Дәстпек Нәбаш; Ле Ахьри Гәш

ЧАХЕ әз мәкʹтәбеда һин дьбум, шәһәре мәда гәләк тьшт нәһатә гöһастьне. Ве мәкʹтәбеда, зарʹед кö кʹома йәкеда һин дьбун, диса жи әwан зарʹа тʹәвайи мәкʹтәб хьлаз дькьрьн. Ләма жи wи шәһәрида һʹәчʹи зәʹф мәрьва наве һәв заньбун.

Дор бәре шәһәре Либертʹи, кʹарханед бьчʹук һәбун, кʹижан кö һʹәчʹи зәʹф гәньме мьсьре дьчандьн. Чахе әз һатьмә буйине, баве мьн кʹарханәкеда дьхәбьти. Щаһьлтийеда әз һин бум тракторе бажом, у öса жи тьштед дьн кö хәбата кʹарханева гьредайи бун.

Мьн баве хwә щаһьлтийа wида нәдитийә, чьмки чахе әз һатьмә буйине, әw ида 56 сали бу, дийа мьн жи 35 сали. Ле баве мьн йәки жар, сьһʹәт-qәwат у qәwи бу. Әw гәләк хәбатһʹьз бу у әwи әм жи һин дькьрьн wәки хәбатһʹьз бьн. Әwи гәләк пʹәрә нәдьстанд, ле йәкә щи-сьтʹара мә һәбу, кʹьнщ у хwарьн жи мә кем нибу. Әw 93 сали бу чахе мьр, ле дийа мьн 86 сали бу мьр. Һәрдö жи Шәʹдед Йаһоwа нибун. Ле бьраки мьн, жь сала 1972 бь амьни ча рʹуспи хьзмәт дькә.

ЩАҺЬЛТИЙА МЬН

Дийа мьн йәкә баwәрмәнд бу. Һәр Ләʹд әwе әм дьбьрьнә дера Бабтиста. Чахе әз 12 сали бум, әз щара пешьн дәрһәqа Сейәканә пеһʹәсийам. Һьнге мьн жь дийа хwә пьрси: «Ча Иса дькарә һьн Кöрʹ һьн жи Бав бә?» Щаба wе һʹәта иро те бира мьн: «Кöрʹе мьн, әw сöрʹ ә. Әм нькарьн ве йәке фәʹм кьн». Рʹасти жи әw йәк бона мьн фәʹмдари нибу. Ле йәкә чахе әз wәкә 14 сали бум, әз һатьмә ньхöмандьне чʹәме бьчʹукда, ль гора Сейәканә се щара мьн кьрьнә аве!

Чахе әз мәкʹтәбеда һин дьбум, һәваләки мьн боксор бу у әwи әз һелан дькьрьм, wәки әз жи бьбьм боксор. Ләма жи мьн дәстпекьр һин бьм у әз бум әндәме тʹәшкиләтәкә боксе йа бь наве Голден Главз. Әз рʹьнд һин нәдьбум, ләма жи паши чәнд шәрʹе боксе, әз жь ве тʹәшкиләте дәркʹәтьм. Паше, гази мьн кьрьн әскәрийе. Жь wедәре әз шандьмә Алманйайе. У чахе мьн wедәре qöльх дькьр, сәрока әз шандьмә академийа офисера (Noncommissionеd Officеrs Acadеmy), чьмки дьфькьрин wәки әзе бьбьмә сәрокәки баш. Wана дьхwәст wәки әз әскәрийеда пешда һәрʹьм. Ле мьн әв йәк нәдьхwәст, ләма жи чахе дö салед qöльхкьрьна мьн тʹәмам бун, сала 1956 ида әз жь әскәрийе чум. Паши ве йәке, әз кʹәтьмә ордикә дьн, демәк нав щьмәʹта Хwәде.

