Бьра Дьле Тә сәр Хьзна Рʹöһʹани бә

1, 2. а) Кʹижан се хьзнед рʹöһʹани Йаһоwа дайә мә? б) Ве готареда әме дәрһәqа чь шеwьр кьн?

НАВА тʹәмамийа гәрдунеда, Йаһоwа Кәсе лапи дәwләмәнд ә (1 Дир. 29:11, 12). Әw Бавәки дәствәкьри йә, у бь мәрʹдани хьзнед рʹöһʹани дьдә wан һʹәмуйа, йед кö әwан хьзна qимәт дькьн. Әм чьqас жь Йаһоwа рʹази нә, wәки хьзнед рʹöһʹани дайә мә, мәсәлә, 1) Пʹадшатийа Хwәде, 2) хьзмәти, 3) у рʹастийед жь Хәбәра wи. Ле һәрге әм мьqати хwә нәбьн, дькарә öса бә кö әм wан хьзна нәшекьриньн у ахьрийеда öнда кьн жи. Сәва әw йәк нәqәwьмә, лазьм ә әм тʹьме биньн бира хwә кö qимәте wан чьqас мәзьн ә, у һʹьзкьрьна хwә һе qәwи кьн. Иса гот: «Хьзна wә кʹидәре бә, дьле wәйе жи ль wе дәре бә» (Луqа 12:34).

² Wәрә әм шеwьр кьн, кö әм ча дькарьн Пʹадшатийа Хwәде, хьзмәтийе, у рʹастийе һе qимәт кьн у һʹьз бькьн. Wәʹде шеwьркьрьне бьфькьрьн, кö хут һун ча дькарьн һʹьзкьрьна хwә qәwи кьн һьндава wан хьзна.

ПʹАДШАТИЙА ХWӘДЕ МИНА ДÖРʹЕ ЛАПИ QИМӘТ Ә

3. Мәтʹәлока Исада, базьрган һазьр бу чь бьда сәва дöрʹе qимәт qазанщ кә? (Бьньһерʹә шькле әʹwльн.)

³ Бьхунә Мәтта 13:45, 46. Иса мәтʹәлока хwәда дәрһәqа базьрган гьли кьр, кʹижани кö дöрʹ дьгәрʹийа. Нава салада, бешьк әwи бь сәда дöрʹ кʹьрʹибу у фьротьбу. Ле щарәке әwи дöрʹәки öса бәдәw дит, кö дьле wи гәләк ша бу. Әw дöрʹ гәләк бьһа бу, ле базьрган һазьр бу тʹәмамийа һәбука хwә жи бьфьрошә, сәва wи дöрʹи qазанщ кә. Бьдьнә бәр чʹәʹве хwә, wәки бона wи әw дöрʹ чьqас qимәт бу!

4. Һәрге әм Пʹадшатийа Хwәде һʹьз дькьн, әме һелан бьн чь бькьн?

⁴ Жь ве мәтʹәлоке әм чь дәрсе һин дьбьн? Рʹастийа дәрһәqа Пʹадшатийа Хwәде мина ви дöрʹи гәләк qимәт ә. Һәрге әм жи Пʹадшатийа Хwәде öса qайим һʹьз дькьн чаwа базьрган әв дöрʹ һʹьз дькьр, әме һәр тьшти бькьн сәва Пʹадшатийа Хwәде wар бьн. (Бьхунә Марqос 10:28-30.) Wәрә сәрһатийед дö мәрьва шеwьр кьн, йед кö һәма öса жи кьрьнә.

5. Зәхайо һазьр бу чь qöрбана бькә сәва Пʹадшатийа Хwәде?

