Чаwа Мәрьве Ну ль сәр Хwә кьн?

1, 2. а) Чьрʹа әм дькарьн мәрьве ну ль сәр хwә wәргьрьн? б) Дәрһәqа кʹижан хәйсәт-һʹöнöред мәрьве ну те готьне Колоси 3:10-14-да?

«МӘРЬВЕ ну». Әв гьли «Wәлгәрʹандьна Дьнйа Тʹәзәда» дö щара һатийә ньвисаре (Әфәс. 4:24; Колс. 3:10). «Мәрьве ну» ль гора qьрара Хwәде хöльqанди йә. Ле гәло әм дькарьн бьбьнә мәрьвед öса? Бәле, чьмки Йаһоwа мәрьв дьлqе хwәда әʹфьранд у ләма жи әм дькарьн чʹәʹв бьдьнә һʹöнöред wи (Дәстп. 1:26, 27; Әфәс. 5:1).

² Һʹәму мәрьва жь Адәм у Һеwайе гöнә стандийә, у ләма нав мәда щара хwәстьнед хьраб пешда тен. Öса жи щара дәрәщә йан жи мәрьвед дор бәре мә сәр мә хьраб һʹöкöм дьбьн. Ле бь аликʹарийа Йаһоwа, әм дькарьн бьбьнә мәрьвед öса, кö ль wи хwәш бен. Сәва әм ве нете биньн сери, әме шеwьр кьн чәнд хәйсәт-һʹöнöред мәрьве ну, дәрһәqа кʹижана Паwлос пе рʹебәрийа Хwәде ньвиси. (Бьхунә Колоси 3:10-14.) Әме öса жи шеwьр кьн кö чаwа әм дькарьн әwан һʹöнöра нав хwәда пешда биньн у жийина хwәда бьдьнә кʹьфше.

ҺУН «ҺʹӘМУ ЖИ ЙӘК ЬН»

3. Хәйсәтәки мәрьве ну кʹижан ә?

³ Паwлос дәрһәqа хәйсәтәки мәрьве ну гот, кʹижан кö гәләк фәрз ә. Мәрьве ну фьрqийе накә ортʹа мәрьва. Паwлос гот: «Иди Йунани у Щьһу, сьнәткьри у сьнәтнәкьри, Искит у һовед дьн, хöлам у азад тʹöнә».a Щьватеда тʹö щар гәрәке фьрqи тʹöнә бә ортʹа раса, мьләта йан жи кʹәсиба у дәwләтийа. Гәло чьрʹа? Чьмки әм ча шагьртед Мәсиһ «һʹәму жи йәк ьн» (Колс. 3:11, ИМ; Галт. 3:28).

4. а) Хьзмәткʹаред Йаһоwа гәрәке чаwа бьн һьндава һәвдöда? б) Кʹижан дәрәщә дькарьн хьраб һʹöкöм бьн сәр йәктийа нава Мәсиһийада?

⁴ Әwед кö мәрьве ну ль сәр хwә кьрьнә, тʹәви һʹәмуйа демәк тʹәви хушк-бьра у нәбаwәра бь qәдьр ьн, у тʹö щар фьрqийе накьнә ортʹа мьләта у раса, öса жи кʹәсиба у дәwләтийа (Рʹом. 2:11). Ле һьнә wәлатада әв йәк дькарә нәһеса бә. Мәсәлә, Африкайа Башуреда гәләк мәрьв, öса жи Шәʹдед Йаһоwа һʹәта иро щийе öсада дьминьн, кʹидәре кö тʹәне раса wан дьминә, демәк мәрьве бь чʹәрме сьпи башqә, ле йед бь чʹәрме рʹәш башqә. Ле сәва кö хушк-бьра жь wан дö раса һәвдö нас кьн у һәврʹа һәвалтийе бькьн, мәһа Щотмәһе сала 2013-да, Кʹома Рʹебәрийе qәбул кьр wәки щьвинәкә öса саз бә, бь сайа кʹижани жи хушк-бьра һе рʹьнд һәвдö нас бькьн (2 Корн. 6:13). Ле гәло әw чь щьвин бу?

