Һинкьрьнед Кʹьтеба Пироз; Сәрwахти Wәхтда

БЬДӘ БӘР ЧʹӘʹВЕ ХWӘ: Тö дьчи музейе, кö тьштед тʹәрихийейә кәвьн тʹәмашә бьки. Һʹәчʹи зәʹф жь wан тьштед кәвьн зийанкьри нә, у пʹарәкә wан шкәсти йә йан öндакьри йә. Ле һәйә тьштәк, кö qә нәһатьбу зийанкьрьне; рʹаст ә дизайна wе чәтьн ә, ле әв һʹәму алийава зәлал ә. Тö рʹебәре хwә пьрс дьки: «Гәло дьбә кö әв тьшт, нә öса кәвьн ә, ча йед дьн?» Рʹебәр дьбежә: «На. Әв жь һʹәму тьштед дьн гәләк кәвьн ә у qә щарәк жи тʹәзәда нәһатьбу чекьрьне». Тö диса пьрс дьки: «Дьqәwьмә әw рʹьнд хwәй кьрьнә?» Рʹебәре тә дьбежә: «На. Әв тьшт нава ба-багәр у баранада дәрбаз бу. У гәләк qачах дьхwәстьн әв хьраб кьн». Бь әʹщебмайибуне тö дьбежи: «Гәло әв жь чь һатийә чекьрьне?»

Әм дькарьн бежьн wәки әв тьште муһим, һәйә Кʹьтеба Пироз. Әв кʹьтеб жь һʹәму кʹьтебед дьн кәвьнтьр ә. Һәмьки кʹьтебед тʹәрихийейә дьн жи һәнә. У wәк wан тьштед тʹәрихийейә зийанкьри, ньвисандьнед кәвьн йа wан кʹьтеба жи пәй wәʹдәрʹа һатьнә зийанкьрьне. Фькьред кö wан кʹьтебада сәр зандарийе һатьбун готьне һьмбәри занәбунә модерн дәрдькʹәвьн у әв избаткьри нә. Ширәтед wан дәрһәqа медисинайе гәләк щар зийане тиньн, нә кö аликʹарийе. Демәк гәләк ньвисандьнед кәвьн әв тʹәне избати нә, кö әʹйан дькьн wәки wәхтәки әwана һәбун; пʹаред wан ньвисандьна һатьнә öндакьрьне йан зийанкьрьне.

Ле Кʹьтеба Пироз жь wан һʹәму тьштед кәвьн щöдә дьбә. Ньвисандьна ве кʹьтебе 35 зедәтьр qьрна пешда дәстпебу у әв нәһатийә гöһастьне. Нава qьрнада әв зәʹфт дькьрьн, дьшәwьтандьн, qәдәхә дькьрьн у бәр тʹö тьшти һʹәсаб нәдькьрьн. Ле диса жи, чь кö ве кʹьтебеда һатьбу ньвисандьне, нәһатә гöһастьне у зийанкьрьне. Һьмбәри занәбуна модерн öса те кʹьфше, кö әв кʹьтебәкә кәвьн ә, ле Кʹьтеба Пироз гәләк тьшта әʹйан дькә, һәла һе дәрһәqа ахьрийе жи. (Бьньһерʹә чаргошә «Кәвьн ә йан Ахьрийе Әʹйан Дькә?»

ПРИНСИПЕД БЬ КʹИЖАНИ КÖ МӘРЬВ ДЬЖИН

Дьбә кö тö дьфькьри: «Гәло һинкьрьнед Кʹьтеба Пироз бь рʹасти керһати нә, сәва рʹожед мә?» Сәва кö щаба ве пьрсе бьди, жь хwә бьпьрсә: «Инсанәт иро рʹасти кʹижан проблема тен? Кʹижан жь wан проблема, даһа әʹщеб ьн?» Дьбә кö тö дьфькьри дәрһәqа шәрʹ, qьрежайе, qачахтийе йан корупсийайе. Ньһа wәрен әм шеwьр кьн дәрһәqа һьнә принсипед Кʹьтеба Пироз. Wәʹде шеwьркьрьне бьфькьрә дәрһәqа ве пьрсе: «Һәрге мәрьв бь wан принсипа бьжитана, гәло һʹале дьнйайе wе даһа баш нибуйа?»