⁵ Зәхайо сәрwере хәрщгьра бу. Әwи хwәрʹа бь хәрще хәлqе һәбука мәзьн тʹоп кьр у дәwләти бу (Луqа 19:1-9). Ле щарәке Зәхайо жь Иса дәрһәqа Пʹадшатийа Хwәде бьһист. Әwи дәрберʹа qимәте Пʹадшатийе фәʹм кьр у хwәст жийина хwәда гöһастьна бькә. Әwи гот: «Хöдан, әз ва ниве һәбука хwә дьдьмә фәqира у мьн нәһәqи кʹе жи кьрьбә, әзе чар щар ле вәгәрʹиньм». Бәле, Зәхайо дәсте хwә жь һәбука һʹәрам кʹьшанд у тьмайи һьндава пʹәра жь дьле хwә дәрхьст.

6. Жьнькәке чь гöһастьн кьрьн у чьрʹа?

⁶ Чәнд сал пешда, жьнькәке йа кö ләзбийән бу, мьзгинийа Пʹадшатийе бьһист. Әw пресидента wе тʹәшкиләте бу, кʹижан кö шәрʹ дькьр wәки изьн һәбә мер меррʹа бә, жьн жьнрʹа бә. Гава әwе жьньке дәстпекьр Кʹьтеба Пироз һин бә, әwе фәʹм кьр кö qимәте Пʹадшатийа Хwәде чьqас мәзьн ә, у хwәст жийина хwә лаптә бьгöһезә (1 Корн. 6:9, 10). Әw жь wе тʹәшкиләте дәркʹәт у һәләqәтийа хwә тʹәви ләзбийәна qәтанд. Әw жьньк сала 2009-да һатә ньхöмандьне, у паши саләке бу пешәнг. Әwе һʹьзкьрьна хwә һьндава Йаһоwа у Пʹадшатийа wи, сәр һәр хwәстьна бәдәнерʹа гьрт (Марq. 12:29, 30).

7. Чаwа әм дькарьн һʹьзкьрьна хwә һьндава Пʹадшатийа Хwәде qәwи хwәй кьн?

⁷ Сәва кö бьбьнә бажарванед Пʹадшатийа Хwәде, гәләка жь мә жийина хwә лаптә гöһастьнә (Рʹом. 12:2). Ле паши ве йәке жи әм гәрәке нәсәкьньн. Әм гәрәке нәһельн wәки һʹьзкьрьна мә һьндава Пʹадшатийе сьст бә, мәсәлә жь бо һәбуке йан жи жь бо хwәстьнед бенамуси (Мәтʹлк. 4:23; Мәт. 5:27-29). Ле Йаһоwа диса хьзнәкә qимәт дайә мә, кʹижан кö али мә дькә, wәки әм һʹьзкьрьна хwә һьндава Пʹадшатийе qәwи кьн.

ХЬЗМӘТИЙА МӘ ӘʹМЬРЕ МӘРЬВА ХЬЛАЗ ДЬКӘ

8. а) Чьрʹа Паwлос гот wәки хьзмәтийа мә мина «хьзнә нава . . . дәрданед һʹәрʹи» йә? б) Паwлос ча избат кьр wәки әw хьзмәтийа хwә qимәт дькә?

⁸ Иса тʹәми да шагьртед хwә, wәки хьзмәт бькьн у мәрьва дәрһәqа мьзгинийа Пʹадшатийа Хwәде һин кьн (Мәт. 28:19, 20). Паwлосе шанди хьзмәти гәләк qимәт дькьр. Әwи хьзмәти бәрамбәр кьр тʹәви «хьзнә нава . . . дәрданед һʹәрʹида» (2 Корн. 4:7; 1 Тимтʹ. 1:12). Рʹаст ә әм гöнәкʹар ьн у ләма чаwа дәрданед һʹәрʹи нә, ле мьзгинийа кö әм бәла дькьн хьзнә йә. Чьрʹа? Чьмки хьзмәти дькарә жийина һʹәта-һʹәтайе һьн бьдә мә, һьн жи бьдә wан мәрьва йед кö гöһ дьдьнә мә. Ләма жи Паwлос гот: «Ван һʹәму тьшта әз иди бона Мьзгинийе дькьм, wәки әз бьбьмә һәвал-пʹаре дöа-дьрозгед сәр wе» (1 Корн. 9:23). Бәле, Паwлос хьзмәтийа хwә гәләк һʹьз дькьр у һʹәму тьшт дькьр кö мәрьва бинә сәр рʹийа рʹастийе. (Бьхунә Рʹомайи 1:14, 15; 2 Тимотʹейо 4:2.) Әве йәке али wи кьр кö wәʹде зерандьнед qайим әwи сәбьр кьр у амьн ма (1 Тʹеслн. 2:2). Ле әм ча дькарьн һʹьзкьрьна хwә һьндава хьзмәтийе нишан кьн?

