«Әз Кʹәрәма Дьстиньм, Чьмки Йаһоwа Рʹумәт Дькьм»

«ӘW ШӘРʹ кö ньһа Әwропайeда дьчә, жь һʹәму шәрʹeд бәрe гьрантьр ә». Әw гьли һатә готьнe дәрһәqа шәрʹe һʹәмдьнйайe йe йәкe «Бьрща Qәрәwьлийeда», йа 1 Илонe, сала 1915. Ахьрийeда, wи шәрʹида wәкә 30 wәлата шәрʹ дькьрьн. Вe «Бьрща Qәрәwьлийeда» һатә готьнe: «Хьзмәткьрьн һьнә алийада һатә сәкьнандьнe, илаһи Алманйайeда у Франсайeда».

Wи чахи Лeколинкʹарeд Кʹьтeба Пироз, принсипа тʹәвнәбуйинe бь тʹәмами фәʹм нәдькьрьн. Лe йәкә wана бь дьл у щан мьзгини бәла дькьрьн. Wилһeлм Һилдәбрандт дьхwәст кö хьзмәтийeда тьштәки бькә алийe хwәда. Әwи бәлавок бь навe «Һәрмәһи йа Лeколинкʹарeд Кʹьтeба Пироз» сьфарәш кьрьн. Wилһeлм Франсайeда бу, ләма әwи сәр зьманe Франси әw бәлавок сьфарʹәш кьрьн. Ль weдәрe әw нә кö ча хьзмәткʹарe һәртʹьм бу, лe чаwа әскәрe Алмани. Бь кʹьнщe әскәрийe, әwи мәрьвeд Франси кʹучeда дьда сәкьнандьнe у мьзгинийа дәрһәqа әʹдьлайe гьли дькьр. Wи чахи Алманйа тʹәви Франсайe шәрʹ дькьр, ләма жи әw мәрьв зәндәгьрти дьман чахe дьдитьн, кö Wилһeлм тʹәви wан дәрһәqа әʹдьлайe хәбәрдьдә.

«Бьрща Qәрәwьлийeда» нәʹмә һатьнә нәшьркьрьнe, кʹидәрe кö һатә готьнe дәрһәqа Лeколинкʹарeд Кʹьтeба Пироз жь Алманйайe. Рʹаст ә әwана әскәрийeда бун, лe йәкә wана гәләк дьхwәст мьзгинийа Пʹадшатийe бәла кьн. Лeмкe бьра, әскәр бу у сәр гәмийe qöльх дькьр. Әwи пeнщ мәрьварʹа, йeд кö тʹәви wи бун, дәрһәqа мьзгинийe гьли кьр. У әw мәрьв дьхwәстьн дәрһәqа мьзгинийe һe зeдә пeбьһʹәсьн. Лeмкe ньвиси: «Һәла һe wьра сәр вe гәмийe жи, әз кʹәрәма дьстиньм, чьмки Йаһоwа рʹумәт дькьм».

Щорщ Каисeр әскәр бу у чу шәрʹ, лe вәгәрʹийа малe чаwа хьзмәткʹарe Хwәдe. Лe гәло ча әw йәк qәwьми? Әwи әʹдәбйәтәкә йа Лeколинкʹарeд Кʹьтeба Пироз дит, у бь дьл у щан рʹастийа Пʹадшатийe qәбул кьр. Паши вe йәкe әw ида нәдьчу шәрʹ. Әwи хәбатәкә öса дит, кö тʹәви әскәрийe у шәрʹ гьрeдайи нибу. Паши шәрʹ, әwи гәләк сала бь хирәт хьзмәт кьр чаwа пeшәнг.

Бәлe, wи wәʹдәйи Лeколинкʹарeд Кʹьтeба Пироз пьрса дәрһәqа тʹәвнәбуйинe бь тʹәмами фәʹм нәдькьрьн. Лe йәкә ньһeрʹандьна wана у кьрeд wана, лап щöдә дьбун жь йeд мәрьвeд дьн, чьмки әwан мәрьва шәрʹ qәбул дькьрьн. Политик у сәрweрeд дeра, пьштгьрийа шәрʹ дькьрьн, лe Лeколинкʹарeд Кʹьтeба Пироз пьштгьрийа «Мирe Әʹдьлайe» дькьрьн (Иша. 9:6). Рʹаст ә wана бь тʹәмами тʹәвнәбуйин хwәй нәдькьрьн, лe wана диса жи qануна Хwәдe дьанинә сeри. Конрад Мортeр, йe кö Лeколинкʹарe Кʹьтeба Пироз бу, гьлийeд öса гот: «Жь Хәбәра Хwәдe мьн рʹьнд фәʹм дькьр, кö Мәсиһи гәрәкe нәкöжә» (Дәркʹ. 20:13).a

