Чьрʹа Әм Бәрдәwам Дькьн Гәләк Бәр Бьдьн?

1, 2. а) Иса пешийа мьрьна хwә дәрһәqа чь шеwьр кьр тʹәви шагьртед хwә? (Бьньһерʹә шькле әʹwльн.) б) Чьрʹа әм гәрәке бир нәкьн мәʹнийа бәлакьрьна мьзгинийе? в) Әме ве готареда чь шеwьр кьн?

ИСА евара пешийа мьрьна хwә, тʹәви шандийед хwә дәрһәqа гәләк тьшта хәбәр дьда. Әwи wана дьлгәрм кьр у гот кö гәләк wана һʹьз дькә. Иса öса жи wанрʹа мәсәла дәрһәqа кʹола тьрийе ани, кʹижан кö мә готара пешийа веда шеwьр кьр. Бь сайа wе мәсәле Иса шагьртед хwә шьданд, wәки әwана «гәләк бәрдайине бьдьнә кʹьфше», демәк бь сәбьр мьзгинийа Пʹадшатийе бәла кьн (Йуһʹн. 15:8).

² Ле Иса нә кö тʹәне гот кö чь лазьм ә әwана бькьн, ле әwи öса жи гот кö чьрʹа әwана гәрәке ве йәке бькьн. Әwи wанрʹа чәнд мәʹни гот кö чьрʹа әwана гәрәке бәрдәwам кьн мьзгинийе бәла кьн. Чьрʹа фәрз ә әм ван мәнʹийа шеwьр кьн? Чьмки чахе әм заньн кö чьрʹа гәрәке мьзгинийе бәла кьн, әм һелан дьбьн бь сәбьр «һʹәму мьләтарʹа» шәʹдәтийе бьдьн (Мәт. 24:13, 14). Ве готареда әме чар мәʹнийа шеwьр кьн, кö чьрʹа әм гәрәке хьзмәт кьн. Öса жи әме шеwьр кьн чар пʹешкʹешед жь Йаһоwа, кʹижан кö али мә дькьн бь сәбьр бәр бьдьн.

ӘМ ЙАҺОWА РʹУМӘТ ДЬКЬН

3. а) Ль гора Йуһʹәнна 15:8, кʹижан ә мәʹнийа лапә мәзьн кö чьрʹа әм мьзгинийе бәла дькьн? б) Мәсәла Исада чь те һʹәсабе тьри, у чьрʹа әw бәрамбәрикьрьн лайиq ә?

³ Мәʹнийа лапә мәзьн кö чьрʹа әм мьзгинийе бәла дькьн әw ә, кö әw шьхöл Йаһоwа рʹумәт дькә у наве wи бәр һʹәму мәрьва пироз дькә. (Бьхунә Йуһʹәнна 15:1, 8.) Дина хwә бьдьн кö Иса Баве хwә Йаһоwа бәрамбәри рʹәзван кьр, йе кö тьрийа дьчинә, хwә бәрамбәри кʹола тьрийе кьр, ле шагьртед хwә бәрамбәри чʹьqьла кьр. Ле тьри те һʹәсабе бәре Пʹадшатийе, кö шагьртед Иса дьдьн. Әwи готә шандийед хwә: «Бь ве йәке Баве мьне бе рʹумәткьрьне, гава һун . . . гәләк бәрдайине бьдьнә кʹьфше». Чаwа тьрийед баш йа кʹола тьрийе рʹумәте дьдьнә рʹәзван, öса жи әм рʹумәте дьдьнә Йаһоwа гава чьqас дәсте мә те, мьзгинийа Пʹадшатийе бәла дькьн (Мәт. 25:20-23).

4. а) Чь щурʹә әм наве Хwәде пироз дькьн? б) Чьрʹа бона wә qәдьр ә кö наве Хwәде пироз кьн?

