Бьра Йаһоwа Нет-Мәрәмед Тә Кʹәрәм кә

1. Щаһьл чь гәрәке сафи кьн бона ахьрийе, у чьрʹа әwана гәрәке гәләк бәрхwә нәкʹәвьн кö ча сафи кьн? (Бьньһерʹә шькле әʹwльн.)

ЩАҺЬЛНО, чахе һун дьхwазьн рʹеwитийе бькьн, аqьлайи йә һәрге нете дайньн пешийа хwә у пешда бьфькьрьн кö һуне һәрʹьнә кʹö. Әм дькарьн бежьн кö әʹмьр жи ча рʹеwити йә, у щаһьлтийеда лазьм ә сафи кьн һуне әʹмьре хwә ча дәрбаз кьн. Ле бь рʹастийе һеса нинә әве сафикьрьне бькьн. Кәчʹькәк бь наве Һитер дьбежә: «Әw тьрс ә, чьмки тö гәрәке сафи ки, кö тʹәмамийа әʹмьре хwә ча дәрбаз ки». Ле щаһьлно мерхас бьн у нәтьрсьн, чьмки Йаһоwа щьмәʹта хwәрʹа дьбежә: «Тö нәтьрсә, жь бәр кö әз бь тәрʹа мә; ль дора хwә нәньһерʹә, жь бәр кö Хwәдайе тә әз ьм; әзе тә зәхм [qәwи] бькьм; бәле, әзе али тә бькьм» (Иша. 41:10).

2. Щаһьлно, чьрʹа Йаһоwа дьхwазә wәки һун нета дайньн пешийа хwә сәва ахьрийа бәхтәwар бьстиньн?

² Щаһьлно, Йаһоwа ширәте дьдә wә, wәки бона ахьрийа хwә нетед аqьлайи дайньн пешийа хwә (Wаиз 12:1; Мәт. 6:20). Әw дьхwазә һун бәхтәwар бьн. У әwи ча әм әʹфьрандьнә, әв йәк жи дьдә кʹьфше кö әw дьхwазә һун әʹмьре хwәрʹа ша бьн. Мәсәлә, әм дькарьн бьвиньн, бьбьһен, у тьштед хwәш тәʹм кьн чь кö әwи чекьрийә. Хенщи ве йәке, Хwәде мә һʹьз дькә, ширәт дькә у һин дькә. Ле wи хwәш найен әw мәрьв, йед кö гöһ надьнә wи. Әw дәрһәqа wан дьбежә: «Һун дьжберьн чь кö мьн хwәш найе. . . . Хьзмәткʹаред мьн wе ша бьн, ле һуне шәрми бьн. Хьзмәткʹаред мьн жь фьрәйа дьл wе бьстьрен» (Иша. 65:12-14, ДТʹ). Бәле, чахе әм әʹмьре хwәда сафикьрьнед аqьлайи дькьн, Йаһоwа рʹумәт дьбә (Мәтʹлк. 27:11).

WАН НЕТА ДАЙНЬН ПЕШИЙА ХWӘ КʹИЖАН WЕ WӘ БӘХТӘWАР КЬН

3. Йаһоwа чь ширәте дьдә wә?

³ Ле гәло Йаһоwа чь ширәте дьдә wә, демәк һун дькарьн кʹижан нета дайньн пешийа хwә? Сәва кö һун бәхтәwар бьн, лазьм ә һун Йаһоwа нас кьн у жерʹа хьзмәт кьн, чьмки әwи әм öса чекьрьнә (Зәб. 128:1; Мәт. 5:3). Һʹәйwан тʹәне дьхwьн, вәдьхwьн, дьтәрькьн у дьзен, ле нет-мәрәмед wан тʹöнә. Ле мәрьв öса нәһатьнә чекьрьне. У Хwәде дьхwазә wәки һун, щаһьлно, әʹмьрда нета дайньн пешийа хwә у бәхтәwар бьжин. Әʹфьрандаре wә «Хwәдейе һʹьзкьрьне», «Хwәдейе хwәзьли» йә, йе кö мәрьв «дьлqе хwәда хöльqанд» (2 Корн. 13:11; 1 Тимтʹ. 1:11; Дәстп. 1:27). У чахе һун чʹәʹв бьдьнә Хwәдейе мәйи һʹьзкьрьне, һуне бәхтәwар бьн. Дьqәwьмә wә хwәха дитийә кö чьqас шабуне тинә әв йәк чь кö Кʹьтеба Пироз дьбежә: «Хwәзи ль дайийа, нә кö ль стандийа» (Кʹар. Шанд. 20:35). Әw гьли рʹаст ьн. Ләма жи Йаһоwа дьхwазә һун әʹмьре хwәда нетед öса дайньн пешийа хwә, кʹижан кö wе һʹьзкьрьне бьдьнә кʹьфше һьндава мәрьва у һьндава Хwәде. (Бьхунә Мәтта 22:36-39.)

