Һәвкʹарийа Тʹәви Мәрьвед Рʹöһʹани бона Мьн Кʹәрәм бу

WӘКӘ сала 1935-да, де-баве мьн Щеймс у Щеси Синклер жь Скотләндайе дәрбази шәһәре Бронксе бьбун, (Нийу Йорк). Йәк жь насе wани тʹәзә Wили Снедон бу, у әw жи жь Скотләндайе бу. Чахе әwана тʹәви һәв бьбунә нас, һьнге дәрһәqа малбәтед хwә гьли кьрьбун. Әw йәк чәнд сал пешийа буйина мьн бу.

Дийа мьн Wилирʹа гьли кьрьбу wәки пешийа кö Шәрʹе Һʹәмдьнйайе дәстпебуйа, баве wе у бьре wейи мәзьн мьрьбун, чьмки Бәʹра Бакʹуреда qәйька wана тʹәqандьбун у әwана хәньqибун. Һьнге Wили дьбежә wе: «Баве тә щәʹньмеда йә!».a Дийа мьн зәндәгьрти дьминә. Wили Шәʹде Йаһоwа бу, у öса дийа мьн рʹастийе жь wи педьһʹәсә.

Гьлийед Wили дьле дийа мьн дешиньн, чьмки баве wе мәрьвәки һʹәйф буйә. Ле паше Wили жерʹа дьбежә: «Ле wе дьле тә рʹьһʹәт бә һәрге әз тәрʹа бежьм кö Иса чу щәʹньме?» Һьнге дькʹәвә бира дийа мьн кö дереда һин дькьрьн wәки Иса чу щәʹньме у рʹожа сьсийа сах бу. Дийа мьн хwәрʹа фькьрибу: «Һәрге щәʹньм әw щи йә кʹидәре кö мәрьвед хьраб нава агьрда дьчәрчьрьн, ле чьрʹа Иса чу wедәре?». Паши ве йәке дийа мьн хwәстьбу һе зедә дәрһәqа рʹастийе пебьһʹәсә. Әw дәстпедькә һәрʹә щьвата Бронксе у сала 1940-да те ньхöмандьне.

Wи wәʹдәйи, де-бавед кö Мәсиһи бун, нәдьһатьнә һеланкьрьне кö тʹәви зарʹед хwә һинбуна Кʹьтеба Пироз дәрбаз бьн. Чахе әз бьчʹук бум, дийа мьн шәʹми у ләʹде дьчу щьвата у хьзмәт дькьр, ле һʹәта әw бьһата, баве мьн мьqати мьн дьбу. Паши чәнд сала мә тʹәви дийа мьн дәстпекьр бенә сәр щьвате. Әw хьзмәтийеда гәләк хирәт бу, у тʹәви чәнд мәрьва һинбуна Кʹьтеба Пироз дәрбаз дькьр. Щара öса дьбу кö әwе тʹәви чәнд мәрьва тʹәвайи һинбуна Кʹьтеба Пироз дәрбаз дькьр, чьмки әwана незики һәв дьман. Wәʹде һесабуне йа мәкʹтәбе әз тʹәви wе дьчумә хьзмәтийе. Öса әз һе зедә тьшт жь Кʹьтеба Пироз пеһʹәсийам у öса жи һин бум кö чаwа мәрьва һин кьм.

Сәд һʹәйф чахе әз бьчʹук бум, мьн рʹасти бь тʹәмами qимәт нәдькьр. Ле чахе әз ида бум wәкә 12 сали, әз бумә хьзмәткʹаре нәньхöманди у мьн тʹьме хьзмәт дькьр. Чахе әз 16 сали бум, мьн хwә тʹәсмили Йаһоwа кьр, у 24 Тирмәһе сала 1954-да һатьмә ньхöмандьне сәр щьвата мәзьн Торонтойеда (Канада).

