Щаһьлно Мьqабьли Мире-Щьна Бьсәкьньн

1, 2. а) Бь сайа чь щаһьл шәрʹе рʹöһʹанида сәрдькʹәвьн? (Бьньһерʹә шькле әʹwльн.) б) Ве готареда әме дәрһәqа чь шеwьр кьн?

ПАWЛОСЕ шанди Мәсиһи бәрамбәри әскәра кьр, йед кö шәрʹда ньн. Бәле, әм бь рʹасти шәрʹе рʹöһʹанида ньн, ле дьжмьнед мә реали нә. Шәйтʹан у щьнед wи шәрʹда щерʹьбанди у qәwи нә. Аликива дькарә бе кʹьфше, wәки wи шәрʹида әм нькарьн сәркʹәвьн, илаһи Мәсиһийед щаһьл. Ле гәло щаһьл qә дькарьн ви шәрʹе тʹәви дьжмьнед зöлмда сәркʹәвьн? Бь рʹасти әwана дькарьн сәркʹәвьн у сәрдькʹәвьн жи! Ле чаwа? Әwана «йәктийа Хöданда qәwат» дьбьн, демәк qәwате жь Хwәде дьстиньн. Хенщи ве йәке, әwана мина әскәред һинкьри, «һәр чʹәке Хwәде» ль хwә дькьн. (Бьхунә Әфәси 6:10-12.)

² Чахе Паwлос дәрһәqа ве мәсәле хәбәр дьда, дьqәwьмә әwи һьнге чʹәкед әскәред Рʹоме дьда бәр чʹәʹве хwә (Кʹар. Шанд. 28:16). Wәрә әм леколин бькьн әве мәсәле, у wәʹде шеwьркьрьне дина хwә бьдьне кö һьнә щаһьл чь дьбежьн дәрһәqа чәтьнайа у кʹара хwәкьрьна һәр чʹәкед рʹöһʹани.

КʹӘМБӘРА РʹАСТИЙЕ

3, 4. Чаwа рʹастийа жь Кʹьтеба Пироз мина кʹәмбәра әскәре Рʹоме йә?

³ Бьхунә Әфәси 6:14. Сәр кʹәмбәред әскәред Рʹомайи, һʹәсьнед пәʹн һәбун, кʹижан кö пьшта wан хwәй дькьрьн. Әw кʹәмбәр öса дьһатә чекьрьне, wәки гьранийа зьрьһе кö сәр синг бу, бьгьрә. Сәр һьнә кʹәмбәра öса жи һәбун һʹәсьнед qәwи кö шур у кʹер пева дькьрьн. Чахе кʹәмбәр qайим пьшта әскәрева гьредайи бу, әw әскәр хwәда баwәр бу чахе дьчу шәрʹ.

⁴ Мина кʹәмбәре, рʹастийед кö әм жь Хәбәра Хwәде педьһʹәсьн, мә жь һинкьрьнед qәлп хwәй дькьн (Йуһʹн. 8:31, 32; 1 Йуһʹн. 4:1). У чьqас зәʹф әм рʹастийед Хwәде һʹьз бькьн, һаqас wе мәрʹа һеса бә «зьрьһʹе» хwә кьн, демәк ль гора принсипед Хwәде бьжин (Зәб. 111:7, 8; 1 Йуһʹн. 5:3). Хенщи ве йәке, чахе әм рʹастийед жь Хәбәра Хwәде рʹьнд фәʹм дькьн, әм дькарьн һе qәwи бьсәкьньн у хwә жь дьжмьна хwәй кьн (1 Пәт. 3:15).

5. Чьрʹа әм гәрәке тʹьме рʹастийе хәбәр дьн?

