Мьн Дьхwәст Чʹәʹв Бьда Мәрьвед Рʹöһʹани

ӘЗ ҺАТЬМӘ буйине 10 Кануна Пешьн сала 1936, Дәwләтед Йәкбуйида, шәһәре Wичитайеда. Әз жь хушк-бьред хwә йе мәзьн бум. Де-баве мьн Wилиам у Щен, Шәʹдед Йaһоwа бун. Щьватеда баве мьн ча «qöльхкʹаре щьвате» бу, бәре öса нав дькьрьн кординаторе кʹома рʹуспийа. Дийа мьн рʹастийа Кʹьтеба Пироз жь дийа хwә пеһʹәсийа, наве wе Ема Wагнер бу. Емайе гәләк мәрьв рʹастийед Кʹьтеба Пироз һин дькьр, йәк жь wан мәрьва Гертруд Стеле бу, йе кö бь сала Порто Рикойеда ча мисйонер хьзмәт дькьр.a Гәләк мәрьвед рʹöһʹани дор бәре мьн һәбун, у мьн дьхwәст чʹәʹв бьдьмә wан.

МӘСӘЛЕД БАШ ТИНЬМ БИРА ХWӘ

Чахе әз 5 сали бум, щарәке рʹожа Шәмийе мьн тʹәви баве хwә кʹучеда журналед «Бьрща Qәрәwьлийе» у «Бәрдьли» (ньһа те навкьрьне «Һʹьшйар Бьн!»), мәрьварʹа бәла дькьр. Wи wәʹдәйи Шәрʹе Һʹәмдьнйайе II дьчу. Кʹучеда һʹәкимәк кö вәхwари бу, рʹасти мә һат у чʹерʹи баве мьн кьр, чьмки баве мьн пьштгьрийа шәрʹ нәдькьр. Әwи баве мьнрʹа гот, wәки әw тьрсонәкә у ләма нахwазә һәрʹә әскәрийе. Әw кʹип незики баве мьн бу, у гот: «Ей тьрсонәк, тö чьрʹа мьн нахи?» Әз гәләк тьрсийам, ле әз әʹщебмайи мам, кö Баве мьн хwә ча да кʹьфше. Паши ве йәке, әwи диса жи бәрдәwам кьр журнала бәла кә мәрьварʹа, йед кö wедәре тʹоп бун. Паше, сәр рʹерʹа әскәрәк дәрбаз дьбу, у әwи һʹәкими wи кьрә гази: «Дә wәрә тьштәки бежә wи тьрсонәкирʹа!». Әwи әскәри тедәрхьст, wәки әw мерьк вәхwари йә, у ләма жерʹа гот: «Һәрʹә мала хwә у сәр һʹьше хwәда wәрә!» Паше әw һәрдö жи чун. Чахе әз әwе qәwьмандьне тиньм бира хwә, әз тʹьме Йaһоwарʹа дьбежьм «зәʹф рʹази мә», чьмки әwи мерхаси дайә баве мьн. Баве мьн дö дәлакханә вәкьр, у әw һʹәким дьһатә щәм wи wәки пʹоре хwә бьбьрә!

Чахе әз 8 сали бум, де-баве мьн мала мә у дәлакханә фьротьн, у мал сәр тʹәкәрәка чекьрьн. У әм дәрбази Колорадойе бун, кʹидәре кö һʹәwщәтийа мьзгинвана һәбу. Әм щиwар бун Гренд Щанкшенеда, у wедәре де-баве мьн ча пешәнг хьзмәт дькьрьн у нив рʹож кʹарханеда дьхәбьтин. Бь аликʹарийа Йaһоwа у хирәта wанә хьзмәтийеда, wи щийи щьват саз бу. Ль wе дәре, 20 Һʹәзиране сала 1948, баве мьн әз чʹемда ньхöмандьм. Хенщи мьн, диса йед дьн жи һатьнә ньхöмандьне, нав wанда бун Били Николз у жьна wи. Паше, әwи чаwа бәрпьрсийар тʹәви жьна хwә хьзмәт дькьр, у кöрʹе wи жи тʹәви жьна хwә чʹәʹв данә wан, у шьхöле бәрпьрсийарти дәстпекьрьн.