5, 6. а) Wәлатәкида чь щьвин һатьбу сазкьрьне сәва кö әʹдьлайа нав щьмәʹта Хwәде qәwи бә? (Бьньһерʹә шькле әʹwльн.) б) Әw щьвин чьда керһати бу?

⁵ Әw щьвин һатә сазкьрьне, wәки чәнд рʹожед Шәми у Ләʹда хушк-бьред жь дö щьвата тʹәвайи wәʹдә дәрбаз кьн. Әw һәрдö щьват бь зьман у раса жь һәв щöдә дьбун. Әwана тʹәвайи дәрдькʹәтьн хьзмәтийе, дьчунә щьвате, у дьчунә малед һәв меван. Бь сәда щьвата бь wи щурʹәйи һәвкʹари дькьрьн. Филиале әʹламәтийед баш станд дәрһәqа ве щьвине, һәла һе жь нә Шәʹдед Йаһоwа жи. Мәсәлә, хьзмәткʹарәки дере гот: «Әз Шәʹде Йаһоwа ниньм, ле дькарьм бежьм кö хьзмәтийа wә гәләк бь организә йә, у нав wәда, демәк ортʹа щурʹә-щурʹә расада әʹдьлайи һәйә». Ле әв щьвин сәр хушк-бьра ча һʹöкöм бу?

⁶ Хушкәкә мә бь наве Нома, кö сәр зьмане Косайи хәбәр дьдә нәдәwләти дьжи. Пешийе wе хушкерʹа гәләк чәтьн бу, wәки хушк-бьред бь чʹәрме сьпи жь щьвата Инглизи, тʹәглифи мала хwә кә. Ле гава әw тʹәви wан хушк-бьра дәркʹәтә хьзмәтийе у чу мала wан меван, әwе ида хwә баш тʹәхмин дькьр у гот: «Әwана мәрьвед мина мә нә!» Ле чахе хушк-бьред жь щьвата Инглизи һатьн wәки хьзмәтийеда һәвкʹарийе бькьн тʹәви хушк-бьред жь щьвата сәр зьмане Косайи, һьнге Номайе хwарьн һазьр кьр у һьнә жь wан хушк-бьра тʹәглифи мала хwә кьр. Тʹәви wан мевана öса жи рʹуспики бь чʹәрме сьпи һат. Нома дьбежә: «Әз гәләк әʹщебмайи мам чахе мьн дит кö әw бьра öса мьлук бу, wәки сәр qöтʹийа пласмасә ньмьз рʹуньшт». Бь сайа ве щьвине, гәләк хушк-бьра һәвалед тʹәзә хwәрʹа qазанщ кьрьн у нет хwәрʹа данин һе зедә һәвала qазанщ кьн.

ДЬЛШӘWАТИ У QӘНЩИЙЕ ЛЬ ХWӘ КЬН

7. Чьрʹа лазьм ә дьлшәwат бьн?

⁷ Һʹәта кö дьнйа Шәйтʹан нәйе кʹöтакьрьне, әме рʹасти чәтьнайа бен, мәсәлә, бехәбати, нәхwәшийед гьран, пәйкʹәтьн, хәзәб, öндакьрьна һәбуке у тьштед дьн. Әм гәрәке дьлшәwат бьн һьндава һәвда, wәки wәʹде чәтьнайа али һәв бькьн. Чьмки дьлшәwати wе мә һелан кә кö мәрьварʹа qәнщийе бькьн (Әфәс. 4:32). Әw хәйсәт-һʹöнöр кö пʹара мәрьве ну нә, wе али мә бькьн, wәки чʹәʹв бьдьнә Хwәде у бәр дьле мәрьвада бен (2 Корн. 1:3, 4).