⁴ Ча бәлакьрьна мьзгинийе наве Хwәде пироз дькә? Бь рʹасти наве Хwәде бь тʹәмами пироз ә, зедә әм нькарьн наве wи пироз кьн. Ле дина хwә бьдьне, Ишайа пʹехәмбәр гот, кö әм гәрәке пирозийа Йаһоwа qәбул кьн (Иша. 8:13). Әм наве Хwәде пироз дькьн бь wе йәке, кö наве wи нава һʹәму навада башqә дькьн у чахе али мәрьва дькьн, wәки әwана жи qәбул кьн кö наве wи пироз ә (Мәт. 6:9). Бәʹса хәбәре, чахе әм дәрһәqа һʹöнöред Йаһоwа у qьрара wи һьндава инсанәте мәрьварʹа гьли дькьн, бь ве йәке избат дькьн, кö гьлийед Шәйтʹан дәрһәqа Хwәде дәрәw у qәлп ьн (Дәстп. 3:1-5). Öса жи, чахе әм мьһала хwәда али мәрьва дькьн, wәки әwана бьвиньн кö тʹәне Йаһоwа һежа йә «рʹумәт, һöрмәте у qәwате» бьстинә, бь ве йәке жи әм наве wи пироз дькьн (Әʹйан. 4:11). Бьраки мә бь наве Рине, йе кö 16 сала пешәнг ә дьбежә: «Әз гәләк дьшекьриньм wе йәке кö дькарьм шәʹде Әʹфьрандаре гәрдуне бьм. Әw йәк qәwате дьдә мьн, wәки бәрдәwам кьм мьзгинийе бәла кьм».

ӘМ ЙАҺОWА У КÖРʹЕ WИ ҺʹЬЗ ДЬКЬН

5. а) Йуһʹәнна 15:9, 10-да дәрһәqа кʹижан мәʹнийе те готьне, wәки мьзгинийе бәла кьн? б) Иса ча да кʹьфше wәки сәбьр лазьм ә?

⁵ Бьхунә Йуһʹәнна 15:9, 10. Һʹьзкьрьна мә һьндава Йаһоwа у Иса, мәʹнийа фәрз ә кö мьзгинийе бәла кьн (Марq. 12:30; Йуһʹн. 14:15). Иса готә шагьртед хwә, wәки әwана нә кö тʹәне һʹьзкьрьна wида бьн, ле öса жи һʹьзкьрьна wида бьминьн. Ле гәло чьрʹа әwи öса гот? Чьмки әwи заньбу шагьртед wирʹа сәбьр лазьм ә, wәки бьжин чаwа Мәсиһийед рʹаст. Йуһʹәнна 15:4-10-да Иса гәләк щар хәбәра «бьминьн» да хәбате сәва бьдә кʹьфше, wәки шагьртед wирʹа wе сәбьр лазьм бә.

6. Әм ча дьдьнә кʹьфше, кö әм дьхwазьн һʹьзкьрьна Исада бьминьн?

⁶ Әм ча дьдьнә кʹьфше кö дьхwазьн һʹьзкьрьна Исада бьминьн у qәбулкьрьна wи öнда нәкьн? Әм гәрәке тʹәмийед wи биньн сери, демәк гöрʹа wи бькьн. Иса хwәст кö әм ве йәке бькьн, чь кö әwи хwәха дькьр. Әwи гот: «Мьн тʹәмийед Баве хwә хwәй кьрьн у һʹьзкьрьна wида дьминьм». Бәле, wе йәкеда Иса мәрʹа мәсәлә һишт (Йуһʹн. 13:15).

7. Чаwа гöһдари у һʹьзкьрьн һәвва гьредайи нә?

