Дьжмьне Хwә Нас кә

1. Әдәнеда, Йаһоwа чь әʹйан кьр дәрһәqа дьжмьне мә?

БЕШЬК, Адәм заньбу wәки мәʹр нькарьн хәбәр дьн. Ләма жи дьбәкә әw дьфькьри, wәки әʹфьринәки рʹöһʹани бь ви мәʹри тʹәви Һеwайе хәбәр дайә (Дәстп. 3:1-6). Дькарьн бежьн, wәки Адәм у Һеwайе дәрһәqа wи кәсе рʹöһʹани тьштәк ньзаньбун. Йәкә, Адәм бь һʹәмде хwә бьжарт кö пьшта хwә бьдә Баве хwәйи әʹзмана у тʹәви wи кәсе нәнас бу йәк, чьмки мьqабьли qьрара Хwәде дәркʹәт (1 Тимтʹ. 2:14). Ле Йаһоwа дәрберʹа дәстпекьр дәрһәqа wи дьжмьне кö Адәм у Һеwа хальфандьн, һе зедә тьшт әʹйан кә у соз да, wәки wе ахьрийеда wи кʹöта кә. Ле Йаһоwа öса жи пешда гот, wәки әw әʹфьрине рʹöһʹани кö бь мәʹр хәбәр да, wе мьqабьли wан дәре йед кö Хwәде һʹьз дькьн (Дәстп. 3:15).

2, 3. Мәʹни дьбәкә чь бу кö дәрһәqа Шәйтʹан, пешийа һатьна Мәсиһ һьндьк дьһатә готьне?

² Йаһоwа наве wи мьлйакʹәте кö мьqабьли wи рʹабу, тʹö щар әʹйан нәкьрьбу.a У тʹәне паши wәкә 2 500 сала Хwәде сафи кьр, wәки сәрнаве wи дьжмьни әʹйан кә (Иб. 1:6). Бь рʹасти Ньвисаред Ибранида тʹәне се кʹьтеб бәʹса Шәйтʹан дькьн, 1 Дирок, Ибо, у Зәкәрйа. Әw нав те һʹәсабе «Йе Мьqабьл». Ле гәло чьрʹа пешийа һатьна Мәсиһ дәрһәqа wи дьжмьни һьндьк һатә готьне?

³ Те кʹьфше Йаһоwа нәхwәстийә, wәки Ньвисаред Ибранида гәләк тьшт дәрһәqа Шәйтʹан у кьред wи бе готьне. Нета Йаһоwайә сәрәкә Ньвисаред Ибранида әw бу, wәки Мәсиһ бе әʹйанкьрьне у щьмәʹта Хwәде wи нас кә (Луqа 24:44; Галт. 3:24). Гава әw йәк һатә сери у Мәсиһ һат, Йаһоwа wи у шагьртед wи да хәбате, сәва һе зедә әʹйан кьн дәрһәqа Шәйтʹан у wан мьлйакʹәта, йед кö тʹәви wи бунә йәк.b Әw йәк әʹщебмайи нинә, чьмки Иса у йед бьжарти wе qьрʹа Шәйтʹан у пәйчуйед wи биньн (Рʹом. 16:20; Әʹйан. 17:14; 20:10).

4. Чьрʹа әм гәрәке жь Мире-щьна нәтьрсьн?

⁴ Пәтрусе шанди Шәйтʹан Мире-щьна нав дькә ча «шер», йе кö «мьрʹә-мьрʹа wи йә», ле Йуһʹәнна wи нав дькә «мәʹр» у «зийа» (1 Пәт. 5:8; Әʹйан. 12:9). Ле әм гәрәке жь Шәйтʹан нәтьрсьн, чьмки qәwата wи бь синор ә. (Бьхунә Аqуб 4:7.) Йаһоwа, Иса у мьлйакʹәтед амьн, мә хwәй дькьн. Әм пе аликʹарийа wан дькарьн мьqабьли дьжмьне хwә дәрен. Ле әм гәрәке бьзаньбьн щаба wан се пьрсед сәрәкә: Qәwат у һʹöкöме Шәйтʹан чьqас ә? Әw һʹöкöме хwә ча дьдә хәбате? Гәло һәнә тьшт кö әw нькарә бькә? Wәрә әм щаба ван пьрса шеwьр кьн, у öса жи бьньһерʹьн чь дәрса дькарьн һин бьн.

QӘWАТ У ҺʹÖКÖМЕ ШӘЙТʹАН ЧЬQАС Ә?