Әм гәләк незик бун тʹәви wан мәрьва, йед кö бь тʹәмами нава шьхöле Пʹадшатийеда бун, илаһи тʹәви малбәта бь фәмила Стеле, әw һәнә Дон у Ерлен, Дав у Щулйа, Си у Мартʹа, йед кö гәләк qайим сәр мьн һʹöкöм бун. Wана мьнрʹа нишан кьр, wәки чахе мәрьв шьхöле Пʹадшатийе датинә щийе пешьн, чьqас бәхтәwар дьбә у шабуне дьстинә.

ДӘРБАЗИ ЩИКИ МАЙИН ДЬБЬН

Чахе әз 19 сали бум, достәки малбәта мә Бәд Һасти, мьнрʹа гот wәки тʹәви wи хьзмәт кьм ча пешәнг ль Дәwләтед Йәкбуйи йа Башуре. Бәрпьрсийаре мьһале мәрʹа гот, wәки әм дәрбази Рестене, (Луисйана) бьн, кʹидәре кö һьнә Шәʹдед Йaһоwа рʹöһʹанида сьст бьбун у нәдьһатьнә щьвате. Мәрʹа готьн, wәки әм һәр һʹәфти, фьрqи тʹöнә кö чьqас мәрьв бенә сәр щьвате, лазьм ә щьвата дәрбаз кьн. Мә щик дит у әw щи һазьр кьр сәва дәрбазкьрьна щьвате. Мә һәр щьват дәрбаз дькьр, ле щара тʹәне әз у әw бьра бун сәр щьвате. Чахе әм тʹәне бун, мә дор бь дор щьват дәрбаз дькьр, мәсәлә һәрге йәк жь мә сәр сене бу, йе дьн гәрәке сәр щийе гöһдара буйа у щаба пьрса бьда. Чахе мә тʹәмашә гәрәке бькьра, әм һәрдö жи сәр сене бун, бей гöһдарвана. Ахьрийеда, хушкәкә әʹмьрда мәзьн дәстпекьр бе сәр щьвате. Паше, ида һьнә мәрьвед кö Кʹьтеба Пироз һин дьбун, у йед кö рʹöһʹанида сьст бьбун дьһатьнә сәр щьвате. Öса щьват мәзьн у qәwи бу.

Рʹожәке, әз у Бәд рʹасти мәрьвәки һатьн, кʹижан кö жь рʹелигийа «Дера Мәсиһ» бу. Әwи тʹәви мә дәрһәqа рʹезәкә Кʹьтеба Пироз шеwьр кьр, кʹижан кö мьнрʹа нас нибу. Әз әʹщебмайи мам, у мьн хwәрʹа сафи кьр, wәки һе кʹур бьфькьрьм дәрһәqа баwәрийа хwә. һʹәфтеки, һәр рʹож һʹәта дәрәнг мьн әw пьрсед кö әwи мерьки дабу, леколин дькьр, сәва щабед ван пьрса бьвиньм. Әwе йәке гәләк али мьн кьр, wәки рʹастийе һе рʹьнд фәʹм кьм, у ида мьн гәләк дьхwәст wәки диса рʹасти мәрьвед wи щурʹәйи бем.

Һьнә wәʹдә дәрбаз бу, у бәрпьрсийаре мьһале мьнрʹа гот, wәки әз дәрбази Ел Дорадо бьм (Аркансас), сәва аликʹарийе бьдьмә щьвате. Чахе әз wедәре бум, әз гәләк щар дьчумә Колорадойе, чьмки гәрәке бьчума комисийа әскәрийе у шьровәкьра кö чьрʹа начьм әскәрийе. Щарәке, рʹева, әз тʹәви һьнә пешәнга бум, у мьн Техаседа аварийа кьр у авта мьн шькәст. Мә бьракирʹа тʹелехьст, әw һат әм бьрьнә мала хwә у паше сәр щьвате. Щьватеда бьра әʹлам кьрьн, wәки әм кʹәтьнә зийане, у бьра алийе пʹәрада аликʹари данә мә. Öса жи бьре кö әм бьрьнә щьвате, авта мьн фьрот 25 долара.

