Нандьрунәкә Мәзьн!

ИСА пʹехәмбәрти кьр, wәки шагьртед wи wе wан рʹожед ахьрийеда, жь гәләк нандьруне шабуне бьстиньн (Мәт. 9:37; 24:14). Дина хwә бьдьне, чаwа гьлийед wи бь щурʹәки мәхсус әʹйан бун Закарпатскайа Областеда, (Украин). Нава се шәһәред дор бәре wи щийи 50 щьват һәнә у 5 400 мьзгинвана зедәтьр.a Бь рʹасти һәрге ван се шәһәрада һәжмара мәрьва һʹәсаб кьн, дәрте кö жь 4 мәрьва 1 Шәʹде Йаһоwа йә.

Ле чаwа wан щийада хьзмәти дьчә? Бьраки мә бь наве Васили, гьли дькә: «Мәрьвед wьра qәдьре Кʹьтеба Пироз дьгьрьн, һәqийе qимәт дькьн, тʹәви нәфәред хwә незик ьн, у һʹәлал аликʹарийа һәвдö дькьн. Рʹаст ә әwана һәр гав тʹәви баwәрийа мә qайил ниньн, ле чахе жь Кʹьтеба Пироз wанрʹа тьштәки нишан дьки, әwана рʹьнд гöһ дьдьн».

Фәʹмдари йә wәки хушк-бьред wьра рʹасти һьнә чәтьнайа жи тен, чахе wи щийида хьзмәт дькьн кʹидәре һаqас зәʹф мьзгинван һәнә. Мәсәлә, щьватәкеда 134 мьзгинван һәнә, ле мьһала wанда тʹәне 50 мал ьн. Ле чаwа әw мьзгинван ве дәрәщеда хwә дьдьнә кʹьфше?

Гәләк хушк-бьра дәстпекьрьн хьзмәт кьн wан щийада, кʹидәре һʹәwщәти һәйә. Бьраки мә бь наве Йонаш, кö 90 сали йә, дьбежә: «Мьһала мәда мьзгинванәкирʹа 2 мал дькʹәвьн. Әз гöнде хwәда хьзмәт дькьм, ле һʹәта кö сьһʹәт-qәwата мьн дьһа хьраб нәбьбу, мьн öса жи хьзмәт дькьр щики дьн, кʹидәре кö щьват тʹöнә у 160 километр дур ә. Wедәре мьн сәр зьмане Һунгари мьзгини бәла дькьр». Мьзгинван сәва кö мьһалед дьнда аликʹарийе бьдьн, гәрәке qöрбана бькьн, демәк һьнәки зәʹмәте бьвиньн. Йонаш дьбежә: «Сәва бьгьһижьмә трене, әз шәбәqе сьһʹәта 4:00 рʹадьбум. Мьн wедәре мьзгини бәла дькьр һʹәта сьһʹәта 18:00, у диса пе трене дьчумә мала хwә. Мьн һʹәфтекеда 2 йан 3 щара öса дькьр». Гәло Йонаш пʹошман буйә кö һаqас щәфа кʹьшандийә? Әw дьбежә: «Wи щурʹе хьзмәтийеда мьн шабунәкә гәләк мәзьн станд. Дьле мьн ша дьбә кö wедәре мьн аликʹари да малбәтәке, wәки рʹастийе пебьһʹәсьн».

Фәʹмдари йә һʹәму мьзгинван жь wи щийи wе нькарьбьн ль щийед дур хьзмәт кьн. Ле әwана һәр тьшти дькьн сәва мьһала хwәда рʹьнд хьзмәт кьн. Бь сайа хирәта wан, сала 2017 сәр Евара Биранине жь wан се шәһәра мәрьв һаqас тʹоп бьбун, кö wәкә дö щара жь мьзгинвана зедәтьр бун, демәк ниве бьнәлийед wан шәһәра һатьбун. Бәле, фьрqи тʹöнә әм кʹидәре хьзмәт дькьн, йәкә әм дькарьн «шьхöле Хöданда пешда һәрʹьн» (1 Корн. 15:58).