ЧаWа Гайос Али Хушк-бьра Дькьр?

ГАЙОС у Мәсиһийед дьн йед qьрʹна йәке рʹасти чәтьнайа һатьн. Щьватеда һьнәка һинкьрьнед qәлп бәла дькьрьн, сәва кö щьват сьст бә у пʹарәвәбә (1 Йуһʹн. 2:18, 19; 2 Йуһʹн. 7). Дийотрәфис нава щьватеда «хәйба» Йуһʹәннайе шанди у йед дьн дькьр. Әwи Мәсиһийед рʹеwирʹа йед кö мьзгини бәла дькьрьн, меванһʹьзи нәдьда кʹьфше у һьн жи рʹийа йед дьн дьгьрт wәки әwана жи хушк-бьра qәбул нәкьн (3 Йуһʹн. 9, 10). Wи һʹалида Йуһʹәнна нәʹмә ньвиси Гайосрʹа. Йуһʹәнна әw нәʹмә wәкә сала 98 Д.М. ньвиси, у Ньвисаред Йунанида әв те навкьрьне «Нәʹма Йуһʹәннайә Сьсийа».

Нава wан чәтьнайада, Гайос бь амьни Хwәдерʹа хьзмәт дькьр. Ле гәло әwи амьнийа хwә ча да кʹьфше? Чьда әм дькарьн чʹәʹв бьдьнә Гайос? У ве йәкеда нәʹма Йуһʹәнна ча али мә дькә?

НӘʹМӘ ҺӘВАЛЕ ДӘЛАЛРʹА

Йуһʹәнна нәʹма хwәйә сьсийада хwә нав кьрьбу ча «бәрпьрсийар». Гайос дәрберʹа фәʹм кьр wәки әw Йуһʹәнна йә кö жерʹа ньвисийә, чьмки Йуһʹәнна али Гайос кьр кö рʹастийе нас кә. Йуһʹәнна бь дьл у әшq нәʹмеда дьньвисә Гайосе дәлал, «кʹижани кö әз бь рʹастийе һʹьз дькьм». Паше Йуһʹәнна гот, кö баwәр ә wәки сьһʹәт-qәwата wийә физики жи баш ә, чаwа сьһʹәт-qәwата wийә рʹöһʹани. Рʹасти жи гьлийед чьqас хwәш у ширьн ьн! (3 Йуһʹн. 1, 2, 4)

Дьqәwьмә Гайос бәрпьрсийаре щьвате бу, ле нәʹмәкеда әw йәк найе готьне. Йуһʹәнна пʹайе Гайос да бона меванһʹьзийа wи һьндава хушк-бьра, һәла һе һьндава йед нәнас жи. У әwи гот кö бь ве йәке амьнийа Гайос те кʹьфше, чьмки меванһʹьзи әw һʹöнöр ә, бь кʹижани тʹьме хьзмәткʹаред Хwәде әʹйан дьбьн (Дәстп. 18:1-8; 1 Тимтʹ. 3:2; 3 Йуһʹн. 5).

Жь гьлийед Йуһʹәнна те кʹьфше, wәки Мәсиһийа тʹьме рʹеwити дькьрьн щийе Йуһʹәнна дьма у незики щьвата. Әw хушк-бьра һьлбәт wе Йуһʹәннарʹа гьли кьрана кö рʹасти чь чәтьнайа һатьнә. Дьqәwьмә кö бь сайа ве йәке Йуһʹәнна дәнг у бәса педьһʹәсийа дәрһәqа wан щьвата.

Һьлбәт Мәсиһийед рʹеwи wе бьхwәстана щәм хушк-бьра бьмана, чьмки отелада хьраби дьһатә кьрьне у бенамуси бәлабуйи бу. Фәʹмдари йә йед кö рʹеwити дькьрьн, һәрге һәвалед wан һәбуна, wе щәм һәвалед хwә бьмана, ле Мәсиһи щәм Мәсиһийа дьман.

«ӘWАНА БОНА НАВЕ МӘСИҺ КʹӘТЬНӘ РʹЕ»

Йуһʹәнна Гайос һелан кьр, wәки диса меванһʹьзийе бьдә кʹьфше, чьмки әwи жь wи һиви кьр кö wан рʹеwийа öса вәрʹекә «чаwа кö ль Хwәде хwәш те». Вәрʹекьрьна мевана дьһатә һʹәсабе кö һазьр кьн чь кö бона рʹекʹәтьна wан у рʹева wанрʹа лазьм ә, сәва бьгьһижьнә щийед хwә. Те кʹьфше кö Гайос ида öса кьрьбу бона меванед пешийа wан, чьмки әw йәк гьһиштә гöһе Йуһʹәнна кö Гайос ча бь һʹьзкьрьн әwана qәбул кьрьбун у баwәрийа wи чьqас qайим ә (3 Йуһʹн. 3, 6).