Паше әм чунә Wичитайе, кʹидәре кö досте малбәта мәйи незик ча пешәнг хьзмәт дькьр. Наве wи «Док» Макартни бу. Дö кöрʹед wийи щеwи Франк у Франсис һʹәта ньһа һәвалед мьни незик ьн. Авта wанә кәвьн һәбу, кʹижан кö wана 25 долара данә мьн, демәк һәма һаqас, чьqас мьн авта хwәйә шькәсти фьротьбу. Әв щара пешийе бу, кö мьн зәлал дит wәки Йaһоwа чьqас али мьн дькьр, чьмки мьн шьхöле Пʹадшатийе дани сәр щийе пешьн. Макартни насийа мьн да хушкәкә дәлал, кö наве wе Бетʹел Кран бу. Дийа wе Рʹутʹ хьзмәткʹарәкә хирәт бу ль Wелингтоне (Кансас). Әw һәла һе 90 салийа хwәда жи пешәнг бу. Саләк дәрбаз нәбу, мьн у Бетʹеле һәвдö сьтанд, сала 1958, у Ел Дорадойеда мә тʹәвайи ча пешәнг хьзмәт дькьр.

ТʹӘГЛИФКЬРЬНЕД ПʹЬРʹ ША

Әм тʹьме дьфькьрин сәр мәсәла мәрьвед баш, у мә дьхwәст чʹәʹв бьдьнә wан. Мә сафи кьр wәки тʹәшкиләта Йaһоwа чь шьхöли жи бьдә мә, әме бь дьл qәбул кьн. Әм һатьнә кʹьфшкьрьне ча пешәнге һәртʹьм Wалнут Рищеда, (Аркансас). Паше, сала 1962 әм тʹәглиф кьрьнә Мәкʹтәба Гиләд у әм гәләк ша бун. Әм һе гәләк ша бун, чахе әм пеһʹәсийан wәки Дон Стел жи wе тʹәви мә һин бә. Чахе мә Мәкʹтәба Гиләд хьлаз кьр, әз у Бетʹел һатьнә кʹьфшкьрьне Наиробийеда, (Кенйа). Әм гәләк бәрхwә дькʹәтьн, чьмки әм гәрәке жь Нийу Йорке бьчуна, ле әм гәләк ша бун чахе мә бьра дит, кö һатьбун пешийа мә ль аерапорта Наиробийе.

Әм зу һини Кенйайе бун, у хьзмәткьрьна wедәре гәләк мә хwәш һат. Мәрьвед пешьн, тʹәви кʹижана мә һинбуна Кʹьтеба Пироз дәрбаз дькьр, Крис у Мери Канайа бун. Әwана һʹәта ньһа Кенйайеда ча хьзмәткʹаред һәртʹьм хьзмәт дькьн. Ле сала дьнда, мәрʹа готьн кö әм гәрәке дәрбази Кампалайе, демәк Угандайе бьн. Wи wәлатида әм мисйонеред пешьн бун. Әw wәʹдәки зәʹф хwәш бу, чьмки гәләк мәрьва дьхwәстьн рʹастийед Кʹьтеба Пироз һин бьн у ахьрийеда әwана бунә хушк-бьред мә. Ле паши се сал у нива әм жь Африкайе вәгәрʹийанә Дәwләтед Йәкбуйи, чьмки зедайи кʹәтә малбәта мә. Мә сафи кьр wәки вәгәрʹьн Дәwләтед Йәкбуйи. Чахе мә Африка һишт, мәрʹа һе чәтьн бу, нә кö чахе мә Нийу Йорк һишт. Мә мәрьвед Африкайеда гәләк һʹьз кьр у мә дьхwәст диса вәгәрʹьн wедәре.

