Кʹижан Пʹешкʹеша Лапә Qимәт Мәрʹа Һатийә Дайине?

«Һәр дайина qәнщ у һәр пʹешкʹеша кʹамьл жь жор ә, жь Бав, жь Әʹфьрандаре рʹонайа те хwаре» (Аqуб 1:17). Әв рʹез дина мә дьдә сәр дьлрʹәмйа Баве мәйи әʹзмана, демәк Йаһоwа Хwәде. Нава гәләк пʹешкʹешада кö Хwәде дайә инсанәте, һәйә пʹешкʹешәкә лап муһим. Гәло әw чь йә? Дь Йуһʹәнна 3:16-да Иса дьбежә: «Чьмки Хwәде öса дьнйа һʹьз кьр, кö Кöрʹе хwәйи тайе тʹәне бәрва да, wәки һәр кәсе кö wи баwәр бькә öнда нәбә, ле жийина wийә һʹәта-һʹәтайе һәбә».

Пʹешкʹеша Хwәдейи пʹьрʹ qимәт бона мә һʹәмуйа, әw һәйә Кöрʹе Wийи тайе тʹәне. Бь ве пʹешкʹеше әм дькарьн аза бьн жь дилтйа гöнә, калбун-пирбуне, у мьрьне (Зәбур 51:5; Йуһʹәнна 8:34). Һәрге әм гәләк qәwате дьдьнә хәбате жи, бь хwә әме нькарьбьн жь ве дилтийе аза бьн. Жь һʹьзкьрьна хwәйә мәзьн Хwәде пʹешкʹеши мә кьр әw, чь кö мә аза дькә. Йаһоwа Хwәде сәва инсанәте кöрʹе хwә Иса Мәсиһ wәк кʹьрин да, чь кö мәщал да мәрьвед гöһдар жийина һʹәта-һʹәтайе бьстиньн. Ле кʹьрин бь рʹасти чь йә? Чьма әw гьринг ә? У чаwа әм дькарьн жь wе кʹаре бьстиньн?

Кʹьрин әw һәq ә, кö дьдьн сәва тьштәки öндакьри пашда wәгәрʹиньн, йан кәсәки жь дилтийе аза кьн. Кʹьтеба Пироз шьровәдькә кö де-баве мәйи пешьн, Адәм у Һеwа бе гöнә һатьбун әʹфьрандьне, у дькарьбун ль сәр әʹрде щьнәт һʹәта-һʹәтайе бьжитана тʹәви зöрʹәтед хwә йед кö ль ахьрийе wанрʹа бьбуна (Дәстпебун 1:26-28). Йазьх ле wана бьжарт гöрʹа Хwәде нәкьн, у öса бунә гöнәкʹар. Ахьрийе чь бу? Кʹьтеба Пироз щаба wе пьрсе дьдә: «Аwа чаwа бь мәрьвәки гöнә кʹәтә дьне у жь гöнә жи мьрьн һат, öса жи мьрьн сәр һʹәму мәрьва бәла бу, чьмки һʹәмуйа жи гöнә кьр» (Рʹомайи 5:12). Адәм дәwса кö жийина кʹамьл дәрбази зöрʹәтед хwә бькә, гöнә у мьрьн дәрбаз кьр.

Wе дәрәщеда кʹьрин гәрәке анәгори тьште öндабуйи буйа, демәк wәк һәв буна. Адәм бь нәгöһдарийа хwә, гöнә кьр у жийина кʹамьл öнда кьр. Кʹьтеба Пироз дьбежә кö жь бо wе йәке Адәм зöрʹәтед хwә кьрә диле гöнә у мьрьне. Ләма жи жийина кәсәки дьн лазьм бу йе кö кʹамьл бу, демәк жийина Иса, чь кö wәк qöрбан һатә дайине wәки мәрьва жь дилтийе аза кә (Рʹомайи 5:19; Әфәси 1:7). Хwәде жь бо һʹьзкьрьна хwә кʹьрин да инсанәте, сәва әм бьстиньн әw, чь кö Адәм у Һеwайе öнда кьрьн, демәк жийина һәрһәйи сәр әʹрде щьнәт (Әʹйанти 21:3-5).

