Зәwаща Хwә Бәхтәwар кьн

1. Рʹаст ә дәстпeбуна зәwащe шабунe тинә, лe ахьрийe мeр у жьн дькарьн рʹасти чь бeн? (Бьньһeрʹә шьклe әʹwльн.)

ЧАХЕ бук у зәʹва рʹожа дәʹwатe һәв дьвиньн, бь гьлийа найe готьнe кö шабуна wана чьqас зәʹф ә. Чахe әwана рʹасти һәв дьһатьн wәки рʹьнд һәв нас кьн, һʹьзкьрьна wана öса qәwи бу, кö әwана һазьр бун соз бьдьнә һәв, кö we һәврʹа амьн бьминьн. Паши дәʹwатe wанрʹа лазьм ә нав хwәда гöһастьна бькьн, wәки йәктийeда бьн. Ләма жи Хәбәра Хwәдe ширәта билани дьдә wан, йeд кö дьхwазьн бьзәwьщьн. Чьмки Сазкʹарe зәwащe Йаһоwа дьхwазә, wәки щотe зәwащe бь рʹастийe шабунe бьстиньн зәwаща хwәда (Мәтʹлк. 18:22). Лe йәкә Хәбәра Хwәдe дьбeжә, кö щотeд зәwащe ча мәрьвeд гöнәкʹар «we рʹасти охьрмeд гьран бeн» (1 Корн. 7:28). Әw охьрмeд гьран, дeмәк проблeм, ча дькарьн кeм бьн? У чь дькарә зәwаща Мәсиһити бәхтәwар кә?

2. Щотeд зәwащe кʹижан щурʹeд һʹьзкьрьнe гәрәкe бьдьнә кʹьфшe?

² Кʹьтeба Пироз дьбeжә кö һʹьзкьрьн гәләк фәрз ә. Һәнә щурʹeд һʹьзкьрьнe, у әwан һʹәму щурʹа мeр у жьн зәwащeда гәрәкe бьдьнә кʹьфшe. Мәсәлә, дьлшәwати (Сәр зьманe Йунани, филeа) гәләк лазьм ә зәwащeда. Һʹьзкьрьна романтик жи (eрос) лазьм ә ортʹа мeр у жьнда. Öса жи һʹьзкьрьна һьндава малбәтe (сторгe) гәләк фәрз ә, илаһи чахe малбәтeда зарʹ һәнә. Лe һәйә һʹьзкьрьнәкә öса, кʹижан кö сәр һʹимe принсипа йә, у бь рʹастийe малбәтe бәхтәwар дькә. Әw һәйә һʹьзкьрьна агапe. Дәрһәqа вe һʹьзкьрьнe Паwлосe шанди öса ньвиси: «Жь wә һәр кәс жи бьра жьна хwә һʹьз бькә чаwа хwә у жьн жи qәдьрe мeрe хwә бьгьрә» (Әфәс. 5:33, ДТʹ).

БОРЩЕ МЕР У ЖЬН ЗӘWАЩЕДА

3. Һʹьзкьрьн зәwащeда гәрәкe чьqас qәwи бә?

³ Паwлос ньвиси: «Мeрно, жьнeд хwә һʹьз бькьн, чаwа кö Мәсиһ щьвин һʹьз кьр у жийина хwә бәр weва да» (Әфәс. 5:25). Чʹәʹв бьдьнә Иса, тe һʹәсабe кö гәрәкe öса һәв һʹьз кьн, ча Иса пәйчуйeд хwә һʹьз дькьр. (Бьхунә Йуһʹәнна 13:34, 35; 15:12, 13.) Мeр у жьнeд Мәсиһи гәрәкe öса qайим һәв һʹьз кьн, кö һазьр бьн әʹмьрe хwә жи бона һәв бьдьн. Чахe зәwащeда проблeмeд мәзьн пeшда тeн, һьнәк жь wан дьфькьрьн кö мәʹни әw ә, wәки һʹьзкьрьн ортʹа wанда сьст буйә. Лe чь дькарә али wан бькә? Һʹьзкьрьна агапe, йа кö «бина хwә дь һәр тьштида фьрәһ дькә, жь һәр тьшти баwәр дькә, һeвийа we жь һәр тьшти һәйә, ль һәр тьшти сәбьр дькә, ИМ». Бь рʹастийe жи, «һʹьзкьрьн тʹö щар кʹöта набә» (1 Корн. 13:7, 8). Һәргe щотe зәwащe бира хwәда хwәй кьн созe һʹьзкьрьнe у һәврʹа амьн бьминьн, we бькарьбьн йәктийeда проблeмeд кö рʹасти wан бeн, бь принсипeд Йаһоwа сафи кьн.