9. Чь щурʹәйи әм дькарьн нишан кьн wәки хьзмәтийе һʹьз дькьн?

⁹ Паwлос хьзмәти гәләк һʹьз дькьр. Әwи һәр мәщал дьда хәбате сәва мәрьварʹа мьзгинийе гьли кә. Әм жи мина шандийа у Мәсиһийед qьрʹна йәке һʹәму щийа мьзгинийе бәла дькьн, мәсәлә дәрва, мал бь бал у щийед кö гәләк мәрьв тʹоп дьбьн (Кʹар. Шанд. 5:42; 20:20). Чьqас дәсте мә те, әм дьхwазьн һе зедә хьзмәт кьн, мәсәлә, ча пешәнге кʹомәкдар йан ча пешәнге һәртʹьм. Йан жи дьбәкә әм зьмане тʹәзә һин дьбьн, жь шәһәре хwә дәрбази шәһәрәки дьн дьбьн, йан һәла һе жи wәлате дьн (Кʹар. Шанд. 16:9, 10).

10. Хушкәкә мә Ирен чь кʹәрәм станд жь бо хирәта хwә бәлакьрьна мьзгинийеда?

¹⁰ Дина хwә бьдьн мәсәла хушкәкә азәп Ирене жь Дәwләтед Йәкбуйи. Ирене гәләк дьхwәст wан емигрантарʹа йед кö сәр зьмане Урьси хәбәр дьдан, мьзгинийе бәла кә. Әwе сала 1993-да дәстпекьр нета хwә бинә сери. Wи wәʹдәйи Нийу Йоркеда сәр зьмане Урьси тʹәне кʹомәк һәбу у ве кʹомеда wәкә 20 мьзгинван һәбун. Ирен ида wәкә 20 сала дәшта wи зьманида хьзмәт дькә. Әw гьли дькә: «Әз һʹәта иро бь тʹәмами сәр зьмане Урьси рʹьнд хәбәр надьм». Ле Йаһоwа хирәта wе у мьзгинванед дьн кʹәрәм кьр. Иро Нийу Йоркеда шәш щьват сәр зьмане Урьси һәнә. Панздәһ мәрьвед кö Ирене һинбуна Кʹьтеба Пироз тʹәви wан дәрбаз дькьр, һатьнә ньхöмандьне. Һьнәк жь wан Бәйтʹәледа хьзмәт дькьн, һьнәк пешәнг ьн у һьнәк рʹуспи нә. Ирен дьбежә: «Һәрге мьн нетед хwәйә дьн бьанийа сери, мьне тʹö щар шабунәкә öса нәстанда». Бәле, әw хушк хьзмәтийа хwә гәләк qимәт дькә!

11. Чахе әм wәʹде пәйкʹәтьна жи мьзгинийе бәла дькьн, әw йәк чь бәред баш тинә?

