Усьве Аримәтйайи Мерхас Дьбә

УСЬВЕ АРИМӘТЙАЙИ дьбәкә хwәха жь хwә әʹщебмайи ма, кö әw ча бь мерхаси незики сәрwере Рʹоме бу. Пилато Понтийо әʹйан бу ча мәрьвәки кö сәр йа хwә сәкьни. Ле сәва кö Иса бь qәдьр у лайиqи бьһата дәфьнкьрьне, кәсәки гәрәке щьнйазе wи жь Пилато бьхwәста. У дьбәкә Усьв нә жи дьфькьри кö Пилато wе һеса qайил бә хwәстьна wи бинә сери. Ле гава Пилато жь әскәр пеһʹәсийа кö Иса мьр, әwи изьн да Усьв кö щьнйаз һьлдә. Паши ве йәке Усьв дьлшькәсти ләзә-ләз вәгәрʹийа бәр щийе кö Иса мьр (Марq. 15:42-45).

• Ле гәло кʹе бу Усьве Аримәтйайи?

• Кʹе бу әw бона Иса?

• У сәрһатийа wи чь кʹар ә бона wә?

ӘНДӘМЕ ЩЬВИНА ГЬРӘГЬРА

Кʹьтеба Марqосда сәр Усьв те готьне кö әw «йәки хwәйиqәдьр у әндәме щьвина гьрәгьра бу». Һьнге щьвина гьрәгьра диwана Щьһуйайә һәри бьльнд бу у һʹöкöме ве щьвине сәр сәрwертийе, щьмәʹте у религийа һәбу (Марq. 15:1, 43). Усьв әндәме ве щьвине бу, у ләма әwи дькарьбу һәрʹә щәм сәрwере Рʹоме. У öса жи әʹщебмайи нинә кö Усьв мәрьвәки дәwләти бу (Мәт. 27:57).

Щьвина гьрәгьра ча кʹом мьqабьли Иса бу. У әндәмед ве щьвине тʹәвайи шеwьр кьрьн, wәки Иса бьдьнә кöштьне. Ле Кʹьтеба Пироз Усьв нав дькә ча «мәрьвәки qәнщи ширһʹәлал» (Луqа 23:50). Бәле, әw мина гәләка жь ве щьвине нибу. Әw мәрьвәки дьлтʹәмьз, нав-намус бу у чьqас дькарьбу тʹәмийед Хwәде дьани сери. Әw öса жи «һивийа Пʹадшатийа Хwәде бу», у әв йәк дьдә кʹьфше кö чьрʹа әw бу шагьрте Иса (Марq. 15:43; Мәт. 27:57). Жерʹа рʹасти у һәqи гәләк фәрз бу, у дьбәкә ләма әwи һинкьрьнед Иса qәбул кьр.

ШАГЬРТЕ ИСА КÖ ХWӘ ӘʹЙАН НӘДЬКЬР

Йуһʹәнна 19:38-да те готьне кö Усьв «шагьрте Иса бу, ле жь тьрса щьһуйа хwә әʹйан нәдькьр». Ле гәло Усьв жь чь дьтьрсийа? Әwи заньбу кö Щьһу Исарʹа дьжмьнатийе дькʹьшиньн, у кö әwана wе һәр кәси йе кö баwәрийа хwә Иса бинә жь кʹьниште дәрхьн (Йуһʹн. 7:45-49; 9:22). У әwе кö жь кʹьниште бьһата дәрхьстьне, бәр чʹәʹве Щьһуйа wе рʹәш буйа, у wе бәри wи дана жь хwә дурхьстана. Ләма Усьв дьтьрсийа әʹйан бежә кö әw баwәрийа хwә Иса тинә. Һәрге әwи öса бькьра, наве wи бькʹәта у wе щийе хwә жи öнда кьра.