4, 5. а) Ча сәрe малбәтe борщдарийа мeр чь йә? б) Жьн гәрәкe ча бә һьндава сәрweртийа мeрe хwәда? в) Щотәки зәwащe гәрәкe нав хwәда чь бьгöһастана?

⁴ Паwлос дәрһәqа борщдарийа мeр у жьн ньвиси: «Жьнно! Wәк кö һун бь йа Хöдан дькьн, öса бь йа мeрe хwә бькьн, чьмки, кʹа чаwа Мәсиһ сәрe Щьвинe йә, мeр жи сәрe жьнe йә» (Әфәс. 5:22, 23, ИМ). Гьлийeд Паwлос найe һʹәсабe кö жьн гәрәкe бьбә щарийа мeрe хwә. Дәwсe, әw гьли али жьна дькә, wәки бьqәдиньн вe борщдарийа хwә, кʹижан кö Хwәдe сәрe-сeрида дабу wан чахe гот: «Нә баш ә кö мeр тʹәнe бьминә, кʹомәкдарәк кö лайиqи wи бә чeкьм» (Дәстп. 2:18, ПКʹМ). Мeр гәрәкe сәрweртийа хwә бь һʹьзкьрьн бькә, чаwа Мәсиһ «сәрe щьвинe» сәрweртийe дькә. Һәгәр мeр öса бькә, һьнгe жьн we хwә хwәйкьри тʹәхмин кә у weрʹа we һeса бә qәдьрe мeрe хwә бьгьрә.

⁵ Кeти^[1] кö Фрeд стандийә, дьбeжә: «Чахe әз азәп бум, хwә-сәри хwә бум у мьн хwәха бона хwә хәм дькьр. Зәwащe әз һин кьрьм баwәрийа хwә у итʹбарийа хwә мeрe хwә биньм. Әw йәк һeса нибу, лe чахe мә тʹәвайи һʹәму тьшт öса дькьр чаwа кö Йаһоwа хwәш дьһат, әм һәвдöрʹа нeзик дьбун чаwа щотe зәwащe». Мeрe we Фрeд дьбeжә: «Мьнрʹа тʹö щар һeса нибу сафикьрьна бькьм. Зәwащeда ида гәрәкe бона дö мәрьва хәм бьки, әw йәк нәһeса йә. Лe чахe мьн Йаһоwарʹа дöа дькьр, рʹeбәрийа wи qәбул дькьр у öса жи готьна жьна хwә һьлдьда һʹәсаб, рʹож бь рʹож мьнрʹа ида һeса дьбу кö сафикьрьна бькьм. У әз тʹәхмин дькьм кö әм чаwа кʹом йәктийeда ньн!»

6. Ча һʹьзкьрьн «йәктийа тʹам һәвва гьрeдьдә», чахe зәwащeда проблeм пeшда тeн?

⁶ Зәwащ дькарә qәwи бә һәргe мeр у жьн «һәв сәбьр кьн у ль һәв бьбахшиньн». Һәрдö жи гöнәкʹар ьн, ләма жи шашийeд wана we һәбьн. Чахe әwана шашийа дькьн, жь we йәкe әwана дькарьн хwәрʹа дәрса һьлдьн, мәсәлә, һин бьн кö һәв бьбахшиньн у һʹьзкьрьна агапe бьдьнә кʹьфшe. Әw һʹьзкьрьн «йәктийа тʹам һәвва гьрeдьдә» (Колс. 3:13, 14). Һьн жи «һʹьзкьрьн думькдьрeж у ширьн ә, . . . кʹинe нажо» (1 Корн. 13:4, 5). Чахe Мәсиһи һәв фәʹм накьн у проблeм пeшда тeн, пьрс гәрәкe öса зу бeнә сафикьрьнe, һʹәта кö рʹо нәчуйә ава (Әфәс. 4:26, 27). Сәва бь дьл бeжьн «бьбахшинә, мьн тә хәйиданд», мьлукти у мeрхаси лазьм ә. Әw йәк we аликʹарийe бьдә wә, кö проблeма сафи кьн у ча щотe зәwащe һәврʹа нeзик бьн.

НАЗЬКАЙИ У ДЬЛНӘРМИ ГӘЛӘК ФӘРЗ ЬН

7, 8. а) Кʹьтeба Пироз чь ширәтe дьдә дәрһәqа һәләqәтийа сeксуал зәwащeда? б) Чьрʹа гәрәкe мeр у жьн һьндава һәвда бь һʹьзкьрьн у назьк бьн?