Алманйайeда wи чахи тʹöнәбу qанун, кʹижан кö изьн бьда мәрьв жь бо баwәрийа хwә нәчә әскәрийe. Лe йәкә 20 зeдәтьр Лeколинкʹарeд Кʹьтeба Пироз нәчунә әскәрийe у тʹö шьхöлe әскәрийeва гьрeдайи qәбул нәдькьрьн. Әскәра һьнәк жь wана һʹәсаб кьрьн ча мәрьвeд дин, мәсәлә, Густав Куйат кьрьнә нәхwәшхана дина у дәрман данә wи. Һанс Һолтeрһоф, йe кö инкʹар кьр һәрʹә әскәрийe, кьрьнә кәлe. Ль we дәрe зорe wи дькьрьн, кö тьштeд әскәрийeва гьрeдайи бькә, лe йәкә әwи тʹö тьшт нәдькьр. Әскәра кʹьнщe дина ль wи кьрьн, у öса qайим wи гьрeдан wәки дәст-ньгeд wи тәвьзин. Чахe әwан әскәра дитьн кö Һанс паши вe йәкe жи ньһeрʹандьна хwә нәгöһаст, wана дәстпeкьр wи бьдьнә тьрсандьнe кö wи бькöжьн. Лe йәкә Һанс амьн ма у wәʹдe шәрʹ тʹәвнәбуйин хwәй кьр.

Бьрeд дьн, кʹижан кö гази кьрьнә һәрʹьнә әскәрийe, qәбул нәкьрьн кö чʹәк һьлдьнә дәстe хwә. Дәwсe, wана хwәст wәки шьхöлeд дьн бьдьнә wан, кʹижан кö шәрʹва гьрeдайи нибун.b Мәсәлә, Щоһанeс Раутe жь дәwләтe изьн хwәст кö шьхöләкә дьн бьдьнә wи, у wи шандьн кö бьхәбьтә сәр рʹийа трeна. Конрад Мортeр һатә кʹьфшкьрьнe чаwа бәрдәстийe һʹәкима, у Рeинһолд Weбeр, һатә кʹьфшкьрьнe кö нәхwәшханeда мьqати нәхwәша бә. Аугуст Крафзиг жи гәләк ша бу, wәки шьхöләкә дьн данә wи у кö әwи тʹәвнәбуйинe хwәй кьр. Әw Лeколинкʹарeд Кʹьтeба Пироз у йeд дьн, сафи кьрьн кö Йаһоwарʹа хьзмәт кьн. Һʹьзкьрьнe у амьнийe һьндава Йаһоwа, wана һeлан кьр бәрбь вe йәкe.

Лeколинкʹарeд Кʹьтeба Пироз бәр мәрьвeд дәwләтe кʹәтьнә чʹәʹва, чьмки нәдьчунә шәрʹ. Һьнә сал шунда, Алманйайeда Лeколинкʹарeд Кʹьтeба Пироз, бь һʹәзара щара шьхöлe wан данә диwанe, сәва кö хьзмәтийа wан бьдьнә сәкьнандьнe. Филиала Алманйайe, саз кьр идара сафикьрьна шьхöлe диwанe, Бәйтʹәла Магдәбургeда, сәва аликʹарийe бьдьнә Лeколинкʹарeд Кʹьтeба Пироз.

Шәʹдeд Йаһоwа һeди-һeди дәстпeкьрьн һe зәлал фәʹм кьн пьрса дәрһәqа тʹәвнәбуйинe. Чахe шәрʹe һʹәмдьнйайe йe дöда дәстпeбу, wана бь тʹәмами тʹәвнәбуйин хwәй дькьрьн у нәдьчунә әскәрийe. Ләма дәwләта Алманйайe wана һʹәсаб дькьрьн ча дьжмьн у гәләк дьзeрʹандьн. Лe әw йәк ида тʹeма башqә йә, у әмe дәрһәqа вe йәкe хәбәрдьн готара дьнда «Жь Архивeд Мә». (Жь архивeд мә Әwропайа Навәндда.)