Бь Дьл у Щан Бьстьрен!

1. Чахе әм кʹьлама дьстьрен әw ча сәр мә һʹöкöм дькә?

МӘРЬВӘКИ навдар кö кʹьлама дьньвисә, гот: «Бь сайа хәбәра, һʹьше мәда фькьр пешда тен. Бь сайа мьqаме, дьле мәда һәст пешда тен. Ле бь сайа кʹьламе, һәрдö тʹәвайи пешда тен у хәбәр дьгьһижьнә дьла». Пе кʹьлама әм пәсьна дьдьнә Йаһоwа у һʹьзкьрьна хwә жерʹа әʹйан дькьн. Рʹасти жи чьqас хwәш ә гава әм бона wи дьстьрен у һе незики wи дьбьн! Фьрqи тʹöнә әм тʹәне дьстьрен йан тʹәви хушк-бьред хwә, йәкә тʹьме кʹьлам хьзмәткьрьна Хwәдеда щийе фәрз дьгьрә.

2, 3. а) Һьнәк чьрʹа нькарьн бь дәнге бьльнд щьватеда бьстьрен? б) Ве готареда әме кʹижан пьрса шеwьр кьн?

² Ле һун щьватеда бь дәнге бьльнд дьстьрен, йан шәрм дькьн? Нав һьнә мьләтада мер шәрм дькьн бәр мәрьвед дьн бьстьрен. Әw йәк дькарә сәр тʹәмамийа щьвате жи һʹöкöм кә, илаһи һәрге рʹуспи шәрм дькьн бьстьрен, йан жи чахе щьват кʹьлама дьстьре, ле әwана шьхöлед дьн дькьн (Зәб. 30:12).

³ Һәрге әм бь рʹастийе стьрандьна кʹьлама һʹәсаб дькьн ча пʹара хьзмәтийа хwә, щьватеда wәʹде кʹьлама әме нәчьн-нәйен. Ләма һәр кәс жь мә гәрәке пьрсәкә öса бьдә хwә: «Гәло wәʹде щьвате стьрандьна кʹьлама бона мьн фәрз ә? Әз ча дькарьм чәтьнайа алт кьм wәки аза у бь дәнге бьльнд щьватеда бьстьрем? У ча әз дькарьм кʹьлама бь дьл бьстьрем?»

СТЬРАНДЬН ҺʹӘБАНДЬНА РʹАСТДА ЩИЙЕ ФӘРЗ ДЬГЬРӘ

4, 5. Бона Исраелийа һʹәбандьнеда стьрандьн чь щи дьгьрт?

⁴ Бәреда хьзмәткʹаред Йаһоwа пе кʹьлама пәсьн у шькьри дьданә Йаһоwа. Дина хwә бьдьне, кö чахе Исраели бь амьни Йаһоwарʹа хьзмәт дькьрьн, стьрандьн һʹәбандьна wанда щийе фәрз дьгьрт. Бәʹса хәбәре, чахе Даwьд Пʹадша бона хьзмәтийа пʹарьстгәһеда кʹар дькьр, әwи 4 000 Леwи бьжарт сәва бь кʹьлама пәсьн у шькьрийе бьдьнә Йаһоwа. Нава wанда 288 мәрьв һинкьри бун, wәки бона Йаһоwа бьстьрен, у әw һʹәмушк жи wе йәкеда һостә бун (1 Дир. 23:5; 25:7).

⁵ Чахе пʹарьстгәһ тʹәсмили Йаһоwа дькьрьн, һьнге жи мьqам у кʹьлама щийе фәрз дьгьртьн. Кʹьтеба Пирозда те готьне: «Гава кö боривана у дәнгбежа бь һәврʹа пәсьн у шькьри дьданә Йаһоwа, у гава кö дәнге борийе у шьнгинийа болма у саза шькьри дьданә Йаһоwа . . . рʹумәта Йаһоwа, мала Хwәдейе рʹаст тʹьжә кьрьбу». Бьдьнә бәр чʹәʹве хwә, wәки әwе qәwьмандьне чьqас баwәрийа Исраелийа qәwи кьр (2 Дир. 5:13, 14, ДТʹ; 7:6).

6. Нәһәмийа диса чь кьр чахе диwаред Оршәлиме һатьнә тʹәсмилкьрьне?

