Йаһоwа Wана Һʹьз Дькә, йед кö «Бь Сәбьр Бәре Хwә Дьдьн»

1, 2. а) Чьрʹа мәсәла wан хушк-бьра, йед кö wи щийида хьзмәт дькьн кʹидәре мәрьв кем гöһ дьдьнә мьзгинийе, мә дьшьдиньн? (Бьньһерʹә шькле әʹwльн.) б) Иса дәрһәqа хьзмәтийа «щи-мьскʹәне» хwәда чь гот? (Бьньһерʹьн спартьн.)

СЕРЖИО У ОЛИНДА жь Амәрикайе, жьн-мер ьн, йед кö wәкә 80 сали нә у пешәнг ьн. Wан пашwәхтийа, жь бо еша ньгед хwә чуйин-һатьн бона wан чәтьн буйә. Йәкә чаwа wана бь дәһа сала дькьр, һʹәта иро әwана шәбәqе сьһʹәта һʹәфта дьчьнә мәйдане, кʹидәре кö гәләк мәрьв һәнә. Әwана незики щийе сәкьнандьна отобусе дьсәкьньн у мәрьварʹа әʹдәбйәтед мә бәла дькьн. Һʹәчʹи зәʹф мәрьв дина хwә надьнә wан, ле йәкә әв жьн-мер диса жи wедәре дьсәкьньн, у wан мәрьварʹа дькʹәньн йед кö wан дьньһерʹьн. Нивро, әwана һеди-һеди дьчьн мала хwә. Сьвәтьре диса сьһʹәта һʹәфта, әwана дьчьнә мәйдане. Бь рʹасти әw жьн-мер нава саледа һәр һʹәфти шәш рʹожа, шәбәqа мьзгинийа Пʹадшатийе бәла дькьн.

² Гәләк хушк-бьред мә мина Сержио у Олиндайе нав тʹәмамийа дьнйайе нава гәләк салада хьзмәт дькьн wан щийада, кʹидәре мәрьв кем гöһ дьдьнә мьзгинийе. Һәрге һун жи мьһаләкә öсада хьзмәт дькьн, әм дьхwазьн бь дьл у щан бона сәбьра wә, пʹайе wә бьдьн.a Гәләк хушк-бьра, һәла һе жи йед щерʹьбанди, дьшьдьн жь бо амьнийа wә хьзмәтийеда. Дина хwә бьдьне бәрпьрсийарәки мьһале чь гот: «Чахе әз тʹәви wан хушк-бьред амьн хьзмәт дькьм, әз пе мәсәла wан qәwи дьбьм. Амьнийа wан мьн һелан дькә, wәки мерхас бьм у хьзмәтийа хwә бәрдәwам кьм. Мәсәла wан мьн дьлгәрм дькә».

3. Ве готареда әме кʹижан се пьрса шеwьр кьн, у чьрʹа?

³ Сәва кö әм шьхöле бәлакьрьна мьзгинийе кö Иса дайә мә, бь тʹәмами биньн сери, wәрә әм ве готареда щаба wан се пьрса шеwьр кьн: Чьрʹа щара әм дьлтәнг дьбьн? Чаwа әм дькарьн бәр бьдьн? Чь wе али мә бькә бәрдәwам кьн бь сәбьр бәр бьдьн?

ЧЬРʹА ӘМ ДЬКАРЬН ДЬЛТӘНГ БЬН?

4. а) Паwлос ча хwә тʹәхмин дькьр чахе дьдит, кö гәләк Щьһу мьзгини qәбул нәдькьрьн? б) Чьрʹа Паwлос хwә öса тʹәхмин дькьр?

⁴ Һәрге һун бәрхwә дькʹәвьн, чьмки щийе кö һун хьзмәт дькьн мәрьв кем гöһ дьдьн мьзгинийе, бь рʹасти һун тʹәне ниньн, Паwлос жи щара бәрхwә дькʹәт бона ве йәке. Әwи wәкә 30 салед хьзмәтийа хwәда гәләк мәрьв кьрә шагьртед Мәсиһ (Кʹар. Шанд. 14:21; 2 Корн. 3:2, 3). Әwи öса жи дьхwәст гәләк Щьһуйа жи бинә сәр рʹийа рʹастийе, ле әw йәк дәсте wи нә дьһат. Гәләк жь wана Паwлос qәбул нәдькьрьн, у һьнәка һәла һе жи wи дьзерандьн у пәй wи дькʹәтьн (Кʹар. Шанд. 14:19; 17:1, 4, 5, 13). Ле әв кьред wан һьндава Паwлос гәло ча сәр wи һʹöкöм дьбу? Әwи гот: «Әз бь Мәсиһ бе хельф рʹаст дьбежьм . . . әз гәләки бәр хwә дькʹәвьм у кöла дьле мьн жи кʹур ә» (Рʹом. 9:1-3). Чьрʹа Паwлос öса хwә тʹәхмин дькьр? Чьмки дьле wи сәр шьхöле бәлакьрьна мьзгинийе бу. Әwи Щьһуйарʹа мьзгини гьли дькьр, чьмки бона wан хәм дькьр у дьле wи дьшәwьти бона wан. Ләма жи чахе Паwлос дьдит кö әwана рʹәʹма Хwәде qәбул накьн, дьле wи дьешийа.

