Әʹдьлайи; Әм Ча Дькарьн Бьстиньн?

ӘМ ДЬЖИН дьнйакә гәләк чәтьнда, у ләма әм алийе хwәда һәр тьшти дькьн, wәки дьлрʹьһʹәтийе бьстиньн. Ле чахе әм дьлрʹьһʹәт ьн жи, йәкә әм дьхәбьтьн wәки әве әʹдьлайе öнда нәкьн. Хwәде дьбежә, кö әм ча дькарьн әʹдьлайа рʹаст у дьреж бьстиньн. Ле гәло әм ча дькарьн ве йәкеда али мәрьвед дьн жи бькьн?

ЧЬ ЛАЗЬМ Ә СӘВА ӘʹДЬЛАЙА РʹАСТ БЬСТИНЬН?

Сәва кö әʹдьлайа мә һәбә, лазьм ә әм хwә бехоф тʹәхмин кьн у дьлрʹьһʹәт бьн. Әм öса жи гәрәке бьхәбьтьн wәки һәләqәтийа мә тʹәви мәрьва баш бә. Ле йа лапә фәрз кö ча әʹдьлайа дьреж бьстиньн әw ә, кö бьбьнә достед Йаһоwайи незик. Ча әм дькарьн ве йәке бькьн?

Чахе әм гöһ дьдьнә тʹәми у принсипед Йаһоwа, бь ве йәке әм дьдьнә кʹьфше, wәки әм баwәрийа хwә wи тиньн у дьхwазьн тʹәви wи әʹдьлайеда бьн (Йерәм. 17:7, 8; Аqуб 2:22, 23). Әw жи алийе хwәда незики мә дьбә, мә кʹәрәм дькә у дьлрʹьһʹәтийе дьдә мә. Ишайа 32:17-да те готьне: «Wе кʹаре рʹастийе бьбә сьламәт у wе бәра рʹастийе һьшбуна абадин у әwләбун бә». Бәле, чахе әм бь дьл гöрʹа Йаһоwа дькьн, һьнге әм бь рʹасти дьлрʹьһʹәт дьбьн (Иша. 48:18, 19).

Öса жи рʹöһʹе Хwәдейи пироз, кö пʹешкʹеша жь Баве мәйи әʹзмана йә, дькарә әʹдьлайе бьдә мә (Кʹар. Шанд. 9:31).

РʹÖҺʹЕ ПИРОЗ ӘʹДЬЛАЙЕ ДЬДӘ МӘ

Паwлосе шанди чахе һʹöнöред бәре рʹöһʹе пироз рʹез дькә, рʹезеда йа сьсийа әʹдьлайи йә (Галт. 5:22, 23). Бәле, әʹдьлайи бь сайа рʹöһʹе Хwәдейи пироз пешда те, ләма жи әм гәрәке бьһельн рʹöһʹе пироз сәр мә һʹöкöм кә. Wәрә дö дәрәща шеwьр кьн, кö чаwа рʹöһʹе Хwәдейи пироз дькарә али мә бькә.

Йа пешьн, чахе әм һәр рʹож Хәбәра Хwәде дьхуньн, әw йәк али мә дькә кö әʹдьлайи дьле мәда һәбә (Зәб. 1:2, 3). Чахе әм дьфькьрьн сәр хwәндьна Кʹьтеба Пироз, рʹöһʹе Хwәдейи пироз али мә дькә, wәки әм ньһерʹандьна Йаһоwа сәр гәләк тьшта, фәʹм кьн. Мәсәлә, әм педьһʹәсьн кö әw ча әʹдьлайе хwәй дькә у чьрʹа бона wи әʹдьлайи гәләк фәрз ә. Гава әм дәрсед wи щурʹәйи жь Хәбәра Хwәде һин дьбьн, әм һе зедә әʹдьлайе дьстиньн (Мәтʹлк. 3:1, 2).

Йа дöда, әм гәрәке дöа бькьн, wәки рʹöһʹе Хwәдейи пироз бьстиньн (Луqа 11:13). Һәрге әм аликʹарийе жь Йаһоwа дьхwазьн, әw мәрʹа соз дьдә, wәки «әʹдьлайийа Хwәде кö жь һәр һʹьш-аqьли дәрбазтьр ә, wе дьл у фькьред [мә] йәктийа Мәсиһ Исада хwәй кә» (Фили. 4:6, 7). Гава әм тʹьме дöа дькьн у рʹöһʹе пироз жь Йаһоwа дьхwазьн, Хwәде дьлрʹьһʹәтийе дьдә мә. Әʹдьлайа wи щурʹәйи Йаһоwа тʹәне дьдә wан, йед кö достийа тʹәви wи qимәт дькьн (Рʹом. 15:13).

