Йаһоwа Тʹö Щар Әз Нәһиштьмә!

ӘЗ МӘЗЬН бумә Гратседа, (Австрйа). Чахе әз һʹәфт сали бум, мьн шандьнә мәкʹтәбе, кʹижанеда бона хьзмәтийа дереда һин дькьрьн. Ле әз әʹщебмайи мам чахе мьн wедәре ортʹа кʹәшиша у хьзмәткʹаред дереда бенамуси дит. Дийа мьн нава саләкеда әз жь ве мәкʹтәбе дәрхьстьм.

Паше әз чумә мәкʹтәбәкә дьн, кʹидәре кö зарʹ шәв wедәре дьман. Щарәке еваре, баве мьн ләзә-ләз һатә мәкʹтәбе, сәва зу мьн дәрхә у бьвә сьтʹаргәһәке, чьмки бомба давитьнә сәр шәһәре мә Гратсе. Һәма чаwа кö әм сәр пʹьрерʹа дәрбаз бун, әв пʹьра дәрберʹа тʹәqандьн. Мә щи-сьтʹар шәһәре Шладмингеда дит. Щарәкә жи öса qәwьми кö тәйар ньмьз дьфьрʹийан, у һʹәйата мәда гöлә бәрʹдан мьн у пирька мьн. Чахе шәрʹ хьлаз бу, әшкәрә бу wәки тʹалаша дере у дәwләте әм ниньн.

МЬН ПЬШТОВАНЕ АМЬН ДИТ

Сала 1950, Шәʹдәки Йаһоwа дийа мьнрʹа мьзгинийа жь Кʹьтеба Пироз гьли кьр. Мьн гöһ дьда хәбәрдана wан у һәла һе жи тʹәви дийа хwә дьчумә щьвате. Дийа мьн баwәр кьр wәки рʹасти бал Шәʹдед Йаһоwа йә, у сала 1952 әw һатә ньхöмандьне.

Һьнге әв щьвата кö әм дьчун, бона мьн ча бежи щьвина пирька бу. Ле паше чахе әм чунә щьватәкә дьн, wедәре тʹьжә щаһьл бун, у әw ида бона мьн щьвина пирька нибу. Чахе әм вәгәрʹийанә Гратсе, мьн дәстпекьр бемә сәр һʹәму щьвата, у зутьрәке әз жи ида дöдьли нибум кö мьн рʹасти дитийә. Әз öса жи пеһʹәсийам, wәки Йаһоwа һәйә Хwәдайе рʹаст, у пьштоване амьн бона хьзмәткʹаред хwә. Чахе wәʹде чәтьнда әм дьфькьрьн кö тʹәне манә, әw тʹьме кʹеләка мә йә у али мә дькә (Зәб. 3:5, 6).

Мьн дьхwәст мәрьвед дьнрʹа дәрһәqа рʹастийе гьли кьм. Пешийе мьн дәстпекьр хушк-бьре хwәрʹа бежьм. Чар хушкед мьнә мәзьн, йед кö ида малда нәдьжитьн, ча дәрсдар дьхәбьтин. Мьн тʹьме тʹәсәлийа wан дькьр щурʹә-щурʹә гöндада кʹидәре әwана дьман, у мьн әwана һелан дькьрьн, wәки һинбуна Кʹьтеба Пироз дәстпекьн. Ахьрийеда, һʹәму хушкед мьн у бьре мьн бунә Шәʹдед Йаһоwа.

Мәһа Нисане сала 1954, мьн хwә тʹәсмили Йаһоwа кьр у һатьмә ньхöмандьне. Ча мьн дәстпекьр мал бь мал хьзмәт кьм, һʹәфтийа дöда әз рʹасти жьнькәке һатьм, кö wәкә 30 сали бу, у мьн тʹәви wе һинбуна Кʹьтеба Пироз дәстпекьр. Wәʹдә шунда әw һатә ньхöмандьне, у паше мере wе у öса жи дö кöрʹед wе. Әwе һинбуне гәләк баwәрийа мьн qәwи кьр. Чьрʹа? Чьмки бона һинбуне мьн хwә рʹьнд һазьр дькьр, тʹö кәси тʹәви мьн һинбуна Кʹьтеба Пироз дәрбаз нәкьрьбу. Бь рʹасти мьн пешийе хwәха хwә һин дькьр, сәва кö паше ида бькарьбьм йед дьн һин кьм! Wи щурʹәйи мьн рʹасти һе зәʹф фәʹм кьр у qимәт кьр.