4, 5. Чь Иса бәхтәwар дькьр?

⁴ Бона wә щаһьлно, Иса мәсәләкә баш һишт. Чахе әw бьчʹук бу, тʹәбийәти йә кö әwи тʹәви зарʹа дьлист у хwәрʹа тьштәкива мьжул дьбу. Ча Хәбәра Хwәде дьбежә, «wәхта кʹәнине һәйә . . . у wәхта листьне һәйә» (Wаиз 3:4). Ле хенщи wан тьшта, Иса Ньвисар леколин дькьрьн у öса незики Йаһоwа дьбу. Чахе әw 12 сали бу, дәрсдаред пʹарьстгәһеда «сәр занәбун у щабед wи» зәндәгьрти дьман (Луqа 2:42, 46, 47).

⁵ Иса бәхтәwар бу. Ле чь wи бәхтәwар дькьр? Әwи qьрара Хwәде дьани сери кö фәqирарʹа у «корарʹа бой дитьне» мьзгини бәла дькьр (Луqа 4:18). Бәле, Иса бәхтәwар бу, чьмки әwи әв дькьр чь кö Хwәде жь wи дьхwаст. Әв йәк жь гьлийед wи Зәбур 40:8-да те кʹьфше: «Әз дьхwазьм хwәстьна Тә бьqәдиньм, йа Хwәде». Иса гәләк һʹьз дькьр дәрһәqа Баве хwәйи әʹзмана мәрьва һин кә. (Бьхунә Луqа 10:21.) Щарәке, чахе Иса дәрһәqа һʹәбандьна рʹаст тʹәви жьнькәке хәбәр да, паше әwи шагьртед хwәрʹа гьлийед öса гот: «Хwарьна мьн әw ә, кö әз хwәстьна йе кö әз шандьмә бькьм у шьхöлед wи биньмә сери» (Йуһʹн. 4:31-34). Иса Хwәде у мәрьв һʹьз дькьрьн, у пе кьред хwә әв йәк нишан дькьр. Щаһьлно, һәрге һун жи öса бькьн, һуне жи бәхтәwар бьн.

6. Чьрʹа баш ә һәрге щаһьл дәрһәqа нетед хwәйә ахьрийе, хәбәр дьн тʹәви хушк-бьред щерʹьбанди?

⁶ Гәләк хушк-бьред мә шабунәкә мәзьн дитьнә чахе щаһьлтийеда ча пешәнг хьзмәт кьрьнә. Щаһьлно, wе баш бә һәрге һун дәрһәqа нетед хwә тʹәви wан хушк-бьра хәбәр дьн. «Бе ширәт мәрәм у тʹьвдир бәтал дьбьн, ле бь сайа гәләк ширәткʹара әw тенә сери» (Мәтʹлк. 15:22). Әв хушк-бьред щерʹьбанди дькарьн wәрʹа гьли кьн, wәки хьзмәткьрьна һәртʹьмда һуне һинкьрьнед öса бьстиньн кö тʹәмамийа әʹмьре wәда кери wә бен. Иса сәр әʹзмана гәләк тьшт жь Баве хwә һин бу. У wәʹде хьзмәтийе сәр әʹрде жи әw гәләк тьшт һин дьбу. Әwи дит кö шабунәкә чьqас мәзьн ә чахе мәрьварʹа мьзгинийе гьли дькә у öса жи wәʹде щерʹьбандьнада амьнийе хwәй дькә (Бьхунә Ишайа 50:4; Ибрн. 5:8; 12:2). Wәрә әм ньһа шеwьр кьн кö хьзмәткьрьна һәртʹьм ча дькарә wә бәхтәwар кә.