5. а) Чь мә һелан дькә кö мьзгинийе мәрьварʹа гьли кьн? б) Чьрʹа әʹщебмайи нинә кö щара әм бәрхwә дькʹәвьн?

⁵ Әм жи мина Паwлос мәрьварʹа мьзгинийе гьли дькьн, чьмки дьле мә сәр wан дьшәwьтә у әм дьхwазьн али wан бькьн (Мәт. 22:39; 1 Корн. 11:1). Әм заньн кö мәрьв дькарьн гәләк кʹәрәма бьстиньн, һәрге бьбьнә хьзмәткʹаред Йаһоwа. Гава әм дьфькьрьн дәрһәqа мәрьвед мьһала хwәда, дьле хwәда дьбежьн: «Хwазьл wана гöһ бьдана мә у пебьһʹәсийана кö әʹмьрәки чьqас баш әwана дькарьн qазанщ кьн!» Ләма жи әм бәрдәwам дькьн wана һелан дькьн, wәки рʹастийа дәрһәqа Йаһоwа у qьрара wи һьндава инсанәте пебьһʹәсьн. Бьдьнә бәр чʹәʹве хwә кö әм мәрьварʹа дьбежьн: «Мә wәрʹа пʹешкʹешәкә qимәт анийә. Һиви дькьн qәбул кьн!». Ле чахе мәрьв әве пʹешкʹеше qәбул накьн, бешьк әw йәк дьбә «кöла дьле» мә. У гава әм бона ве йәке дьлтәнг дьбьн, әw найе һʹәсабе wәки әм баwәрийеда сьст ьн, ле әw те һʹәсабе кö дьле мә сәр хьзмәтийе йә. Рʹаст ә әм бәрхwә дькʹәвьн, ле диса жи сәбьр дькьн у шьхöле хwә бәрдәwам дькьн. Елена, кö 25 сала зедәтьр пешәнг ә, дәрһәqа ве йәке дьбежә: «Бәле, хьзмәти һеса нинә, ле йәкә тʹö шьхöләки öса тʹöнә кö дәwса wи шьхöли бьгьрә».

ЧА ӘМ ДЬКАРЬН БӘР БЬДЬН?

6. Әме кʹижан пьрсе шеwьр кьн?

⁶ Чьрʹа әм дькарьн дöдьли нәбьн, wәки әме хьзмәтийеда пешдачуйи бьн, фьрqи тʹöнә әм кʹидәре жи хьзмәт кьн? Сәва щаба ве пьрса фәрз бьдьн, wәрә әм дö мәсәлед Иса шеwьр кьн, кʹидәре те готьне кö чьрʹа лазьм ә «бәр» бьдьн (Мәт. 13:23). Мәсәла пешьн дәрһәqа кʹола тьрийе йә.

7. а) Мәсәла Исада кʹе те һʹәсабе «рʹәзван», «кʹола тьрийе» у «чʹьqьл»? б) Әме щаба кʹижан пьрсе пебьһʹәсьн?

⁷ Бьхунә Йуһʹәнна 15:1-5, 8. Дина хwә бьдьне кö Иса чь готә шандийед хwә: «Баве мьне бе рʹумәткьрьне, гава һун пе гәләк бәрдайине бьдьнә кʹьфше, кö һун бунә шагьртед мьн». Иса гот кö ве мәсәледа Йаһоwа «рʹәзван ә», хwәха әw «кʹола тьрийейә» рʹаст ә, шагьртед wи жи «чʹьqьл» ьн.b Ле гәло чь те һʹәсабе бәр, кʹижан кö шагьртед Иса гәрәке бьдана? Ве мәсәледа Иса рʹастә-рʹаст набежә кö әw чь бәр ә, ле әwи тьштәки öса гот, кö али мә дькә әм фәʹм кьн щаба ве пьрсе.