5, 6. Чьрʹа сәрwертийед мәрьва нькарьн гöһастьнед öса бькьн кö мәрьв гәләк һʹәwщә нә?

⁵ Гәләк мьлйакʹәт тʹәви рʹабәрибуна Шәйтʹан бунә йәк. Пешийа Селаве, Шәйтʹан һьнә жь wан мьлйакʹәта һелан кьр, wәки тʹәви жьна бенамусийе бькьн. Кʹьтеба Пирозда дәрһәqа зийа, демәк Шәйтʹан, те готьне wәки әwи жь се пʹара пʹарәкә стәйркед әʹзмен тʹәви хwә кʹьшанд (Дәстп. 6:1-4; Щьһуд. 6; Әʹйан. 12:3, 4). Чахе әwан мьлйакʹәта пьшта хwә данә малбәта Хwәде, wана алийе Шәйтʹан гьрт у хwә кьрьн бьн һʹöкöме wи. Әw рʹабәр нә кö тʹәне кʹомәк ә, йа кö чәтьнайа пешда тинә, ле Шәйтʹан чʹәʹв дайә Пʹадшатийа Хwәде, у сәрwертийа хwә кö найе дитьн, саз кьрийә. Ве сәрwертийеда әw ә пʹадша, у әwи һʹöкöм дайә щьна жи wәки сәрwертийе сәр дьнйайе бькьн (Әфәс. 6:12).

⁶ Шәйтʹан бь сайа сәрwертийа хwәйә кö найе дитьн, һʹöкöм дькә сәр һʹәму сәрwертийед мәрьва. Әw йәк рʹьнд һатә кʹьфше чахе Шәйтʹан «һʹәму пʹадшатийед дьнйайе» нишани Иса кьр у жерʹа гот: «Әзе рʹәwш у сәрwерийа ван һʹәмуйа бьдьмә дәсте тә, чьмки мьнрʹа һатийә дайине у кʹерʹа кö бьхwазьм әзе бьдьме» (Луqа 4:5, 6). Бәле, һәнә гәләк сәрwертийед мәрьва кö тьштед баш дькьн бона бажарванед хwә, у һьнә сәрwер бь дьле тʹәмьз дьхwазьн али мәрьва бькьн. Ле йәкә тʹö сәрwер нькарә гöһастьнед öса бькә, кö мәрьв гәләк һʹәwщә нә (Зәб. 146:3, 4; Әʹйан. 12:12).

7. Шәйтʹан ча хенщи сәрwертийед мәрьва, öса жи рʹелигийа qәлп у система комерси дьдә хәбате? (Бьньһерʹә шькле әʹwльн.)

⁷ Шәйтʹан у щьн рʹелигийед qәлп у система комерси дьдьнә хәбате, сәва «тʹәмамийа дьне» бьхальфиньн (Әʹйан. 12:9). Шәйтʹан дәрһәqа Йаһоwа бь рʹелигийед qәлп дәрәwа бәла дькә. Хенщи ве йәке, Мире-щьна öса дькә wәки мәрьв наве Хwәде бир кьн (Йерәм. 23:26, 27). Ләма жи гәләк мәрьвед дьлсах дьфькьрьн wәки әwана Хwәде дьһʹәбиньн, ле бь рʹасти щьна дьһʹәбиньн (1 Корн. 10:20; 2 Корн. 11:13-15). Шәйтʹан öса жи бь сайа система комерси тьштед qәлп бәла дькә. Мәсәлә, әw систем мәрьва һин дькә, wәки әwана wе бәхтәwар бьн һәрге пәй пʹәра кʹәвьн у гәләк һәбуке хwәрʹа тʹоп кьн (Мәтʹлк. 18:11). Әwед кö ве дәрәwийе баwәр дькьн, әʹмьре хwәда дьбьнә хöламед «һәбуке», нә кö хöламед Хwәде (Мәт. 6:24). Ахьрийеда, һʹьзкьрьна wанә һьндава һәбуке, дькарә һʹьзкьрьна wанә һьндава Хwәде бьхәньqинә (Мәт. 13:22; 1 Йуһʹн. 2:15, 16).

8, 9. а) Әм кʹижан дö дәрса һин дьбьн жь мәсәла Адәм, Һеwайе у мьлйакʹәтед рʹабәр? б) Чьрʹа кʹар ә кö әм заньн wәки Шәйтʹан сәрwертийе сәр ве дьнйайе дькә?