WӘʹДЕ ПӘЙКʹӘТЬНА ТʹӘНЕ НИНЬМ

Сала 1955, әз чумә сәр щьвата мәзьнә һʹәмдьнйайе Алманйайеда, Франсайеда у Инглистанеда. Лондонеда әз рʹасти Алберт Шредер һатьм, кʹижан кö һьнге дәрсдаре мәкʹтәба Гиләд бу, ле паше бу әндәме Кʹома Рʹебәрийе. Чахе Мйузейа Британйайеда мәрʹа екскурсийа дәрбаз дькьрьн, Шредер бьра дина мә да сәр һьнә манускриптед Кʹьтеба Пироз. Wан манускриптада бь һʹәрфед Ибрани наве Хwәде ньвисар бу, у әwи мәрʹа шьровәкьр кö әw манускрипт чьqас фәрз ьн. Әwе йәке гәләк дьле мьн гьрт, әз рʹöһʹанида шьдандьм у һелан кьрьм, wәки һе зедә рʹастийа Хәбәра Хwәде бәла кьм.

Мьн пешәнгти дәстпекьр 1 Чьләйе, сала 1956. Чар мәһ шунда, әз һатьм тʹәглифкьрьне кö Австрйайеда хьзмәт кьм ча пешәнга мәхсус. Һьнге шәһәре Мистелбахеда, кʹидәре әз һатьмә кʹьфшкьрьне, Шәʹдед Йаһоwа тʹöнә бун. Wедәре чәтьнайикә мьн әw бу, кö әз у хушкәкә пешәнг кö тʹәви мьн дьжит, мина һәв нибун. Әз wәкә 19 сали бум у жь шәһәр бум, ле әw 25 сали у жь гöнд бу. Шәбәqа әз дәрәнг рʹадьбум, ле әw зу, еваре әз дәрәнг рʹадьзам, ле әw зу рʹадьза. Рʹаст ә әм жь һәв щöдә дьбун, ле әм тʹьфаq бун, чьмки мә ширәтед жь Кʹьтеба Пироз дьда хәбате.

Ле әм рʹасти чәтьнайед дьн жи дьһатьн. Һәла һе пәй мә жи дькʹәтьн, ле йәкә тʹö щар әм тʹәне нибун (2 Корн. 4:7-9). Щарәке, чахе мә гöндәкида мьзгини бәла дькьр, хәлqе кучʹькед хwә бәри мә дан. Әwан кучʹька дора мьн у һәвалхьзмәткʹара мьн гьртьн, дькьрьнә мьрʹә-мьр у дьране хwә һәв дьхьстьн. Мә дәстед һәвдö гьрт, у мьн дöада Йаһоwарʹа һәла һе жи гот: «Йаһоwа, һиви тә дькьм, чахе әwана бьгьһижьнә мә, бьра әм зу бьмьрьн!». Ле чахе ида гавәк мабу әw кучʹьк бьгьһиштана мә, ньшкева сәкьнин, почʹа хwә ба кьрьн у чун. Һьнге мә тʹәхмин кьр кö Йаһоwа әм хwәй кьрьн. Паши ве йәке, нав тʹәмамийа ви гöндида мә хьзмәт кьр, у әм гәләк ша бун кö әwан мәрьва әм баш qәбул кьрьн. Дьqәwьмә әwана әʹщебмайи ман кö кучʹька зийан нәданә мә, йан жи әʹщебмайи ман кö әм нәтьрсийан у мә шьхöле хwә бәрдәwам кьр. Һьнәк жь wан мәрьва, ахьрийеда бунә Шәʹдед Йаһоwа.

Диса әм рʹасти чәтьнайикә хоф һатьн. Щарәке хwәйе мале кʹидәре мә дьжит, гәләк ичʹкә вәхwарьбу. Әwи әм дьданә тьрсандьне кö wе мә бькöжә, у шәрʹ авитә мә йанчь әм щинара әʹщьз дькьн. Жьна wи дьхwәст wи бьдә сәкьнандьне, ле әw нәдьсәкьни. Әw йәк мә жь отʹаха жорьнва дьбьһист. Мә дәрберʹа кʹöрси да бәр дәре отʹаха хwә, у зускава дәстпекьр һур-муред хwә тʹоп кьн. Гава кö мә дәри вәкьр, хwәйе мале ида сәр пʹепәлука жоре бу, у дәсте wида кʹерәкә мәзьн бу. Әм пе һур-муред хwә дәре пьштева дәркʹәтьн у рʹийа бахчәрʹа рʹәвин, у тʹö щар вәнәгәрʹийанә wедәре.