⁶ Нәһәмийа рʹебәри дькьр wәки диwаред Оршәлиме тʹәзәда бенә данине. Хенщи ве йәке, әwи öса жи рʹебәри кьр, wәки Леwийед дәнгбеж мьqама лехьн у кʹьлама бежьн. Чахе диwаред Оршәлиме тʹәсмил дькьрьн, бона ве йәке кʹьлама мәхсус ледьхьстьн, у шабуна Исраелийа һе зедә дьбу. Һьнге һәбун «дö льqед [кʹомед] мәзьн кö шькьрийе дькьн». Әwана щурʹә-щурʹә алийава дьчун, у паше незики диwаред пʹарьстгәһе рʹасти һәв дьһатьн, сәва кö дурва дәнг бе бьһистьне (Нәһәм. 12:27, 28, 31, 38, 40, 43). Бешьк, Йаһоwа гәләк ша дьбу гава дьбьһист дәнге хьзмәткʹаред хwә, йед кö бь дьл у щан бь кʹьлама шькьри дьданә wи.

7. Иса ча нишан кьр кö бона Мәсиһийа стьран гәрәке щийе фәрз бьгьрә?

⁷ Wәʹде Исада жи һʹәбандьна рʹастда кʹьлама щийе фәрз дьгьртьн. Биньн бира хwә еварәкә мәхсус нав тʹәмамийа тʹәрихийа инсанәтеда. Гава Иса Шива Хöдан дәрбаз кьр, әwи шагьртед хwәва бь кʹьлама пәсьн данә Йаһоwа. (Бьхунә Мәтта 26:30.)

8. Мәсиһийед qьрʹна йәкеда чь мәсәлә һиштьнә стьранеда?

⁸ Мәсиһийед qьрʹна йәке тʹәвайи бь кʹьлама пәсьне Хwәде дьдан. Әw бона мә мәсәлә йә. Гәләк щар әwана дьзикава малада тʹоп дьбун, ле әwе йәке рʹе wан нәдьгьрт, wәки пәсьне Йаһоwа бьдьн. Паwлос пе рʹебәрийа Хwәде бьред Мәсиһирʹа гот: «Бь һʹәму сәрwахтийе ль һәв һин кьн у ширәт кьн, зәбура у һәр щурʹә стьранед рʹöһʹани бь шькьрдари дьле хwәда бона Хwәде бьстьрен» (Колс. 3:16). Кʹьламед кö кʹьтеба мәйә кʹьламада һәнә, рʹасти жи «стьранед рʹöһʹани» нә, кʹижан кö гәрәке «бь шькьрдари» бенә стьране. Әв һәйә пʹарәкә хwарьна рʹöһʹани кö «хöламе амьн у сәрwахт» дьдә мә (Мәт. 24:45).

ЧАWА АЗА БЬСТЬРЕН?

9. а) Чь дькарә бьбә мәʹни кö щьватеда йан щьватед мәзьнда бь дьл у щан нәстьрен? б) Әм ча гәрәке бьстьрен кʹьламед пәсьндайине Йаһоwарʹа, у пешийе кʹе гәрәке ве йәкеда мәсәла баш бә? (Бьньһерʹә шькле әʹwльн.)

⁹ Дьбәкә малбәта wәда йан нав мьләте wәда әʹдәт нинә кö бьстьрен. Йан жи дьqәwьмә һун пе телевисйоне йан радиойе дәнге дәнгбежа дьбьһен кö гәләк рʹьнд дьстьрен у һун дәнге хwә бәрамбәри дәнге wан дькьн. Һьнге һун дькарьн бәрхwә кʹәвьн кö мина wан нькарьн бьстьрен. Ле йәкә әв тьшт гәрәке нәбьнә мәʹни кö щабдарийа хwә нәйньн сери, демәк бь кʹьлама пәсьна нәдьн Йаһоwа. Дәwсе, кʹьтеба хwәйә кʹьлама бьльнд бьгьрьн, сәре хwә бьльнд кьн, у бь дьл у щан бьстьрен! (Әзр. 3:11; бьхунә Зәбур 147:1.) Иро гәләк Одед Щьватада, хәбәред кʹьлама сәр мониторе тенә нишанкьрьне, у әw йәк али мә дькә бь дәнге бьльнд бьстьрен. Öса жи wәʹде Мәкʹтәба Хьзмәтийе кö рʹуспи дәрбаз дьбьн, кʹьлам жи кʹәтьнә нава бәрнама ве мәкʹтәбе. Әв йәк дьдә кʹьфше кö чьqас фәрз ә рʹуспи щьватеда бьстьрен у ве йәкеда бьбьнә мәсәлә.

10. Һәрге әм хwә дьгьрьн кö бь дәнге бьльнд нәстьрен, әм чь гәрәке биньн бира хwә?