⁷ Иса гот кö гöһдари у һʹьзкьрьн һәвва гьредайи нә. Әwи готә шандийед хwә: «Әwе кö тʹәмийед мьн qәбул дькә у wан хwәй дькә, әw ә йе кö мьн һʹьз дькә» (Йуһʹн. 14:21). Хенщи wе йәке тʹәмийа Иса кö мьзгинийе бәла кьн, жь Баве wи йә, ләма жи чахе әм әве тʹәмийа Иса тиньн сери, әм öса жи һʹьзкьрьна хwә һьндава Йаһоwа дьдьнә кʹьфше (Мәт. 17:5; Йуһʹн. 8:28). Чахе әм һʹьзкьрьна хwә һьндава Йаһоwа у Иса дьдьн кʹьфше, әwана жи мә нава һʹьзкьрьна хwәда хwәй дькьн.

ӘМ ПЕШДА ӘʹЛАМИ МӘРЬВА ДЬКЬН

8, 9. а) Диса кʹижан мәʹни һәйә кö әм мьзгинийе бәла дькьн? б) Чьрʹа гьлийед Йаһоwа кö Һәзәqел 3:18, 19 у 18:23-да ньвисар ьн, һелане дьдьнә мә wәки бәрдәwам кьн мьзгинийе бәла кьн?

⁸ Мәнийа дьн кö чьрʹа әм мьзгинийе бәла дькьн әw ә, кö әм мәрьварʹа пешда әʹлам дькьн дәрһәqа рʹожа Йаһоwа кö гәләк незик ә. Кʹьтеба Пирозда дәрһәqа Нöһ те готьне, wәки әwи «даннасин дькьр». (Бьхунә 2 Пәтрус 2:5.) Әwи мәрьварʹа пешда әʹлам дькьр wәки Селав wе рʹабә. Ле чьрʹа әм дькарьн öса бежьн? Дина хwә бьдьне Иса чь гот: «Чаwа кö wан рʹожед бәри тофане мәрьва дьхwарьн, вәдьхwарьн, дьзәwьщин у мер дькьрьн, һʹәта wе рʹожа кö Нöһ кʹәтә гәмийе у мәрьв пе нәһʹәсийан, һʹәта кö лейи рʹабу у һʹәму жи хәньqандьн. Һатьна Кöрʹе Инсан жи wе öса бә» (Мәт. 24:38, 39). Рʹаст ә гәләк мәрьв әʹламәтийа Нöһ пьшт гöһе хwәва дьавитьн, йәкә әwи бь амьни бәрдәwам дькьр әʹламәтийа Хwәде бәла кә.

⁹ Иро әм мьзгинийа Пʹадшатийе бәла дькьн, сәва мәрьв пебьһʹәсьн qьрара Хwәде һьндава инсанәте. Әм жи мина Йаһоwа дьхwазьн мәрьв гöһ бьдьнә ве әʹламәтийе у бьжин (Һәзqл. 18:23). Хенщи ве йәке чахе әм мал бь мал у щийед кö гәләк мәрьв һәнә, хьзмәт дькьн, әм мәрьварʹа пешда әʹлам дькьн дәрһәqа Пʹадшатийа Хwәде, кʹижан кö wе бе у qьрʹа ве дьнйа хьраб бинә (Һәзqл. 3:18, 19; Дан. 2:44; Әʹйан. 14:6, 7).

ӘМ МӘРЬВА ҺʹЬЗ ДЬКЬН

10. а) Ль гора Мәтта 22:39 диса чь мәʹни һәйә кö мьзгинийе бәла кьн? б) Гьли кьн кö чаwа Паwлос у Силас Филипийайеда али сәрwере кәле кьрьн.