¹¹ Һәрге әм хьзмәтийа хwә qимәт дькьн, әме мина Паwлос wәʹде пәйкʹәтьна жи хьзмәт бькьн (Кʹар. Шанд. 14:19-22). Жь сала 1930 һʹәта wәкә сала 1944, хушк-бьред Дәwләтед Йәкбуйида qайим дьһатьнә зерандьне. Ле әwана мина Паwлос qәwи дьсәкьнин у хьзмәтийа хwә нәдьданә сәкьнандьне. Сәва кö дәwләт изьне бьдә wәки әм аза мьзгинийе бәла кьн, бьра әw шьхöл дьданә диwане у гәләк щар әwана сәр кʹәтьн. Сала 1943-да, бьред мә Диwана Һәрә Мәзьнда йа Дәwләтед Йәкбуйида сәр кʹәтьн, у Нейтан Нор дәрһәqа ве йәке мьзгинванарʹа öса гот: «Әw сәркʹәтьн бь сайа хирәта wә йә. Һәрге мьзгинвана бәрдәwам нәкьра хьзмәт кьн, qә тʹö шьхöл wе нәчуйа ве Диwана Һәрә Мәзьн. Ле чьмки һун мьзгинванно, демәк хушк-бьред нав тʹәмамийа дьнйайеда, нәсәкьнинә, wә избат кьр, wәки тʹö пәйкʹәтьн рʹе wә нагьрә. Әw сәркʹәтьн йа щьмәʹта Хöдан ә, кʹижан кö qәwи дьсәкьнә у ләма сәр дькʹәвә». Wәлатед дьнда жи хушк-бьра qәwи дьсәкьньн у диwанада сәр кʹәтьнә. Бәле, һәрге әм хьзмәтийе һʹьз дькьн, тʹö тьшт рʹе мә нагьрә кö бәрдәwам кьн хьзмәт кьн.

12. Хьзмәтийеда һун дьхwазьн бьгьһижьнә чь нете?

¹² Һәрге әм хьзмәтийа хwә qимәт дькьн, әме тʹö щар пәй «сьһʹәта» нәкʹәвьн. Әме һәр тьшти бькьн чь дәсте мәва те, сәва хьзмәтийа хwә биньн сери (Кʹар. Шанд. 20:24; 2 Тимтʹ. 4:5). Ле хьзмәтийеда әме мәрьва чь һин кьн? Wәрә шеwьр кьн кö Хwәде диса чь хьзнә дайә мә.

ӘМ РʹАСТИЙЕД QИМӘТ ПЕҺʹӘСИЙАН

13, 14. Чь йә «хьзнә» кö Иса Мәтта 13:52-да готьбу, у әм ча әwе хьзне зедә дькьн?

¹³ Хьзна сьсийа әw һәйә хьзна wан рʹастийа кʹижана әм педьһʹәсьн. Йаһоwа йә Хwәдейе рʹастийе (2 Сам. 7:28; Зәб. 31:5). У әw мина бавәки мәрʹд, әwан рʹастийа мәрьвед хwәдехофрʹа әʹйан дькә. Әм гәләк рʹастийа пеһʹәсийан жь Хәбәра Хwәде, жь әʹдәбйәтед мә, жь щьватед мәзьн, у щьватед һәр һʹәфтийе. У чьqас дьчә, «хьзна мә» пе рʹастийед кәвьн у тʹәзә зедә дьбә. (Бьхунә Мәтта 13:52.) Һәрге әм мина хьзнәкә вәшарти рʹастийа бьгәрʹьн, Йаһоwа wе али мә бькә, wәки әм «хьзна» хwә пе рʹастийед тʹәзә зедә кьн. (Бьхунә Мәтʹәлок 2:4-7.) Ле ча әwан рʹастийа бьгәрʹьн?