ЩАБДАРИЙА ТʹӘЗӘ

Әм дәрбази Колорадойа рʹоавайе бун, кʹидәре кö де-баве мьн дьжитьн. Чахе qиза мәйә пешьн Кимберли һатә буйине, паши саләк у 5 мәһа qиза мә Стефани һатә буйине. Щабдарийа мәйә тʹәзә чаwа де-бав, гәләк фәрз бу бона мә. Мә гәләк qәwат хәрщ дькьр, wәки qизед хwә рʹастийе һин кьн. Мә дьхwәст чʹәʹв бьда wан мәрьва, йед кö мәсәлед баш бун бона мә. Мә заньбу, wәки мәсәла мәйә баш жи дькарә баш сәр зарʹед мә һʹöкöм бә. Ле мә фәʹм дькьр, wәки тʹәне wе йәкева гьредайи нинә, кö әwана wе бьбьнә хьзмәткʹаред Йaһоwа йан на. Чьмки йазьх, бьре мьни бьчʹук у хушка мьн, рʹасти һиштьн. Ле әз баwәр ьм кö әwана wе диса вәгәрʹьн у чʹәʹв бьдьнә мәсәлед баш.

Мәрʹа гәләк һʹәwас бу чахе мә qизед хwә мәзьн дькьр. Малбәта мә дьхwәст тʹьме һʹәму тьшти тʹәвайи бькьн. Мә незики Аспене дьжит, кʹижан кö бь курорта ажотьна лакʹана (лиж) нас ә. Чахе әм пе канате һьлдькʹьшийанә чʹийе, әw wәʹдә мә дьда хәбате сәва тʹәви qизед хwә хәбәрдьн. Öса жи мә ль чʹийа у дәшта рʹеwити дькьр. Һьнге мә кöчʹьк ведьхьст, әм доре рудьньштьн, у мә тʹәви qизед хwә хwәш-хwәш хәбәрдьда. Рʹаст ә әwана һе бьчʹук бун, ле мә тʹәви wан хәбәрдьда, wәки чахе әwана мәзьн бьн wе чь бькьн у мере ча бьстиньн. Мә дьхwәст wәки зарʹед мә принсипед Йaһоwа һʹьз бькьн. Мә тʹьме wана һелан дькьр кö хwәрʹа нете дайньн, wәки хьзмәт кьн ча хьзмәткʹаред һәртʹьм у кәсед öса бьстиньн, кʹижана нета öса данә пешийа хwә. Мә дьхwәст wана һин кьн, wәки азәпбуна хwә qимәт кьн у зу мер нәкьн. Мә тʹәвайи хәбәрда у кьрә qәйдә: «Һʹәта нәбьн 23 сали мер нәкьн».

Чаwа де-баве мә бона мә кьрьбун, öса жи әм зәʹф дьхәбьтин, wәки малбәта мә тʹьме тʹәвайи сәр щьвате бьн у хьзмәт кьн. Мә öса жи, хушк-бьред кö хьзмәткʹаред һәртʹьм бун, тʹәглиф дькьр, wәки шәв мала мәда бьминьн. Öса жи мә гәләк щар тʹәви зарʹед хwә хәбәрдьда дәрһәqа ве йәке, кö wәʹдәки чьqас хwәш бу чахе әм мисйонер бун. Мә дьгот, wәки әм гәләк дьхwазьн кö әм һәр чар тʹәвайи һәрʹьнә Африкайе. Qизед мә жи гәләк дьхwәстьн wәки әм һәрʹьн.

