«Тʹöнә Рʹийа Чәтьн у Пʹьрʹ Дьреж»

САЛА 1937-да 26 Адаре, дö мәрьвед рʹеви, вәстийайи, һеди-һеди әʹрәба хwә кö qьреж бу дажотьн у вәдьгәрʹийанә Сиднейе (Австралйа). Әwана саләк пешда жь wи шәһәри дәркʹәтьбун у wәкә 19 300 км. рʹеwити кьрьбун у чубунә щийед гәләк дур. Әw мәрьв, Артур Wилис у Бил Нийуленд бун. Әwан пешәнгед хирәт нет дабунә пешийа хwә кö мьзгинийа Пʹадшатийа Хwәде Австралйайе навинда бәла кьн, кʹидәре кö лап һьндьк мәрьв дьжитьн.

Салед 1920-1930-да, кʹомәкә бьчʹук йа Леколинкʹаред Кʹьтеба Пирозa дь Австралйайеда, ль шәһәред кö незики бәʹре бун у жь wан шәһәра дәр мьзгини бәла дькьрьн. Австралйа навинда һьндьк мәрьв дьжин, чьмки әw щики зьһа йә у дәшт у чол ә, чапа кʹижани кö wәк ниве Әwрупайе йә. Әwан бьра заньбун wәки шагьртед Иса гәрәке шәʹдәтийе бьдьн «һʹәта сәре дьне», демәк Австралйа навинда жи (Кʹар. Шанд. 1:8). Ле гәло wана ча wе бькарьбуна шьхöләкә öса пʹьрʹ мәзьн бькьрана? Wана баwәр дькьр кö Йаһоwа wе qәwата wан кʹәрәм кә, чьмки wана сафи кьрьбун һʹәму тьшти бькьн чь кö дәсте wан те.

ПЕШӘНГ ШЬХÖЛЕ БӘЛАКЬРЬНА МЬЗГИНИЙЕ ДӘСТПЕДЬКЬН

Сала 1929-да щьватед Кwинслендеда у Австралйа Рʹоавайеда чәнд әʹрәбә чекьрьбун, сәва кö жь шәһәра дәр, демәк Австралйа навинда мьзгинийе бәла кьн. Wан әʹрәбада ньвин һәбун у һащәтед wәки хwарьне чекьн. Бь wан әʹрәба пешәнгед хирәт дьчун, йед кö дькарьбун әв әʹрәба чекьрана һәрге әв хьраб буйа. Әw пешәнг дьчунә гәләк щийа, кʹидәре кö мәрьва дәрһәqа мьзгинийе нәбьһистьбун.

Пешәнгед кö дәсттәнг бун у нькарьбун әʹрәбед öса хwәрʹа дәстхьстана, бь бисиклета дьчунә Австралйа навинда. Мәсәлә, дь сала 1932-да, бьраки 23 сали бь наве Бинет Брикел жь Рокʹһамптоне (Кwинсленд) рʹевитийа хwә дәстпекьр, у нава пенщ мәһада ль щийед дур алийе бакʹуре мьзгини бәла дькьр. Бисиклета wи гәләк баркьри бу, сәр кʹижане кö әwи ләʹйиф, кʹьнщ, хwарьн у гәләк кʹьтеб хwәрʹа дьбьр. Чахе чәрхед бисиклета wи дьмашийан, әwи йәкә рʹийа хwә бәрдәwам дькьр, чьмки баwәр бу кö Йаһоwа wе рʹебәрийе wи бькә. Әwи бисиклета хwә тʹәви хwә һьлдьда у 320 км. ньга дьчу wан щийа, кʹидәре мәрьв бәре жь бо тʹибуне мьрьбун. Нава 30 салед дьн, Бинет ль тʹәмамийа Австралйайеда бь бисиклете, мотосикле у әʹрәбе, бь сәда һʹәзар километра дәрбаз дьбу. Әwи дәстпекьр Аборигенарʹа мьзгинийе бәла кә у щьватед тʹәзә саз кьр, йед кö тʹәмамийа Австралйа навинда гәләк әʹйан бун.

