Бона Мьн Хwәде Тʹöнә бу

ЖИЙИНА МЬНӘ БӘРЕ

Әз дь гöнде Саксонйайеда һатьмә буйине, йе кö бәре дькʹәтә Кʹомара Демократик йа Алманйайе (GDR). Мала мә бь һьзкьрьн тʹьжә бу у де-баве мьн жи әз һин кьрьмә, кö бь нормед нав-намусийе бьжим. GDR Комунисти бу, ләма жи бона гәләк мәрьвед Саксонйайе, религийа тьштәкә муһим нибу. У мьн жи һʹәсаб дькьр кö Хwәде тʹöнә. Атеизм у Комунизме гәләк һʹöкöм кьрьн сәр 18 салед мьнә пешьн.

Чьма Комунизм мьн хwәш һат? Чьмки мьн гәләк бәгәм дькьр әw фькьр, кö һʹәму мәрьв wәк һәw ьн. Хенщи ве йәке мьн һʹәсаб дькьр, кö тʹәмамийа һәбуке гәрәке бь һәqийе нава мәрьвада бе пʹаравәкьрьне, чьмки ида фьрqи wе тʹöнә буйа ортʹа дәwләмәндтийе у фәqирийе. Ләма жи әз кʹәтьмә нава тʹәшкиләта Комуниста йа бона щаһьла. Чахе әз 14 сали бум, мьн гәләк wәде хwә хәрщ дькьр, кö бона екологйайе хәм бькьм, демәк әз дьхәбьтим кö кʹахазед нәлазьм тʹәзә кьм. Мәрьвед шәһәре Ауе öса мьрʹа рʹази бун сәва шьхöле мьн, кö һʹöкöмдаред wан һәла һе әз хәлат жи кьрьм. У ида wи чахи мьн öса жи һьнә мәрьве политикийә GDR нас дькьр, йед кö мәрьвнә бь нав у дәнг бун. Мьн тʹьре кö әз бәрбь нетәкә рʹаст дьчьм у кö ахьрийа мьн wе баш бә.

Паше, ньшкева нет-мәрәмед мьн бәта вәбун. Дь сала 1989-да Диwаре Берлине у блока рʹöһʹьлате йа Комунизме һатә һьлшандьне. Әз гәләк әʹщебмайи дьмам. Зутьрәке мьн тедәрхьст, кö дь GDR-да нәрʹасти гәләк бәлабуйи йә. Мәсәлә мәрьвед кö пьштгьрийа Комунизме нәдькьрьн, ча бажарванед бекер дьһатьнә һʹәсабе. Ле чьма öса бу? Нә Комунизм дьбежә кö һʹәму мәрьв wәк һәв ьн. Йан кьред Комунизме жь хәбәрдана wан, һәв щöдә дьбә? Әз гәләк хәмгин бум.

Ләма жи мьн нетед хwә гöһаст у әз музикайева у нәqьшькьрьна шьклава мьжул бум. Әз мәкʹтәба музикайе йа бьльнда һин дьбум, у мьн нет да пешийа хwә дәрбази заньнгәһе бьм, чьмки әз һьзрәт бум бьбьмә музиканте щерʹьбанди у нәхшкʹар. Хенщи wе йәке әз жь нормед нав-намусийе дур кʹәтьм, кö зарʹотийеда әз һин кьрьмә. Wи чахи бона мьн даһа фәрз бу, кö тʹәви чәнд кәчʹька wәʹдә дәрбаз кьм. Чь жи һәбу, мьqам, нәqьшкьрьна шькьла у жийина нәщайиз, хәмед мьн кем нәкьрьн. Һәла һе әв шькьл жи, кʹижан мьн нәqьш дькьр, тьрс дьданә кʹьфше. Чь ахьри һивийа мә йә? У нета жийине чь йә?

Ахьрийе чахе мьн щаба пьрсед хwә дит, әз әʹщебмайи мам. Щарәке еваре дь заньнгәһеда әз рʹуньштьбум тʹәви кʹома шагьрта, йед кö дәрһәqа ахьрийе шеwьр дькьрьн. Мендиa шагьрта заньнгәһа мә, Шәʹде Йаһоwа бу. Wе еваре әве ширәтәкә баш да мьн. Әwе гот: «Андреас, һәрге тö дьхwази щабед пьрсед хwә бьстини йед кö жийин у ахрийева гьредайи нә, рʹьнд дина хwә бьдә Кʹьтеба Пироз».

Мьн сәд сәләфи баwәр нәкьр, ле йәкә мьн сафи кьр дь Кʹьтеба Пирозда щабед wан пьрса бьгәрʹьм. Менди дина мьн дабу сәр кʹьтеба Данийел сәре 2, у чахе мьн хwәнд әз гәләк әʹщебмайи мам. Әв пʹехәмбәрти шьровәдькә дәрһәqа рʹеза һʹöкöмдарийа, йед кö һʹәта рожа иройин жи гәләк һʹöкöм дькьн. Менди öса жи пʹехәмбәртийед дьн жь Кʹьтеба Пироз мьнрʹа нишан кьр, кʹижан кö ахьрийа мәва гьредайи нә. Шькьр, мьн щаба пьрсед хwә дит! Ле гәло кʹи әв пʹехәмбәрти ньвисин, у кʹи дькарьбу öса рʹастә-рʹаст ахьрийе әʹйан кә? Мьнрʹа зәлал бу, кö Хwәде һәйә у тʹәне Әw дькарә һʹәму тьшти әʹйан кә.