ҺИНКЬРЬНА ШАГЬРТА ШЬХÖЛӘКӘ ЛАПӘ БАШ Ә

7. Чьрʹа гәләк щаһьл шабуне дьвиньн чахе мәрьва һин дькьн?

⁷ Иса шагьртед хwәрʹа гот: «Һәрʹьн . . . мьләта бькьн шагьртед мьн» (Мәт. 28:19, 20, ИМ). Щаһьлно, һәрге һун хwәрʹа нете дайньн кö wи шьхöли бькьн, һуне бәхтәwар бьн, чьмки бь wи шьхöли һуне рʹумәте бьдьнә Хwәде. Ле сәва wи шьхöлида щерʹьбанди бьн, лазьм ә wәʹдә. Бьре мә бь наве Тимоти, йе кö щаһьлтийеда пешәнгти дәстпекьр, гот: «Әз бәгәм дькьм хьзмәтийа һәртʹьм, чьмки öса әз Йаһоwарʹа нишан дькьм кö wи һʹьз дькьм. Дәстпекеда, мьн нькарьбу тʹәви мәрьва һинбуна Кʹьтеба Пироз дәрбаз кьра, ле чахе әз дәрбази щики дьн бум, мьн нава мәһәкеда дәстпекьр тʹәви чәнд мәрьва һинбуна Кʹьтеба Пироз дәрбаз кьм. Мәрьвәки дәстпекьр бе сәр щьвате жи. Паше әз Мәкʹтәба бона Бьред Азәп дәрбаз бумa, у мьн кʹьфшкьрьна тʹәзә станд, кʹидәре кö тʹәви чар мәрьва мьн һинбун дәрбаз дькьр. Әз һʹьз дькьм мәрьва һин кьм, чьмки дьвиньм кö рʹöһʹе пироз ча wан дьгöһезә» (1 Тʹеслн. 2:19).

8. Һьнә щаһьла чь кьрьн сәва һе зедә мәрьварʹа мьзгинийе бәла кьн?

⁸ Һьнә щаһьлед мә зьмане тʹәзә һин дьбьн сәва мәрьва һин кьн. Мәсәлә, бьраки бь наве Щейкоб жь Дәwләтед Йәкбуйи, ньвиси: «Чахе әз 7 сали бум, гәләк һәвалед мьнә дәрсхане Вийәтнами бун. Мьн гәләк дьхwәст wанрʹа дәрһәqа Йаһоwа гьли кьра, ләма жи мьн нет хwәрʹа дани wәки зьмане wан һин бьм. Мьн ‹Бьрща Qәрәwьлийе› йа зьмане Инглизи бәрамбәри зьмане Вийәтнами дькьр, у дьһа зәʹф wи щурʹәйи әз зьмане wан һин бум. Öса жи мьн хwәрʹа һәвал дитьн щьвата зьмане Вийәтнамида, кʹижан кö незики мьн бу. Чахе әз 18 сали бум, мьн пешәнгти дәстпекьр. Паше, әз Мәкʹтәба бона Бьред Азәп дәрбаз бум. Әве мәкʹтәбе кʹьфшкьрьна мьнә ирода гәләк али мьн кьр. Әз кʹома сәр зьмане Вийәтнамида хьзмәт дькьм, кʹидәре кö тʹәне әз ьм рʹуспи. Гәләк мәрьвед Вийәтнам әʹщебмайи дьминьн кö ча әз зьмане wан һин бумә. Әwана мьн тʹәглифи мала хwә дькьн у тʹәви wан гәләка дәстпедькьм һинбуна Кʹьтеба Пироз. Һьнәк һатьнә ньхöмандьне жи» (Бәрамбәр кьн Кʹаред Шандийа 2:7, 8).