⁵ Чахе рʹастийа Кʹьтеба Пироз бь симболик мәва йә, әме һелан бьн ль гора ве йәке бьжин у тʹьме рʹастийе бежьн. Ле чьрʹа әм гәрәке хwә жь дәрәwийе дур бьгьрьн? Чьмки дәрәw әw һәйә qьрʹмәкә qәwи дәсте Шәйтʹанда. Дәрәwи һьн wанрʹа зийане тинә йед кö дәрәwа дькьн, һьн жи wанрʹа, кʹе кö wан дәрәwа баwәр дькә (Йуһʹн. 8:44). Ләма жи сәва кö хwә жь ве йәке хwәй кьн, әм гәрәке хwә жь дәрәwийе дур бьгьрьн (Әфәс. 4:25). Ле әw йәк һеса нинә. Абигаил йа кö 18 сали йә, дьбежә: «Нә һәртʹьм дькарә дәст бьдә, рʹастийе хәбәр ди, илаһи һәрге дәрәwи дькарә тә жь дәрәща чәтьн хьлаз кә». Ле гәло чьрʹа Абигаил дьхwазә тʹьме рʹастийе хәбәр дә? Әw дьбежә: «Чахе әз рʹастийе дьбежьм, исафа мьн бәр Йаһоwа тʹәмьз дьминә. У де-баве мьн öса жи һәвалед мьн итʹбарийа хwә мьн тиньн». Викториа кö 23 сали йә, дьбежә: «Чахе тö рʹастийе дьбежи у баwәрийеда qайим дьсәкьни, дьбәкә мәрьвед дьн qәрфа тә бькьн. Ле тö йәкә тʹьме кʹаре дьстини: Тö хwәда баwәр дьби, хwә һе незики Йаһоwа тʹәхмин дьки, у мәрьве кö тә һʹьз дькьн, һе qәдьре тә дьгьрьн». Рʹасти жи, һежа йә әм һәр гав «рʹастийе мина кʹәмбәре ль пьшта хwә бьшьдиньн».

ЗЬРЬҺʹА ҺӘQИЙЕ

6, 7. Чьрʹа һәqи бәрамбәри зьрьһʹ дьбә?

⁶ Щурʹәк зьрьһʹа әскәре Рʹомайи жь кöдоред һʹәсьн бу, әw кöдор дьрежошки бун, у пе чʹәрм һәвва гьредайи бун. Әw зьрьһʹ синг у пьшта әскәр дадьда. Мьлед әскәр жи бь wи щурʹәйи пе һʹәсьн дадайи бун. Кʹьнщед wи щурʹәйи рʹечуйин һьнәки чәтьн дькьр, у öса жи лазьм бу әскәр тʹьме бьньһерʹийа һәла әw һәвгьредана һʹәсьнед зьрьһʹ сьст нәбунә. Ле әw зьрьһʹ дьл у навдьле әскәр жь шур у тира хwәй дькьр.

⁷ Бәле, принсипед Йаһоwайи һәq жи мина зьрьһʹ, дьле мәйи симболик хwәй дькә (Мәтʹлк. 4:23). Әскәр тʹö щар зьрьһʹа жь һʹәсьн сәр металәкә сьст нагöһезә. Әм жи гәрәке тʹö щар принсипед Йаһоwа нәгöһезьн тʹәви wан тьшта, чь кö әм хwәха һʹәсаб дькьн кö рʹаст ә. Мәрьв һаqас билан ниньн, wәки дьле хwә хwәха хwәй кьн (Мәтʹлк. 3:5, 6). Һе баш ә әм һәр гав зьрьһʹа хwәйә симболик кö Йаһоwа дайә мә, рʹьнд бьдьнә сәр дьле хwә.

8. Чьрʹа һежа йә пе принсипед Йаһоwа бьжин?

⁸ Дьqәwьмә тö щара дьфькьри wәки принсипед Йаһоwайи рʹаст баргьран ьн, йан жи азайа тә синор дькьн. Данийел, кö 21 сали йә, дьбежә: «Дәрсдар у һәвалдәрсханед мьн, мьн дькʹәньн чьмки әз ль гора Кʹьтеба Пироз дьжим. Wәʹдәки әз хwәда дöдьли дьбум у әз кʹәтьмә депресийе». Ле гәло ча Данийел жь ве чәтьнайе дәркʹәт? Әw гьли дькә: «Ахьрийеда, мьн дит кö чьqас керһати йә пе принсипед Йаһоwа бьжим. Һьнә ‹һәвалед› мьн бунә наркоман; һьнәк жи жь мәкʹтәбе дәркʹәтьн. Йаһоwа бь рʹасти мә хwәй дькә». Медисон кö 15 сали йә, дьбежә: «Мьнрʹа һеса нинә хwә ль принсипед Йаһоwа бьгьрьм у нәкʹәвьмә бәр байе һʹьш-аqьле щаһьлед дьн». Ле әw чь дькә сәва нәкʹәвә бәр байе wан? Әw дьбежә: «Әз тʹьме дькьмә бира хwә, wәки наве Йаһоwа сәр мьн ә у Шәйтʹан бь ве щерʹьбандьне сәр мьн гöлә дькә. Чахе әз сәрдькʹәвьм, дьле мьн рʹьһʹәт ә».