8. Чахе әм щьватеда дьлшәwатийе у qәнщийе дьдьн кʹьфше, әв йәк чь кʹәрәма тинә? Мәсәле биньн.

⁸ Әм ча дькарьн һе зедә qәнщийе бьдьнә кʹьфше һьндава мәрьвед хәриб у йед кʹәсиб? Әм гәрәке wанрʹа бьбьнә һәвал у öса бькьн wәки әwана бьвиньн кö щьватеда wана qимәт дькьн (1 Корн. 12:22, 25). Дина хwә бьдьне чь qәwьми тʹәви бьре мә Деникарл, кö жь Филипинайе дәрбази Жапонйайе бу. Жь бо ве йәке кö әw хәриб бу, ль щийе хәбате һьндава wида нәбаш бун. Паше, рʹожәке әw чу сәр щьвата Шәʹдед Йаһоwа. Деникарл дьбежә: «Һʹәчʹи зәʹф жь wан Жапони бун, ле йәкә wана мьн бь дьл qәбул кьрьн, те бежи мә зудава һәв нас дькьр». Хушк-бьра һьндава wида тʹьме qәнщ бун, у әве йәке wи һелан кьр кö әw незики Йаһоwа бә. Паше Деникарл һатә ньхöмандьне у иро әw щьватеда рʹуспи йә. Рʹуспийед дьн гәләк ша нә wәки әw тʹәви жьна хwә Щенифер щьвата wанда ньн. Әwана дәрһәqа wан öса дьбежьн: «Әwана, чаwа пешәнг бь әʹмьре һеса дьжин у мәсәләкә баш ьн ве йәкеда кö Пʹадшатийа Хwәде датиньн щийе пешьн» (Луqа 12:31).

9, 10. Мәсәла биньн кö ча дьлшәwати хьзмәтийеда кʹәрәма тинә.

⁹ Чахе әм дәрһәqа мьзгинийа Пʹадшатийе мәрьварʹа дьбежьн, әw йәк мәщале дьдә wәки әм «һʹәмуйарʹа qәнщийе бькьн» (Галт. 6:10). Гәләк Шәʹдед Йаһоwа дьлшәwат ьн һьндава мәрьвед хәриб, у ләма qәwате дьдьнә хәбате, wәки зьмане wан һин бьн (1 Корн. 9:23). У әw йәк кʹәрәмед мәзьн тинә. Мәсәлә, хушкәкә мә бь наве Тифани жь Австралйайе зьмане Сwаһили һин бу, сәва кö щьвата сәр wи зьманида шәһәре Брисбенеда аликʹарийе бьдә. Рʹаст ә бона Тифани нәһеса бу wи зьмани һин бә, ле әʹмьре wе дьһа бәхтәwар бу. Әw дьбежә: «Һәрге һун дьхwазьн кö хьзмәтийа wә һе һʹәwас бә, дәрбази щьватәкә зьмане дьн бьн. Әw мина ве йәке йә, ча те бежи рʹеwитийе дьки шәһәре хwәда. Һуне сәр хwә тʹәхмин кьн кö чь йә бьратийа мәйә һʹәмдьнйайе, ле йа пешийе, һуне йәктийа бьратийа мәйә мәзьн бьвиньн».