9. Хьзмәтийеда һун чь тьштед баш һин дьбьн?

⁹ Щаһьлно, хьзмәтийеда һун тьштед баш һин дьбьн. Мәсәлә, һун хәйсәт-һʹöнöред баш пешда тиньн, фәрәсәтед wә зедә дьбьн, хәбәрдана wә тʹәви мәрьва һе рʹьнд у һеса дьбә, һун хwәда һе баwәр дьбьн у һин дьбьн мәʹрифәт бьн (Мәтʹлк. 21:5; 2 Тимтʹ. 2:24). Wи шьхöлида öса жи шабунәкә мәзьн һәйә, һун дьбьнә щерʹьбанди сәва мәрьварʹа пе Кʹьтеба Пироз баwәрийа хwә избат кьн. Öса жи һун һин дьбьн кö чаwа тʹәви Йаһоwа һе незик һәвкʹарийе бькьн (1 Корн. 3:9).

10. Һун ча дькарьн шабуне бьвиньн, һәрге жи мьһала wәда һьндьк мәрьв гöһ дьдьнә wә?

¹⁰ Һәрге жи мьһала wәда һьндьк мәрьв гöһ дьдьнә wә, йәкә һун дькарьн шабуне бьвиньн. Тʹәмамийа щьвате ча кʹом дьхәбьтә wәки мәрьвед дьлсах бьвиньн у бькьн шагьрт. Чахе хушк йан бьрак кәсәки дьвиньн у әw дьбә шагьрт, һʹәмушк жи ша дьбьн чьмки wана жи гәрʹийанә. Мәсәлә, бьрак бь наве Брендон, нәһә сала пешәнг бу ве мьһаледа, кʹидәре кö һьндьк мәрьв Кʹьтеба Пироз һин дьбьн. Әw дьбежә: «Әз һʹьз дькьм мьзгинийе бәла кьм, чьмки Йаһоwа әwе йәке жь мә дьхwазә. Чахе мьн мәкʹтәб хьлаз кьр, мьн пешәнгти дәстпекьр. Щьватеда әз бьред щаһьл һелан дькьм у дьле мьн ша дьбә чахе әз дьвиньм ча әwана рʹöһʹанида пешда дьчьн. Паши хьлазкьрьна Мәкʹтәба бона Бьред Азәп, мьн ча пешәнг кʹьфшкьрьна тʹәзә станд. Рʹаст ә мьн qә мәрьвәк жи нәгиһандә ньхöмандьне, ле хушк-бьред дьн әw йәк кьрьн. Әз гәләк ша мә кö мьн нет хwәрʹа данийә, wәки бь тʹәмами хwә шьхöле һазьркьрьна шагьрта бьгьрьм» (Wаиз 11:6).

НЕТЕД WӘ ДЬКАРЬН МӘЩАЛЕД ДЬН WӘРʹА ВӘКЬН

11. Гәләк щаһьл кʹижан щурʹә хьзмәти бьжартьнә?

¹¹ Щаһьлно, һун дькарьн бь гәләк щурʹа Йаһоwарʹа хьзмәт кьн. Мәсәлә, гәләк щаһьл шьхöле авакьрьнеда дьхәбьтьн. Бь рʹастийе лазьм ә бь сәда Одед Щьвата йед тʹәзә бенә авакьрьне. Авакьрьна ван авайа хьзмәтийа пироз ә, кʹижан кö Хwәде рʹумәт дькә у дькарә wә бәхтәwар кә. У wи щурʹе хьзмәтийеда жи һун дькарьн шабунәкә мәзьн бьвиньн, чьмки тʹәви хушк-бьра һәвкʹарийе дькьн. Һьн жи, ве хьзмәтийеда һун дькарьн гәләк тьшта һин бьн, мәсәлә чаwа хәбате фәсал бькьн, пʹешә һин бьн, хәбатһʹьз бьн, у тʹәви бәрпьрсийара һәвкʹарийе бькьн.