¹⁰ Мәʹник кö чьрʹа гәләк хwә дьгьрьн у бь дәнге бьльнд настьрен, әв һәйә тьрс. Бәʹса хәбәре, һьнәк дьтьрсьн кö йед дьн әʹщьз бьн һәрге бь дәнге бьльнд бьстьрен. Һьнәк жи дьфькьрьн кö дәнге wан нә хwәш ә, у шәрм дькьн бьстьрен. Ле дина хwә бьдьн сәр ве йәке, кö хәбәрданеда «әм һʹәму жи гәләки шашийа дькьн» (Аqуб 3:2). Ле әв йәк рʹе мә нагьрә кö әм ида хәбәр нәдьн. Ләма жи чьрʹа әм гәрәке сәва дәнге хwәйи бь qьсур, хwә бьгьрьн у пе кʹьлама пәсьна нәдьнә Йаһоwа?

11, 12. Чаwа әм дькарьн сәва стьрандьне дәнге хwә баш кьн?

¹¹ Дьбәкә әм шәрм дькьн бьстьрен чьмки ньзаньн ча бьстьрен. Ле wәрә әм чәнд ширәта шеwьр кьн, кʹижан кö wе али мә бькьн әм һе рʹьнд бьстьрен.a

¹² Һәрге һун һин бьн кö ча рʹаст бина хwә бькʹьшиньн, wе дәнге wә һе бьльнд бә у qайим бә. Ча ток кö qәwате дьдә сәва лус бьшьхöлә, бинкʹьшандьн жи qәwате дьдә дәнге мә wәʹде хәбәрдане у стьране. Һун гәрәке бь дәнге öса бьстьрен, чаwа һун хәбәр дьдьн, йан һәла һе бь дәнге дьһа бьльнд жи (Кʹьтеба «Мәкʹтәба Даннасинкьрьнеда» сәр рʹупʹелед 181-184, бьнсәрийа бь наве «Чаwа Пʹьшкед Хwәда Һәwе Контрол Бькьн», дәрһәqа ве йәке һәнә ширәт). Кʹьтеба Пирозда жи чәнд щийада хьзмәткʹаред Йаһоwарʹа те готьне кö «әшq» бьстьрен (Зәб. 33:1-3).

13. Шьровәкьн кö чаwа әм дькарьн бона стьрандьне дәнге хwә һе баш кьн.

¹³ Wәʹде qöльхкьрьна тʹәви малбәте, йан жи чахе һун тʹәне нә, әван ширәта бьдьнә хәбате: Кʹьтеба кʹьламада бьжберьн кʹьламәке кʹижане һун һʹьз дькьн. Пешийе педа кʹьламе бь дәнге бьльнд бьхуньн. Паше, һәма бь ви дәнге бьльнд һәр щьмләке бинәкерʹа бьхуньн. Паше диса жи бь wи дәнги әве щьмле бьстьрен (Иша. 24:14). Öса wе дәнге wә һе qәwи бә у баш бә. Дәнге хwә нәгьрьн у тʹö щар шәрм нәкьн бьстьрен!

14. а) Чахе wәʹде стьрандьне дәве мә фьрә вәкьри йә, әw йәк чьда али мә дькә? (Бьньһерʹьн чаргошә «Чаwа Дьһа Баш Бьстьрен».) б) Кʹижан ширәт али wә дькьн кö дәнге хwә һе баш кьн?

¹⁴ Сәва кö бь дәнге qәwи бьстьрен, лазьм ә дәве хwә фьрә вәкьн. Демәк, чахе һун дьстьрен дәве хwә һьнәки зедә вәкьн, нә кö чахе һун хәбәр дьдьн. Ле һун чь гәрәке бькьн һәрге дәнге wә гәләк ньмьз ә йан жи гәләк бьльнд ә? Дәрһәqа ве йәке бьхуньн Кʹьтеба «Мәкʹтәба Даннасинкьрьнеда», рʹупʹела 184, чаргошеда бь наве «Чаwа Чәтьнайед кö Дәнгва Гьредайинә Сафи кьн».

БЬ ДЬЛ БЬСТЬРЕН КʹЬЛАМЕД ШЬКЬРДАРИЙЕ

15. а) Сәр щьвата һәрсали йа сала 2016-да чь һатә әʹламкьрьне? б) Чьрʹа кʹьтеба кʹьлама һатә гöһастьне?