«СОЛ НЬГЕД WӘДА, БОНА МЬЗГИНИЙА ӘʹДЬЛАЙИЙЕ ҺАЗЬР СӘКЬНИ БЬН»

9-11. а) Кʹижан солед симболик Мәсиһи хwә дькьн? б) Чь дькарә али мә бькә дьһа һеса мьзгинийе бәла кьн?

⁹ Бьхунә Әфәси 6:15. Әскәре Рʹоме һәрге сол пʹенәкьра, wе нькарьбуйа бьчуйа шәрʹ. Әw сол, кö мина чарьха бун, жь тʹелед чʹәрм бун кö ньгва гьредайи бун у бь сайа ве йәке әскәр рʹьнд рʹера дьчу. Әв сол öса дьһатә чекьрьне wәки qәwи у рʹьһʹәт бьн.

¹⁰ Әв солед әскәред Рʹоме али wан дькьр, wәки шәрʹ рʹьнд бьвьн, öса жи бь симболик солед кö Мәсиһи пʹедькьн, али wан дькьн мьзгинийа әʹдьлайе бәла кьн (Иша. 52:7; Рʹом. 10:15). Ле мерхаси жи лазьм ә, wәки әм мьзгинийе бәла кьн. Боу кö 20 сали йә, дьбежә: «Әз дьтьрсийам һәвалдәрсаханед хwәрʹа шәʹдәтийе бьдьм. Мьн шәрм дькьр. Ньһа әз фәʹм дькьм кö нәлазьм бу мьн шәрм кьра, у әз гәләк ша мә кö щаһьлед дьнрʹа шәʹдәтийе дьдьм».

¹¹ Гәләк щаһьл дьбежьн кö чахе әwана сәва шәʹдәтийе рʹьнд һазьр дьбьн, әwана һе хwәда баwәр дьбьн. Ле һун ча дькарьн хwә һазьр кьн? Щулиа кö 16 сали йә, дьбежә: «Әз тʹьме әʹдәбйәта дькьмә чәнтʹе хwәйи мәкʹтәбе. Öса жи әз рʹьнд гöһ дьдьм һәвалдәрсханед хwә, чахе әwана фькьред хwә дьбежьн у дәрһәqа баwәрийа хwә гьли дькьн. Паши ве йәке, әз ида заньм ча али wан бькьм. Чахе әз һазьр ьм, әз дькарьм тʹәви wан хәбәр дьм дәрһәqа ве йәке, чь жи дькарә wанрʹа кʹаре бинә». Макензи, кö 23 сали йә, дьбежә: «Һәрге тö хәйсәтда нәрм и у рʹьнд гöһ дьди, тöйе фәʹм бьки wәки чәтьнайед щаһьлед дьн чь нә. Әз һʹәму материала дьхуньм йед кö бона щаһьла тенә дәрхьстьне. Wи щурʹәйи әз дькарьм дина wан бьдьм сәр Кʹьтеба Пироз, йан жи сәр малпәра мә jw.org, кö дькарә али wан бькә». Пе гьлийед wан щаһьла те кʹьфше, wәки әм чьqас рʹьнд һазьр бьн, һаqас wе «солед» мә ньгед мә рʹьнд бьгьрьн.

МӘРТʹАЛА БАWӘРИЙЕ

12, 13. Кʹижан ьн һьнә «тиред агьр» кö Шәйтʹан давежә?

¹² Бьхунә Әфәси 6:16. «Мәртʹала» мәзьн, кʹижан кö әскәред Рʹоме дьгьртьн, дьрежошки бу у жь мьл һʹәта чокед wи дадьда. Әwе мәртʹале wи жь гöла у жь тира хwәй дькьр.