12. Хьзмәтийа пешәнгти чь мәщала вәдькә?

¹² Бьрак бь наве Кевин дьбежә: «Мьн жь бьчʹуктайе дьхwәст Йаһоwарʹа гәләк хьзмәт кьм. У ахьрийеда, чахе әз 19 сали бум, мьн пешәнгти дәстпекьр. Әз һʹәфтекида чәнд сьһʹәта дьхәбьтим щәм бьраки мә, кʹижан кö авакʹар бу, у öса мьн әʹбура хwә дькьр. Ве хәбатеда әз һин бум банийа, агушка у дәрийа чекьм. Паше, мьн 2 сала, аликʹари дьда тʹәзәкьрьна Одед Щьвата у малед хушк-бьра, кö жь бо хәзәба зийане стандьбун. Щарәке мьн бьһист wәки авакьрьнеда аликʹари лазьм ә Африкайа Башуреда, мьн хwәст һәрʹьм у мьн тʹәглифи wедәре кьрьн. Африкайеда һәр чәнд һʹәфтийада, әз жь авакьрьна Ода Щьватәке дәрбази йәкә дьн дьбум. Кʹома авакьрьне тʹәви кʹе жи әз дьхәбьтьм, бона мьн ча малбәт ә. Әм тʹәвайи дьжин, тʹәвайи Кʹьтеба Пироз леколин дькьн, у тʹәвайи дьхәбьтьн. Öса жи гәләк мьн хwәш те һәр һʹәфти хьзмәт кьм тʹәви хушк-бьред wедәре. Нетед кö мьн бьчʹуктайеда хwәрʹа qьрар кьр, әз öса бәхтәwар кьрьм кö мьн нә жи дьда бәр чʹәʹве хwә».

13. Хьзмәткьрьна Бәйтʹәледа чаwа гәләк щаһьла бәхтәwар дькә?

¹³ Һьнә щаһьл кö пешәнг бун, ньһа Бәйтʹәледа хьзмәт дькьн. Хьзмәтийа Бәйтʹәледа рʹасти жи бәхтәwар дькә, чьмки һәр тьшт чь кö wедәре те кьрьне, бона Йаһоwа йә. Хушк-бьред Бәйтʹәледа аликʹарийе дьдьн сәва хwарьна рʹöһʹани һәбә. Бьраки бь наве Дастин кö Бәйтʹәледа хьзмәт дькә, гьли дькә: «Чахе әз 9 сали бум, мьн нет дани пешийа хwә, кö бьбьмә хьзмәткʹаре һәртʹьм. У чахе мьн мәкʹтәб хьлаз кьр әз бумә пешәнг. Сал нивәк шунда, мьн тʹәглифи Бәйтʹәле кьрьн. Ль wедәре әз һин бум мәкʹинед нәшьркьрьне бьдьмә хәбате у паше сәр програмед компöтәре бьхәбьтьм. Дәрһәqа пешдачуйина шьхöле мәйи һʹәмдьнйайе әз пешийе Бәйтʹәледа педьһʹәсьм, у әw йәк жи мьнрʹа шабуне тинә. Әз һʹьз дькьм wьра хьзмәт кьм, чьмки чь кö әм wьра дькьн аликʹарийе дьдә мәрьва кö незики Йаһоwа бьн».

ТÖ КʹИЖАН НЕТА ДЬХWАЗИ ДАЙНИ ПЕШИЙА ХWӘ?

14. Һун ча дькарьн хwә һазьр кьн бона хьзмәткьрьна һәртʹьм?