Әм чунә отеле у мә отʹах хwәст. Öса бу кö әм wедәре wәкә саләке ман, у әw йәк бона хьзмәтийа мә баш бу. Чьрʹа? Әв отел сентра шәһәрда бу, у wан мәрьварʹа йед кö Кʹьтеба Пироз һин дьбун, дәстдьда отʹаха мәда һинбуне дәрбаз бьн. Зутьрәке, мә ида отʹаха мәда щьват дәрбаз дькьрьн, у wәкә 15 мәрьв дьһатьн.

Әм саләке зедәтьр Мистелбахеда ман. Паше, әз һатьмә кʹьфшкьрьне кö хьзмәт кьм Фелдбахеда, әw алийе Гратса башура-рʹоһлате йә. Һәвалхьзмәткʹара мьн ида йәкә дьн бу, у wи щийида жи щьват тʹöнә бу. Мә ханики жь дар qәте дöда, отʹахәкә бьчʹукда дьжит. Диwаред отʹаха мәда гәләк qәлш һәбун, у мә пе кʹахаза әw qәлш дадьдан сәва сöр нәкʹәвә отʹахе. Ав мә жь бире һьлдьда. Ле һежа бу кö әм wедәре ман, чьмки нава чәнд мәһада, кʹомәк саз бу. Ахьрийеда, wәкә 30 мәрьв тʹәви кʹе жи мә һинбуна Кʹьтеба Пироз дәрбаз дькьр һатьнә сәр рʹийа рʹастийе!

Әw һʹәму qәwьмандьн дьле мә һе зәʹф бь рʹазибуне һьндава Йаһоwа тʹьжә кьр, чьмки әwи тʹьме аликʹари дьда wан, йед кö Пʹадшатийа wи дьгәрʹийан. Һәрге жи мәрьв нькарьн али мә бькьн у кʹеләка мә ниньн, Йаһоwа тʹьме кʹеләка мә йә у һазьр ә али мә бькә (Зәб. 121:1-3).

ХWӘДЕ БЬ ДӘСТЕ ХWӘЙИ РʹАСТЕ АЛИ МЬН ДЬКЬР

Сала 1958-да, Нийу Йоркеда сәр стадиона «Йанке» у «Поло Граундс», щьвата мәзьнә һʹәмдьнйайе дәрбаз дьбу. Мьн хwә пешда да ньвисаре, wәки дьхwазьм һәрʹьм сәр щьвата мәзьн, у филиала Австрйайе жь мьн пьрси кö һәла әз дьхwазьм wәки Мәкʹтәба Гиләд дәрбаз бьм. Мьне ча әв qәдьре мәзьн жь дәсте хwә бәрʹда, мьн дәрберʹа гот: «Әре!».

Гиләдеда, әз кʹеләка Мартин Поетсингер рʹуньштьбум. Әw алийе Натсистада гьртигәһеда гәләк чәрчьри. Wәʹдә дәрбаз бу, паше әw бу әндәме Кʹома Рʹебәрийе. Wәʹде һинбуна Гиләдеда, әwи щара дькьрә пʹьстә-пʹьст: «Ерика, сәр зьмане Алмани әв чь те һʹәсабе?»

Чахе һинбун нивида дәрбаз бу, Нейтан Нор кʹьфшкьрьнед мә әʹлам кьр. Әз Парагöwайеда һатьмә кʹьфшкьрьне. Һьнге әз гәләк щаһьл бум, у лазьм бу баве мьн qайил бә wәки әз дәрбази wәлатәки дьн бьм. Гава кö баве мьн qайил бу, Адареда сала 1959 әз чумә Парагöwайе. Әз Асунсйонеда мала бона мисйонерада һатьмә кʹьфшкьрьне, тʹәви һәвалхьзмәткʹара тʹәзә.

Зутьрәке әз рʹасти Wолтер Брайт һатьм, йе кö мәкʹтәба Гиләд хьлаз кьрьбу у бьбу мисйонер. Wәʹдә шунда, мә һәв станд у тʹәвайи рʹасти чәтьнайа дьһатьн. Чахе әм рʹасти тәнгасийа дьһатьн, мә созе Йаһоwа дьхwәнд кö Ишайа 41:10-да ньвисар ә: «Тö нәтьрсә жь бәр кö әз бь тәрʹа мә; ль дора хwә нәньһерʹә, жь бәр кö Хwәдайе тә әз ьм; әзе тә зәхм [хwәй] бькьм». Әw гьли мә qәwи кьрьн кö һʹәта әм Хwәдерʹа амьн дьминьн, у пʹадшатийа wи датиньн щийе пешьн, әw wе тʹö щар мә нәһелә.