Wәрә әм ньһа чәнд сәрһатийед хушк-бьра шеwьр кьн, йед кö ширәтед жь Кʹьтеба Пироз данә хәбате у нав хwәда гöһастьн кьрьнә сәва кö дьлрʹьһʹәтийе бьстиньн, öса жи тʹәви Йаһоwа у мәрьва әʹдьлайеда бьн.

ЧАWА WАНА ӘʹДЬЛАЙА РʹАСТ QАЗАНЩ КЬРЬН

Щьвата Мәсиһитида һәнә хушк-бьред öса, йед кö бәре «һерс» бун, ле ньһа әwана һьндава мәрьва фәсал, ширьн, бь сәбьр у бь әʹдьлайе бунәa (Мәтʹлк. 29:22). Дина хwә бьдьнә мәсәла хушкәке у бьраки, йед кö һерса хwә тәмьрандьнә у тʹәви мәрьва әʹдьлайе хwәй дькьн.

Девид, хәбәрданеда йәки сәрт бу, чьмки ньһерʹандьна wи нәрʹаст бу. Пешийа кö әwи хwә тʹәсмили Хwәде кьра, әwи qәрф мәрьва дькьр у һьндава нәфәред хwә хәбәред нәщайиз дьда хәбате. Wәʹдә дәрбаз бу Девид фәʹм кьр, wәки әw гәрәке әви хәйсәте хwә бьгöһезә у тʹәви мәрьва әʹдьлайеда бә. Ле гәло чь али wи кьр бе гöһастьне? Әw гьли дькә: «Мьн дәстпекьр принсипед Кʹьтеба Пироз биньм сери, у бь сайа ве йәке әз у нәфәред мьн һе qәдьре һәв дьгьрьн».

Рейчел, малбәтәкә öсада мәзьн буйә кö сәр ньһерʹандьна wе һʹöкöм буйә. Әw дьбежә: «Һәла һе ньһа жи әз сәр хwә дьхәбьтьм, wәки һерса хwә бьгьрьм, чьмки әз малбәтәкә öсада мәзьн бумә, кʹидәреда гьшк һерс бун». Ле гәло чь али wе кьр, wәки әw тʹәви мәрьва әʹдьлайе хwәй дькә? Әw дьбежә: «Мьн тʹьме Йаһоwарʹа дöа дькьр у аликʹари жь wи дьхwәст».

Мә тʹәне дö мәсәлә шеwьр кьр, кö ча принсипед Кʹьтеба Пироз у öса жи дöакьрьна бона рʹöһʹе пироз, али мәрьва дькә бь әʹдьлайи бьн. Әшкәрә йә, кö рʹаст ә әм ве дьнйа хьрабда дьжин, ле йәкә әм дькарьн дьлрʹьһʹәтийе бьстиньн, кʹижан кö баш һʹöкöм дькә һьн сәр нәфәред мә, һьн жи сәр хушк-бьра. Йаһоwа мәрʹа дьбежә, wәки әм «тʹәви һʹәму мәрьва әʹдьлайеда бьн» (Рʹом. 12:18). Ле гәло әw йәк дьбә, у әме чь кʹаре бьстиньн һәрге тʹәви мәрьва әʹдьлайеда бьн?

ТʹӘВИ МӘРЬВА ӘʹДЬЛАЙЕДА БЬН

Бь сайа хьзмәтийа хwә, әм мәрьварʹа мьзгинийа Пʹадшатийа Хwәде бәла дькьн у әw мьзгини дькарә әʹдьлайе бьдә wан (Иша. 9:6, 7; Мәт. 24:14). Ча баш ә кö гәләк мәрьва әв мьзгини qәбул кьрьнә. Әw мәрьв ида дьлшкәсти ниньн у нә жи һерс дькʹәвьн сәр ве йәке кö чь дьqәwьмә ве дьнеда. Дәwсе, әwана һивийа ахьрийа баш ьн, у алийе хwәда әʹдьлайе хwәй дькьн (Зәб. 34:14).