¹⁴ Щаһьлно, һун ча дькарьн хwә һазьр кьн бона хьзмәткьрьна һәртʹьм? Сәва кö ахьрийеда пешдачуйи бьн ве хьзмәтийеда, гәләк фәрз ә хәйсәт-һʹöнöред Мәсиһити нав хwәда пешда биньн. Ләма жи бь дьл у щан Хәбәра Хwәде леколин бькьн, кʹур сәр бьфькьрьн, у мәщала бьгәрʹьн баwәрийа хwә щьватеда нишан кьн. Wәʹде һинбуна мәкʹтәбеда, һун дькарьн бәлакьрьна мьзгинийеда щерʹьбанди бьн. Һин бьн кö бь мәʹрифәти пьрса бьдьнә мәрьва у гöһ бьдьнә щабед wан сәва тедәрхьн әwана чь дьфькьрьн. Щьватеда жи һун дькарьн шьхöл бькьн, мәсәлә аликʹарийе бьдьн сәва тʹәмьзайи у тʹәзәкьрьна Ода Щьвате. Йаһоwа һʹьз дькә мәрьвед мьлук, йед кö бь рʹәзәдьли аликʹарийе дьдьн. (Бьхунә Зәбур 110:3; Кʹар. Шанд. 6:1-3). Паwлосе шанди, Тимотʹейо тʹәглифи хьзмәтийа мисйонерти кьр, чьмки «һьндава wида qәнщ хәбәр дьдан» (Кʹар. Шанд. 16:1-5).

15. Һун чь нета дькарьн бькьн, сәва паше әʹбура хwә бькьн?

¹⁵ Хьзмәткʹаред һәртʹьмарʹа лазьм ә хwә хwәй кьн у әʹбура хwә бькьн (Кʹар. Шанд. 18:2, 3). Щаһьлно, дьбәкә һун дькарьн курсед кьн дәрбаз бьн сәва пʹешәки һин бьн, кʹижан кö wе гәләк wәʹдә жь wә нәстинә, у һуне бькарьбьн хьзмәт кьн ча пешәнг. Дәрһәqа ван нетед хwә, тʹәви бәрпьрсийаре хwәйи мьһале хәбәр дьн у öса жи тʹәви пешәнгед мьһала хwәда. Жь wана бьпьрсьн кʹижан хәбат баш ә бона пешәнга. У чаwа Кʹьтеба Пироз дьбежә, «шьхöле хwә бьдә дәсте Хöдан у те бьгьһижи нет-мәрәме хwә» (Мәтʹлк. 16:3; 20:18).

16. Щаһьлтийа wәда хьзмәткьрьна һәртʹьм дькарә wә һазьр кә диса бона кʹижан щабдарийед ахьрийеда?

¹⁶ Щаһьлно, Йаһоwа дьхwазә, wәки һун ахьрийа бәхтәwар «qазьнщ кьн». (Бьхунә 1 Тимотʹейо 6:18, 19.) Хьзмәткьрьна һәртʹьм мәщале дьдә wә кö тʹәви хьзмәткʹаред һәртʹьмә майин һәвкʹарийе бькьн, у әв йәк wе али wә бькә бьбьнә Мәсиһийед гьһишти. Гәләк хушк-бьра готьнә кö чьмки wана щаһьлтийеда хьзмәтийа һәртʹьм дәстпекьрьнә, әв йәк паше зәwащеда кери wан һатийә. Гәләкед кö пешийа зәwаще пешәнг бун, паши зәwаще бәрдәwам дькьн тʹәвайи ча пешәнг хьзмәт дькьн (Рʹом. 16:3, 4).

17, 18. Чьрʹа нетед wә гәрәке жь дьле wә бьн?

¹⁷ Нетед wә гәрәке жь дьле wә бьн. Зәбур 20:4-да те готьне кö Хwәде «бьра wәкә дьле тә бьдә тә у нет-мәрәмед тә бинә сери». Бьфькьрьн кö һун ча дьхwәзьн әʹмьре хwә дәрбаз кьн. Дина хwә бьдьн кö Йаһоwа чь дькә бона рʹожа иройин у чь һун дькарьн бькьн хьзмәтийеда. Паше нетед öса дайньн пешийа хwә, кʹижан кö wе дьле Хwәде ша кьн.

¹⁸ Һәрге һун бь тʹәмами Йаһоwарʹа хьзмәт кьн, һуне гәләк бәхтәwар бьн, чьмки бь wе йәке һуне Хwәде рʹумәт кьн. Бәле, бьра Йаһоwа «шабуна тә бә, Әwе хwәстьна дьле тә бьдә тә» (Зәб. 37:4).