Мә тʹьме qöльхкьрьна тʹәви малбәте дәрбаз дькьр у һьнге мә шеwьр дькьр, кö әwана мәкʹтәбеда дькарьн рʹасти кʹижан дәрәща бен. Мә тʹәмашә саз дькьр кö әwана Шәʹде Йaһоwа нә, ле әм һәвалед wанә мәкʹтәбе нә, у мә пьрс дьда wан. Әw йәк гәләк wан хwәш дьһат, у әwана мерхас дьбун. Ле чахе әwана һьнәки мәзьн бун, щара дькьрьнә офә-оф, чьмки нә дьхwәстьн qöльхкьрьна тʹәви малбәте дәрбаз бьн. Щарәке әз һерс кʹәтьм у мьн wанрʹа гот, wәки һәрʹьн отʹаха хwә у әм qöльхкьрьна тʹәви малбәте дәрбаз накьн. Әwана шаш ман, дәстпекьрьн гьрийан у готьн, wәки дьхwазьн qöльхкьрьна тʹәви малбәте дәрбаз кьн. Мә фәʹм кьр wәки әwана дьле хwәда рʹастийе һʹьз дькьн. Чьqас дьчу, һе зедә wана һʹьз дькьр һин бьн, у wана зәʹф аза фькьред хwә мәрʹа гьли дькьрьн. Рʹаст ә дьле мә дешийа чахе wана дьгот, wәки әwана һьнә һинкьрьнед Кʹьтеба Пироз баwәр накьн, ле öса мә тедәрдьхьст, wәки бь рʹастийе дьле wанда чь йә. Паши шеwьркьрьна дәрһәqа пьрсед wан, әwана qайил дьбун тʹәви принсипед Йaһоwа.

ГÖҺАСТЬНЕД ТʹӘЗӘ

Зарʹед мә öса зу мәзьн бун, wәки мә нә жи тедәрхьст әw wәʹдә ча дәрбаз бу. Мә пе аликʹари у рʹебәрийа тʹәшкиләта Йaһоwа, чь дькарьбу һʹәму тьшт дькьр, сәва зарʹед мә Йaһоwа һʹьз кьн. Әм гәләк ша бун чахе дö qизед мә паши хьлазийа мәкʹтәбе дәстпекьрьн ча пешәнг хьзмәт кьн. Әwана öса жи пʹешә һин бун, дьхәбьтин у хwәха хwә хwәй дькьрьн. Әwана тʹәви дö хушка, дәрбази Кливленд (Тенеси) бунә, кʹидәре кö һʹәwщәтийа мьзгинвана һәбу. Мә гәләк бира wан дькьр, ле әм гәләк ша дьбун wәки әwана тʹәмамийа wәʹде хwә хәрщ дькьн хьзмәтийеда. Мьн у Бетʹеле диса дәстпекьр хьзмәт кьн ча пешәнг, у әwе йәке мәрʹа рʹе вәкьр бона кʹьфшкьрьнед майин. Әм һатьнә кʹьфшкьрьне ча аликʹарчийе бәрпьрсийаре мьһале, у öса жи мә аликʹари дьда шьхöлед кö лазьм бун сәва щьвата мәзьн.

Qизед мә пешийа кö бьчуна Тенесийе, чубунә филиала Лондоне. Һьнге Стефани 19 сали бу, у ль wедәре әw рʹасти бьраки щаһьл һат, кʹижани кö Бәйтʹәледа хьзмәт дькьр. Наве wи Пол Нортон бу. Кʹәнге Стефани бу 23 сали, әwе Пол станд. Ле чахе Кимберли диса чу ве филиале, әw рʹасти һәвале Пол һат, наве wи Брайан Леwелин ә. Саләк пәй меркьрьна Стефанирʹа, Кимберли Брайан станд, чахе әw 25 сали бу. Әwана һәрдö жи гьлийед хwә анинә сери, кö һʹәта 23 сали мер нәкьн. Дьле мә гәләк ша дьбу, wәки qизед мә меркьрьнеда сафикьрьнед рʹаст кьрьн.

Qизед мә мәрʹа готьн wәки мәсәла мә у калькпирькед wан али wан кьр, wәки гöрʹа ве тʹәмийа Иса кьрьн, кö һәла һе тʹöнәбунеда жи «бәре пешьн ль Пʹадшатийа Хwәде бьгәрʹьн» (Мәт. 6:33). Сала 1998, мәһа нисане, Пол у Стефани һатьнә тʹәглифкьрьне Мәкʹтәба Гиләдда, у паше әwана һатьнә кʹьфшкьрьне Малавйеда (Африка). Wи wәʹдәйи, Брайан у Кимберли һатьнә тʹәглифкьрьне кö Бәйтʹәла Лондонеда хьзмәт кьн. Паше әwана һатьнә кʹьфшкьрьне Бәйтʹәла Малавйайеда. Шабуна мә беһʹәсаб бу, чьмки сәва щаһьла рʹийа лапә баш әw ә, чахе әwана wәʹде хwә пʹешкʹеши Хwәде дькьн.