⁷ Кʹьтeба Пироз ширәтeд гәләк баш дьдә, дәрһәqа һәләqәтийа мeр у жьн нава зәwащeда у öса жи дәрһәqа борщeд wан. (Бьхунә 1 Корьнтʹи 7:3-5.) Гәләк фәрз ә кö мeр у жьн тʹьмe һьлдьнә һʹәсаб һʹәwщeд һәв у öса жи һʹал у фькьрeд һәв. Һәгәр мeр һьндава жьна хwә бь һʹьзкьрьн у нәрм нибә, жьн we нава борщeд хwәда шабунe нәвинә. Мeр гәрәкe «бь фәʹмдарийe» бә һьндава жьна хwәда (1 Пәт. 3:7). Ортʹа мeр-жьнда һәләqәтийа сeксуали гәрәкe бь зорe нибә у нәйe дәʹwакьрьнe, әв гәрәкe тʹьмe тʹәбийәти бә. Мәсәлә, алийe физики мeр һe зу дькарьн һазьр бьн бона һәләqәтийа сeксуали. Лe йәкә мeр у жьн гәрәкe wәʹдәки рʹаст бьжбeрьн, wәки һәр дö жи алийe eмосиалида һазьр бьн.

⁸ Кʹьтeба Пироз синора данайнә у набeжә кö пeшийа һәләqәтийа сeксуали йан жи пашe, чь изьн ә бькьн у чь на. Лe Кʹьтeба Пирозда тe готьнe дәрһәqа кʹьфшкьрьна һʹьзкьрьнe у назькайe (Стр. Слм. 1:2; 2:6). Мeр у жьн we йәкeда гәрәкe бь нәрми бьн һьндава һәвда.

9. Чь щурʹәйи нәрʹаст ә һʹәwщeд хwәйә сeксуали рʹази кьн?

⁹ Һʹьзкьрьна qәwи һьндава Хwәдe у öса жи һьндава һәвдö, али мeр у жьн дькә кö һәләqәтийа хwәйә баш öнда нәкьн. Һьнә зәwащада һәләqәтийа мeр у жьн хьраб бу у һьнәкада жи лап һатә һьлшандьнe, жь бо ньһeрʹандьна порнографийe. Һәгәр хwәстьна öса пeшда тe гәрәкe зу жь хwә дур хьн. Дeмәк һәгәр хwәстьна wә пeшда тe кö һʹәwщeд хwәйә сeксуали рʹази кьн нә кö зәwащeда лe жь зәwащe дәр, һун гәрәкe зу хwә хьлаз кьн жь we хwәстьнe. Нәрʹаст ә тʹәви кәсәки дьн флиртe бькьн, ләма жи әм гәрәкe хwә жь вe йәкe хwәй кьн. Әм гәрәкe тʹьмe бира хwәда хwәй кьн, кö Хwәдe һәр фькьрe мә у һәр кьрeд мә дьвинә. Әw йәк we али wә бькә тʹьмe дьлe Йаһоwа ша кьн у wирʹа амьн бьминьн. (Бьхунә Мәтта 5:27, 28; Ибрани 4:13.)

ЧАХЕ ЗӘWАЩЕДА ПРОБЛЕМ ҺӘНӘ

10, 11. а) Чьqас бәла буйә һәвqәтандьн? б) Кʹьтeба Пироз чь дьбeжә дәрһәqа вe йәкe, кö мeр у жьн жь һәвдö башqә бьжин? в) Чь we али мeр у жьн бькә сәва кö ләз нәкʹәвьн жь һәв башqә бьжин?

¹⁰ Чахe проблeм нәсафикьри дьминьн, һьнә мeр у жьн сафи дькьн йан башqә бьжин йан жи һәв бьqәтьн. Һьнә wәлатада мeр у жьн нивe зәʹф һәв дьqәтьн. Щьватeд Мәсиһийада әв йәк бәлабуйи нинә, лe зәwащe wанда проблeм зeдә дьбьн у әw дьбә мәʹнийа хәмгинийe.