¹⁵ Сала 2016-да сәр щьвата һәрсали йа Шәʹдед Йаһоwа, әʹламәтийа мәхсус һатә готьне. Стивен Лет бьра, әʹлам кьр дәрһәqа дәрхьстьна кʹьтеба кʹьлама йа тʹәзә, бь наве «Бь Дьл у Щан бона Йаһоwа Бьстьрен». Әwи шьровәкьр кö мәʹнийа дәрхьстьна ве кʹьтебе әw ә, кö ль гора wәлгәрʹандьна «Дьнйа Тʹәзә» бә, кʹижан кö сала 2013-да һатә тʹәзәкьрьне. Ләма жи лазьм бу wәки кʹьламада һьнә гьли бенә дәрхьстьне йан жи бенә гöһастьне, кʹижан кö wәлгәрʹандьна «Дьнйа Тʹәзә»-да тʹöнә нә. Хенщи ве йәке, кʹьламед тʹәзә дәрһәqа хьзмәтийа мә у рʹазибуне сәва кʹьрʹине һатьнә зедәкьрьне. Һьн жи, чьмки стьрандьн әw һәйә пʹара хьзмәтийа мә, Кʹома Рʹебәрийе хwәст кö әв кʹьтеб бь матерйалед баш бе чекьрьне у һьн жи рʹуйе кʹьтебе бьбә мина йа Кʹьтеба Пирозә wәлгәрʹандьна «Дьнйа Тʹәзә», йа тʹәзәкьри.

16, 17. Чь гöһастьн һатьнә кьрьне кʹьтеба кʹьламайә тʹәзәда?

¹⁶ Сәва кö һеса бә әве кʹьтеба тʹәзә бьдьнә хәбате, кʹьлам пе тʹема һатьнә пʹарәвәкьрьне. Мәсәлә, 12 кʹьламед пешийе дәрһәqа Йаһоwа нә, паше 8 кʹьлам дәрһәqа Иса у кʹьрʹине нә у диса йед майин. Öса жи ве кʹьтебеда һәйә индекса һʹәму кʹьлама, кʹижан кö али готарвана дькә һеса кʹьлама бьжберьн.

¹⁷ Кʹьламада һьнә хәбәр һатьнә гöһастьне, сәва кö фькьр һе зәлал бенә фәʹмкьрьне. Öса жи хәбәред чәтьн у кʹижан кö мәрьв ида надьнә хәбате һатьнә дәрхьстьне. Әw гöһастьн һатьнә кьрьне сәва кö һәр кәс бькарьбә бь дьл бьстьре. Хәбәред кʹьламада öса һатьнә бьжартьне, wәки дьле мә бьгьрә. У һьнә навед кʹьлама у хәбәред теда, кʹижан кö һьнәки сәрт дьһатьнә кʹьфше, әw жи һатьнә гöһастьне. Әw йәк аликʹарийе дьдә, wәки сәр щьвата у щьватед мәзьн меван, йед кö Кʹьтеба Пироз һин дьбьн, щаһьл, у öса жи хушк бькарьбьн аза бьстьрен.

18. Чьрʹа лазьм ә әм һин бьн кʹьламед мәйи тʹәзә? (Бьньһерʹә спартьн.)

¹⁸ Ве кʹьтеба тʹәзәда гәләк кʹьлам мина дöа нә. Бь ван кʹьлама һун дькарьн дьле хwә Йаһоwарʹа вәкьн. Кʹьламед дьн жи wе али wә бькьн кö «һʹьзкьрьне у qәнщикьрьнеда һелана бьдьнә» һәв (Ибрн. 10:24). Бәле, әм дьхwазьн гьли, мьqам у ритмед кʹьламед мә һин бьн. Малпәра мә jw.org-да бьбьһен кö хушк-бьра ча wан кʹьлама дьстьрен, у әw йәк wе али wә бькә кö һун рʹьнд бьстьрен. Чахе һун малда wан кʹьлама бьстьрен, һуне һе аза у бь дьл у әшq бьстьрен.b

19. Чь щурʹәйи тʹәмамийа щьвате дькарә Йаһоwа бьһʹәбинә?

¹⁹ Бир нәкьн кö стьрандьн хьзмәтийа мәда щийе фәрз дьгьрә. Әв мәщала мәзьн дьдә мә, wәки һʹьзкьрьн у рʹазибуна хwә Йаһоwарʹа нишан кьн. (Бьхунә Ишайа 12:5.) Һәрге һун бь дьл у щан бьстьрен, йед дьн жи wе чʹәʹв бьдьнә wә кö аза у бь дьл бьстьрен. Һәр кәс щьватеда, фьрqи тʹöнә щаһьл, йан мәзьн, йан йед кö Кʹьтеба Пироз һин дьбьн, дькарьн бь ве йәке Йаһоwа бьһʹәбиньн. Ләма жи шәрм нәкьн у хwә нәгьрьн wәки бьстьрен. Дәwсе, гöһ бьдьнә ве ширәте кö зәбурбеж ньвиси: «Бьстьрен әшqи Хöдан». Бәле, wәрә әм тʹьме бь шабуне бьстьрен! (Зәб. 96:1).