¹⁰ Wәрә шеwьр кьн мәсәла малбәтәкә жь Жапонйайе. Qиза wан Сакико гьли дькә: «Чахе мә мьзгини бәла дькьр, әм гәләк щар рʹасти емигрантед жь wәлате Бразиле дьһатьн. Гава мә рʹезед жь Кʹьтеба Пироз сәр зьмане wан дьхwәнд, мәсәлә рʹезед жь Әʹйанти 21:3, 4; Зәбур 37:10, 11, 29, wана рʹьнд гöһ дьдан у һәла һе щара һесьр жь чʹәʹвед wан дьһат». Әw малбәт дьлшәwат бу һьндава емигранта, ләма wана дьхwәст али wан мәрьва бькьн, wәки әwана рʹастийе пебьһʹәсьн. Сакико дьбежә: «Чахе мә дит кö әwана рʹöһʹанида бьрчи нә, мә гьшка жи малбәтеда дәстпекьр зьмане Португали һин бьн». Wәʹдә шунда, әwе малбәте аликʹари да, у щьвата сәр зьмане Португали саз бу. Бь сала әwе малбәте али гәләк емигранта кьрьн, кö дәрһәqа рʹастийе пеһʹәсийан у бунә Шәʹдед Йаһоwа. Сакико дьбежә: «Рʹаст ә гәләк wәʹдә у qәwат лазьм бу, wәки зьмане Португали һин бьн, ле әw йәк һежа бу. Әм гәләк рʹази нә жь Йаһоwа бона ве йәке». (Бьхунә Кʹаред Шандийа 10:34, 35.)

МЬЛУКТИЙЕ ЛЬ ХWӘ КЬН

11, 12. а) Бь чь нете әм гәрәке мәрьве ну ль хwә кьн? б) Чь wе али мә бькә wәки мьлук бьминьн?

¹¹ Хwәстьна мә кö мәрьве ну ль хwә кьн, гәрәке нә сәва wе йәке бә кö мәрьв пʹайа бьдьнә мә, ле гәрәке наве Йаһоwа һöрмәт-рʹумәт кьн. Бир нәкьн, кö һәла һе һорийе беqьсур жи гöнә кьр, чьмки бу йәки qöрʹә (Бәрамбәр кьн Һәзәqел 28:17). Әм мәрьвед гöнәкʹар ьн, ләма жи мәрʹа дьһа чәтьн ә wәки хwә жь qöрʹәбуне дур бьгьрьн. Ле йәкә әм диса жи дькарьн мьлуктийе ль хwә кьн. Чь дькарә али мә бькә ве йәкеда?

¹² Сәва кö мьлук бьминьн, әм гәрәке һәр рʹож wәʹдә хwәрʹа бьвиньн, wәки Кʹьтеба Пироз бьхуньн у сәр бьфькьрьн (Qан. Дщр. 17:18-20). Илаһи гәрәке бьфькьрьн сәр һинкьрьнед Иса у мәсәла мьлуктийа wи (Мәт. 20:28). Иса öса мьлук у шкәсти бу, кö һәла һе ньгед шагьртед хwә жи шушт (Йуһʹн. 13:12-17). Әм жи гәрәке Хwәдерʹа дöа бькьн, wәки рʹöһʹе хwәйи пироз бьдә мә, чьмки рʹöһʹе wийи пироз дькарә али мә бькә, wәки әм хwә сәр мәрьвед дьнрʹа нәгьрьн (Галт. 6:3, 4; Фили. 2:3).

13. Мьлукти чь кʹәрәма тинә?

¹³ Бьхунә Мәтʹәлок 22:4. Йаһоwа дьхwазә wәки һʹәму хьзмәткʹаред wи мьлук бьн. Бь рʹастийе мьлукти кʹәрәмед мәзьн тинә у öса жи әʹдьлайе у йәктийе дькә щьвате. Һәрге әм әwи һʹöнöри бал хwә пешда биньн, Хwәде wе qәнщийа хwәйә нәһежа бьдә мә. Пәтрусе шанди гот: «Һун һʹәму жи, ль бәр һәв шкәсти бьн, хöламтийе һәвдöрʹа бькьн, чьмки ньвисар ә: ‹Хwәде мьqабьли кʹöбар-бабаха йә, ле кʹәрәме дьдә шкәстийа›» (1 Пәт. 5:5).

БӘРБЬҺЕРИЙЕ У СӘБЬРЕ ЛЬ ХWӘ КЬН

14. Кʹе мәсәла лапә баш һишт, wәки бәрбьһерийе у сәбьре бьдьнә кʹьфше?