ӘʹМЬРӘКИ ТʹӘЗӘ ДӘСТПЕДЬКЬМ

Һʹәта мьн рʹасти нас кьра, фькьред мьн нәрʹаст бун дәрһәqа wе йәке, кö мер гәрәке бь рʹасти чь щурʹәйи бә. Филм у мәрьвед дор бәре мьн сәр ньһерʹандьна мьн хьраб һʹöкöм бьбун. Һьн жи әз дьфькьрим, wәки меред кö дәрһәqа рʹелигийе хәбәр дьдьн, әwана мерани ниньн. Ле паше мьн дәстпекьр тьштед öса һин бьм, кö әʹмьре мьн лаптә гöһастьн. Рʹожәке, чахе әз пе авта хwәйә сор нав шәһәррʹа дьчум, дö кәчʹька дәстед хwә мьнрʹа һәжандьн сьлав данә мьн. Мьн әwана нас дькьрьн, әw балтʹузед хушка мьнә мәзьн бун. Әw дö кәчʹьк Шәʹдед Йаһоwа бун. Пешийа ве йәке, wана журналед «Бьрща Qәрәwьлийе» у «Һʹьшйар бьн!» дабунә мьн, мьн тʹьре кö «Бьрща Qәрәwьлийе» бона мьн гәләк чәтьн ә. Ле ве рʹоже, wана әз тʹәглифи щьвате кьрьм, кö мала wанда дәрбаз дьбу. Мьн wанрʹа гот кö әзе бьфькьрьм. Wана бь бәшәра хwәш мьн пьрсин: «Соз дьди?» Мьн жи гот: «Әре, әз соз дьдьм».

Рʹаст бежьм әз һьнәки пʹошман бум кö мьн wанрʹа соз да, ле мьн хwәст хwәйе созе хwә бьм. Ләма жи ве еваре әз чум сәр щьвате. Әз гәләк әʹщебмайи мам кö зарʹа ча рʹьнд Кʹьтеба Пироз заньбун. Чахе әз бәре тʹәви дийа хwә һәр Ләʹд дьчумә дере, мьн дәрһәqа Кʹьтеба Пироз гәләк һьндьк заньбу. Ле ньһа мьн хwәст һе зедә пебьһʹәсьм. Әз qайил бум һинбуна Кʹьтеба Пироз дәстпекьм. Пешийа ве йәке әз пеһʹәсийам, wәки наве Хwәдейе Һьмзор, Йаһоwа йә. Гәләк сал пешда, мьн жь дийа хwә пьрсибу кö кʹе нә Шәʹдед Йаһоwа, щаба wе öса бу: «Әwана мерәки әʹмьрда мәзьн бь наве Йаһоwа дьһʹәбиньн». Ле ньһа мьн фәʹм кьр кö чʹәʹвед мьн вәбунә.

Әз рʹöһʹанида зу пешда дьчум, чьмки мьн заньбу wәки мьн рʹасти дитийә. Паши щьвата мьнә пешьн, нава нәһ мәһада әз һатьмә ньхöмандьне, мәһа Адаре сала 1957. Ньһерʹандьна мьн сәр әʹмьр һатә гöһастьне. Чахе дьһатә бира мьн, wәки бәре әз нәрʹаст дьфькьрим, кö мер гәрәке чь щурʹәйи бә, әз ша дьбум wәки әз пеһʹәсийамә кö Кʹьтеба Пироз чь дьбежә дәрһәqа ве йәке. Иса мәрьвәки бекемаси бу. Qәwата wи öса мәзьн бу, кö тʹәви qәwата тʹö мери найе бәрамбәркьрьне. Йәкә әw тʹö щар нәдькʹәтә нав шәрʹ-дәʹwа, ле әwи һишт wи бьдьнә щәфе, чаwа һатьбу пʹехәмбәртикьрьне (Иша. 53:2, 7). Әз пеһʹәсийам wәки шагьртед Иса гәрәке «һьндава һʹәмуйада бәрбьһер» бьн (2 Тимтʹ. 2:24).