¹⁴ Әм гәрәке тʹьме Хәбәра Хwәде у әʹдәбйәтед мә бьхуньн, у кʹур леколин бькьн. Тʹәне бь wи щурʹәйи әме бьвиньн wан рʹастийа, кʹижан кö wе бона мә «ну» бьн, демәк кʹижан кö мә бәре ньзаньбу (Йешу 1:8, 9; Зәб. 1:2, 3). Журнала «Бьрща Qәрәwьлийеда» кö щара пешийе сала 1879 Тирмәһеда һатә дәрхьстьне, дьһатә готьне: «Рʹасти, әw һәйә мина кöлирка бьчʹук, кʹижан кö чоле мәзьн дьбә, у дәр доре wе зиwанед дәрәwийе мәзьн дьбьн у нав хwәда ле вәдьшерьн. Һәрге һун дьхwазьн әwе кöлирке бьвиньн, һун гәрәке рʹьнд бьгәрʹьн. . . . Гава wә әw дит, лазьм ә бьсәкьньн у һьлдьн. Ле тʹәне бь ве кöлиркәке рʹастийе, тʹер нәбьн. . . . Диса йед дьн бьгәрʹьн, нәсәкьньн һе зедә тʹоп кьн». Бәле, әм гәрәке тʹьме бәрдәwам кьн рʹастийед qимәт бьгәрʹьн у хьзна хwә зедә кьн.

15. Чьрʹа сәр һьнә рʹастийа әм дькарьн бежьн ча «кәвьн», у һун кʹижан рʹастийе лап зәʹф qимәт дькьн?

¹⁵ Чахе мә пешийе дәстпекьр Кʹьтеба Пироз һин бьн, әм рʹастийед гәләк qимәт пеһʹәсийан. Әм дькарьн бежьн wәки әw рʹасти бона мә ида «кәвьн» ьн, чьмки әwан тьшта әм дәстпекеда пеһʹәсийанә. Мәсәлә, әм пеһʹәсийан кö Йаһоwа Әʹфьрандаре мә йә у öса жи дәрһәqа qьрара wи һьндава инсанәте. Әм öса жи пеһʹәсийан wәки Хwәде жь һʹьзкьрьне Кöрʹе хwә qöрбан кьр, сәва кö әм жь гöнә у мьрьне хьлаз бьн. Öса жи әм пеһʹәсийан wәки Пʹадшатийа Хwәде wе һʹәму кöл-дәрда бьдә һьлдане у паше әме бькарьбьн әʹдьлайеда у бәхтәwарийеда бьжин (Йуһʹн. 3:16; Әʹйан. 4:11; 21:3, 4).

16. Әм чь гәрәке бькьн гава фәʹмкьрьна рʹастийе те гöһастьн?

¹⁶ Щара, фәʹмкьрьна мә һьндава пʹехәмбәртийа йан жи рʹезед жь Кʹьтеба Пироз дькарә бе гöһастьне. Гава әм әwан гöһастьна дьстиньн, һьнге лазьм ә әм әве информасйайе кʹур леколин бькьн у сәр бьфькьрьн (Кʹар. Шанд. 17:11; 1 Тимтʹ. 4:15). Әм гәрәке зәлал фәʹм бькьн кö чь фьрqи һәйә ортʹа фәʹмкьрьна бәре у йа тʹәзәда, һьн тьштед мәзьнда, һьн жи тьштед һурда. Wи щурʹәйи әме хьзна хwә пе рʹастийед ну зедә кьн. Ле гәло чь кʹар һәйә ве йәкеда?

17, 18. Рʹöһʹе пироз дькарә чьда али мә бькә?