¹⁴ Wе дьнеда мәрьвед бәрбьһер у бь сәбьр, сьст һʹәсаб дькьн. Ле әw йәк рʹаст нинә. Әw һʹöнöред гәләк баш, жь Йаһоwа нә, демәк жь Кәсе лапи qәwат сәр тʹәмамийа дьнйайе. Йаһоwа мәсәләкә лапә баш ә кö ча бәрбьһерийе у сәбьре бьдьнә кʹьфше (2 Пәт. 3:9). Бьфькьрьн сәр wе йәке, кö Йаһоwа ча бь сайа мьлйакʹәтед хwә бь сәбьр щаба Бьраһим у Лут да чахе wана пьрс дьданә wи (Дәстп. 18:22-33; 19:18-21). Öса жи бьфькьрьн дәрһәqа сәбьра Йаһоwа һьндава щьмәʹта Исраел, кö 1 500 сал зедәтьр нәгöһдар бун (Һәзqл. 33:11).

15. Иса чь мәсәлә һишт ве йәкеда кö ча мьлуктийе у сәбьре бьдьнә кʹьфше?

¹⁵ Иса йәки «шкәсти» бу (Мәт. 11:29). Әw бь сәбьр бу һьндава шагьртед хwәда гава wана шаши бәрдьдан. Wәʹде хьзмәтийа Исайә сәр әʹрде, сәрwеред динед qәлп, гәләк щар һьмбәри wи нәрʹасти дькьрьн. Ле йәкә әw һʹәта мьрьне мьлук у бь сәбьр бу. Чахе Иса сәр стуна щәфе бу, әwи Баве хwәрʹа дöа кьр, wәки бьбахшинә wан мәрьва, кʹижана әw дьданә щәфе. Әwи гот кö, әwана «ньзаньн чь дькьн» (Луqа 23:34). Бь рʹасти жи Иса мәсәләкә гәләк баш һишт, кö ча мьлукти у сәбьре хwәй кьн wәʹде чәтьнайед гьран! (Бьхунә 1 Пәтрус 2:21-23.)

16. Әм ча дькарьн мьлуктийе у сәбьре бьдьнә кʹьфше?

¹⁶ Ле әм чаwа дькарьн мьлуктийе у сәбьре бьдьнә кʹьфше? Паwлос ньвиси: «Ль һәв сәбьр кьн у ль һәв бьбахшиньн, һәгәр газьне йәки ль һьндава йәкида һәбә. Чаwа Хöдан бахшандә wә, һун жи öса бьбахшиньнә һәв» (Колс. 3:13). Бь рʹасти жи, сәва кö әве тʹәмийе биньн сери, әм гәрәке мьлук у бь сәбьр бьн. У һәрге әм һазьр бьн мәрьва бьбахшиньн, әʹдьлайа щьвате wе бе хwәйкьрьне.

17. Чьрʹа гәләк фәрз ә wәки мьлук у бь сәбьр бьн?

¹⁷ Әw йәк нә кö сәр хwәстьна мәйә кö мьлук у бь сәбьр бьн, ле Йаһоwа жь мә дәʹwа дькә. Һәрге әм дьхwазьн бенә хьлазкьрьне, әw һʹöнöр әʹсә лазьм ьн (Мәт. 5:5; Аqуб 1:21). Ле йа лапә фәрз әw ә, кö бь wан һʹöнöра әм Йаһоwа һöрмәт дькьн у мәрьва жи һелан дькьн wәки әwан жи öса бькьн (Галт. 6:1; 2 Тимтʹ. 2:24, 25).

ҺʹЬЗКЬРЬНЕ ЛЬ ХWӘ КЬН

18. Һʹьзкьрьн у нәдöрʹути ча һәвва гьредайи нә?

