Гәло Рʹебәрийа Кʹьтеба Пироз Иро Кʹаре Тинә?

ҺЬНӘК ДЬБЕЖЬН НА. Дохдьрәк гот, кö иро мәкʹтәбада тʹö дәрсдарәк ль сәр дәрсед кʹимйайе, wе нәдә хәбате кʹьтеба кәвьнә йа сала 1920, кö зарʹа һин кьн. Әwи гот кö принсипед Кʹьтеба Пироз жи, һәма öса бекер ьн. Мәрьвед кö баwәрийа хwә Кʹьтеба Пироз найиньн, дьбежьн wәки әв ча бежи һәрге бьди хәбате рʹебәрийа кәвьн йа компотере, сәва кö бь ве рʹебәрийе һин бьн компотера модерн бьдьнә хәбате. Һәрге бь гьлийе майин бежьн, мәрьв дьфькьрьн wәки Кʹьтеба Пироз кʹьтебәкә кәвьн у бекер ә.

Гәло чьма иро кәсәк гәрәке рʹебәрийа кәвьн бьдә хәбате, нә әм дьжин wәʹде текноложийайә модерн? Хенщи wе йәке беһʹәсаб малпәр у рʹожньвис, гәләк ширәт у рʹебәрийа дәрбази мә дькьн. Бәрнамед телевизийоне жи, рʹебәрийа у ширәта дәрбаз дькьн бь сайа дохдьра, мамоста у ньвискʹара. Ле махазийед кʹьтеба, беһʹәсаб кʹьтеб нәшьр дькьн кö йан чь, бь ширәтед хwә али мәрийа бькьн. Сәр ве йәке гәләк милйард долар те хәрщкьрьне.

Һәрге иро һаqас информасийа те дәстхьстьне, чьма әм гәрәке Кʹьтеба Пироз һьлдьн һʹәсаб, йе кö wәкә 2 000 сал пешда һатьбу тʹәмам кьрьне? Дьбә кö зандар у мәрьвед дьн рʹаст дьбежьн, кö хәбьтандьна Кʹьтеба Пироз, әв һәйә ча бежи бьдьнә хәбате кʹьтеба кәвьнә кʹимийайе йан рʹебәрийа кәвьнә компотәре, кö тьштәк һин бьн. Чь жи һәбә әв ньһерʹандьн нәрʹаст ә. Зандари у текʹноложийа зу-зу тенә гöһастьне, ле һʹәwщед мәрьва найенә гöһастьне. Һʹәта ньһа мәрьв диса жи дьхwазьн нета жийине бьвиньн, бәхтәwар у бехофийеда бьн, һәләqәтийа баш малбәтеда хwәй кьн у һәвалтийа баш жи qазанч кьн.

Рʹаст ә Кʹьтеба Пироз кʹьтебәкә кәвьн ә, ле әw дькарә һʹәwщед мәда али мә бькә, чьмки әв жь бина бәр Әʹфьрандаре мә һатийә ньвисаре. Әв һʹәму алийава рʹебәрийа мә дькә у һазьр дькә бона һʹәму чәтьнайед жийине (2 Тимотʹейо 3:16, 17). Һәйнәсәр дь ве кʹьтебеда һәнә ширәт, кö тʹьме wәхтда ньн у рʹебәри йед кö тʹöщар кәвьн набьн! Кʹьтеба Пироз хwәха жи дьбежә: «Хәбәра Хwәде сах у зор ә» (Ибрани 4:12).

Гәло Кʹьтеба Пироз рʹаст ә? Әв кʹьтебәкә кәвьн ә йан бь рʹасти кʹьтебәкә лайиq у керһати йә? Нета ве нәшьра мәхсусә «Бьрща Qәрәwьлийе», әв ә, кö али тә бькә щабед wан пьрса бьвини.