Пʹешкʹеша Гәләк Qимәт

ЙОРДАН пʹешкʹеша хwә һьлдьдә, йа кö бь щурʹе гәмийе йә. Әв һәйә һащәта бона тужкьрьна qәләма. Те бежи әв тьштәкә нәбәрбьчʹәʹв ә. Ле бь рʹасти әв пʹешкʹешәкә лапә qимәт ә сәва Йордан. Әw дьбежә: «Чахе әз бьчʹук бум, әв пʹешкʹеш Расел да мьн, мерәки әʹмьрда мәзьн, йе кö тʹәви нәфәред малбәта мьн һәвалти дькьр». Паши мьрьна Расел, Йордан пеһʹәсийа кö әwи wәʹде тәли-тәнгийа гәләк али калке wи у де-баве wи дькьр у бәрдьле wанда дьһат. Йордан зедә дькә: «Чахе әз һе зедә дәрһәqа Расел пеһʹәсийам, әв пʹешкʹеша бьчʹук бәр чʹәʹве мьн даһа qимәт бу».

Мәсәлә Йордан рʹьнд нишан дькә, кö бәр чʹәʹве һьнә мәрийа, баһе пʹешкʹеше дькарә йан бьчʹук бә йан жи бе qимәт бә. Ле чахе мәрьвәки спасдар пʹешкʹеше дьстинә, сәва wи әв пʹешкʹеш дькарә пʹьрʹ qимәт бә. Кʹьтеба Пироз жи qимәте пʹешкʹешәке әʹйан дькә: «Хwәде öса дьнйа һʹьз кьр, кö Кöрʹе хwәйи тайе тʹәне бәрва да, wәки һәр кәсе кö wи баwәр бькә öнда нәбә, ле жийина wийә һʹәта-һʹәтайе һәбә» (Йуһʹәнна 3:16).

Әв пʹешкʹеш жийина һʹәта-һʹәтайе дьдә мәрийа! Гәло дьнйайеда пʹешкʹеша жь ве qимәттьр һәйә? Дьбә кö һьнә мәрьв qимәте ве пʹешкʹеше тедәрнахьн, ле сәва Мәсиһийед рʹаст әв пʹешкʹеш бь рʹасти жи мәхсус ә (Зәбур 49:8; 1 Пәтрус 1:18, 19). Чьма Хwәде жийина Кöрʹе хwә wәк пʹешкʹеш сәва инсанәте бәрва да?

Паwлосе шанди әве йәке öса шьровәдькә: «Бь мәрьвәки гöнә кʹәтә дьне у жь гöнә жи мьрьн һат, öса жи мьрьн сәр һʹәму мәрьва бәла бу» (Рʹомайи 5:12). Мәрьве пешьн Адәм рʹьнд заньбу кö жь бо нәгöһдарикьрьне wе чь бе сәре wи, ле йәкә әwи гöнә кьр у бь мьрьне һатә щәзакьрьне. Öса мьрьн жь Адәм дәрбази сәр һʹәму зорәтед wи бу.

«Маше гöнә мьрьн ә, ле пʹешкʹеша Хwәде жийина һʹәта-һʹәтайе йә, бь сайа Хöдане мә Мәсиһ Иса» (Рʹомайи 6:23). Сәва кö инсанәт жь тʹорʹе мьрьне аза бә, Хwәде Кöрʹе хwә Иса Мәсиһ шандә сәр әʹрде, wәки әw жийина хwәйә беqöсур сәва мәрийа qöрбан кә. Бь ве qöрбане, йе кö öса жи әʹйан ә чаwа «кʹьрин», һʹәму мәрьвед кö баwәрийа хwә Иса тиньн, wе жийина һәрһәйи бьстиньн (Рʹомайи 3:24).

Бь сайа qöрбанбуна Иса Мәсиһ, Хwәде гәләк кʹәрәма ль сәр хьзмәткʹаред хwәда дьбаринә. Дәрһәqа ве йәке Паwлосе шанди дьбежә: «Шькьр жь Хwәде бона wе дайина wийә кö найе готьн!» (2 Корьнтʹи 9:15). Бәле, баһе ве пʹешкʹеше öса мәзьн ә, кö әм нькарьн бь гьлийа әве йәке әʹйан кьн. Һәмьки Хwәде гәләк пʹешкʹеш дайә инсанәте. Ле чьма кʹьрин жь wан һʹәму пʹешкʹеша даһа мәхсус ә? Чьда кʹьрин жь пʹешкʹешед дьн, кö Хwәде дайә мә, щöдә дьбә?a Ньһерʹандьна мә ль сәр ве пʹешкʹеше гәрәке чь щурʹәйи бә? Әм wә тʹәглиф дькьн бьхуньн щабед Кʹьтеба Пироз ль сәр wан пьрса, дәрһәqа кʹижана кö дö готаред майинда те готьне.