¹⁸ Әw һʹәму һʹöнöред кö мә шеwьр кьр, һʹьзкьрьнева гьредайи нә. Мәсәлә, Аqубе шагьрт ширәт да бьред хwә, wәки әw дöрʹу нибьн у фьрqийе нәкьнә ортʹа дәwләтийа у кʹәсиба. Әwи шьровәкьр кö кьред öса мьqабьли qануна Хwәде йә, кʹижанеда те готьне: «Һәвале хwә wәкә хwә һʹьз бькә». Аqуб öса жи гот: «Һәгәр һун фьрqийе дькьн, гöна дькьн» (Аqуб 2:8, 9). Мәсәлә, һʹьзкьрьн wе мә һелан кә, wәки әм дöрʹу нибьн у фьрqийе нәкьнә ортʹа мәрьва жь бо хwәндьна wан, раса wан, йан жи һәбука wан. Әм гәрәке нә кö тʹәне бь гьлийа фьрqийе нәкьнә ортʹа мәрьва, ле әw йәк гәрәке дьле мә у һʹьш-аqьле мәда бә жи.

19. Чьрʹа фәрз ә wәки әм һʹьзкьрьне ль хwә кьн?

¹⁹ Һʹьзкьрьн öса жи «думькдьреж у ширьн ә» у «пʹьшька хwәда наwәрьмә» (1 Корн. 13:4). Сәва кö мьзгинийа Пʹадшатийе бәла кьн, әм гәрәке бәрдәwам кьн бь сәбьр, qәнщ у мьлук бьн (Мәт. 28:19). Әw һʹöнöр öса жи али мә дькьн, wәки тʹәви һʹәму хушк-бьред щьватеда әʹдьлайе хwәй кьн. Һәрге әм һʹьзкьрьна öса бьдьн кʹьфше, әw йәк wе чь кʹәрәма бинә? Һьнге щьвата мәда wе әʹдьлайи һәбә, у әw йәк wе Йаһоwа рʹумәт кә. У öса жи чахе мәрьв бьвиньн кö әʹдьлайи нав мәда һәйә, әwана wе дьһа һелан бьн кö рʹастийе пебьһʹәсьн. Демәк, Кʹьтеба Пирозда дәрһәqа мәрьве ну öса те готьне: «Сәр ван һʹәмуйада һʹьзкьрьне ль хwә кьн, йа кö ван һʹәмуйа бь йәктийа тʹам һәвва гьредьдә» (Колс. 3:14).

БӘРДӘWАМ КЬН «НУЙӘЖИЙИН БЬН»

20. а) Әм кʹижан пьрса гәрәке бьдьнә хwә? б) Әм һивийа кʹижан wәʹдәйи нә?

²⁰ Һәр кәс жь мә гәрәке пьрсе бьдә хwә: «Диса кʹижан гöһастьна әз дькарьм бькьм сәва кö мәрьве кәвьн сәр хwә бехьм?» Әм гәрәке бь дьл Хwәдерʹа дöа бькьн wәки али мә бькә. Әм öса жи гәрәке сәр хwә бьхәбьтьн wәки фькьр у кьред хwәйи нәрʹаст бьгöһезьн, сәва Пʹадшатийа Хwәде wар бьн (Галт. 5:19-21). Wе керһати бә öса жи пьрсәкә öса бьдьнә хwә: «Гәло әз бәрдәwам дькьм фькьред хwә рʹаст кьм, wәки дьле Хwәде ша кьм?» (Әфәс. 4:23, 24). Әм һʹәмушк жи гöнәкʹар ьн, ләма әм гәрәке тʹьме рʹьнд сәр хwә бьхәбьтьн сәва кö мәрьве ну ль хwә кьн. Бьдьнә бәр чʹәʹве хwә, кö әʹмьр wе чьqас баш бә чахе һʹәмушк жи мәрьве ну ль хwә кьн, у бь тʹәмами чʹәʹв бьдьнә һʹöнöред Йаһоwайи qимәт!