1 Аликʹари, кö жь Проблема Хwә Дур Бьгьрьн

НӘРʹАСТ ХӘБЬТАНДЬНА ИЧКЕ

Зәйнәб, дәрһәqа кʹижани кö дь готара пешьнда һатьбу гьликьрьне, тʹәхмин кьр кö жь бо хәмгинийа хwә, әw дәстпекьр гәләк ичке вәхwә. Һәмьки Кʹьтеба Пироз сущдар накә кö ичке вәхwьн, ле әw дьбежә: «Нәчә нава вәхwарийа» (Мәтʹәлок 23:20). Нәрʹаст хәбьтандьна ичке дькарә проблемед мәзьн бьдә сьһʹәт-qәwате, һәләqәти тʹәви мәрийа дькарә зийан кә у хьраб кә. Жь бо гәләк ичкәвәхwарьне, һәр сал бь милйона мәрьв дьмьрьн. Мәрьв дькарьбун жь гәләк проблемед öса хwә хwәйкьрана, һәрге гöһ бьдана ширәта Кʹьтеба Пироз.

Зәйнәб һәма öса жи кьр. Әw дьбежә: «Мьн фәʹм кьр, кö ичкә нькарә хәмгинийа мьн бьтәмьринә у проблемед мьн сафи кә. Мьн да хәбате гьлийе жь Филипи 4:6, 7, кʹидәре кö те готьне: ‹Бона тʹö тьшти хәм нәкьн› у бьра дәрде дьле wә ‹Хwәдева әʹйан бә›. Һәр шәв чахе фькьред нәбаш у хәмгини әз зәʹфт дькьрьм, мьн Йаһоwарʹа дöа дькьр. Мьн һʹәму һʹәстед хwә wирʹа вәдькьр, öса жи һерса хwә, еш у дьлтәнгийа хwә. Мьн wирʹа дöа дькьр, кö али мьн бькә һе баш хwә тʹәхмин кьм. Рʹожа дьн сьбәтьре, мьн тедәрхьст кö һәстед ви щурʹәйи щәм мьн ида тʹöнә бун. Әз һини дöакьрьне дьбум у әв йәк али мьн дькьр дина хwә бьдьмә ве йәке, чь кö ньһа щәм мьн һәйә, нә кö чь щәм мьн тʹöнә. Мьн сафи кьр ида тʹö щар ичʹке вәнәхwьм. Әв әʹдьлайа кö мьн qазанч кьрьбу öса qимәт бу бона мьн, кö мьн нәдьхwәст диса әв öнда кьм».

БЕНАМУСИ

Бенамуси гәләк проблем пешда тинә, мәсәлә дьлтәнги у бебәхти. Ле принсипед Кʹьтеба Пироз дькарьн али мә бькьн жь проблемед ви щурʹәйи хwә хьлаз кьн у жь сәбәбед кö әwан проблема пешда тиньн. Мәсәлә флирт у порнографйа. Хортәки щаһьл бь наве Самуйел дьбежә: «Флирт бона мьн бу тьштәкә тʹәбйәти. Щарна әз нахwазьм әве йәке бькьм, ле чахе әз тʹәхмин дькьм кö йәке хwәш тем, һьнге һʹәwас ә бькʹәвьмә флирте». Самуйел нәһәq кьрьн дь ве йәкеда, кö әв гәләк щара дькʹәтә флирте, ле бь рʹасти һьнә дәрәщәда әw нә жи дьхwәст öса бькә. Ахьр Самуйел нәсәкьни у ида әʹйнатара дькʹәтә флирте. Әв бьбу wирʹа хәйсәт, жь бо чь жи әw паше дьлтәнг дьбу. Әw дьбежә: «Әв тьштәкә зийан ә, чьмки хwәһʹьзийе пешда тинә».

Самуйел хwәнд готара бона щаһьла, йе кö ль сәр малпәра жw.орг һатьбу данине. У әw фькьри сәр Мәтʹәлок 20:11, кʹидәре кö те готьне: «Һʹәта qәнщи йан хьрабийа хәйсәте зарʹе жи бь кьред wи кʹьфш дьбьн». Чаwа әв йәк али wи кьр? Самуйел фәʹм кьр, кö флирта wи һʹәрам у нәрʹаст бу. Ньһа әw дьбежә: «Мьн öса жи фәʹм кьр, wәки щаһьлед кö дькʹәвнә флирте, хәйсәтед нәбаш нав хwәда пешда тиньн, жь бо чь жи ль ахьрийе әwана дь зәwащеда жи дьбьнә һәвалпʹарәки хьраб. Мьн дәстпекьр бьфькьрьм, кö чаwа жьна мьнә ахьрийе, wе хwә тʹәхмин кә, һәрге бьвинә кö әз тʹәви кʹöлфәтәки дькʹәвмә флирте. Мьн фәʹм кьр wәки әв хәйсәт дькарә зийане бинә. Рʹаст ә һеса йә бькʹәвьнә флирте, ле әв найе һʹәсабе кö әв йәк рʹаст ә». Самуйел һатә гöһастьне. Әв жь флирте хwә дур гьрт у әв йәк али wи кьр жь бенамусийе жи хwә хwәй кә.

Һʹале Антонио һе хьраб бу у әв дькарьбу һеса бькʹәта бенамусийе. Әw порнографийайева гьредайи бу. Рʹаст ә әw зәwьщи бу сәр кʹöлфәте, кʹижани кö пʹьрʹ һʹьз дькьр, ле әwи тедәрхьст, wәки диса у диса дькʹәвә бьн тʹәлька порнографийайе. Әw гот кö дьфькьри сәр 1 Пәтрус 5:8, чь кö бь рʹасти али wи кьр. Ль вьр ньвисар ә: «Сәрwахт бьн, һʹьшйар бьминьн! Мирещьне нәйаре wә мина шер мьрʹә-мьрʹа wи йә, дьгәрʹә кʹа кʹе һʹуфи хwә кә». Антонио дьбежә: «Әва дьнйа, дәр-дора мә бь шькьлед порнографийайе тʹьжә йә, у әв шькьл дькарьн кʹур бькʹәвнә һʹьше мә. Әв рʹез бь рʹасти жи али мьн кьр бьфькьрьм дәрһәqа канийа wан щерʹьбандьна. Әз һин бум дәрбера бькьмә бира хwә, кö әw шькьл жь Мире-щьна йә. Ньһа әз заньм, wәки тʹәне Йаһоwа дькарә али мьн бькә, ‹һʹәстед хwә бьгьрьм, у сәрwахт бьм›, сәва кö бькарьбьм һʹьше хwә, дьле хwә у зәwаща хwә контрол бькьм». Антонио, аликʹарийа лазьм станд, у ахьрийе әwи әв хәйсәте хwәйә хьраб тʹәрьканд. Әв йәк һәмьки али wи кьр, кö жь проблемед гьран жи хwә дур бьгьрә.

Зәлал ә, кö Кʹьтеба Пироз ширәте керһати дьдә, чь кö дькарә али мә бькә жь проблемед гьран хwә хьлаз кьн. Ле чь әм дькарьн бежьн дәрһәqа проблемед кö ида кʹöр рʹуньштьнә у кʹьфш ә кö qә жь wан ида хьлаз нәбьн? Wәрен әм бьньһерʹьн кö чаwа Хәбәра Хwәде дькарә али мә бькә әв пьрсед чәтьн сафи кьн.