⁸ Әм жь мәсәла Адәм, Һеwайе у мьлйакʹәтед рʹабәр дö дәрса һин дьбьн. Дәрса пешьн әw ә, wәки тʹәне дö рʹе һәнә у әм гәрәке йәке бьжберьн. Демәк, йан әм алийе Йаһоwа бьгьрьн у жерʹа амьн бьминьн, йан жи хwә бькьнә бьн дәсте Шәйтʹан (Мәт. 7:13). Дәрса дöда жи әw ә, wәки кәсед кö алийе Шәйтʹан дьгьрьн, тʹәне кʹара wәʹдәлу дьстиньн. Адәм у Һеwа бунә хwә сәри хwә сәва хwәха сафи кьн чь qәнщ ә у чь хьраб e. Ле щьна жи һьнә һʹöкöм стандьн сәр сәрwертийед мәрьва (Дәстп. 3:22). Бәле, әwед кö алийе Шәйтʹан дьгьрьн, тʹьме ахьрийа хьраб дьстиньн у qә кʹаре жи настиньн (Иб. 21:7-17; Галт. 6:7, 8).

⁹ Ле чьрʹа кʹар ә кö әм заньн wәки Шәйтʹан һʹöкöм дькә сәр дьнйайе? Занәбуна ве йәке али мә дькә кö рʹаст бьньһерʹьн сәр сәрwера у хьзмәткʹаред дәwләте, у öса жи мә һелан дькә кö мьзгинийе бәла кьн. Әм фәʹм дькьн wәки Йаһоwа дьхwазә әм qәдьре сәрwеред дәwләте бьгьрьн (1 Пәт. 2:17). У әw дьхwазә әм гöрʹа qанунед сәрwертийед мәрьва бькьн, һәрге әwана мьqабьли принсипед wи начьн (Рʹом. 13:1-4). Ле әм öса жи заньн wәки әм гәрәке тʹәвнәбуйине хwәй кьн, у пьштгьрийа тʹö партиакә политики йан жи сәрwерәки нәкьн (Йуһʹн. 17:15, 16; 18:36). Әм заньн Шәйтʹан дьхwазә наве Йаһоwа беһöрмәт кә, ләма жи әм һәр тьшти дькьн сәва мәрьва рʹастийа дәрһәqа Хwәде һин кьн. Әм фьрнаq дьбьн кö наве wи сәр мә йә у кö әм наве wи һьлдьдьн. Хенщи ве йәке, һʹьзкьрьна мә һьндава Хwәде, жь һʹьзкьрьна һьндава пʹәра у һәбуке бьльндтьр у qимәттьр ә (Иша. 43:10; 1 Тимтʹ. 6:6-10).

ЧАWА ШӘЙТʹАН ҺʹÖКÖМЕ ХWӘ ДЬДӘ ХӘБАТЕ?

10-12. а) Шәйтʹан кʹижан тʹәльк да хәбате сәва мьлйакʹәта бьхальфинә? б) Әм жь шашийа wан мьлйакʹәта чь дәрса һин дьбьн?

¹⁰ Шәйтʹан метʹодед qәwи дьдә хәбате, сәва сәр мәрьва һʹöкöм бькә. Мәсәлә, әw тʹәлька датинә, wана дькә щерʹьбандьне у öса жи щара әw wана дьтьрсинә, сәва бькә бьн һʹöкöме хwә.

¹¹ Дина хwә бьдьне, Шәйтʹан ча бь һостәти тʹәльк да хәбате кö гәләк мьлйакʹәт хальфанд. Ча те кʹьфше Шәйтʹан гәләк wәхт wана леколин дькьр, сәва тедәрхә һәла ча wана бькʹьшинә алийе хwә. Чахе һьнә мьлйакʹәт кʹәтьнә тʹәльке у тʹәви жьна бенамуси кьрьн, паше wанрʹа зарʹед тәрьки һатьнә буйине, йед кö тьрса хwә дькьрьнә сәр мәрьва (Дәстп. 6:1-4). Хенщи тʹәлька бенамусийе, дьqәwьмә Шәйтʹан öса жи wан мьлйакʹәтед нәамьнрʹа соз да, кö әwана wе һʹöкöмтийе бькьн сәр һʹәму мәрьва. Нета wи дьбәкә әw бу, wәки рʹе бьгьрә сәва пʹехәмбәртийа дәрһәqа һатьна зöрʹәта создайи, нәйе сери (Дәстп. 3:15). Чь жи һәбә, йәкә Йаһоwа әw һʹәму нетед Шәйтʹан у мьлйакʹәтед рʹабәр бош-бәтал кьр, чахе Селав ани сәр дьне.

