Пʹешкʹеша Хwәдейә Лапә Мәзьн; Чьма öса Qимәт ә?

КʹИ ӘВ ПʹЕШКʹЕШ ДА?

Һьнә пʹешкʹеш сәва мә qимәт ьн, чьмки дьбә кö әw жь мәрьвәки навдар ә йан жь wи мәрьви йә, qәдьре кʹижани кö әм зәʹф дьгьрьн. Һәнә пʹешкешед öса жи, йед кö нә баһа нә ле тö wана хwәй дьки чьмки нәфәре малбәта тә йан һәвале тәйи незик әв данә тә. Пʹешкʹеша Расел жи дәрһәqа кʹижани кö дь готара пешьнда һатьбу готьне, сәва Йордан гәләк qимәт бу. Ле әм чь дькарьн бежьн дәрһәqа кʹьрине, йе кö wәк пʹешкʹеш мәрʹа һатийә дайине?

Йа пешьн, Кʹьтеба Пироз дьбежә wәки Хwәде «Кöрʹе хwәйи Тайе Тʹәне шандә дьнйайе, wәки әм бь wи бьжин» (1 Йуһʹәнна 4:9). Жь бо ве занәбуне, баһе ве пешкеше бәр чʹәʹве мә даһа мәзьн дьбә. Хенщи Хwәде щәм тʹö кәси һʹöкöмдарийа пʹьрʹ мәзьн тʹöнә. Дәрһәqа wе йәке зәбурбеж ньвиси: «Наве тә, ЙАҺОWА йә! У йе кö ль сәр тʹәваһийа Гәрдуне Һәри Бьльнд ә, тʹәне тö йи!» (Зәбур 83:18). Ле qә әм дькарьн жь кәсәки лапи бьльнд, пʹешкʹеше бьстиньн?

Йа дöда, Хwәде «Баве мә йә» (Ишайа 63:16). Чь щурʹәйи? Әwи жийин дайә мә. Хенщи wе йәке әw мина бавәки дьлован, бь һʹьзкьрьн дәрһәqа мә хәм дькә. Һьнә хьзмәткʹаред хwәйи бәрерʹа мәсәлә Әфрайимрʹа Хwәде гот: «Ма лаwе мьни бьрумәт Әфрайим ә? Зарʹоке хошәwист әw ә? . . . Дьле мьн жь бәр ве йәке берийа wи дькә; бь рʹасти, әзе дьлованийе ле бькьм!» (Йерәмйа 31:20). Иро жи Хwәде дәрһәqа хьзмәткʹаред хwә öса дьфькьрә. Әw нә кö тʹәне Әʹфьрандаре мәйи һьмзор ә, ле öса жи Бав у Досте мәйи амьн ә. Ләма жи һʹәму пʹешкʹешед жь Хwәде сәва мә гәләк qимәт ьн.

ЧЬМА ПʹЕШКʹЕШ ДАН?

Һьнә пʹешкʹеш тәрʹа гәләк qимәт ьн, чьмки әw нә бь дәсте зоре данә тә, ле жь бо һʹьзкьрьне. Мәрьве кö бь дьл у щан пʹешкʹеше дьдә тә, һивийе нинә wәки тö жи гәрәке әʹсәйи сәва qәнщийа wи тьштәки бьди wи.

Хwәде мә һʹьз дькә, ләма жи әwи Кöрʹе хwә сәва һʹалхwәшийа мә бәрва да. Кʹьтеба Пироз дьбежә: «Бь ве йәке һʹьзкьрьна Хwәде һьндава мәда хöйа бу, гава кö әwи Кöрʹе хwәйи Тайе Тʹәне шандә дьнйайе». Ле чьма Хwәде öса кьр? «Wәки әм бь wи бьжин» (1 Йуһʹәнна 4:9). Гәло дьбә кö Хwәде борщдар бу ләма әв йәк кьр? На! Qöрбанбуна Иса, дьһатә һʹәсабе qәнщийа Йаһоwа һьндава мәда (Рʹомайи 3:24).

Чьма әм дькарьн бежьн wәки пʹешкʹеша жь Хwәде qәнщийа wи әʹйан дькә? Кʹьтеба Пироз дьбежә: «Хwәде һʹьзкьрьна хwә һьндава мәда һьнге да кʹьфше, гава әм һе гöнәкʹар бун, Мәсиһ бона мә мьр» (Рʹомайи 5:8). Һʹьзкьрьна дьловани Хwәде һелан кьр, wәки бона һʹалхwәшийа мә әве пʹешкʹеше бьдә, демәк сәва мәрьвед гöнәкʹар, йед сьст у чәрчьранди. Бь рʹасти жи әм нәһежайи һʹьзкьрьна öса бун, у әме нә жи тʹö щар бькарьбьн бь тʹәмами һәqе пʹешкʹеша wи бьдьн. Нава тʹәрихийеда тʹәне пʹешкʹеша Хwәде бь рʹасти жи әʹйан дькә һʹьзкьрьна wийә пʹьрʹ мәзьн.

ЧЬ ЖЬ ХWӘ КЕМ КЬРЬН СӘВА КÖ ПʹЕШКʹЕШЕ БЬДЬНӘ ТӘ?