Бе шьк пʹешкʹеша кʹьрине мәщале дьдә, кö жийина һәрһәйи бьстиньн, у әв һәйә пʹешкʹешәкә лапә qимәт сәва мә һʹәмуйа. Чаwа кö готара дьнда һатьбу готьне, сәва кö «пʹешкʹеша кʹамьл» qимәт кьн, wәрә әм шеwьр кьн чаwа әw сәр мә һʹöкöм дькә у али мә дькә кʹаре бьстиньн.

Хwәстьна мәва гьредайи йә. Хwәстьна мәйә qәwи һәйә, кö тʹьме бьжин (Wаиз 3:11). Һәмьки бь qәwата хwә әм нькарьн әв хwәстьна хwә биньн сери, ле бь сайа кʹьрине дьбә. Кʹьтеба Пироз дьбежә: «Чьмки маше гöнә мьрьн ә, ле пʹешкʹеша Хwәде жийина һʹәта-һʹәтайе йә, бь сайа Хöдане мә Мәсиһ Иса» (Рʹомайи 6:23).

Һʹәwщед мәва гьредайи йә. Мәрьва нькарьбун кʹьрин бьдана. Кʹьтеба Пироз шьроwәдькә «Чьмки бьһа йә qимәте хьлазбуна wан, тʹö щар әв йәк набә кö бе дайин» (Зәбур 49:8). Ләма жи мәрʹа аликʹарйа Хwәде лазьм бу, сәва кö жь дилтйа гöнә у мьрьне аза бьн. Ле «бь азакьрьна Мәсиһ Иса» Хwәде да мә әw, чьда әм һʹәwщә бун (Рʹомайи 3:23, 24).

Wәʹде лайиq. Кʹьтеба Пироз дьбежә: «Гава әмә һе гöнәкʹар бун, Мәсиһ бона мә мьр» (Рʹомайи 5:8). Әва йәка мә дьдә баwәркьрьне, wәки Хwәде зәʹф мә һʹьз дькә, һәла һе чахе әм нава гöнада бун жи. Рʹаст ә әм жь бо гöнә пʹьрʹ дьчәрчьрьн, ле әв кʹьрин, мә һелан дькә ль ахьрийе бьньһерʹьн.

Нетед тʹәмьз әʹйан дькә. Кʹьтеба Пироз әʹйан дькә, кö чьма Хwәде, Кöрʹе хwә wәк кʹьрин да: «Бь ве йәке һʹьзкьрьна Хwәде һьндава мәда хöйа бу, гава кö әwи Кöрʹе хwәйи Тайе Тʹәне шандә дьнйайе, wәки әм бь wи бьжин. Һʹьзкьрьн әв ә, нә кö мә Хwәде һʹьз кьр, ле әwи әм һʹьз кьрьн» (1 Йуһʹәнна 4:9, 10).

Чаwа тö дькари нишан ки, кö дьшекьринь ве пʹешкʹеша лапә qимәт? Бинә бира хwә гьлийе Иса жь Йуһʹәнна 3:16, кʹидәре кö те готьне wәки тʹәне әwе кö wи «баwәр бькә» wе бе хьлазкьрьне. Ль гора Кʹьтеба Пироз «баwәри әw ә, чахе әм дöдьли ниньн, wәки чь кö әм һивийе нә, wе бе сери» (Ибрани 11:1). Сәва кö баwәрийа öса һәбә, занәбуна рʹаст гәләк фәрз ә. Ләма жи әм wә һелан дькьн wәʹдә бьвиньн у дәрһәqа Йаһоwа Хwәде һе зедә пебьһʹәсьн, чьмки Әwи әв «пʹешкʹеша кʹамьл» дайә мә. Öса жи пебьһʹәсьн кö чь гәрәке бькьн сәва кö жийина һәрһәйи бьстиньн у ләзәте бьвиньн жь wе йәке, чь кö бь qöрбанбуна Иса әм дькарьн qазанч кьн.

Тö дькари әwан һʹәму тьшта пебьһʹәси һәрге леколин ки әʹламәтйа дәрһәqа Ньвисаред Пироз жь малпәра www.jw.org. Шәʹдед Йаһоwа һазьр ьн али тә бькьн. Әм баwәр ьн, кö чахе тö һе зедә пебьһʹәси дәрһәqа ве пʹешкʹеша qимәт у кʹара wе, һьнге те һелан би бежи: «Шькьр жь Хwәдерʹа, бь сайа Хöдане мә Иса Мәсиһ» (Рʹомайи 7:25).