Ле Усьв тʹәне нибу кö öса дьтьрсийа. Йуһʹәнна 12:42-да те готьне: «Сәрwера гәләка баwәрийа хwә ль wи [Иса] анин. Ле жь тьрса ферьсийа, ль хwә мöкöрʹ нәдьһатьн, кö жь кʹьниште нәйенә дәрхьстьне». Диса әндәмәки щьвина гьрәгьра жи, жь бо тьрсе нькарьбу бьгота wәки әw Иса нас дькә. Наве wи мәрьви Никодемо бу (Йуһʹн. 3:1-10; 7:50-52).

Усьв шагьрте Иса бу, ле йәкә нькарьбу дәрһәqа ве йәке әʹйан бежә. Әв йәк нәрʹаст бу, ль гора wан гьлийед Иса: «Кʹи кö мьн бәр мәрьва иqрар кә, әзе жи wи бәр Баве хwәйи әʹзмана иqрар кьм. Ле кʹи кö мьн бәр мәрьва инкʹар кә, әзе жи wи бәр Баве хwәйи әʹзмана инкʹар кьм» (Мәт. 10:32, 33). Бәле, Усьв әʹйан нәдьгот кö Иса нас накә, ле әwи öса жи нәwерьбу бьгота кö әw Иса qәбул дькә.

Кʹьтеба Пироз дьбежә кö чахе щьвина гьрәгьра шеwьра хwә мьqабьли Иса дькьрьн, Усьв пьштгьрийа шеwьра wан нәкьрьбу (Луqа 23:51). Öса жи, чаwа һьнәк дьбежьн, дьqәwьмә чахе диwана Иса дькьрьн, Усьв wедәре нибу. Чь жи һәбә, әw нәһәqийа бехwәдети бәр чʹәʹве Усьв рʹәш бу, ле сәд һʹәйф әwи нькарьбу әв нәһәqи бьдә сәкьнандьне!

ТЬРСЕ ДЬТӘМЬРИНӘ

Чахе Иса мьр, ча те кʹьфше Усьв тьрса хwә тәмьранд у сафи кьр кö пьштгьрийа шагьртед Иса бькә. Әw йәк те кʹьфше жь Марqос 15:43, кʹидәреда те готьне: «Wи тöрöш кьр, чу щәм Пилато, щьнйазе Иса же хwәст».

Те кʹьфше кö чахе Иса мьр Усьв wедәре бу, чьмки әwи пешийа Пилато заньбу кö Иса мьрийә. Кʹьтеба Пироз дьбежә кö чахе Усьв жь wи щьнйаз хwәст, әw «әʹщебмайи ма» гава «бьһист кö Иса иди мьрийә» (Марq. 15:44). Һәрге Усьв хwәха пе чʹәʹве хwә мьрьна Иса сәр стуна щәфе дит, һьлбәт әwе йәке wе сәр исафа wи һʹöкöм кьра у ахьрийеда фәʹм кьра wәки гәрәке әʹйан кә кö әw алийе рʹастийе дьгьрә. Дьбәкә öса жи бу, чьмки ида тьрса wи тʹöнә бу у әwи нәдьхwәст вәшарта кö шагьрте Иса йә.