ДИСА ТʹӘГЛИФКЬРЬНӘКӘ ГӘЛӘК ША

Сала 2001, мәһа Чьлә, мьнрʹа тʹелехьстьн, чаwа мьн ида жоре гьли кьр. Мараисе бьра, йе кö бәрпьрсийаре идара Кʹомәкдарийа Wәлгәрʹа бу, тʹеледа мьнрʹа шьровәкьр wәки бьра дьхwазьн нав тʹәмамийа дьнйайе курсед фәʹмкьрьна зьмане Инглизи саз кьн. У wана дьхwәст wәки әз 64 салийа хwәда, бьбума йәк жь дәрсдаред ве курсе. Мьн у Бетʹеле дöа дькьр, у дәрһәqа ве йәке мә ширәт жь дийа мьн у дийа wе һьлда, йед кö әʹмьрда мәзьн бун. Рʹаст ә wанрʹа аликʹарийа мә лазьм бу, ле йәкә wан һәрда жи әм һелан кьрьн wәки әм һәрʹьн. У мьн тʹелехьст wи бьрайирʹа у гот wәки әм һазьр ьн сәва wи шьхöли, кʹижан кö бона мә qәдьрәки мәзьн бу.

Паше, әʹйан бу, wәки рʹәqа дийа мьн һәйә. Мьн дийа хwәрʹа гот, wәки әме бьминьн у али хушка мьн Линда бькьн сәва мьqати wе бьн. Ле дийа мьнрʹа гот: «На тьште öса нәкә, әзе һе хьраб бьм һәрге тö нәчи». Хушка мьн жи дьхwәст кö әм һәрʹьн. Мә гәләк дьшекьранд кö әwана һазьр бун qöрбанед öса бькьн, у әм öса жи гәләк рʹази бун сәва аликʹарийа хушк-бьред мә, йед кö мьһала дийа мьнда дьжитьн. Сьвәтьре, чахе әм һатьнә Патерсоне, кʹидәре кö гәрәке әм һин кьрана, Линдайе мәрʹа тʹелехьст у гот, wәки дийа мьн мьр. У чаwа дийа мьн әм һелан кьрьбун, әм нава wи шьхöлида ман.

Әм öса ша бун, чахе әм щара пешийе һатьн кʹьфшкьрьне филиала Малавйайеда, кʹидәре кö qизед мә тʹәви меред хwә хьзмәт дькьрьн. Чьqас хwәш бу, кö әм диса тʹәвайи бун! Паше, мә курс дәрбаз кьр Зимбабwәда у паше Замбйайеда. Паши се сал у нива, мәрʹа готьн wәки диса һәрʹьнә Малавйайе, сәва кö qәwьмандьнед хушк-бьред мә бьньвисьн, йед кö жь бо тʹәвнәбуйине дьһатьнә зерандьне.b

Сала 2005, диса әм гәләк бәрхwә дькʹәтьн, чьмки әм жь Африкайе чун у вәгәрʹийанә мала хwә Колорадойе. Ль wе дәре мьн у Бетʹеле бәрдәwам кьр хьзмәт кьн ча пешәнг. Сала 2006, Брайан у Кимберли бунә щинаред мә, тʹәви дö qизед хwә Мекензи у Елизабете. Пол у Стефани диса Малавйайеда ньн, кʹидәре кö Пол хьзмәт дькә ча әндәме Комитейа Филиале. Ньһа әз ида дьбьмә 80 сали, у әз гәләк ша мә чахе әwан бьред щаһьл дьвиньм, кʹижан кö мьн бь сала һин дькьр. Әw шьхöлед кö мьн бәре дькьр, ньһа әwана дькьн. Әм бь рʹастийе жи бәхтәwар ьн у шабуна мә пʹьрʹ мәзьн ә, чьмки мә әʹмьре хwәда чʹәʹв дьда мәрьвед рʹöһʹани, у әwе йәке зарʹед мә у нәбийед мәрʹа жи кʹар ани.