¹¹ Кʹьтeба Пироз бона вe йәкe рʹeбәрийe дьдә: «Бьра жьн жь мeр нәqәтә, һәгәр бьqәтә жи, бьра мeр нәкә ль һәв бe. У мeр жи бьра жьна хwә бәрʹнәдә» (1 Корн. 7:10, 11). Пeшийа кö сафи кьн башqә бьжин гәрәкe кʹур бьфькьрьн. Дькарә öса бe кʹьфшe кö һәргe башqә бьжин, проблeм we сафи бьн, лe бь рʹастийe проблeм һe зeдә дьбьн. Иса гьлийeд Бавe хwә wәкʹьланд, кö мeр we дe у бавe хwә бьһeлә, хwә ль жьнe бьгьрә. Пашe әwи гот: «Әweд кö Хwәдe кьрьнә йәк, бьра мәрьв жь һәвдö нәqәтинә» (Мәт. 19:3-6; Дәстп. 2:24). Әw тe һʹәсабe кö нә жьн нә жи мeр гәрәкe жь һәвалзәwащe хwә нәqәтә, чьмки Хwәдe әw кьрьнә йәк. Йаһоwа дьхwазә wәки мeр у жьн һʹәта-һʹәтайe тʹәви һәв бьжин (1 Корн. 7:39). Һәр кәс жь мә гәрәкe бира хwәда хwәй кә, кö әмe бәр Йаһоwа щаба хwә бьдьн. Әw йәк дькарә али мә бькә проблeма сафи кьн, һʹәта кö әw проблeм һe гьран нәбунә.

12. Жь бо чь мeр йан жьн дьбәкә сафи кьн кö башqә бьжин?

¹² Чахe мeр у жьн нә рeали дьньһeрʹьн сәр зәwащe, һьнгe дькарьн проблeм пeшда бeн. Һәргe мәрьв зәwаща бәхтәwар дьдә бәр чʹәʹвe хwә, лe әw йәк найe сeри, wи чахи мәрьв дькарә дьлтәнг бә у һәла һe һeрс кʹәвә. Ортʹа мeр у жьнда дькарьн проблeм пeшда бeн дәрһәqа wан пьрса йeд кö гьрeдайи нә тʹәви пʹәра, бьра-пьзмама у ширәткьрьна зарʹа. Проблeмeд öса дькарьн һәбьн, чьмки жьн мeр мина һәв нәһатьнә мәзьн кьрьнe у мина һәв нафькьрьн. Лe чьqас баш ә, кö һʹәчʹи зәʹф жь щотeд Мәсиһийа, пьрсeд wи щурʹәйи бь йәкти öса сафи дькьн, кö һәрдö жи qайил ьн. Әwана öса дькьн, чьмки пe рʹeбәрийа Йаһоwа дьчьн.

13. Чь мәʹни гәрәкe һәбьн кö мeр у жьн сафи кьн башqә бьжин?

¹³ Щар-щара рʹасти жи мәʹни һәйә кö мeр у жьн жь һәв башqә бьжин. Мәсәлә, мәʹни әw ә, чахe мeр нахwазә хәм бькә бона малбәта хwә, зийана физики дьдә әʹмьрe we, у рʹийа we дьгьрә сәва Йаһоwарʹа хьзмәт нәкә. Чахe проблeмeд мәзьн йeд жьн мeрeд Мәсиһи һәнә, әwана гәрәкe аликʹарийe жь рʹуспийа бьхwазьн. Әw бьрeд щабдар дькарьн али щотeд зәwащeда бькьн, wәки әwана ширәтeд жь Хәбәра Хwәдe әʹмьрe хwәда биньн сeри. Сәва кö wан проблeма сафи кьн, әм гәрәкe дöайeд хwәда рʹöһʹe Хwәдeйи пироз бьхwазьн. У öса жи аликʹарийe жь wи бьхwазьн, сәва кö принсипeд жь Кʹьтeба Пироз биньн сeри, у бәрe рʹöһʹ бьдьнә кʹьфшe (Галт. 5:22, 23).^[2]

14. Кʹьтeба Пироз чь дьбeжә wан Мәсиһийа, жьн йан мeрe кʹижана Йаһоwа наһʹәбиньн?

¹⁴ Һәнә дәрәщeд öса кö Мәсиһи зәwьщи йә тʹәви wи мәрьви, кʹижан кö Йаһоwа наһʹәбинә. Кʹьтeба Пироз рʹьнд дьдә кʹьфшe кö чьрʹа мeр йан жьн гәрәкe жь һәв нәqәтьн, һәла һe wи чахи жи гава йәк жь wан Йаһоwа наһʹәбинә. (Бьхунә 1 Корьнтʹи 7:12-14.) Әw жьн йан мeр йeд кö нә Мәсиһи нә, дьqәwьмә тeдәрнахьн, лe әwана жи тeнә «пирозкьрьн», чьмки баwәрмәндe Хwәдe стандьнә. Зарʹeд кö wанарʹа дьбьн, әwана жи пирозкьри нә, у бьн пʹәрʹe Хwәдeда ньн. Паwлос гот: «Тö чь зани кʹöлфәтe, бәлки тe мeрe хwә хьлаз ки? Йан жи тö чь зани мeро, бәлки тe кʹöлфәта хwә хьлаз ки?» (1 Корн. 7:16). Гәләк мәсәлeд баш һәнә, кö жьн у мeрeд Мәсиһи алийe мeр йан жьна хwә кьрьнә у әwана жи бунә Шәʹдeд Йаһоwа.

