Мьн Нәдьхwәст Бьмьрьм!

ЖИЙИНА МЬНӘ БӘРЕ

Әз ль Лондонеда һатьмә буйине, дь маһала Падингтонеда. Мьн тʹәви дийа хwә у се хушкед хwәйи мәзьн дьжит. Баве мьн жь бо вәхwарьна ичке qә малда нәдьма.

Чахе әз бьчʹук бум, дийа мьн әз һиндькьрьм һәр евар дöа бькьм. Щәм мьн кʹьтеба Зәбур һәбу, у мьн хwәрʹа кʹьлам чедькьрьн сәва кö wан Зәбура бьстьрем. Те бира мьн, ча щарәке кʹьтебәкеда мьн тʹьштәк хwәнд, чь кö әз тьрсандьм. Wе дәре ньвисар бу: «Щарәке wе рʹожа сьбе ида тöнә бә». Жь бо wан гьлийа, әз евара нькарьбум разама у дәрһәqа ахьрийе дьфькьрим. Мьн хwәрʹа дьгот: ‹Нә нета жийине гәрәке һәбә? Чира әз һатьмә дьне?› Мьн нәдьхwәст бьмьрьм!

Мьн дәстпекьр сербази у кочʹәктийева мьжул бьм. Мьн дьхwәст тʹәви мьрийа хәбәр дьм, ләма жи әз тʹәви һәвалед хwәйә мәктәбе дьчумә сәр мәзәла, әм öса синәмед (кино) тьрсәһез дьньһерʹин. Әм дьфькьрин, кö әw һʹәму тьшт һьм һʹәwас ьн һьм жи тьрсәһез ьн.

Чахе әз дәһә сали бум әз бумә йәкә хwәһʹьз. Мьн дәстпекьр тʹьтʹуне бькʹьшиньм у ахьрийеда әз вева һатьме гьредане. Һьне wәʹдә шунда мьн дәстпекьр марихуане бькʹьшиньм. 11 салийа хwәда мьн дәстпекьр ичке тәʹм кьм. Рʹаст ә тәʹма ичке мьн һʹьз нәдькьр ле мьн бәгәм дькьр кö жь бо ве йәке әз сәрхwәш дьбум. Мьн öса жи мьqам у рәqас һʹьз дькьр. Мьн wәʹдәдәрбазкьрьн гәләк һʹьз дькьр у дьчумә клубед шәве. Әз евара дәрдькʹәтьм у бәрбанге вәдьгәрʹийамә мал. Рʹожа дьн әз ида wәстийайи бум у жь бо wе йәке мьн тʹьме мәкʹтәб бәрдьда. Ле чахе әз дьчумә мәкʹтәбе, wәʹде чәнд дәqе һесабуне мьн ичкә вәдьхwар.

Сала пашьнә мәкʹтәбеда, әз гәләк хьраб һин дьбум. Чахе дийа мьн пеһʹәсийа дәрһәqа кьред мьнә хьраб, у дит кö чаwа әз хьраб һин дьбьм, әw гәләк дьлтәнг у һерс бу. Мә һәврʹа шәрʹ кьр у әз жь мале рәвʹийам. Чәндәке мьн тʹәви һәваләки хwә Тони дьжит. Әwи хwә ль дине Растафари дьгьрт. Тони дьзийед бьчʹук дькьр у наркотика дьфьрот, һьм жи әw әʹйан бу ча мәрәвәки зöлм. Зутьрәке әз гьран дәркʹәтьм у чахе 16 сали бум, кöрʹ мәрʹа һатә буйине.

КʹЬТЕБА ПИРОЗ ЧА ЖИЙИНА МЬН ГÖҺАСТ

Щара пешьн әз рʹасти Шәʹдед Йаһоwа һатьм, чахе мьн wи ханида дьжит, кʹижан кö бона wан кʹöлфәта бу, йед кö тʹәне зарʹед хwә мәзьн дькьрьн. Ви ханида, дәwләте отʹах дабу мьн. Дö кʹöлфәт йед кö Шәʹдед Йаһоwа бун, тʹьме дьһатьн ханийе мә у тʹәви дайикед щаһьл хәбәр дьдан. Щарәке мьн жи тʹәви wан хәбәр да. Мьн дьхwәст избат кьм wәки әwана нәрʹаст ьн. Ле wана сәр һʹиме Кʹьтеба Пироз щаба һʹәму пьрсед мьн дан. Әwана мәрьвнә qәнщ у дьлрʹәʹм бун, чь кö гәләк мьн хwәш һат. Ләма жи әз qайил бум кö әwана һинкьрьна Кʹьтеба Пироз тʹәви мьн дәрбаз кьн.

Һьнә wәʹдә шунда әз жь Кʹьтеба Пироз тьштәки öса пеһʹәсийам, чь кö жийина мьн гöһаст. Бьчʹуктайа хwәда әз мьрьне дьтьрсийам. Ле ньһа әз пеһʹәсийам дәрһәqа сахкьрьне, чь кö Иса һин дькьр (Йуһʹәнна 5:28, 29). Öса жи әз пеһʹәсийам, wәки Хwәде бона мьн хәм дькә (1 Пәтрус 5:7). Гьлийед жь Йерәмйа 29:11 гәләк дьле мьн гьртьн. Ль вьр Йаһоwа дьбежә кö рʹьнд занә wәки чь бона мә qьрар кьрийә. Демәк әwи бона мә әʹдьлайи qьрар кьрийә нә кö хәзәб, у әw ахьрикә баш мәрʹа соз дьдә. Ләма жи мьн дәстпекьр баwәр бькьм кö әз жи дькарьм дь Щьнәтеда ль сәр әʹрде һʹәта-һʹәтайе бьжим (Зәбур 37:29).