8. а) Чьрʹа мәсәла Исада, бәр нькарә бе һʹәсабе шагьртед тʹәзә? б) Йаһоwа чьqаси жь мә дәʹwа дькә?

⁸ Иса дәрһәqа Баве хwә гот: «Һәр чʹьqьле мьнва кö бәр надә әw дьбьрʹә». Демәк, щурʹәки дьн бежьн, Йаһоwа мә ча хьзмәткʹаред хwә һʹәсаб дькә тʹәне һьнге, һәрге әм бәр дьдьн (Мәт. 13:23; 21:43). Жь ве мәсәле әм дьвиньн, wәки бәр, кʹижан кö һәр Мәсиһи гәрәке бьдә, найе һʹәсабе әw шагьртед тʹәзә, йед кö мә али wан кьрийә бьбьнә шагьрт (Мәт. 28:19). Һәрге әw öса буйа, ль гора мәсәла Иса, чʹьqьлед бебәр wе бьһатана һʹәсабе әw Шәʹдед Йаһоwайи амьн, йед кö тʹö кәс нәкьрьнә шагьрт, чьмки хьзмәт дькьн щийе öса, кʹидәре кö һьндьк мәрьв мьзгинийе qәбул дькьн. Ле әw йәк нәрʹаст ә. Чьрʹа? Чьмки әм зоре тʹö кәси нькарьн бькьн wәки бьбьнә шагьрт. Һьн жи, Йаһоwа Хwәдейе һʹьзкьрьне йә, у әw тʹö щар жь хьзмәткʹаред хwә тьштед öса дәʹwа накә, кö жь qәwата wан дәр бә. Әw тʹьме һаqаси жь мә дьхwазә, чьqас әм дькарьн бькьн (Qан. Дщр. 30:11-14).

9. а) Әм кʹижан шьхöлида бәр дьдьн? б) Әме кʹижан мәсәле шеwьр кьн у чьрʹа?

⁹ Wәки öса нә, кʹижан ә әw бәр кö әм гәрәке бьдьн? Әшкәрә йә, wәки бәр әw шьхöл ә, кʹижан кö һәр кәс жь мә wәкә qәwата хwә дькарә бькә. Ле гәло әw чь шьхöл ә бь сайа кʹижани әм дькарьн «бәр» бьдьн? Әw һәйә бәлакьрьна мьзгинийа Пʹадшатийа Хwәдеc (Мәт. 24:14). Мәсәла Иса дәрһәqа тʹохьмрʹәш ве йәке дьдә кʹьфше. Wәрә әм ве мәсәле шеwьр кьн.

10. а) Мәсәла дәрһәqа тʹохьмрʹәшда, чь те һʹәсабе тʹохьм у әʹрд? б) Чʹиле гәньм чь тинә?

¹⁰ Бьхунә Луqа 8:5-8, 11-15. Мәсәла дәрһәqа тʹохьмрʹәшда, бь симболик тʹохьм те һʹәсабе «хәбәра Хwәде», демәк мьзгинийа Пʹадшатийе. Әʹрд те һʹәсабе дьле мерьв. Тʹохьме кö кʹәтийә сәр әʹрде qәнщ, шин бу у бу чʹил, бәʹса хәбәре чʹиле гәньм. Паше әw чʹил «сәд щар бәр дан». Ле чь щурʹә бәр дьдә әw чʹиле гәньм? Гәло әw диса чʹилед бьчʹук дьдә? На, әw тʹохьмед тʹәзә дьдә, кʹижан ахьрийеда wе бьбьнә чʹилед гәньм. Ве мәсәледа, тʹохьмәк сәд щара тʹохьм тинә. Гәло әw мәсәлә ча гьредайи йә тʹәви хьзмәтийа мә?

11. а) Чаwа мәсәла дәрһәqа тʹохьмрʹәш хьзмәтийа мәва гьредайи йә? б) Чаwа әм тʹохьме Пʹадшатийе дьдьн?