Wәʹдә шунда, әм һатьнә кʹьфшкьрьне незики синоре Бразилйайе. Wедәре кʹәшиша нав щаһьла дьдан wәки кәвьра бавежьн мала мә, кʹижан кö ида һʹаләки хьрабда бу. Паше Wолтер тʹәви сәроке полиса һинбуна Кʹьтеба Пироз дәстпекьр. Әwи сәроки öса кьр wәки офисеред полисе һʹәфтеки бәр мала мә бьсәкьньн, у паши ве йәке ида тʹö кәси әм ащьз нәдькьрьн. Һьнә wәʹдә шунда, бәр синоре Бразилйайе әм дәрбази маләкә һе баш бун. Әw йәк гәләк баш бу, чьмки мә дькарьбу щьвин дәрбаз кьра һьн Парагöwайеда һьн жи Бразилйайеда. Һʹәта әм жь wи щийи бьчуна, wедәре ида 2 щьватед бьчʹук һәбун.

ЙАҺОWА ҺʹӘТА ИРО ПЬШТОВАНЕ МЬН Ә

Һʹәкима мьнрʹа готьн, wәки әзе нькарьбьм зарʹа биньм, ле сала 1962 әм әʹщебмайи ман чахе пеһʹәсийан кö әз гьран ьм. Ахьрийеда әм дәрбази Һолиwуде, Флоридайе бун, незики малбәта Wолтер. Бь сала, мә тʹәви Wолтер нькарьбу ча пешәнг хьзмәт кьра, чьмки әм гәрәке мьqати нәфәред хwә буна. Ле йәкә һьнге жи Пʹадшатийа Хwәде әʹмьре мәда щийе пешьн дьгьрт (Мәт. 6:33).

Сала 1962, мәһа Мьждаре, әм һатьнә Флоридайе. Әм әʹщебмайи ман кö щьмәʹта wедәре хwәш найе кö хушк-бьред бь чʹәрме рʹәш у чʹәрме сьпи тʹәвайи тʹоп бьн. Әwан хушк-бьра щурʹә-щурʹә мьһалада хьзмәт дькьрьн. Ле Йаһоwа тʹö щар фьрqийе накә ортʹа раса, ләма жи wәʹдә шунда әw щьват бунә йәк. Ве йәкеда әшкәрә дәсте Йаһоwа дьһатә хане, у ньһа wедәре гәләк щьват һәнә.

Йазьх, ле Wолтер сала 2015 жь рәqе мьр. Әw малхеки гәләк баш бу, мә тʹәвайи 55 сала жит. Әwи Йаһоwа гәләк һʹьз дькьр у али хушк-бьра дькьр. Әз гәләк һивийа wи wәʹдәйи мә кö диса wи бьвиньм чахе әw жь мьрьне рʹабә (Кʹар. Шанд. 24:15).

Әз бәхтәwар ьм кö 40 сала зедәтьр ча хьзмәткʹара һәртʹьм хьзмәт дькьм, у гәләк шабун у кʹәрәма жи һʹәта ньһа дьвиньм. Мәсәлә, мьн у Wолтер пе чʹәʹве хwә дит кö чаwа 136 мәрьв, тʹәви кʹижана мә һинбуна Кʹьтеба Пироз дәрбаз дькьр, һатьнә ньхöмандьне. Бәле, мә чәтьнайед гьран жи дит, ле бона ве йәке мә тʹö щар хьзмәтийа хwә Хwәдайе амьнрʹа нәда сәкьнандьне. Дәwсе, әм һе незики wи дьбун у мә итʹбарийа хwә wи дьани, кö әw wе wәʹдәда чәтьнайед мә сафи кә. У тʹьме öса жи дьбу (2 Тимтʹ. 4:16, 17).

Әз гәләк бира Wолтер дькьм, у хьзмәтийа пешәнгти али мьн дькә сәбьр кьм. Дьле мьн ша дьбә чахе әз мәрьва һин дькьм, илаһи чахе дәрһәqа рʹабуна мьрийа гьли дькьм. Бь рʹастийе мьн гәләк дәрәщада дьдит, wәки Йаһоwа тʹö щар мьн наһелә у нә жи wе бьһелә. Әw ль гора созе хwә али мьн дькә, мьн хwәй дькә у «бь дәсте рʹасте» дәсте мьн дьгьрә (Иша. 41:10).