¹² Әм чь дәрсе һин дьбьн жь ве йәке? Бир нәкьн, тʹәлькед бенамусийе у хwәһʹьзийе гәләк qәwи нә. Мьлйакʹәтед кö пьшта Шәйтʹан гьртьн, пешийе сәр әʹзмана гәләк сала кʹеләка Хwәде бун, ле йәкә гәләк жь wана нав хwәда хwәстьнед хьраб пешда анин. Һәрге мьлйакʹәт кʹәтьнә ве тʹәльке, илаһи әм гәрәке чьqас фәсал бьн, wәки хwәстьнед хьраб дьле мәда кʹокед хwә нәдьн. Бәле, фьрqи тʹöнә әм чьqас сала Йаһоwарʹа хьзмәт дькьн, йәкә әм гәрәке тʹьме мьqати дьле хwә бьн (1 Корн. 10:12). Бәле, гәләк фәрз ә әм дьле хwә леколин бькьн, тʹәрка фькьред бенамуси бькьн, у жь хwәһʹьзийе у qöрʹәбуне дур бьн. (Галт. 5:26; бьхунә Колоси 3:5).

13. Шәйтʹан диса кʹижан тʹәльке дьдә хәбате, у әм ча дькарьн хwә жь ве тʹәльке хwәй кьн?

¹³ Диса тʹәлькәкә Шәйтʹан кö гәләк мәрьв дькʹәвьне, әw һәйә сербази. Иро хенщи рʹелигийед qәлп, Шәйтʹан öса жи щурʹә-щурʹә wәʹдәдәрбазкьрьна дьдә хәбате, сәва мәрьварʹа һʹәwас бә дәрһәqа щьна пебьһʹәсьн. Мәсәлә, филм, листькед әләктроники, медийа, сербазийе у кʹочʹәктийе әʹйан дькьн ча тьштәки баш. Ле ча әм дькарьн хwә хwәй кьн сәва нәкʹәвьнә ве тʹәльке? Тʹәшкиләта Хwәдеда әм гәрәке һивийе нибьн, кö мәрʹа wе бе готьне кʹижан wәʹдәдәрбазкьрьн щайиз ә кʹижан на. Һәр кәс жь мә гәрәке ль гора принсипед Хwәде исафа хwә һин кә (Ибрн. 5:14). Ле әме бьжартьнед билан бькьн, һәрге ширәта Паwлосе шанди бьдьнә хәбате, демәк һʹьзкьрьна мә һьндава Хwәде «һʹьләкʹари нибә» (Рʹом. 12:9). Әм дькарьн пьрсе бьдьнә хwә: «Гәло бьжартьнед мьн бона wәʹдәдәрбазкьрьне wе нишан кьн, wәки әз дöрʹу ниньм? Һәрге әw мәрьв, тʹәви кʹижани әз һинбуна Кʹьтеба Пироз дәрбаз дькьм, йан жи сәрледана дöбарә дькьм, бьвиньн әз кʹижан wәʹдәдәрбазкьрьне дьжберьм, wе чь бьфькьрьн?» Кьред мә чьqас анәгори хәбәрдана мә бьн, һаqас wе мәрʹа һеса бә нәкʹәвьнә тʹәлькед Шәйтʹан (1 Йуһʹн. 3:18).

14. Шәйтʹан бь чь дькарә мә бьтьрсинә, у ча әм дькарьн qәwи бьминьн?

¹⁴ Шәйтʹан хенщи тʹәлька, öса жи дьхwазә мә бьдә тьрсандьне, сәва әм Йаһоwарʹа амьн нәминьн. Мәсәлә, әw дькарә сәрwера бьдә хәбате, wәки әwана шьхöле мәйи бәлакьрьна мьзгинийе qәдәхә бькьн. Йан жи әw дькарә һәвалхәбатчи йан жи һәвалдәрсханед мә бьдә хәбате, сәва әwана qәрфа мә бькьн, чьмки әм пе принсипед Кʹьтеба Пироз дьжин (1 Пәт. 4:4). Әw öса жи дькарә нәфәред мала мә бьдә хәбате, сәва әwана рʹе мә бьгьрьн әм нәчьн щьвата (Мәт. 10:36). Ле ча әм дькарьн wан дәрәщада qәwи бьсәкьньн? Йа пешьн, әм гәрәке әʹщебмайи нәминьн чахе дькʹәвьнә wан дәрәщада, чьмки әм фәʹм дькьн wәки Шәйтʹан тʹәви мә шәрʹ дькә (Әʹйан. 2:10; 12:17). Öса жи әм гәрәке бир нәкьн әв пьрса лапә фәрз: Шәйтʹан дьбежә wәки әм Йаһоwарʹа хьзмәт дькьн, тʹәне һьнге гава мәрʹа дәст дьдә, ле тәнгасийада әме пьшта хwә бьдьнә Хwәде (Иб. 1:9-11; 2:4, 5). Әм гәрәке тʹьме qәwате жь Йаһоwа бьхwазьн, гава рʹасти щерʹьбандьна тен. Тʹö щар әм гәрәке бир нәкьн, wәки Хwәде wе мә нәһелә (Ибрн. 13:5).

