Әм гәрәкe шьровәкьн кö бь сайа вe кʹьрʹинe ахьрийeда һʹәму мәрьв we бьбьнә бeqьсур. Кʹьтeба Пироз дьбeжә: «Әʹфьринe хwәха жи жь we хöламтийа пʹучʹ аза бьн у тʹәви азайи у рʹумәта зарʹeд Хwәдe бьн» (Рʹом. 8:21). Әw йәк we тʹәнe бь сайа qәнщийа Йаһоwайә мәзьн бe стандьн.

¹⁹ Әw qәдьрәки мәзьн ә сәва мә, кö әм дькарьн мәрьварʹа гьли кьн дәрһәqа созeд пʹьрʹ баш, кʹижан кö Әʹйанти 21:4, 5-да һәнә: «[Хwәдe] жь чʹәʹвeд wан һʹәму һeсьрeд wан паqьж кә у иди мьрьнe тʹöнәбә, нә шин, нә гьри, нә eш-eшук, чьмки тьштeд бәрe дәрбаз бун». У Йаһоwа ль сәр тʹәхт рʹуньшти мәрʹа соз дьдә: «Ва әз һәр тьшти ну чeдькьм». Öса жи Йаһоwа дьбeжә: «Бьньвисә, чьмки әв хәбәр амьн у рʹаст ьн». Бәлe, чахe әм бь хирәт мьзгинe бәла дькьн, әм бь рʹастийe жи qәнщийа Йаһоwайә мәзьн рʹумәт дькьн!