¹¹ Сәва әве йәке рʹьнд фәʹм бькьн, wәрә әм биньн бира хwә, кö ча гәләк сал пешда әм мьзгинийа Пʹадшатийе жь Шәʹдед Йаһоwа йан жи дьбәкә жь де-бавед хwәйи Мәсиһи пеһʹәсийан. Әwана гәләк ша бун чахе тедәрхьстьн, кö дьле мә нәрм ә сәва wи тʹохьме мьзгинийа Пʹадшатийе qәбул кә. Чаwа мәсәла Исада әʹрде баш тʹохьм хwәй кьр, öса жи мә әw әʹламәти qәбул кьр у хwәй кьр. Ахьрийеда, әw тʹохьме мьзгинийа Пʹадшатийе кʹокед хwә да, мәзьн бу, бу чʹил у паше ида һазьр бу сәва бәр бьдә. Чаwа кö чʹиле гәньм бәр дьдә, демәк тʹохьмед тʹәзә дьдә, нә кö чʹилед тʹәзә, әм жи бәр дьдьн бь тʹохьме тʹәзә йе Пʹадшатийе, нә кö шагьртед тʹәзә.d Ле чаwа әм тʹохьме тʹәзә йе Пʹадшатийе дьдьн? Һәр щар гава әм мьзгинийа дәрһәqа Пʹадшатийе бәла дькьн, бь ве йәке әм әw тʹохьме кö дьле мәда һатьбу чандьне, дьрʹәшиньн (Луqа 6:45; 8:1). Әw мәсәлә мә һин дькә, wәки гава әм мьзгинийа Пʹадшатийе бәла дькьн, әм «бь сәбьр бәре» хwә дьдьн.

12. а) Әм чь дәрсе һин дьбьн жь мәсәлед Иса дәрһәqа кʹола тьрийе у тʹохьмрʹәш? б) Ча әw дәрс сәр wә һʹöкöм дькә?

¹² Әм чь дәрсе дькарьн жь мәсәлед Иса дәрһәqа кʹола тьрийе у тʹохьмрʹәш һин бьн? Әw мәсәлә мә дьдьнә фәʹмкьрьне, wәки бәрдайин гьредайи нинә ве йәкева кö мьһала мәда мәрьв гöһ дьдьнә мә йан на. Дәwсе, әw амьнийа мәва гьредайи йә. Паwлос жи рʹастийа ве йәке да кʹьфше гава гот: «Һәр кәсе һәqе хwә бьстинә, wәкә хәбата хwә» (1 Корн. 3:8). Демәк, әм һәqе хwә дьстиньн ль гора хәбата хwә, нә кö ль гора ахьрийа хәбата хwә. Хушкәкә мә бь наве Матилда, йа кö ида 20 сал ә пешәнг ә, дьбежә: «Дьле мьн бь шабуне тʹьжә йә, чьмки әз заньм кö Йаһоwа шьхöл у qәwата мә кʹәрәм дькә».

ЧАWА БЬ СӘБЬР БӘРЕ ХWӘ БЬДЬН?

13, 14. Ль гора Рʹомайи 10:1, 2, Паwлос чьрʹа тʹәрька wан нәда, йед кö мьзгинийа Пʹадшатийе qәбул нәдькьрьн?

¹³ Чь wе али мә бькә, wәки бәрдәwам кьн бь сәбьр бәр бьдьн? Чаwа мә жоре гот, Паwлос бәрхwә дькʹәт бона Щьһуйед кö мьзгинийа Пʹадшатийе qәбул нәдькьрьн. Ле йәкә wи чахи жи әwи тʹәрька wан нәдьда. Дина хwә бьдьне, әwи дәрһәqа wан Щьһуйа чь гот: «Дöа у хwәстьна дьле мьн жь Хwәде бона хьлазбуна Исраеле йә. Әз шәʹде wана мә, кö әw һьндава Хwәдеда хwәйихирәт ьн, ле әв йәк бе занәбун ә» (Рʹом. 10:1, 2). Чь мәʹнийед Паwлос һәбун кö әwи хьзмәтийа хwә бәрдәwам дькьр?

¹⁴ Йа пешьн, Паwлос шьровәкьр wәки әw бәрдәwам дькә Щьһуйарʹа мьзгинийе бәла кә, чьмки әw «хwәстьна дьле» wи бу. Паwлос бь дьл у щан дьхwәст, wәки әw Щьһу хьлаз бьн (Рʹом. 11:13, 14). Йа дöда, Паwлос гот кö әwи бона хьлазбуна wан «дöа . . . жь Хwәде» дькьр. Әwи дöада лавайа Хwәде дькьр сәва әw али wи бькә, wәки Щьһу мьзгинийа Пʹадшатийе qәбул кьн. Йа сьсийа, Паwлос дәрһәqа ван Щьһуйа гот: «Әw һьндава Хwәдеда хwәйихирәт ьн». Бәле, Паwлос нав мәрьвада тьштед баш дьдит у тʹәхмин дькьр кö әwана дькарьн бьбьнә хьзмәткʹаред Хwәдейи хирәт, чаwа әw хwәха бу.

15. Әм ча дькарьн чʹәʹв бьдьнә Паwлос? Мәсәла биньн.