ХЬЗМӘТКЬРЬН БӘЙТʹӘЛЕДА

Һьнә бьред жь щьвата мә Бәйтʹәледа хьзмәт дькьрьн. Әwана гәләк qәwи сәр мьн һʹöкöм дьбун. Әз әʹщебмайи дьмам кö әwана ча wәʹде хьзмәтийе у чахе готар дьхwәндьн, рʹастийа Кʹьтеба Пироз шьровәдькьрьн. Дәрсдаред мәкʹтәба мьн гәләк дьхwәстьн wәки әз хwәндьна бьльнд бьстиньм, ле мьн гәләк дьхwәст Бәйтʹәледа хьзмәт кьм. Ләма жи сәр wе щьвата мәзьн Торонтойеда мьн бланка Бәйтʹәле тʹьжә кьр. Сала 1955 мьн сәр щьвата мәзьн кö сәр стадийона Йанки бу (Нийу Йорк), щара дöда әв бланк тʹьжә кьр. Ве сале, 19 Илоне мьн тʹәглифи Бәйтʹәла Бруклине кьрьн, һьнге әз 17 сали бум. Рʹожа дöда Бәйтʹәледа мьн дәстпекьр бьхәбьтьм сәр мәкʹина кö бәлге кʹьтеба тʹоп дькьр у пʹар-пʹар һазьр дькьр, сәва кö мәкʹина дьн һәвва бьдьру у бькә кʹьтеб.

Паши wәкә мәһәке, мьн шандьнә Идара Журнала, чьмки мьн нәшьркьрьн заньбу. Һьнге хушк-бьра сәр һʹәсьнед бьчʹук у пәʹн, нав у адреса wан мәрьва нәшьр дькьрьн, йед кö сьфарәш дькьрьн «Бьрща Qәрәwьлийе» у «Һьшйар бьн!». Әв адрес бь ван һʹәсьна сәр журнала дьһатьнә моркьрьне. Чәнд мәһ шунда, мьн Идара Шандьна Әʹдәбйәтада хьзмәт дькьр. Клаус Щенсен кö сәркʹаре ве идаре бу, мьнрʹа гот кö әз гәрәке тʹәви ажован һәвкʹарийе бькьм, йе кö qöтʹийед әʹдәбйәта пе әʹрәба баркʹеш дьбьрә щийе сәкьнандьна гәмийа, сәва паше нав тʹәмамийа дьнйайе бенә шандьне. Öса жи һәбун тʹорбед бь журнала тʹьжә кö гәрәке бьвьрана пʹоштәйе (нәʹмәкханә), сәва кö нав тʹәмамийа Амәрикайе щьватарʹа бьһатана шандьне. Щенсен бьра гот кö әв хәбата физики wе бона сьһʹәт-qәwата мьн баш бә. Һьнге гьранийа мьн wәкә 57 кило бу у әз öса жар бум ча чʹәрм һәсту. Әз гәләк рʹе дьчум-дьһатьм щийед сәкьнандьна гәмийа у пʹошта, у рʹасти жи сьһʹәт-qәwата мьн qәwи бу. Щенсен бьра рʹасти жи заньбу бона мьн чь һе баш ә!

Идара Журнала щабдар бу сәва бьньвисә кö кʹижан щьват чьqас журнал дьхwазә. Wи щурʹәйи әз пеһʹәсийам кö Бруклин сәр кʹижан зьмана журналед мә нәшьр дькә у wәлатед дьнрʹа дьшинә. Мьн qә нә жи бьһистьбу дәрһәqа гәләк зьмана, ле әз гәләк ша дьбум кö бь дәһа һʹәзара журналед мә дьһатьнә шандьне ль гәләк wәлатед дур. Һьнге мьн ньзаньбу кö әзе ахьрийеда qәдьрәки öса бьстиньм, wәки тʹәсәлийа гәләк жь wан wәлата бькьм.