¹⁰ Диса мәʹникә фәрз һәйә кö чьрʹа әм бәрдәwам дькьн мьзгинийе бәла дькьн, әw һәйә һʹьзкьрьна мә һьндава мәрьва (Мәт. 22:39). Әw һʹьзкьрьн али мә дькә бь сәбьр wи шьхöли бәрдәwам кьн, чьмки әм фәʹм дькьн кö ньһерʹандьна мәрьва жь бо дәрәщед wан дькарә бе гöһастьне. Биньн бира хwә кö чь qәwьми тʹәви Паwлосе шанди у һәвалхьзмәткʹаре wи Силас. Шәһәре Филипйайеда мәрьв мьqабьли wан дәркʹәтьн у wана кьрьнә кәле. Ниве шәве әʹрдһәжәкә öса qайим qәwьми, кö дәред кәле вәбун. Сәрwере кәле тьрсийа кö гьрти wе бьрʹәвьн у хwәст хwә бькöжә. Ле Паwлос wи да сәкьнандьне у wирʹа гот: «Тʹö зийане нәдә әʹмьре хwә». Сәрwере кәле жерʹа гот: «Әз чь гәрәке бькьм кö хьлаз бьм?» Паwлос у Силас щаба wи дан: «Баwәрийа хwә Хöдан Иса бинә, те . . . хьлаз би» (Кʹар. Шанд. 16:25-34).

11, 12. а) Чаwа сәрһатийа дәрһәqа сәрwере кәле хьзмәтийа мәва гьредайи йә? б) Чьрʹа әм дьхwазьн бәрдәwам кьн мьзгинийе бәла кьн?

¹¹ Әв мәсәла сәрwере кәле чь мә һин дькә дәрһәqа хьзмәтийа мә? Бьфькьрьн: Сәрwере кәле тʹәне паши әʹрдһәже ньһерʹандьна хwә гöһаст у аликʹари хwәст. Иро жи чахе һʹале мәрьва ньшкева те гöһастьне, әwана һьнге дькарьн гöһ бьдьнә мьзгинийе у бьхwазьн аликʹарийе бьстиньн. Бәʹса хәбәре, һьнә мәрьв мьһала мәда дьбәкә ньшкева хәбата хwә öнда кьрьнә у ньзаньн чь бькьн. Һьнәк жи дьбәкә жь мер йан жьна хwә qәтийанә. Һьнәк жи бинтәнг дьбьн, чьмки пеһʹәсийанә кö нәхwәшийа wанә гьран һәйә, йан жи дьлшкәсти нә, чьмки мәрьве хwәйи незик öнда кьрьнә. Чахе тьштед öса дьqәwьмьн, бал wан мәрьва пьрсед нета әʹмьрва гьредайи пешда тен, дәрһәqа кʹижани кö бәре нә жи фькьринә. Дьqәwьмә әwана һәла һе жи дьфькьрьн: «Әз гәрәке чь бькьм wәки хьлаз бьм?» Гава әм рʹасти wан мәрьва тен, әwана дькарьн гöһ бьдьнә мьзгинийа мәйә ша, кö wана әʹмьре хwәда тʹö щар нәбьһистийә.

¹² Ләма жи һәрге әм бь амьни бәрдәwам кьн мьзгинийе бәла кьн, әме бькарьбьн бәрдьлийе бьдьнә мәрьва, гава әwана һазьр бьн гöһ бьдьнә мә у бәрдьлийа мә qәбул кьн (Иша. 61:1). Хушкәкә мә бь наве Шарлот, йа кö ида 38 сал ә пешәнг ә, дьбежә: «Мәрьв иро öндабуйи нә. Әwана һʹәwщә нә кö мьзгинийе пебьһʹәсьн». Ле Евор кö 34 сал ә пешәнг ә, дьбежә: «Иро wәʹдәки öса һатийә, кö мәрьв емосиалида гәләк сьст ьн. Әз гәләк дьхwазьм али wан бькьм у әw йәк мьн һелан дькә wанрʹа мьзгинийе гьли кьм». Һʹьзкьрьн һьндава мәрьва мәʹнийа мәзьн ә, wәки бәрдәwам кьн мьзгинийе бәла кьн!

ПʹЕШКʹЕШ КÖ АЛИ МӘ ДЬКЬН СӘБЬР КЬН

13, 14. а) Йуһʹәнна 15:11-да дәрһәqа кʹижан пʹешкʹеше те готьне? б) Шабуна Иса ча дькарә бьбә йа мә? в) Шабун ча һʹöкöм дькә сәр хьзмәтийа мә?