¹⁷ Иса һин дькьр wәки рʹöһʹе Хwәдейи пироз дькарә бинә бира мә тьштед кö әм бәре һин бунә (Йуһʹн. 14:25, 26). Ле гәло wәʹде хьзмәтийе ча әw дькарә кери мә бе? Дина хwә бьдьнә сәрһатийа бьраки мә, бь наве Питер. Сала 1970 әw 19 сали бу у тʹәзә дәстпекьр Бәйтʹәла Британйайеда хьзмәт кә. Щарәке әwи мал бь мал хьзмәт дькьр у рʹасти мерәки wәкә 50 сали һат, рʹуйе кʹижани бәрдайи бу. Питер жь wи мерьки пьрси кö гәло әw нахwазә Кʹьтеба Пироз фәʹм бькә. Питер әʹщебмайи ма чахе әwи мерьки жерʹа гот wәки әw мамостайе Щьһу йә. Әwи мерьки дьхwәст Питер бьщерʹьбинә, у пьрсәкә öса да wи: «Ижа кöрʹе мьн, һәла бежә кʹьтеба Данийел сәр кʹижан зьмани һатә ньвисаре?» Питер щаба хwә да: «Пʹарәкә ве кʹьтебе сәр зьмане Арамайи һатә ньвисаре». Питер тинә бира хwә: «Әw мамоста әʹщебмайи ма кö мьн щаба ве пьрсе заньбу, ле әз хwәха жь wи зедәтьр әʹщебмайи мам! Ле мьн жь кʹö заньбу щаба wе пьрсе? Чахе әз һатьм мале мьн журналед «Бьрща Qәрәwьлийе» у Һʹьшйар Бьн! йед wан пашwәхтийа гәрʹийа у мьн готарәк дит кʹидәре кö дьһатә шьровәкьрьне wәки кʹьтеба Данийел сәр зьмане Арамайи һатийә ньвисаре».a Бәле, рʹöһʹе пироз дькарә бинә бира мә wан тьшта, чь кö мә бәре хwәндийә у хьзна мәйә рʹöһʹанида һатийә хwәйкьрьне (Луqа 12:11, 12; 21:13-15).

¹⁸ Һәрге әм әwан рʹастийед кö жь Йаһоwа педьһʹәсьн, һʹьз дькьн у qимәт дькьн, әме бьхwазьн хьзна хwә пе рʹастийед тʹәзә у кәвьн зедә кьн. Чьqас зәʹф әм әве йәке бькьн, һаqас баш әме бькарьбьн мәрьвед дьн һин кьн.

ХЬЗНА ХWӘ ХWӘЙ КЬН

19. Чьрʹа әм гәрәке хьзна хwә хwәй кьн?

¹⁹ Шәйтʹан у дьнйа wи дьхwазьн wәки әм хьзнед рʹöһʹани qимәт нәкьн. Ләма әм гәрәке һаш жь хwә һәбьн сәва һʹьзкьрьна хwә öнда нәкьн. Һәрге әм фәсал нибьн, һʹьш-аqьле мә дькарә һәрʹә алийе нәрʹаст. Мәсәлә, әм дькарьн пәй пʹәра кʹәвьн. Бәʹса хәбәре, кәсәк хәбатәкә баш соз бьдә мә у әм һʹьш-аqьле хwә бьдьнә сәр ве йәке кö пʹәре qальм чекьн. Йан жи дьбәкә әме тʹәне сәр ве йәке бьфькьрьн, кö чаwа дәwләмәнд бьн у рʹьһʹәт бьжин, йан жи пе һәбука хwә qöрʹә бьн. Йуһʹәннайе шанди тинә бира мә wәки әw дьнйа у чь кö теда һәйә wе дәрбаз бьн (1 Йуһʹн. 2:15-17). Ләма жи, әм гәрәке мьqати хwә бьн сәва хьзна хwәйә рʹöһʹани öнда нәкьн.

20. Һун ча дьхwазьн хьзна хwәйә рʹöһʹани хwәй кьн?

²⁰ Нәһельн wәки тьштәки һʹьзкьрьна wә һьндава Пʹадшатийа Хwәде сьст кә. Бь хирәт мьзгинийе бәла кьн у хьзмәтийе һʹьз бькьн. Бь дьл у щан бьгәрʹьн рʹастийед жь Кʹьтеба Пироз. Гава һун öса бькьн, һуне «хьзна» ль әʹзмана тʹоп кьн. «Ль wе дәре нә дьзе незик бе у нә жи wе бьзузе бьхwә. Чьмки хьзна wә кʹидәре бә, дьле wәйе жи ль wе дәре бә» (Луqа 12:33, 34).