¹⁵ Ча әм дькарьн чʹәʹв бьдьнә Паwлос? Йа пешьн, әм гәрәке бь дьл бьхwазьн мәрьвед öса бьвиньн, йед кö «бона жийина һʹәта-һʹәтайе кʹьфшкьри» нә. Йа дöда, әм бь дöа жь Йаһоwа һиви дькьн, wәки дьле мәрьвед һʹәлал вәкә (Кʹар. Шанд. 13:48; 16:14). Хушкәкә мә бь наве Силвиана, йа кö wәкә 30 сала пешәнг ә, дьбежә: «Әз пешийа кö һʹәрьм мал бь мал хьзмәт кьм, әз Йаһоwарʹа дöа дькьм сәва ньһерʹандьна позитив бьдә мьн». Öса жи әм Хwәдерʹа дöа дькьн, wәки мьлйакʹәтед wи рʹебәрийе мә бькьн кö әм мәрьвед дьлсах бьвиньн (Мәт. 10:11-13; Әʹйан. 14:6). Дина хwә бьдьне, бьраки мә бь наве Роберт кö 30 сала зедәтьр ча пешәнг ә, чь дьбежә: «Һәвкʹари тʹәви мьлйакʹәтед кö һаш жийина хwәйед мала һәнә, рʹасти жи тьштәки мәхсус у һʹәwас ә». Йа сьсийа, әм гәрәке нав мәрьвада тьштед баш бьвиньн. Бьраки мә бь наве Карл кö рʹуспи йә у 50 сала зедәтьр ньхöманди йә, дьбежә: «Әз дина хwә дьдьмә һәр нишанәкә бьчʹук жи кö дькарә әʹйан кә мәрьве һʹәлал, бәʹса хәбәре дьqәwьмә бәшәра wийи хwәш, йан жи пьрсәкә һʹәлал». Бәле, мина Паwлос әм жи дькарьн бь сәбьр бәр бьдьн.

«РʹЬҺʹӘТИЙЕ НӘДӘ ДӘСТЕ ХWӘ»

16, 17. а) Әм чь дәрсе һин дьбьн жь Wаиз 11:6? б) Гьли кьн чаwа хьзмәтийа мә дькарә сәр мәрьва һʹöкöм бә.

¹⁶ Һәрге жи әм дьвиньн wәки мьзгинийа кö әм бәла дькьн нагьһижә дьле мәрьва, әм гәрәке нәфькьрьн кö шьхöле мә бадиһәwа йә. (Бьхунә Wаиз 11:6.) Рʹаст ә гәләк мәрьв гöһ надьнә мә, ле йәкә әwана дина хwә дьдьнә мә. Әwана дина хwә дьдьн кʹьнщхwәкьрьна мәйә лайиq, рʹабун-рʹуньштьна мә у бәшәра мәйә хwәш. Wәʹдә дәрбаз дьбә, у рʹабун-рʹуньштьна мә дькарә чʹәʹвед wан вәкә у фькьред нәрʹаст һьндава мә бьгöһезә. Сержио у Олинда бәʹса кʹижана мә дәстпекеда кьр, фәʹм кьрьн wәки әw йәк öса нә.

¹⁷ Сержио гьли дькә: «Әм жь бо нәхwәшийе, wәʹдәке нәдьчунә мәйдане. Ле чахе әм вәгәрʹийан, мәрьвед кö бәр мәрʹа дәрбаз дьбун, жь мә дьпьрсин: ‹Һʹәму тьшт баш ә? Мә бира wә кьрийә›». Олинда жи дькʹәнә у дьбежә: «Ажованед отобуса, дәстед хwә мәрʹа дьһәжандьн у һьнәка жи бь дәнге бьльнд мәрʹа дьготьн: ‹Әʹфәрәм!› Wана һәла һе жи жь мә журнал дьхwәстьн». Әwана öса жи әʹщебмайи мабун чахе мерькәк һатьбу бәр стенда wан, кöлирк дабу wан у wанрʹа готьбу wәки рʹази йә бона шьхöле кö әwана дькьн.

18. Чьрʹа һун дьхwазьн «бь сәбьр» бәр бьдьн?

¹⁸ Рʹасти жи, һʹәта кö әм рʹьһʹәтийе надьнә дәсте хwә кö тʹохьме Пʹадшатийе бьчиньн, әм шьхöләки qимәт дькьн, чьмки «һʹәму мьләтарʹа» шәʹдәтийе дьдьн (Мәт. 24:14). Хенщи ве йәке, әм дьлша нә, чьмки заньн wәки Йаһоwа qәбул дькә у һʹьз дькә wана, йед кö «бь сәбьр бәре хwә дьдьн»!