¹³ Иса евара пешийа мьрьна хwә, шандийед хwәрʹа öса жи дәрһәqа чәнд пʹешкʹеша гот, кʹижан кö wе али wан бькьра бь сәбьр бәр бьдана. Гәло әw чь пʹешкʹеш ьн, у чаwа әw пʹешкʹеш дькарьн али мә жи бькьн?

¹⁴ Шабун. Гәло бәлакьрьна мьзгинийе барәки гьран ә? Тʹö щар на. Чахе Иса гьли кьр мәсәла дәрһәqа кʹола тьрийе, әwи гот кö жь бәлакьрьна мьзгинийе әме шабунәкә мәзьн бьстиньн. (Бьхунә Йуһʹәнна 15:11.) Бь рʹасти әwи гот кö шабуна wи дькарә дьле мәда бә жи. Ле ча? Чаwа мә ида жоре гот, Иса хwә бәрамбәри кʹола тьрийе кьр, ле шагьртед хwә бәрамбәри чʹьqьла кьр. Кʹола тьрийе чʹьqьла хwәй дькә. Һʹәта кö әw чʹьqьл кʹола тьрийева ньн, әwана ав у тьштед дьн дькʹьшиньнә хwә. Öса жи әм, һʹәта кö тʹәви Мәсиһ йәктийеда ньн у пәй wи дьчьн, әм шабунәкә мәзьн дьстиньн, чаwа әw дьстинә чахе qьрара Баве хwә тинә сери (Йуһʹн. 4:34; 17:13; 1 Пәт. 2:21). Хушкәкә мә бь наве Һана, йа кö 40 сали зедәтьр пешәнг ә, дьбежә: «Әw шабуна кö әз хьзмәтийеда дьстиньм, һелане дьдә мьн wәки бәрдәwам кьм Йаһоwарʹа хьзмәт кьм». Бәле, шабун qәwате дьдә мә, wәки бәрдәwам кьн мьзгинийе бәла кьн һәрге жи һьндьк мәрьв гöһ дьдьнә мә (Мәт. 5:10-12).

15. а) Йуһʹәнна 14:27-да дәрһәqа кʹижан пʹешкʹеше те готьне? б) Чьрʹа әʹдьлайи али мә дькә кö бәрдәwам кьн бәр биньн?

¹⁵ Әʹдьлайи. (Бьхунә Йуһʹәнна 14:27.) Иса бәре еваре пешийа мьрьна хwә, готә шандийа: «Әз . . . әʹдьлайийа хwә дьдьмә wә». Ле чаwа әw пʹешкʹеш, демәк әʹдьлайа wи, али мә дькә кö бәр биньн? Чахе әм бь сәбьр ьн, дьле хwәда әм әʹдьлайе тʹәхмин дькьн, чьмки  заньн wәки Йаһоwа у Иса мә qәбул дькьн (Зәб. 149:4; Рʹом. 5:3, 4; Колс. 3:15). Бьраки мә бь наве Улф, йе кö 45 сал ә хьзмәткʹаре һәртʹьм ә, дьбежә: «Рʹаст ә хьзмәтийеда әз дьwәстьм, ле хьзмәти дьлрʹьһʹәтийе у нета жийине дьдә мьн». Әм гәләк рʹази нә wәки мә дьлрʹьһʹәтийа рʹаст дитийә!

16. а) Йуһʹәнна 15:15-да дәрһәqа кʹижан пʹешкʹеше те готьне? б) Шанди ча дькарьбун достийа wида бьмана?