Саләк шунда, демәк сала 1958, мьн пешәнгти дәстпекьр. Ле һьнә wәʹдә шунда мьн пешәнгтийа хwә да сәкьнандьне. Чьрʹа? Чьмки мьн сафи кьр wәки Глориайе бьстиньм, әw балтʹуза хушка мьн ә, йа кö тʹәви хушка хwә әз тʹәглифи щьвате кьрьм. Әз тʹö щар пʹошман набьм кö мьн әw станд. Глориа һьнге бона мьн кәвьре qимәт бу, у һʹәта иро жи бона мьн гәләк qимәт ә. Әw бона мьн жь алмазәки лапи бьһа qимәттьр ә, у әз гәләк бәхтәwар ьм кö әw бу жьна мьн! Ньһа әwе wәрʹа һьнәки дәрһәqа хwә гьли кә:

«Әм 17 хушк-бьра бун. Дийа мьн Шәʹде Йаһоwайә амьн бу. Чахе әз 14 сали бум әw мьр. Паши мьрьна wе, баве мьн дәстпекьр Кʹьтеба Пироз һин бә. Баве мьн тʹәви директоре мәкʹтәбе хәбәр да, wәки әw изьне бьдә кö рʹожәке әз нәчьмә мәкʹтәбе, рʹожа дьн жи хушка мьнә мәзьн, йа кö ида кʹома хьлазийеда бу. Әwи öса дьхwәст сәва кö рʹоже йәк жь мә малда бьминә бәр зарʹа бә, у бона нәфәра хwарьне һазьр кә, һʹәта баве мә жь хәбате бе. Директоре мәкʹтәбе qайил бу, у әw йәк öса бу һʹәта кö әwе хушка мьн мәкʹтәб хьлаз кьр. Дö малбәтед Шәʹдед Йаһоwа тʹәви мә һинбуна Кʹьтеба Пироз дәрбаз дькьрьн, у жь мә 11 зарʹ бунә Шәʹдед Йаһоwа. Рʹаст ә әз йәкә шәрмокә бум, ле мьн хьзмәти гәләк һʹьз дькьр. Ве йәкеда Сем ида гәләк сал ә али мьн дькә».

Мьн у Глориайе сала 1959, мәһа Сьбате һәв станд. Мә тʹәвайи ча пешәнг хьзмәт дькьр. Ве сале мәһа Тирмәһе, мә бланка хьзмәтийа Бәйтʹәле тʹьжә кьр, чьмки мә гәләк дьхwәст офиса сәрәкәда хьзмәт кьн. Бьраки мәйи дәлал бь наве Симон Кракер кö Бәйтʹәледа хьзмәт дькьр у бланка мә дит, дәрһәqа хьзмәтийа Бәйтʹәле тʹәви мә хәбәр да. Әwи готә мә wәки Бәйтʹәл ньһа щотед зәwаще һе qәбул накә. Ле әw нет жь дьле мә тʹö щар дәрнәдькʹәт, у һежа бу wәки әм гәләк wәхт һивийе бьн!

Мә ньвиси филиала сәрәкәра wәки әwана мә бьшиньн wи щийи, кʹидәре кö һʹәwщәти һәйә. Мәрʹа щаб öса дан: Һәрʹьнә шәһәре Пайн Блаф, Аркансас. Һьнге, wедәре тʹәне дö щьват һәбун, йәкида мьзгинванед бь чʹәрме спи хьзмәт дькьрьн, йа дьнда мьзгинванед бь чʹәрме рʹәш. Әм һатьнә кʹьфшкьрьне щьвата мьзгинванед бь чʹәрме рʹәшда, кʹидәре кö тʹәне 14 мьзгинван һәбун.