¹³ Һьнә «тиред агьрийә» кö Шәйтʹан дькарә бавежә сәр тә, әw һәйә дәрәwед дәрһәqа Йаһоwа, йанчь әw бона тә хәм накә у тә һʹьз накә. Иде кö 19 сали йә, дәрһәqа хwә дьфькьрә wәки әw нәһежайи һʹьзкьрьна Хwәде йә. Әw дьбежә: «Гәләк щар әз дьфькьрьм, кö Йаһоwа жь мьн дур ә у нахwазә бьбә Досте мьн». Ле гәло Иде ча шәрʹ дькә тʹәви wан фькьра? Әw гьли дькә: «Щьват гәләк баwәрийа мьн дьшьдиньн. Бәре әз сәр щьвата рʹудьньштьм у мьн тʹö щар щаба хwә нәдьда, чьмки дьфькьрим кö тʹö кәс wе нәхwазә мьн бьбьһе. Ле ньһа, әз бона щьвате хwә һазьр дькьм у дö йан се щара щаба хwә дьдьм. Бәле, мьнрʹа нәһеса йә, ле чахе әз öса дькьм әз хwә баш тʹәхмин дькьм. У хушк-бьра жи гәләк дьл дьдьнә мьн. Паши щьвате әз тʹьме пе фькьред öса дәрдькʹәвьм, кö Йаһоwа мьн һʹьз дькә».

14. Сәрһатийа Иде чь дьдә кʹьфше?

¹⁴ Сәрһатийа Иде рʹастийа фәрз әʹйан дькә: Мәртʹалед кö дьданә әскәра, чапа wан стандарт бу. Ле баwәри öса нинә, чьмки баwәрийа мә дькарә йан зедә бә йан жи кем бә, әw йәк мәва гьредайи йә (Мәт. 14:31; 2 Тʹеслн. 1:3). Әм гәрәке алийе хwәда һәр тьшти бькьн, wәки баwәрийа хwә тʹьме qәwи кьн у мәзьн кьн!

КʹÖМЗЬРЬҺʹЕ ХЬЛАЗБУНЕ

15, 16. Чь щурʹәйи һеwи мина кʹöмзьрьһʹ ә?

¹⁵ Бьхунә Әфәси 6:17. Кʹöмзьрьһʹе кö әскәре Рʹоме дькьрә сәре хwә, сәре әскәр, патьк у рʹуйе wи хwәй дькьр. Сәр һьнә кʹöмзьрьһʹа һәбун щийе гьртьне, сәва әскәр бькарьбә дәсте хwәда бьгьрә.

¹⁶ Чаwа кʹöмзьрьһʹ мәжийе әскәр хwәй дькә, öса жи баwәри у һеwийа сәр «хьлазбуне» фькьр у һʹьш-аqьле мә хwәй дькә (1 Тʹеслн. 5:8; Мәтʹлк. 3:21). Һеwи али мә дькә wәки һʹьш-аqьле мә сәр созед Йаһоwа бә, у әw йәк али мә дькә wәки әм сәр чәтьнайа рʹаст бьньһерʹьн (Зәб. 27:1, 14; Кʹар. Шанд. 24:15). Ле һәрге әм дьхwазьн кʹöмзьрьһʹ мә хwәй кә, әм гәрәке нә кö әw бьгьрьнә дәстед хwә, ле бькьнә сәре хwә.

17, 18. а) Ча Шәйтʹан дькарә öса бькә кö әм кʹöмзьрьһʹ жь сәре хwә дәрхьн? б) Ча әм дькарьн нишан кьн, wәки әм пе дәрәwед Шәйтʹан найенә хапандьне?

¹⁷ Ле чаwа Шәйтʹан дькарә öса бькә кö әм кʹöмзьрьһʹ жь сәре хwә дәрхьн? Дина хwә бьдьне, Шәйтʹан ча ве йәкеда дьхwәст Иса бьщерʹьбинә. Бешьк, Шәйтʹан заньбу wәки ахьрийеда Иса wе сәрwертийе инсанәте бькә. Ле Иса гәрәке һивийа wи wәʹдәйи буйа кö Йаһоwа кʹьфш кьр. У пешийа ве йәке әwи гәрәке щәфа бькʹьшанда у бьмьра. Ләма жи Шәйтʹан соз да кö һәрге Иса сәре хwә бәр wи дайнә, әw wе һәма ве дәме бьбә сәрwере дьнйайе (Луqа 4:5-7). Иро жи Шәйтʹан занә, wәки Йаһоwа wе һәр тьшт дьнйа тʹәзәда бьдә мә. Бәле, әм гәрәке һивийа wи wәʹдәйи бьн, ле һʹәта һьнге әм дькарьн рʹасти тәнгасийа жи бен. Ләма жи Шәйтʹан һәр тьшти дькә сәва әм пәй жийина баш кʹәвьн, кö ньһа рʹьһʹәт у баш бьжин. Әw дьхwазә wәки әʹмьре мәда һәбук сәр щийе пешьн бә, wәки әм пәй кʹәвьн сәва ньһа qазанщ кьн. Әw öса дькә, wәки әʹмьре мәда Пʹадшатийа Хwәде щийе пешьн нәгьрә (Мәт. 6:31-33).