Меван дьбәкә мисйонер бун, йан аликʹарчийед Йуһʹәнна, йан жи бәрпьрсийаред рʹеwи бун. Фьрqи тʹöнә әwана кʹе бун, wана рʹеwити дькьр сәва мьзгинийе бәла кьн. Йуһʹәнна гот: «Әwана бона наве Мәсиһ кʹәтьнә рʹе» (3 Йуһʹн. 7). Әв гьлийед Йуһʹәнна «әwана бона наве Мәсиһ кʹәтьнә рʹе», дьдә кʹьфше кö әw хушк-бьра жь щьвата Мәсиһи бун, у әwана һежа бун кö wана бь дьл у әшq qәбул кьн. Ләма Йуһʹәнна гьлийед öса ньвиси: «Аwа әм гәрәке йед öса qәбул кьн, кö әм тʹәви шьхöле рʹастийе бьн» (3 Йуһʹн. 8).

АЛИКʹАРИ WӘʹДЕ ЧӘТЬНАЙА

Йуһʹәнна нә тʹәне бона пʹайидайине Гайосрʹа ньвиси, әwи öса жи дьхwәст чәтьнайа мәзьнда али wи бькә. Бьраки бь наве Дийотрәфис нәдьхwәст Мәсиһийед рʹеwирʹа меванһʹьзийе бьдә кʹьфше. Әwи һәла һе рʹе хушк-бьред дьн жи дьгьрт, сәва wан мевана qәбул нәкьн (3 Йуһʹн. 9, 10).

Бешьк, тʹö Мәсиһи wе нәхwәста щәм Дийотрәфис меван бьминә. Щьватеда әwи хwә сәр йед дьнрʹа дьгьрт, у Йуһʹәнна жи дәрһәqа wи тьштед qәнщ нә гот. Һьн жи Дийотрәфис бь һʹәмде хwә тьштед хьраб дьгот сәр Йуһʹәнна у йед дьн. Йуһʹәнна сәр Дийотрәфис нә гот кö әw дәрсдаре qәлп ә, ле әwи наве Йуһʹәнна шанди дехьст. Дийотрәфис пәй наве хwә дькʹәт у ньһерʹандьна wийә нәрʹаст, амьнийа wи дькьрә бьн шьке. Сәрһатийа Дийотрәфис нишан дькә, wәки щьватеда дькарә тьштәки öса бьqәwьмә, кö мәрьвед хwәһʹьз у бабах шәрʹ-дәʹwа бькьнә нава щьватеда. Ләма жи Йуһʹәнна готә Гайос: «Чʹәʹв нәдә хьрабийе». Әw ширәт öса жи бона мә йә (3 Йуһʹн. 11).

МӘʹНИЙА МӘЗЬН КÖ QӘНЩИЙЕ БЬКЬН

Йуһʹәнна нәʹма хwәда öса жи дәрһәqа бьраки qәнщ ньвиси, кö наве wи Димитрийо бу. Әw бьра мина Дийотрәфис нибу. Йуһʹәнна дәрһәqа wи ньвиси: «Бона Димитрийо һʹәму жи шәʹдәтийа qәнщ дьдьн . . . Әм жи шәʹдәтийе дьдьн у тö зани кö шәʹдәтийа мә рʹаст ә» (3 Йуһʹн. 12). Дьбәкә Димитрийорʹа аликʹарийа Гайос лазьм бу, у Йуһʹәнна ве нәʹма хwәйә сьсийада, Гайосрʹа дәрһәqа Димитрийо гьли кьр у пʹайе wи да. Дьбәк Димитрийо хwәха әw нәʹмә да Гайос. Йан дьбәк Йуһʹәнна wи шанд, йан жи дьбәкә әw бәрпьрсийаре рʹеwи бу, у дьбәкә чь кö Йуһʹәнна ньвисибу, Димитрийо һе зәлал Гайосрʹа шьровәкьр.