Сәд һʹәйф, нә һʹәму мәрьв перʹа-перʹа мьзгинийа мә qәбул дькьн (Йуһʹн. 3:19). Ле рʹöһʹе Хwәдейи пироз али мә дькә, wәки әве мьзгинийе нәрм у бь qәдьр wанрʹа гьли кьн. Бь wи щурʹәйи әм пәй рʹебәрийа Иса дьчьн, кö Мәтта 10:11-13-да ньвисар ә: «Гава һун һәрʹьнә мале, сьлаве бьдьнә wе у бежьн: ‹Әʹдьлайи ве малерʹа›. У һәгәр әw мал һежа йә, бьра сьлава wә ль сәр wе бә, ле һәгәр нә һежа йә, бьра сьлава wә ль wә вәгәрʹә». Чахе әм пәй ширәтед Иса дьчьн, әм дьлрʹьһʹәт дьминьн у щарәкә майин әwана дькарьн гöһ бьдьн мьзгинийе.

Öса жи чахе әм тʹәви мәрьвед дәwләте бь qәдьр хәбәр дьдьн, әм әʹдьлайе чедькьн тʹәви wан, у һәла һе тʹәви wан жи, йед кö мьqабьли мә нә. Мәсәлә, сәрwертийа wәлатәки Африкайе изьн нәда, wәки әм Одед Щьвата ава кьн, чьмки дәрһәqа мә нәрʹаст дьфькьрин. Сәва кö әве чәтьнайе бь әʹдьлайе сафи кьн, бьраки кö бәре wи wәлатида ча мисйонер хьзмәт дькьр, һатә кʹьфшкьрьне wәки Лондонеда тʹәви qасьде wи wәлате Африкайе хәбәр дә. Әwи гәрәке дәрһәqа шьхöле Шәʹдед Йаһоwа wирʹа гьли кьра, кö wәлате wи qасьдида те кьрьне. Гәло әw рʹастһатьн ча дәрбаз бу?

Әw бьра гьли дькә: «Чахе әз кʹәтьмә һöндöрʹ, мьн дит wәки әw qизька кö мәрьва qәбул дькә, кʹьнщед ве бәрәке ле нә, зьмане кʹижани әз һин дьбум. Ләма жи мьн сәр зьмане wе жерʹа сьлав да. Әw әʹщебмайи ма у жь мьн пьрси: ‹Чьрʹа һун һатьнә wьра?› Мьн бь qәдьр жерʹа гот, wәки әз дьхwазьм qасьд бьвиньм. Әwе wирʹа тʹелехьст, әw qасьд һат у сәр зьмане wи бәрәки мьнрʹа сьлав да. Паши ве йәке, әwи рʹьнд гöһ да мьн чахе мьн жерʹа шьровәдькьр дәрһәqа шьхöлед Шәʹдед Йаһоwа, кö әʹдьлайе хьраб накьн».

Әви бьрайи öса бь qәдьр wи qасьдирʹа шьровәкьр, wәки әwи qасьди ньһерʹандьна хwә гöһаст у ида сәр шьхöле мә баш дьньһерʹи. Һьнә wәʹдә шунда, сәрwере wи wәлате Африкайе изьн да, wәки әм Одед Щьвата ава кьн. Рʹасти жи хушк-бьра чьqас ша бунә кö öса бь әʹдьлайи әw чәтьнайи сафи бу. Бәле, чахе әм һьндава мәрьва бь qәдьр ьн, әм гәләк кʹаре у әʹдьлайе дьстиньн.

ҺʹӘТА-ҺʹӘТАЙЕ ӘʹДЬЛАЙЕРʹА ША БЬН

Иро щьмәʹта Йаһоwа щьнәта рʹöһʹанида нә кö бь әʹдьлайе тʹьжә йә. Һун жи алийе хwәда дькарьн әве әʹдьлайе зедә кьн, гава wи һʹöнöре бәре рʹöһʹе пироз нав хwәда пешда биньн у әʹмьре хwәда бьдьнә хәбате. Ле йа лапә фәрз әw ә, кö һуне qәбулкьрьна Йаһоwа бьстиньн у дьнйа тʹәзәда һʹәта-һʹәтайе әʹдьлайеда бьн (2 Пәт. 3:13, 14).