¹⁶ Достийа тʹәви Иса. Паши ве йәке чахе Иса готә шандийед хwә кö дьхwазә шабуна wан «тʹәмам бә», әwи wанрʹа шьровәкьр, wәки чьqас фәрз ә һʹьзкьрьна һʹәлал бьдьнә кʹьфше. Паше әwи гот: «Мьн һун дост һʹәсаб кьрьн». Рʹасти жи әw пʹешкʹешәкә чьqас qимәт ә кö бьбьнә достед Иса! Ле шандийа чь гәрәке бькьрана, wәки достийа wида бьмана? Иса wанрʹа гот: «Һәрʹьн бәр бьдьн». (Бьхунә Йуһʹәнна 15:14-16.) Wәкә 2 сал пешда, Иса рʹебәри да шандийед хwә: «Гава һун һәрʹьн, даннасин кьн у бежьн: ‹Пʹадшатийа Әʹзмана незик буйә›» (Мәт. 10:7). Ле ве евара хьлазийе Иса wана qәwи кьр, wәки әwана wи шьхöле кö wана дәстпекьр, бь сәбьр бәрдәwам кьн (Мәт. 24:13; Марq. 3:14). Әве тʹәмийа Иса биньн сери шьхöләкә һеса нибу, ле wана әw шьхöл рʹьнд анинә сери у достийа wида ман. Ча? Пе аликʹарийа пʹешкʹешәкә дьн.

17, 18. а) Йуһʹәнна 15:16-да дәрһәqа кʹижан пʹешкʹеше те готьне? б) Ча әwе пʹешкʹеше али шагьртед Иса дькьр? в) Кʹижан пʹешкʹеш иро мә qәwи дькьн?

¹⁷ Щаба дöа. Иса гот: «Һун чь кö пе наве мьн жь Баве бьхwазьн, әwе бьдә wә» (Йуһʹн. 15:16). Бь рʹасти әwи сози wе шанди гәләк бьшьданда!a Рʹаст ә wана бь тʹәмами фәʹм нәдькьр, wәки зутьрәке гәрәке Иса бьмьрә, ле әwана wе бе аликʹари нәмана. Йаһоwа тʹьме һазьр бу кö щаба дöайед wан бьдә, гава wанрʹа аликʹари лазьм буйа сәва ве тʹәмийе биньн сери кö мьзгинийе бәла кьн. У бь рʹасти wәʹдә шунда wана тʹәхмин кьр, кö ча Йаһоwа щаба дöайед wан да (Кʹар. Шанд. 4:29, 31).

¹⁸ Иро жи öса нә. Чахе әм бь сәбьр бәр дьдьн, әм достийа Исада дьминьн. Хенщи ве йәке, әм дькарьн дöдьли нәбьн, wәки гава әм хьзмәтийеда рʹасти чәтьнайа бен у жь Йаһоwа аликʹарийе бьхwазьн, әw wе әʹсә щаба дöайед мә бьдә (Фили. 4:13). Әм чьqас рʹази нә кö Хwәде щаба дöайед мә дьдә у кö әм достед Иса нә! Әв пʹешкʹешед жь Йаһоwа мә qәwи дькьн сәва әм бь сәбьр бәр бьдьн (Аqуб 1:17).

19. а) Чьрʹа әм бәрдәwам дькьн мьзгинийе бәла кьн? б) Чь али мә дькә кö әм шьхöле Хwәде һʹәта хьлазийе биньн сери?

¹⁹ Чаwа мә ве готареда дит, әм бәрдәwам дькьн мьзгинийе бәла кьн сәва Йаһоwа рʹумәт кьн, наве wи пироз кьн, һʹьзкьрьна хwә wирʹа у Исарʹа бьдьнә кʹьфше, мәрьварʹа пешда әʹлам кьн дәрһәqа рʹожа Хwәде, у һьндава мәрьва һʹьзкьрьне бьдьнә кʹьфше. Хенщи ве йәке, әw пʹешкʹеш демәк, шабун, әʹдьлайи, дости, у щаба дöайед мә, мә qәwи дькьн сәва әм шьхöле Хwәде һʹәта хьлазийе биньн сери. Йаһоwа wе мәрʹа гәләк ша бә чахе бьвинә кö әм бь дьл у щан бәрдәwам дькьн «бәр» дьдьн!