ӘʹДЬЛАЙИҺʹЬЗИ

«Хwәзи ль wан, кö әʹдьлайийе дькьн, чьмки әwе зарʹед Хwәде бенә һʹәсабе» (Мәтта 5:9). «Чьqас жь дәст wә те, тʹәви һʹәму мәрьва әʹдьлайийеда бьн» (Рʹомайи 12:18).

БАХШАНДЬН, ДЬЛРʹӘʹМИ

«Хwәзи ль дьлрʹәʹма, чьмки әwе рʹәʹме бьбиньн» (Мәтта 5:7). «Ль һәв сәбьр кьн у ль һәв бьбахшиньн, һәгәр газьне йәки ль һьндава йәкида һәбә. Чаwа Хöдан бахшандә wә, һун жи öса бьбахшиньнә һәв» (Колоси 3:13).

ЙӘКТИ НАВА МЬЛӘТАДА

Хwәде «һʹәму мьләтед дьнйайе жь хунәки хöльqанд, кö сәр рʹуйе тʹәмамийа дьнйайе бьжин» (Кʹаред Шандийа 17:26). «Хwәде рʹасти жи фьрqийе накә нава мьләта. Ле жь нав һәр мьләтида, йе кö жь wи хоф дькә у рʹастийе дькә ль wи qәбул ә» (Кʹаред Шандийа 10:34, 35).

ХWӘЙИТИЙА ӘʹРДЕ

«Хöдан Хwәде әw мер һьлда дани бахче Едене, wәки wе бещәр кә у хwәйитийе ле бькә» (Дәстпебун 2:15). Хwәде wе qьрʹа wан бинә, йед кö дьне хьраб дькьн (Әʹйанти 11:18).

НӘФРʹӘТКЬРЬНА ТЬМАЙЕ У БЕНАМУСИЙЕ

«Һаш жь хwә һәбьн у һʹәвза хwә жь тьмайе бькьн, чьмки әʹмьре инсен һәбука wива гьредайи нинә» (Луqа 12:15). «Ле һʹәта наве qавийе у һәр һʹәрамийе, йан тьмайе жи гәрәке нава wәда нәйе һьлдане, чаwа ль щьмәʹта Хwәде накʹәвә» (Әфәси 5:3).

ДЬЛПʹАКИ У ХӘБАТ

«Исафа мә рʹьһʹәт ә у дьхwазьн кö һәр тьшти рʹаст бькьн» (Ибрани 13:18). «Әwе кö дьзийе дькә, бьра иди нәдьзә, ле бь худана хwәйә һʹәлал бь дәстед хwә бьхәбьтә» (Әфәси 4:28).

АЛИКʹАРИ WАНРʹА, КʹИ КÖ ҺʹӘWЩӘ НӘ

«Кери кʹәтийа wәрьн, һьндава һʹәмуйада сәбьра wә һәбә» (1 Тʹесалоники 5:14). «Тәʹли-тәнгийада дәст бавежьнә сеwийа у жьнәбийа у һʹәвза хwә жи жь ләкʹед дьне бькә» (Аqуб 1:27).

Кʹьтеба Пироз нә кö тʹәне дәрһәqа wан принсипа дьбежә. Әв йәк мә һин дькә wан принсипа qимәт кьн у жийина хwәда рʹаст бьдьнә хәбате. Һәрге гәләк жь мәрийа әwан принсипа бьдана хәбате, дәрһәqа кʹижана кö жоре һатьбу готьне, иро ль дьнйайеда wе проблемед мә кем буна. Бь рʹасти жи принсипед Кʹьтеба Пироз кʹар ьн у wәхтда ньн! Ле гәло һинкьрьнед Кʹьтеба Пироз чь кʹаре дькарьн иро тәрʹа биньн?