ЧӘТЬНАЙА ТӘЙАХ ДЬКЬН

Нав тʹәмамийа дьнйайеда, Австралйа йәк жь wан wәлата йә, кʹидәре кö һьндьк мәрьв дьжин, илаһи Австралйа навинда. Ле йәкә щьмәʹта Йаһоwа нет данә пешийа хwә, wәки бьвиньн wан мәрийа, йед кö дури шәһәра дьжин.

Пешәнг Стуарт Келти у Wилийам Торингтон, дьхwәстьн һәма әwе нете биньн сери. Дь сала 1933-да әwана жь Бәрʹийа Симпсоне дәрбази Алис Спрингсе бун, сәва кö мьзгинийе бәла кьн. Әв шәһәр һәма Австралйа навинда йә. Чахе әʹрәба wанә бьчʹук шкәст у йа авитьне бу, бьре Келти, ньгәки кʹижани кö жь протеза дар бу, диса жи тʹәви Wилийам бәрдәwам кьр рʹевити кьр, ле ида сәр дәwа! Qәwата пешәнга кʹарәкә мәзьн ани, чахе әwана Wилийам Крикда, щийе сәкьнандьна трена, менещере отеләкерʹа дәрһәqа мьзгинийе гьли кьрьн. Wәʹдә шунда әw менещере отеле Чарлс Бернард, рʹасти qәбул кьр. Әwи отела хwә фьрот у wәкә 15 сала әwи тʹәне, чаwа пешәнг щийед жь шәһәра дур дь Австралйайеда хьзмәт дькьр.

Wан пешәнгарʹа лазьм бу мерхаси у хирәт, сәва кö тәйах кьн һʹәму чәтьнайада. Чахе Артур Wилис у Бил Нийуленд, дәрһәqа кʹижана кö мә ль абзаса пешьнда хәбәр да, ль щийе дур Австралйайеда хьзмәт дькьрьн, һьнге әwана нава дö һʹәфтийада wәкә 32 км. дәрбаз бун. Жь бо баранәкә qайим, бәрʹи бьбу мина бәʹра һʹәрийе. Щарна wанарʹа чәтьн бу, чьмки һәwа гәләк гәрм бу у wана гәрәке әʹрәба хwә бь дәʹвдане нава qучʹед бәрʹийеда бьвьрана. Әwана дәштед бь кәвьр-кöчʹькрʹа у чʹәмед зьһарʹа дәрбаз дьбун. Гәләк щар чахе әʹрәба wан хьраб дьбу, әwана пʹийе хwә йан бь бисиклете чәнд рʹожа дьчунә шәһәрәки незик у бь һʹәфтийа һивийе бун һʹәта пʹаред әʹрәбе бьгöһастана. Нава wан чәтьнайада, бьра шабуна хwә öнда нәдькьрьн. Артур Wилис жь журнала «Qьрʹна Зерʹин» гьлийед öса wәкʹьланд: «Тʹöнә рʹийа чәтьн у пʹьрʹ дьреж сәва шәʹдед Wи».

Чарлс Һарис, йе кö гәләк wәхт ча пешәнг хьзмәт дькьр, дьгот кö щурʹә-щурʹә чәтьнайед бәрʹийеда у рʹийа дьреж, әw һе незики Йаһоwа кьрьн. Хенщи ве йәке әwи гот: «Чәнтʹе тә чьqас бьчʹук бә, һаqас wе һеса бә жийина тә. Һәрге Иса һазьр бу дәрва бьн стәйркада рʹазе, wәки öса нә әм жи гәрәке һазьр бьн öса бькьн, чахе бона шьхöле Хwәде лазьм бә». Гәләк пешәнга һәма öса жи кьрьн. Бь сайа хирәт у qәwата wан, мьзгини гьһиштә һәр qöлбед Австралйайе у али гәләка кьр wәки әwана пьштгьрийа Пʹадшатийа Хwәде бькьн.