УСЬВ ИСА ДӘФЬН ДЬКӘ

Qануна Щьһуйа дәʹwа дькьр wәки мәрьвед кʹижан кö бь мьрьне һатьнә щәзакьрьне, пешийа кö рʹож бьчуйа ава гәрәке бьһатана дәфьнкьрьне (Qан. Дщр. 21:22, 23). Ве йәкеда хәма Рʹомайа нибу, чьмки wана щьнйазед qачаха йан сәр стуне дьһиштьн, йан жи дьавитьнә чʹәле. Ле Усьв нәһишт кö щьнйазе Иса жи öса бькьн. Незики щийе кö Иса мьр, тʹьрбәкә тʹәзә һәбу qәйеда кʹолайи, хwәйе кʹижане Усьв бу. Әw йәк кö ве тʹьрбеда тʹö щар кәсәк нәһатьбу данине, дьдә кʹьфше wәки Усьв тʹәзә жь Аримәтйайеa дәрбази Оршәлиме бьбу у әwи хwәстьбу әw тʹьрб щийе дәфьнкьрьна wи у малбәта wи бә (Луqа 23:53; Йуһʹн. 19:41). Әw йәк кö Усьв тʹьрба хwәда Иса дәфьн кьр, әʹйан дькә кö әw чьqас мәрʹд у һʹәйф бу. Бь ве йәке öса жи пʹехәмбәртийа дәрһәqа Мәсиһ һатә сери, кö әw wе тʹәви йе «дәwләмәнд» бе дәфьнкьрьне (Иша. 53:5, 8, 9).

Һәр чар кʹьтебед пешьнә Мьзгинийе дьбежьн, кö чахе щьнйазе Иса жь стуне дахьстьн, Усьв щьнйаз һьлда, qәдәке кʹьтанийи паqьжда кʹәфән кьр у дани нав тʹьрба хwәйә ну (Мәт. 27:59-61; Марq. 15:46, 47; Луqа 23:53, 55; Йуһʹн. 19:38-40). Тʹәне дәрһәqа мәрьвәки те готьне кö аликʹари дайә Усьв, әw Никодемо бу, йе кö анәгори әʹдәте дәфьнкьрьне бьһарәт ани. Әw һәрдö мер навдар бун, ләма жи дьбәкә wана щьнйаз wе хwәха нәбьрана. Дьqәwьмә wана бәрдәстийед хwәрʹа готьн кö щьнйаз һьлдьн у дәфьн кьн. Һәрге жи әw йәк öса бу, йәкә әw шьхöләкә бьчʹук нибу. Һәр кәсе кö дәсте хwә бьда щьнйаз, wе һʹәфт рʹожа нә паqьж бьһата һʹәсабе, у wана дәсте хwә бьдана чь жи, wе нә паqьж буйа (Жьмар 19:11; Һаг. 2:13). Хенщи ве йәке, ве һʹәфтийе Щәжьна Дәрбазбуне бу, у wана wе нькарьбуна щәжьн дәрбаз кьрана у гәрәке нә жи незики мәрьва буна (Жьмар 9:6). Һьн жи Усьв заньбу кö сәва дәфьнкьрьна Иса, әw wе алийе әндәмед гьрәгьрада бьбә пекʹәни. Бәле, Усьв әw йәк заньбу, ле йәкә һазьр бу һәр тьшти тәйах кә сәва дәфьнкьрьна Иса лайиqи бә, у wәки хwә әʹйан кә кö әw шагьрте Иса йә.

КʹÖТАСИЙА СӘРҺАТИЙА УСЬВ

Хенщи дәфьнкьрьна Иса кö һәр чар кʹьтебед пешьнә Мьзгинийеда те гьликьрьне, дәрһәqа Усьве Аримәтйайи Кʹьтеба Пирозда тьштәк найе готьне. Гәло һʹале wи ча бу? Әм тьштәки ньзаньн дәрһәqа ве йәке. Ле чь кö мә шеwьр кьр, жь ве йәке те кʹьфше, кö әwи дьбәкә хwә әʹйан кьр ча Мәсиһи. Чахе әw кʹәтә щерʹьбандьне у чәтьнайе, баwәрийа wи у мерхасийа wи һе зедә бу, нә кö кем бу. Әw нишанәкә баш бу.

Сәрһатийа wи пьрсәкә öса пешда тинә, кö wе баш бә һәр кәс жь мә сәр ве пьрсе бьфькьрә: Гәло һәйә тьштәки öса, бәʹса хәбәре, навәки баш, һәбук, һʹьзкьрьн һьндава нәфәра йан жи азайа мә, кö жь һәләqәтийа мә тʹәви Йаһоwа һе фәрзтьр ә?