Шәʹдед Йаһоwа бь рʹасти жи һʹьзкьрьна хwә һьндава мьнда данә кʹьфше. Чахе әз щара пешьн чумә щьватед wан, һʹьзкьрьна wан ль сәр мьн һʹöкöм бу, чьмки һәр кәс һәвалһʹьз бу! (Йуһʹәнна 13:34, 35) Бь рʹасти жи әwана гәләк щöдә дьбун жь wе дере, кʹидәре кö әз дьчум. Шәʹдед Йаһоwа бь дьл у щан әз qәбул кьрьм у нәньһерʹин ль сәр һале мьн. Wана wәʹде хwә сәр мьн хәрщ дькьрьн, бона мьн хәм дькьрьн у аликʹарийа керһати дьданә мьн. Мьн хwә тʹәхмин кьр wәк пʹарәкә малбәта мәзьн, нава кʹижанида кö һʹьзкьрьн һәйә.

Жь һинбуна Кʹьтеба Пироз мьн фәʹм кьр кö гәрәке жийина хwәда тьштәки бьгöһезьм, сәва кö ль гора нормед Хwәдейи нав-намусийе бьжим. Мьрʹа һеса нибу тʹәрка тʹьтʹуне бьдьм. Хенщи wе йәке, мьн фәʹм кьр wәки һьнә мьqамед кö мьн дьбьһист, мьн һелан дькьн марихуанайе бькʹьшиньм. Ләма жи мьн мьqамед хwә гöһаст. Мьн нәдьхwәст диса жи сәрхwәш бьм, ләма жи әз ида нәдьчум клубед шәве у щийед дьн, кʹидәре кö әз дькарьбум диса жи бькʹәтама бәр байе ичке. Мьн һәвалед ну хwәрʹа дьгәрʹийа, йед кö wе баш ль сәр мьн һʹöкöм кьрана, у али мьн бькьрана, wәки жийина хwә бьгöһезьм (Мәтʹәлок 13:20).

Хенщи wе йәке Тони жи дәстпекьр тʹәви Шәʹдед Йаһоwа Кʹьтеба Пироз һин бә. Чахе Шәʹдед Йаһоwа щаба пьрсед wи бь Кʹьтеба Пироз дан, әw баwәр бу кö әв һәйә рʹасти. У әwи гöһастьнед мәзьн жийина хwәда кьр; әwи һәвалед хwәйә зöлм һишт, тʹәрка дьзийед бьчʹук да у һәла һе марихуана жи тʹәрьканд. Сәва кö бь тʹәмами дьле Хwәде ша кьн, мә фәʹм кьр, кö гәрәке шьхöлед хwәйи бенамуси бьһельн у дәрәщәкә баш сәва кöрʹе хwә чекьн. Дь сала 1982-да әм зәwьщин у һәләqәтийа мә ида qануни бу.

Те бира мьн ча мьн журналед «Бьрща Qәрәwьлийеда» у «Һʹьшийар Бьн!»a готар дьгәрʹийан дәрһәqа сәрһатийа wан мәрийа, йед кö жийина хwә гöһастьн у сәрфьраз бун, чь кö мьрʹа лазьм бу. Мәсәла wан, гәләк әз һелан дькьрьм! Мьн qәwат станд кö һʹәму тьшти бькьм wәки бемә гöһастьне у сьст нәбьм. Мьн бәрдәwам дькьр Йаһоwарʹа дöа кьм кö әw мьн нәһелә. Әз у Тони сала 1982 мәһа Тирмәһе һатьнә ньхöмандьне у бунә Шәʹдед Йаһоwа.

ЧЬ КʹАР МЬН СТАНД

Достийа мьн тʹәви Йаһоwа Хwәде, жийина мьн хьлаз кьр. Мьн у Тони wәʹде чәтьнда тʹьме пьштгьрийа Йаһоwа ль сәр хwә тʹәхмин дькьр. Әван чәтьнайа әм һин кьрьн итʹбарийа хwә Хwәде биньн, у ньһа жи әм тʹәхмин дькьн кö әw һәр гав али малбәта мә дькә у мә qәwи дькә (Зәбур 55:22).

Әз гәләк ша мә кö дькарьм аликʹарийе бьдьмә кöрʹ у qиза мә, wәки әwана жи мина мьн Йаһоwа нас кьн. Ньһа әз дьлша мә чахе дьвиньм кö чаwа нәбичʹьркед мьн занәбуне дәрһәqа Хwәде дьстиньн у пешда дьчьн.

У ньһа евара әз дькарьм архайин рʹазем у бәрхwәнәкʹәвьм дәрһәqа ахьрийе у мьрьне. Ньһа әз у Тони һәр һʹәфтийе сәрледана щурʹә-щурʹә щьватед Шәʹдед Йаһоwа дькьн, сәва кö wана һелан кьн. Әм тʹәви wана аликʹарийе дьдьнә мәрьвед дьн сәва кö баwәрийа хwә Иса биньн, у бькарьбьн жийина абадин демәк жийина һәрһәйи бьстиньн.