¹⁸ Гәләк щаһьлед Мәсиһи, накʹәвьнә ве тʹәлька Шәйтʹан. Киана кö 20 сали йә, дьбежә: «Әз заньм wәки тʹәне Пʹадшатийа Хwәде дькарә һʹәму чәтьнайед мә сафи кә». Ле гәло чаwа әw баwәри сәр фькьр у кьред wе һʹöкöм дькә? Әw дьбежә: «Әw йәк кö әз һивийа Щьнәте мә, али мьн дькә нәкʹәвьмә пәй тьштед ве дьнйайе. Әз нәхwазьм wәки фәрәсәтед хwә бона кʹара хwә бьдьмә хәбате, йан жи пәй кариерайе кʹәвьм у пешдачуйи бьм. Дәwса ве йәке, әз wәʹдә у qәwата хwә хәрщ дькьм сәва бьгьһижьмә нетед хwәйә рʹöһʹани».

ШУРЕ РʹÖҺʹ, ДЕМӘК ХӘБӘРА ХWӘДЕ

19, 20. Ча әм дькарьн Хәбәра Хwәде һе рʹьнд бьдьнә хәбате?

¹⁹ Шуре кö әскәред Рʹомайи wәʹде Паwлосда дьданә хәбате, дьрежайа wи wәкә 50 сантиметр бу. Хәбьтандьна шурда әw әскәр һостә бун, чьмки әwана һәр рʹож һин дьбун.

²⁰ Паwлос Хәбәра Хwәде бәрамбәри шур дькә кö Йаһоwа дайә мә. Ле әм гәрәке рʹьнд һин бьн сәва әw шур бь һостәти бьдьнә хәбате, чахе дәрһәqа баwәрийа хwә шәʹдәтийе дьдьн, йан жи чахе лазьм ә тьштәкида фькьр у ньһерʹандьна хwә бьгöһезьн (2 Корн. 10:4, 5; 2 Тимтʹ. 2:15). Ле һун ча дькарьн ве йәкеда пешда һәрʹьн? Себастиан кö 21 сали йә, дьбежә: «Әз жь Кʹьтеба Пироз хwәрʹа башqә жь һәр сәрики рʹезәке дьньвисьм. Öса әз хwәрʹа рʹезед кö гәләк һʹьз дькьм тʹоп дькьм. Әw йәк али мьн дькә кö ньһерʹандьна мьн мина йа Йаһоwа бә». Данийел, бәʹса кʹижани мә жоре кьр, дьбежә: «Чахе әз Кʹьтеба Пироз дьхуньм, әз хwәрʹа башqә wан рʹеза дьньвисьм йед кö дькарьн али мәрьва бькьн, кʹижан кö хьзмәтийеда рʹасти мьн тен. Мьн дит wәки мәрьв рʹьнд гöһ дьдьн мьн, чахе дьвиньн кö әз Кʹьтеба Пироз һʹьз дькьм у алийе хwәда һәр тьшти дькьм сәва али wан бькьм».

21. Чьрʹа әм гәрәке жь Шәйтʹан у щьна нәтьрсьн?

²¹ Жь гьлийед wан щаһьла кö мә жоре шеwьр кьр, те кʹьфше wәки нәлазьм ә әм жь Шәйтʹан у щьнед wи бьтьрсьн. Бәле, әwана qәwат ьн, ле йәкә әм дькарьн сәркʹәвьн. Һьн жи һьндьк майә кö әwана ида тʹöнә бьн. Зутьрәке, wәʹде Һʹәзарсалийа Сәрwертийа Мәсиһ, әwана wе бенә гьредане, у паши ве йәке wе бь тʹәмами qьрʹа wан бе (Әʹйан. 20:1-3, 7-10). Әм һаш жь дьжмьне хwә, жь тʹәльк, у нетед wи һәнә. Пе аликʹарийа Йаһоwа әм дькарьн qәwи мьqабьли wи бьсәкьньн у сәркʹәвьн!