ЧАWА ҺИНКЬРЬНЕД КʹЬТЕБА ПИРОЗ ДЬКАРЬН ИРО ТӘРʹА КʹАРЕ БИНЬН

Щарәке мәрьвәки билан гьлийе öса гот: «Сәрwахти бь әʹмәлед хwә кʹьфш дьбә кö әw рʹаст ә» (Мәтта 11:19). Дьбә кö һун жи wан гьлийарʹа qайил ьн. Сәрwахти wе йәкеда те кʹьфше, кö чаwа тö әв дьди хәбате. Дьqәwьмә тö дьфькьри: «Һәрге Кʹьтеба Пироз бь рʹасти керһати йә, демәк әв гәрәке ль сәр жийина мьн һʹöкöм кә? Чаwа әв дькарә нава проблемед мьнда али мьн бькә?» Wәре әм мәсәләки шеwьр кьн.

Зәйнәбa, бь жийинәкә бәхтәwар у ша дьжит. Ле ньшкева жийина wеда, кöл-дәрд qәwьмин. Qиза wе йа нәгьһишти мьр. Әв тʹәви мере хwә һәв qәтийан. Һьм жи алийе пʹәрада әw гәләк дәсттәнг бу. Әw дьбежә: «Мьн фәʹм нәдькьр әз бумә чь, нә qиза мьн һәбу нә мере мьн, нә жи мал. Нета жийина мьн ида тʹöнә бу».

Пешийа wе йәке Зәйнәб öса зәлал ль сәр хwә тʹәхмин нәкьрьбу әw гьлийед жь Зәбуре: «Рʹожәд әʹмьре мә һʹәфте сал ьн, һәгәр бь сьһʹәт-qәwат һʹәйште сал бьн, диса рʹумәта wан зәʹмәт у кʹәдәр ә, әw зу дьбьһöрьн, әм жи дьфьрʹин дьчьн» (Зәбур 90:10).

Нава чәтьнайед хwәда, Зәйнәб жь Кʹьтеба Пироз аликʹари дит. Чь кö әwе бь сайа Кʹьтеба Пироз станд, бь рʹасти жи муһим ә. Се готаред дьнда те шьроwәкьрьне, кö чаwа гәләк мәрьвед дьн жи, аликʹари жь ве кʹьтебе дитьн, чахе рʹебәрийа wе дьданә хәбате. Wана ль сәр хwә тʹәхмин кьр, кö Кʹьтеба Пироз анәгори тьште тʹәрихийейә кәвьн, пʹьрʹ муһим ә. Әw нә мина гәләк кʹьтебед дьн ә, кʹижан кö кәвьн у бекер дьбьн. Гәло чьма әв кьтеб öса щöдә дьбә? Чьмки ве кʹьтебеда фькьред Хwәде нә, нә кö йа мәрийа (1 Тʹесалоники 2:13).

Һәмьки жийина мә кьн ә у тʹьжә проблема йә. Чахе жийина тәда проблем пәй проблема тен, гәло кʹидәре тö дькари бәрдьли, аликʹари у ширәтед баш бьвини?

Дина хwә бьдьн се тьшта кʹидәре кö зәлал дьбә, wәки Кʹьтеба Пироз керһати йә бона жийина тә. Әв дькарә тә һин кә кö чаwа,

1. хwә хwәй ки жь проблема, чахе дькари.

2. сафи ки чәтьнайа, рʹасти кʹижани тö тей.

3. тәйах ки wан дәрәщед чәтьнда, кʹижан кö әм нькарьн бьгöһезьн.

Готаред дьнда wе дәрһәqа wан се дәрәща бе шеwьркьрьне.