ЧАWА КʹЬТЕБА ПИРОЗ ЖИЙИНА МЬН ГÖҺАСТ

Менди әз дамә наскьрьне тʹәви Һорст у Ангеликайе. Әв жьн-мер Шәʹдед Йаһоwа бун. Wана али мьн кьр һе рʹьнд Хәбәра Хwәде фәʹм кьм. Мьн дәрбера тедәрхьст кö тʹәне Шәʹдед Йаһоwа әw тʹәшкиләт ә, йа кö тʹьме дина хwә дьдә сәр наве Хwәдейи шәхси, демәк Йаһоwа, у әви нави дьдьнә хәбате (Зәбур 83:18; Мәтта 6:9). Әз пеһʹәсийам кö Йаһоwа Хwәде һевийе дьдә инсанәте, кö һәр-һәйи ль сәр әʹрде щьнәте бьжин. Зәбур 37:9 дьбежә: «Йед ль Хöдан сәбьр дькьн, әwе ль әʹрде wар бьн». Әве йәке дьле мьн гьрт чьмки әв һеви сәва wан һʹәму мәрийа нә, йед кö qәwате дьдьнә хәбате, wәки ль гора нормед Хwәде бьжин.

Мьнрʹа һеса нибу жийина хwә бьгöһезьм у ль гора Кʹьтеба Пироз бьжим. Һьм музикеда, һьм жи нәqьшкьрьнеда әз гәләк пешда дьчум у сәрфьраз дьбум. Жь бо ве йәке әз бумә йәки бабах. Ләма жи пешийе әз гәрәке мьлуктийе һин бума. Мьнрʹа öса жи һеса нибу жийина хwәйә нәщайиз бьһельм. Әз чьqас рʹази мә, кö Йаһоwа мәрийа фәʹм дькә. Әw öса жи сәбьре у дьлрʹәмийе дьдә кʹьфше һьндава wан мәрьвада, йед кö бь принсипед Кʹьтеба Пироз дьжин!

Комунизм у Атеизм 18 салед мьни пешьнда алийе хьрабда әз гöһастьмә, ле Кʹьтеба Пироз жийина мьн алийе башда гöһаст. Чь кö әз педьһʹәсийам, хәмгинийа мьн дәрһәqа ахьрийе дьтәмьранд у мьн нета жийине дит. Дь сала 1993-да, әз һатьмә ньхöмандьне у бумә Шәʹде Йаһоwа. У сала 2000-да әз тʹәви Табитайе зәwьщим, кʹöлфәтәкә хирәт йа кö wәк мьн Хwәде баwәр дькьр. Мә гәләк wәʹдә хәрщ дькьр кö али мәрийа бькьн, сәва Кʹьтеба Пироз нас кьн. Ньһерʹандьна гәләк мәрийа, йед кö рʹасти мьн тен, ль сәр һʹиме Комунизме у Атеизме һатә сазкьрьне. Мьнрʹа гәләк һʹәwас ә wанарʹа гьли кьм, кö чаwа Йаһоwа нас кьн.

ЧЬ КʹАР МЬН СТАНД

Чахе әз щара пешийе тʹәви Шәʹдед Йаһоwа текли бум, де-баве мьн гәләк әʹщебмайи ман. Ле һьнгеда wана дит, кö чаwа һәвалтийа мьн тʹәви wана, баш сәр жийина мьн һʹöкöм дькә. Әз гәләк ша мә кö ньһа де-баве мьн Кʹьтеба Пироз дьхуньн у тенә сәр щьватед Шәʹдед Йаһоwа.

Әз у Табита зәwаща хwәда бәхтәwар ьн, чьмки әм дьхәбьтьн кö хwә ль wан ширәта бьгьрьн, йед кö Кʹьтеба Пироз дьдә жьн-мера. Мәсәлә әв кö әм дьдьнә хәбате ширәте дәрһәqа амьнйа зәwащеда, зәwаща мә даһа qәwи дькә (Ибрани 13:4).

Ньһа ида әз жь жийине натьрсьм у дәрһәqа ахьрийе жи бәрхwәнакʹәвьм. Әз кʹәтьмә нава малбәта һʹәмдьнйайе йа wан мәрийа, йед кö wәк мьн Хwәде дьһʹәбиньн у нава кʹижана кö һәйә әʹдьлайа рʹаст у йәкти. Дь ве малбәтеда кәсәк жь йед дьн хwә бьльнд һʹәсаб накә. Әw һʹәма әw ә чь кö әз һивийе бум у тʹәмамийа жийина хwәда һьзрәт бум бьгьһижьмә ве йәке.