Пьрсeд Хwәндәвана

Чьрʹа дьжмьнeд Иса сәва дәстшуштьнe тʹәви wи дькʹәтьнә дәʹwe?

Дьжмьнeд Иса гәлә щар тʹәви wи дькʹәтьнә дәʹwe у дьхwәстьн wи у шагьртeд wи сәр гьлийа бьгьрьн. Дәрһәqа әʹдәтe паqьжбунe Qануна Мусада гәләк тʹәми һәбун. Мәсәлә, паqьжбун жь гәмаржeчуйинe, кʹотибунe, у дәстлeкʹәтьна щьнийаза у щәндәкe һʹәйwана. Qанунeда öса жи рʹeбәри дьһатә дайинe, кö мәрьв ча дькарьбу паqьжбуйа. Мәсәлә, бь qöрбанe, бь шуштьнe, йан бь рʹәшандьнe нәпаqьжбун тʹәмьз дьбу (Qан. Кʹаһ., сәрe 11-15; Жьмар 1:1, сәрe 19).

Сәрweрeд рʹeлигийа Щьһуйа, wан qанунада жь бәр хwә әʹдәт зeдәкьрьнә. Кʹьтeбәкә дәрһәqа дирока мьләтe Щьһу, гьли дькә кö һәр мәʹнийа нәпаqьжбунe гәрәкe бьһата лeколинкьрьнe. Мәсәлә, кʹьтeбeда дьһатә готьнe кö сәрweрeд рʹeлигийа Щьһуйа лeколин дькьрьн кö «ча у кʹижан дәрәщада мәрьв дькарьбу нәпаqьжбуйа, ча у чь щурʹәйи әw нәпаqьжбун дькарьбу дәрбази сәр мәрьвeд дьн буйа. Öса жи кʹижан фьраq у һащәт дькарьбун тʹәмьзбуна у нәтʹәмьзбуна, у бь кʹижан һащәта у рʹeтуала паqьжбун гәрәкe бьһата кьрьнe».

Дьжмьнeд Иса жь wи пьрсин: «Чьма шагьртeд тә пәй рʹаw-рʹьзьмeд кал у бава начьн у бь дәстнәшушти нан дьхwьн?» (Марq. 7:5). Әw Фeрьси нәдьготьн дәрһәqа һигиeнайe, дeмәк дәстшуштьн пeшийа нанхwарьнe. Лe wана дьгот дәрһәqа рʹeтуала, кö чаwа гәрәкe дәстe хwә бьшон. Wана жь мәрьва дәʹwа дькьрьн, кö пeшийа нанхwарьнe ав гәрәкe сәр дәстe wанда бe рʹeтьнe. We кʹьтeбeда, йа дәрһәqа дирока мьләтe Щьһу, öса жи тe готьнe: «Wи чахи öса жи дәʹw пeшда дьһатьн, кö кʹижан фьраq гәрәкe бe хәбьтандьнe сәва паqьжкьрьнe, ава ча гәрәкe бe хәбьтандьнe, кʹe гәрәкe авe бәри сәр дәстe wан дә у ав гәрәкe сәр дәст һʹәта кʹö бьһата рʹeтьнe».

Ньһeрʹандьна Иса жь йа wан мәрьва щöдә дьбу, чьмки wана хwәха әw әʹдәт бәр хwә дәрдьхстьн. Ләма Иса сәрweрeд рʹeлигийа Щьһуйарʹа гот: «Ишайа бона wә дöрʹуйа рʹаст пʹeхәмбәрти кьрийә! Чаwа кö һатийә ньвисарe: ‹Әва щьмәʹта бь зарe хwә qәдьрe мьн дьгьрә, лe дьлe wан жь мьн дур ә. Бадиһәwа мьн дьһʹәбиньн, тʹәмийeд мәрьва чаwа qанунeд мьн щьмәʹтe һин дькьн›. Һун тʹәмийeд Хwәдe дьһeльн у пәй рʹаw-рʹьзьмeд мәрьвайийe дькʹәвьн» (Марq. 7:6-8).