Чахе кәсәк тьштәки жь хwә кем дькә сәва кö пʹешкʹеше бьдә тә, әв пʹешкʹеш тәрʹа гәләк qимәт дьбә. Чахе щәм мәрьв тьштәки qимәт һәйә у әw һазьр ә әве йәке тʹәви мә пʹарә вәкә у бьдә, һьнге әм әве пʹешкʹеше пʹьрʹ qимәт дькьн, чьмки әв мәрьв тьштәки жь хwә кем кьр.

Хwәде «кöрʹе хwәйи тайе тʹәне бәрва да» (Йуһʹәнна 3:16). Әwи дькарьбу әв пʹешкʹеша хwәйә лапә qимәт нә жи бьда. Иса, Кöрʹе Хwәдейи «һʹьзкьри йә» у әw һәйә «сурәте Хwәдейе кö хöйа набә». Кʹьтеба Пироз дьбежә кö Хwәде пешийа һʹәму тьшти Иса әʹфьрандийә. Ләма жи әм дькарьн бежьн кö Хwәде у Иса һәврʹа гәләк незик бун (Колоси 1:13-15).

Кʹьтеба Пироз дәрһәqа Хwәде дьбежә кö «һʹәйфа wи Кöрʹе wи нәһат» (Рʹомайи 8:32). Йаһоwа кәсе хwәйи лапи дәлал да мә. Тʹö пʹешкʹеш нькарә бәрамбәри wе йәке бә, чьмки әв пʹешкʹешәкә лапә qимәт ә.

ПʹЕШКʹЕША КÖ БЬ РʹАСТИ ЖИ ТӘРʹА ЛАЗЬМ Ә

Һьнә пʹешкʹеш гәләк qимәт ьн, чьмки әwана wәʹдәда мәрʹа һатьнә дайине у гәләк мәрʹа лазьм бун. Бьдә бәр чʹәʹве хwә кö тö нәхwәш и у пʹәрʹе тә тʹöнә сәва дәрмана бькʹьри у qәнщ би. Ле кәсәк һазьр ә бь рʹәзәдьли дәwса тә пʹәра бьдә сәва кö тö хьлаз би. Бь рʹасти жи тöйе чьqас шькьрдар би wи мәрьвирʹа, öса нинә! У әв пʹешкʹеш сәва тә wе пʹьрʹ qимәт бә.

«Һʹәмуйед жь Адәм буйи дьмьрьн, öса жи һʹәмуйед жь Мәсиһ буйи wе сах бьн» (1 Корьнтʹи 15:22). Әм зöрʹәтед Адәм ьн, ләма әм һʹәмушк жи «дьмьрьн» у нькарьн хwәхә жь нәхwәшийе у мьрьне аза бьн. Әм öса жи нькарьн хwәха тʹәв Хwәде ль һәв бен у жь сущдаркьрьне аза бьн. Жь qәwата мә дәр ә сәва кö хwә, йан йед дьнена «сах кьн». Кʹьтеба Пироз дьбежә: «Тʹö кәсәк бь тʹö аwайи нькарә бьрайе хwә рьзгар бькә [хьлаз кә] у бәрдела wи бьдә Хwәда. Жь бәр кö бәрдела щане wан, пʹьрʹ гьранбьһа йе у дьве, әw һәрһәйи дәв жь wе бәрдә» (Зәбур 49:7, 8). Әм һʹәwще аликʹарийе нә, чьмки әм нькарьн бьдьн баһе кʹьрʹине демәк баһе бәрделе. Һәрге аликʹарийа мә тʹöнә буйа, һʹале мә жи wе хьраб буйа.

Жь бо һʹьзкьрьна хwәйә мәзьн, Йаһоwа бь һазьрбун һәq демәк баһе «дәрмане» мә да, сәва кö жийина мә хьлаз кә. Демәк әw һәбу Иса жь кʹижани кö гьшк wе сах бьн. Чь щурʹәйи кʹьрин дькарьбу бьбуйа бәрдел? «Хуна Исайе Кöрʹе wи wе мә жь һʹәму гöна паqьж кә». Әре, һәрге әм баwәрийа хwә qöрбанбуна Иса тиньн, бь ве йәке әм мәщале дьстиньн кö жь гöна паqьж бьн у жийина һәрһәйи бьстиньн (1 Йуһʹәнна 1:7; 5:13). Ле гәло бь ве кʹьрине чь мәщал чедьбә сәва мәрьвед мәйә һʹьзкьри йед кö мьрьн ә? «Мьрьн рʹуйе мәрьвәкида бу, бь мәрьвәки [Иса] жи wе рʹабуна мьрийа бьбә» (1 Корьнтʹи 15:21).a

Qöрбанбуна Иса пʹешкʹешәкә пʹьрʹ qимәт ә у тʹö пʹешкʹеш нькарә бәрамбәри ве бә. Тʹö мәрьвәки һаqас тьшт нәдайә мә, чьqас кö Йаһоwа Хwәде дайә мә. У әм öса гәләк һʹәwще тʹö пʹешкʹешәкә дьн ниньн, чаwа qöрбанбуна Иса, чь кö мә жь гöнә у мьрьне аза дькә. Бь рʹасти жи әв гәләк пʹешкʹешәкә qимәт ә.