Сала 1961-да, әз һатьм кʹьфшкьрьне Офиса Һʹәсабе Пʹәрада, кʹидәре кö Грант Суитер сәркʹарти дькьр. Паши чәнд сала, гази мьн кьрьн ль офиса Нейтан Нор, кʹижани кö һьнге рʹебәрийа шьхöле мәйи һʹәмдьнйайе дькьр. Әwи шьровәкьр кö бьрак, кʹижан офиса wида дьхәбьти, гәрәке һәрʹә Мәкʹтәба Хьзмәтийе у паше хьзмәт кә Идара Хьзмәтийеда. Мьн дәwса wи бьрайи кʹьфш кьрьн у әз тʹәви Дон Адамс бьра дьхәбьтим. Öса һʹәwас бу кö Дон һәма әw бьра бу, кʹижан кö сала 1955 сәр щьвата мәзьн, бланка мьнә Бәйтʹәле qәбул кьр. Дö бьра Роберт Wолен у Чарлз Молоһан ида wе идареда дьхәбьтин. Мә һәрчар бьра тʹәвайи 50 сала зедәтьр хьзмәт кьр. Әз бәхтәwар бум кö мьн тʹәви wан бьред рʹöһʹанида qәwи у амьн, хьзмәт дькьр! (Зәб. 133:1).

Дәстпека сала 1970, мьн щабдари станд, wәки һәр сал йан дö сала щарәке, чәнд һʹәфтийа тʹәсәлийа щурʹә-щурʹә филиала бькьм. Шьхöле мьн әw бу кö әндәмед Бәйтʹәла у мисйонерʹа рʹöһʹанида qәwи кьм, у öса жи һʹәсаб у документед филиала бьщерʹьбиньм. Әз гәләк ша дьбум wан хушк-бьра бьвиньм, йед кö Мәкʹтәба Гиләд хьлаз кьрьбун у диса жи бь амьни хьзмәт дькьрьн wәлатед хәрибда кʹидәре кö әwана һатьбун кʹьфшкьрьне. Әw шабун у qәдьрәки мәзьн ә бона мьн, кö бь сайа ве кʹьфшкьрьне мьн 90 wәлатада зедәтьр тʹәсәлийа хушк-бьра кьр.

МЬН ҺӘВАЛӘКӘ АМЬН ХWӘРʹА ДИТ

Һʹәму әндәмед Бәйтʹәла Бруклине кʹьфшкьри бун щьватед Нийу Йоркеда. Әз һатьмә кʹьфшкьрьне щьвата Бронкседа. Щьвата пешийе wи шәһәре бьчʹукда, зу мәзьн бу у паше пʹарәвәбу. Наве ве щьвата пешийе, Щьвата Бронксейә Жорьн бу, у әз дьчумә ве щьвате.

Wәкә сала 1965-да, малбәтәкә Латвйайи кö Бронкса башуреда бунә Шәʹдед Йаһоwа, дәрбази wе щьвате бун. Ливйа, кö ве малбәтеда qиза мәзьн бу, гава кö мәкʹтәб хьлаз кьр пешәнгти дәстпекьр. Чәнд мәһ шунда, әw дәрбази Мәсашусәтсе бу, кʹидәре кö һʹәwщәтийа мьзгинвана һәбу. Мьн жерʹа дьньвиси дәнг-бәʹсед щьвата мә, у әwе жи мьнрʹа дьньвиси кö алийе Бостоне хьзмәтийа wе ча нә.

Чәнд сал шунда, Ливйа һатә кʹьфшкьрьне ча пешәнга мәхсус. Әwе гәләк дьхwәст хьзмәтийеда һе зәʹф бькә, ләма әwе бланка Бәйтʹәле тʹьжә кьр у сала 1971-да әw тʹәглифи Бәйтʹәле кьрьн. Те бежи әw жь Йаһоwа нишан бу бона мьн! Сала 1973-да 27 Щотмәһе, мә һәв станд у мә qәдьрәки мәзьн станд кö Нор бьра готар бона зәwаща мә хwәнд. Мәтʹәлок 18:22-да те готьне: «Кʹи жьне дьбинә, хер у хьзне дьбинә у жь Хöдан рʹәʹм-кʹәрәме дьстинә». Әз тʹәви Ливйайе ида 40 сала зедәтьр ә Бәйтʹәледа хьзмәт дькьм, у әм Бронкседа диса аликʹарийе дьдьнә щьвата wе мьһале.