Гәло чьрʹа Йуһʹәнна Гайос ширәт кьр wәки бәрдәwам кә меванһʹьз бә, нә ахьр әw ида йәки öса бу? Дьбәкә Йуһʹәнна дьхwәст кö Гайос qәwи кә. Йан жи дьбәкә шанди бәрхwә дькʹәт wәки Гайос хwә паш хә у меванһʹьзийе нәдә кʹьфше, чьмки ве йәкеда щьватеда Дийотрәфис рʹе хушк-бьра дьгьрт. Чь жи һәбә, Йуһʹәнна дьл да Гайос кö жерʹа гот: «Әwе кö qәнщийе дькә, жь Хwәде йә» (3 Йуһʹн. 11). Бәле, әw мәʹникә гәләк мәзьн ә wәки тʹьме qәнщийе бькьн.

Гәло нәʹма Йуһʹәнна Гайос һелан кьр wәки бәрдәwам кә меванһʹьз бә? Бь рʹастийе әw нәʹма Йуһʹәннайә Сьсийа Кʹьтеба Пирозда һатә хwәйкьрьне у бона мәрьвед майин жи ширәт ә сәва чʹәʹв бьдьнә «qәнщийе».

ЖЬ НӘʹМА ЙУҺʹӘННАЙӘ СЬСИЙА ӘМ ЧЬ ДӘРСЕ ҺИН ДЬБЬН?

Әм зедә тьштәки ньзаньн дәрһәqа бьрайе дәлал Гайос, ле чь кö әм заньн дькарә гәләк тьшт мә һин кә.

Йа пешьн, гәләк жь мә һатьнә сәр рʹийа рʹастийе бь аликʹарийа wан хушк-бьред амьн, йед кö бь дьл у щан рʹеwити дькьрьн сәва рʹастийе бьгьһиньнә мә. Иро нә һʹәму Мәсиһи рʹийа гәләк дур дьчьн, сәва мьзгинийе бәла кьн. Ле әм мина Гайос дькарьн аликʹарийе у дьл бьдьнә wан хушк-бьра йед кö рʹеwитийе дькьн, мәсәлә бәрпьрсийаред мьһале у жьнед wан. Йан жи әм дькарьн кʹомәке бьдьнә wан хушк-бьра, йед кö дәрбази шәһәрәки дьн йан һәла һе wәлате хәриб бунә, кʹидәре кö һʹәwщәтийа мьзгинвана һәйә. Wәрә әм тʹьме «пәй меванһʹьзийе бьн» (Рʹом. 12:13; 1 Тимтʹ. 5:9, 10).

Йа дöда, әм гәрәке әʹщебмайи нәминьн һәрге щьватеда щара qәдьре кәсәки дехьн. Бьраки qәдьре Йуһʹәнна дехьст у Паwлос жи рʹасти ве чәтьнайе һат (2 Корн. 10:7-12; 12:11-13). Гәло әм ча гәрәке хwә бьдьнә кʹьфше, һәрге щьватеда әм рʹасти ве чәтьнайе бен? Паwлос Тимотʹейорʹа ширәтәкә öса да: «Ль хöламе Хöдан накʹәвә, кö шәрʹ бькә, ле һьндава һʹәмуйада бәрбьһер бә, бькарьбә һин кә у бинфьрә бә, бь ширьнайи йед мьqабьл ширәт кә». Бәле, һәрге кәсәк мьqабьли мә йә, ле әм хwәгьрти нә у һерса хwә дьгьрьн, дьле wан дькарә нәрм бә у һеди-һеди әwана баш бьфькьрьн сәр мә. Ле Йаһоwа «бәлки . . . мәщале бьдә wан, кö жь гöнәкьрьне вәгәрʹьн у рʹастийе нас кьн» (2 Тимтʹ. 2:24, 25).

Йа сьсийа, әм гәрәке бь дьл у щан пʹайе wан хушк-бьра бьдьн, йед кö нава тәнгасийада бь амьни Йаһоwарʹа хьзмәт дькьн. Һьлбәт Йуһʹәннайе шанди һелан да Гайос у wи да баwәркьрьне, wәки әw тьштед рʹаст дькә. Иро рʹуспи гәрәке чʹәʹв бьдьнә Йуһʹәнна, кö хушк-бьра qәwи кьн, сәва әwана нәwәстьн (Иша. 40:31; 1 Тʹеслн. 5:11).

Текста Йунанида, нәʹма Йуһʹәнна Гайосрʹа жь 219 хәбәра нә, у Кʹьтеба Пирозда әw кʹьтеб йа лапә кьн ә. Ле бона Мәсиһийа әw гәләк qимәт ә у кʹаре жи тинә.