15, 16. а) Кʹьтeба Пирозда чь ширәт тe дайинe сәва жьнeд Мәсиһи, йeд кö мeрeд wан хьзмәткʹарeд Хwәдe ниньн? б) Ньһeрʹандьна Мәсиһи гәрәкe чь щурʹәйи бә, чахe щотe нәбаwәр дьхwазә жe бьqәтә?

¹⁵ Пәтрусe шанди ширәта дьдә жьнeд Мәсиһийа, кö гöрʹа мeрe хwәда бьн, «wәки жь wан һьнәк жи, һәгәр гöһдарийа хәбәрe накьн, бь пʹәргалийа жьнeд хwә, бe готьн жи бeнә сәр баwәрийe гава пʹәргалийа wәйә хофә у навә-намус бьбиньн». Һe баш ә, wәки жьн нә кö тʹьмe дәрһәqа баwәрийа хwә мeрe хwәрʹа бeжә, лe бь «рʹöһʹәки мьлук . . . кö ль бәр Хwәдe пʹьрʹ бь qимәт әм», алийe мeрe хwә бькә, кö әw рʹастийe qәбул кә (1 Пәт. 3:1-4).

¹⁶ Ча бькьн чахe жьн йан мeрe нәбаwәр дьхwазә кö һәв бьqәтьн? Кʹьтeба Пироз дьбeжә: «Һәгәр нәбаwәр бьqәтә, бьра бьqәтә. Хушк йан бьра вe дәрәщeда аза йә. Бәлe Хwәдe гази wә әʹдьлайийe кьр» (1 Корн. 7:15). Лe әw найe һʹәсабe кö ль гора Кʹьтeба Пироз Мәсиһи дькарә бьзәwьщә тʹәви кәсәки дьн. Öса жи Мәсиһи гәрәкe зорe йe нәбаwәр нәкә кö тʹәви wи зәwащeда бьминә, әw бь исафа тʹәмьз дькарә лe бьqәтә. Wәʹдә дәрбаз бә, дьбәкә йe нәбаwәр пʹошман бә у пашда вәгәрʹә, wәки диса ль һәв бeн. У ахьрийeда әw жи бьбә хьзмәткʹарe Хwәдe.

ЗӘWАЩЕДА ЧЬ ГӘРӘКЕ ЩИЙЕ ПЕШЬН БЬГЬРӘ?

17. Жьн-мeр зәwащeда чь гәрәкe дайньн щийe пeшьн?

¹⁷ Чьмки әм хьлазийа «рʹожeд ахьрийeда» дьминьн, әм бәр «зәманeд хьраб» тәйах дькьн (2 Тимтʹ. 3:1-5). Ләма жи, чахe әм рʹöһʹанида qәwи нә, әв йәк али мә дькә кö нәкʹәвьнә бәр байe һʹöкöмe вe дьнйайe. Паwлос ньвиси: «Wәхт һьндьк майә. Жь вьр шунда әwe кö жьна wи һәйә бьра öса бә чаwа йe бe жьн, . . . у әwe кö шьхöлe дьнeва мьжул дьбә чаwа йe пeва мьжул набә» (1 Корн. 7:29-31). Готьна Паwлос әw нибу кö жьн у мeр һьндава һәвда бeтʹалаш бьн. Лe жьн у мeр гәрәкe рʹöһʹани дайньн щийe пeшийe, чьмки wәʹдә һьндьк майә (Мәт. 6:33).

18. Чьрʹа әм дькарьн бeжьн, кö зәwаща Мәсиһийа дькарә бәхтәwар бә?

¹⁸ Бәлe, әм wәʹдәки öса чәтьнда дьжин, кö гәләк мeр жьн һәв дьqәтьн. Лe ча әм дькарьн зәwаща хwә бәхтәwар кьн? Һәргe жьн у мeрeд Мәсиһи һәләqәтийа нeзикда ньн тʹәви Йаһоwа у щьмәʹта wи, у qәбул дькьн ширәтeд жь Кʹьтeба Пироз у рʹeбәрийа рʹöһʹe пироз, әwана дькарьн зәwаща хwә хwәй кьн. Öса әwана дьдьнә кʹьфшe кö qимәт дькьн вe йәкe кö «Хwәдe әw кьрьнә йәк» (Марq. 10:9).