ШӘЙТʹАН ЧЬ НЬКАРӘ БЬКӘ

15. Гәло Шәйтʹан дькарә зоре мә бькә кö әм тьштед öса бькьн, чь кö нахwазьн? Шьровәкьн.

¹⁵ Шәйтʹан нькарә зоре мәрьва бькә кö мьqабьли хwәстьна хwә һәрʹьн (Аqуб 1:14). Гәләк мәрьв бь нәзанийа хwә, нә жи тедәрдьхьн wәки алийе Шәйтʹан дьгьрьн. Ле чахе әwана рʹастийе педьһʹәсьн, һәр кәс жь wан хwәха дьжберә кʹерʹа хьзмәт кә (Кʹар. Шанд. 3:17; 17:30). Һәрге мә дьле хwәда сафи кьрийә кö qьрара Хwәде биньн сери, Шәйтʹан тʹö тьшти нькарә бькә сәва амьнийа мә һьлшинә (Иб. 2:3; 27:5).

16, 17. а) Шәйтʹан у щьнед wи диса чь нькарьн бькьн? б) Чьрʹа әм гәрәке нәтьрсьн бь дәнге бьльнд Йаһоwарʹа дöа кьн?

¹⁶ Диса һәнә тьштед öса кö Шәйтʹан у щьнед wи нькарьн бькьн. Мәсәлә, Кʹьтеба Пирозда тʹö щики найе готьне, wәки әwана дькарьн һʹьше мә у дьле мә бьхуньн, тʹәне Йаһоwа у Иса дькарьн (1 Сам. 16:7; Марq. 2:8). Әм заньн wәки Шәйтʹан у щьнед wи мә дьбьһен, гава әм хәбәр дьдьн йан жи бь дәнге бьльнд дöа дькьн. Ле гәло лазьм ә әм бьтьрсьн, wәки әwана чь кö дьбьһен, wе мьqабьли мә бьдьнә хәбате? Тʹö щар на! Ле чьрʹа? Әм заньн Мире-щьна мә дьвинә, ле әм натьрсьн кьред qәнщ бькьн кʹижан кö Йаһоwа хwәш тен. Öса жи, әм заньн кö әw мә дьбьһе чахе әм бь дәнге бьльнд дöа дькьн, ле әм гәрәке нәтьрсьн. Кʹьтеба Пирозда һәнә сәрһатийед гәләк хьзмәткʹаред Хwәде, йед кö бь дәнге бьльнд дöа дькьрьн, у тʹö щики найе готьне, wәки әwана дьтьрсийан кö Мире-щьна wе wана бьбьһе (1 Пʹадш. 8:22, 23; Йуһʹн. 11:41, 42; Кʹар. Шанд. 4:23, 24). Һәрге хәбәрдан у кьред мә ль гора qьрара Хwәде нә, әм гәрәке дöдьли нәбьн кö Йаһоwа wе нәһелә, wәки Мире-щьна зийанәкә öса бьдә мә, кö жийина һʹәта-һʹәтайе нәстиньн. (Бьхунә Зәбур 34:7.)

¹⁷ Әм гәрәке дьжмьне хwә рʹьнд нас бькьн, ле әм гәрәке тʹö щар жь wи нәтьрсьн. Пе аликʹарийа Йаһоwа һәла һе мәрьвед гöнәкʹар жи дькарьн шәрʹда тʹәви Шәйтʹан сәркʹәвьн (1 Йуһʹн. 2:14). Һәрге әм мьqабьли wи бьсәкьньн, әw wе жь мә бьрʹәвә (Аqуб 4:7; 1 Пәт. 5:9). Шәйтʹан илаһи пәй щаһьла дькʹәвә. Ле гәло ча әwана дькарьн qәwи бьминьн у мьqабьли wи бьсәкьньн? Готара дьнда әме щаба ве пьрсе шеwьр кьн.