ҺӘВКʹАРИ ТʹӘВИ БЬРЕД БЬЖАРТИ

Һәвкʹари тʹәви Нор бьра рʹасти жи wәʹдәки хwәш бу. Әw гәләк хәбатһʹьз бу, у мисйонеред нав тʹәмамийа дьнйайе гәләк qимәт дькьр. Гәләк жь wан мисйонера һатьбунә кʹьфшкьрьне wан wәлатада, кʹидәре кö Шәʹдед Йаһоwа тʹöнә бун. Сәд һʹәйф кö сала 1976-да Нор бьра жь нәхwәшийа рʹәqе дьчәрчьри. Щарәке чахе әw нав щи-ньвинада бу, әwи мьнрʹа гот кö жерʹа һьнә готара бьхуньм, кʹижан кö гәрәке бьһатана нәшьркьрьне. Әwи öса жи гот wәки гази Фредерик Франс бькьм сәва әw жи бе у хwәндьне бьбьһе. Паше әз пеһʹәсийам wәки Нор бьра тʹьме Фредерик Франсрʹа әw готар дьхwәндьн, чьмки Фредерик бьра чʹәʹвада бәләнгаз бу.

Нор бьра сала 1977 мьр. Хушк-бьред кö wи нас дькьрьн у һʹьз дькьрьн дьле wан дешийа, ле әwана дьлгәрм дьбун, чьмки әw амьн ма wәʹде жийина хwәйә сәр әʹрде (Әʹйан. 2:10). Паши wи, Франс бьра дәстпекьр рʹебәрийа шьхöле мәйи һʹәмдьнйайе бькә.

Һьнге әз аликʹарчийе Милтон Һеншел бум, кʹижан кö бь дәһа сала тʹәви Нор бьра хәбьти бу. Һеншел бьра мьнрʹа гот кö щабдарийа мьнә сәрәкә Бәйтʹәледа әw ә, wәки аликʹарийе бьдьмә Франс бьра чьда кö лазьм ә. Мьн тʹьме жерʹа готар дьхwәндьн кʹижан кö гәрәке бьһатана нәшьркьрьне. Франс бьра һәр тьшт бира хwәда хwәй дькьр у тʹьме гәләк кʹур гöһе хwә дьда сәр хwәндьне. Әw wәʹдәки гәләк баш бу бона мьн, кö мьн али wи дькьр һʹәта жийина wийә сәр әʹрде. Әw сала 1992 мәһа Кануна Пешьнда мьр.

Әз ида Бәйтʹәледа 61 сал ә хьзмәт дькьм, ле әw wәʹдә бона мьн гәләк зу дәрбаз бу. Де-баве мьн һʹәта мьрьне Йаһоwарʹа амьн ман, у әз бь дьл у щан һивийа wи wәʹдәйи мә чахе диса wана бьвиньм (Йуһʹн. 5:28, 29). Әв дьнйа нькарә мәрʹа тьштәки öса бьдә, wәки qимәттьр бә жь wи qәдьри кö хьзмәт кьн тʹәви хушк-бьред амьн. Әw хушк-бьра бона щьмәʹта Хwәде нав тʹәмамийа дьнйайе qәwата хwә хәрщ дькьн. Бь рʹасти бежьм нава wан салед хьзмәтийа һәртʹьмда шабуна Йаһоwа qәwата мьн у Ливйа бу (Нәһәм. 8:10).

Тʹәшкиләта Йаһоwада мәрьвәки öса тʹöнә йә, кö бей wи шьхöле бәлакьрьна мьзгинийа Пʹадшатийе пешда нәчә. Нава wан салада бона мьн qәдьрәки мәзьн бу кö тʹәви хушк-бьред qәwи у амьн һәвкʹарийе бькьм. Гәләк йед бьжарти тʹәви кʹе жи мьн һәвкʹари дькьр, ньһа ида сәр әʹрде ниньн. Ле әз гәләк рʹази мә кö мьн тʹәви wан мәрьвед рʹöһʹанида qәwи у Хwәдерʹа амьн, хьзмәт кьрийә.