РʹАСТИ СЕГРЕГАСИЙА У РАСИЗМЕ ТЕН

Дьбәкә һун дьфькьрьн, wәки щьвата Шәʹдед Йаһоwада чьрʹа сегрегасийаa һәбу. Рʹекә дьн тʹöнә бу. Qанун һәбун кö изьн нәдьдан wәки мәрьвед жь щурʹә-щурʹә раса тʹәвайи тʹоп бьн. Бь рʹасти әw йәк гәләк хоф бу, чьмки шәрʹ-дәʹwед мәзьн дькарьбун пешда бьһатана. Гәләк щийада, хушк-бьра дьтьрсийан, wәки дö раса тʹәвайи тʹоп бьн, чьмки wе Ода Щьвате кʹöтакьрана. Тьштед öса бь рʹасти ида qәwьмибун. Һәрге Шәʹдед Йаһоwа йед бь чʹәрме рʹәш, мал бь мал хьзмәт дькьрьн у хwәйе мале чʹәрме спи бу, әwана дькарьбун бьһатана гьртьне у дьбәкә бьһатана кʹöтане жи. Ләма жи сәва бәрдәwам кьн хьзмәт кьн, мә әw qанун нәдьтʹәрʹьбандьн, у әм һивийе бун wәки әw дәрәщә алийе башда бе гöһастьне.

Хьзмәтийа хwәда әм рʹасти чәтьнайа дьһатьн. Мә хьзмәт дькьр мьһала мәрьвед бь чʹәрме рʹәшда, ле щара мә дәри дьхьст у дьдит wәки әwана мәрьвед бь чʹәрме спи нә. Һьнге мә гәрәке дәрберʹа сафи кьра кö чь бькьн, йан пешанине бежьн у рʹезәке бьхуньн, йан жи бежьн wәки мә шаш кьрийә, у пашда һәрьн. Һьнә щийада, мә öса хьзмәт дькьр.

Әм пешәнг бун, ле мәрʹа лазьм бу бьхәбьтьн сәва әʹбура хwә бькьн. Мә бона һьнә хәбатед хwә рʹоже 3 долар дьстанд. Глориа чәнд малада дьхәбьти. Щики мьнрʹа изьн дан, wәки али wе бькьм, сәва әw шьхöле хwә зу хьлаз кә. Рʹоже щарәке хwарьн дьданә мә. Глориайе һәр һʹәфти малбәтәкеда утʹи дькьр. Ле әз бахчәда дьхәбьтим, мьн агушкә дьшуштьн, у диса щурʹә-щурʹә хәбатед дьн дькьр. Малбәтәкеда кö мәрьвед бь чʹәрме спи бун, мә агушкә дьшушт, Глориайе алийе һöндöрʹва дьшушт, ле мьн алийе дәрвава. Бона ве йәке тʹәмам рʹож лазьм бу, ләма жи wана хwарьн дьданә мә. Глориайе мала wанда башqә дьхwар, нә тʹәви нәфәред wан, ле мьн гаражеда дьхwар. Бона мьн әw йәк проблем нибу. Хwарьнәкә гәләк баш wана дьда мә. Әw малбәт бь рʹасти баш бу, тʹәне ньһерʹандьна wан нәрʹаст бу, чьмки дькʹәтьнә бәр байе мәрьвед дор бәр, демәк фьрqи дькьрьнә ортʹа раса. Те бира мьн щарәке әм сәкьнибун, wәки бензине бәри авта хwә дьн. Чахе мә бензин дагьрт, мьн жь хәбатчи пьрси кö изьнә Глориа бькʹәвә дәставе. Әwи авьрʹ да мьн у гот: «Дадайә».

QӘНЩИ КÖ НАЙЕНӘ БИРКЬРЬН

Ле мә wәʹдәки баш дәрбаз дькьр тʹәви хушк-бьред хwә, у мә хьзмәтийа хwә һʹьз дькьр! Чахе әм щара пешьн һатьнә Пайн Блафе, мә тʹәви бьраки дьжит, кʹижан кö һьнге хьзмәткʹаре щьвате бу. Жьна wи һьнге нәбаwәр бу, у Глориайе дәстпекьр тʹәви wе һинбуне дәрбаз кә. Ле мьн тʹәви qиза wан у мере wе дәстпекьр һинбуна Кʹьтеба Пироз дәрбаз кьм. Ахьрийеда әw жьньк у qиза wе һатьн сәр рʹийа Йаһоwа у һатьнә ньхöмандьне.

Һәвалед мәйә баш һәбун жь щьвата хушк-бьред чʹәрме спи. Wана әм тʹәглифи мала хwә дькьрьн, ле әм һьнге дьчунә мала wан чахе тәʹри дькʹәтә әʹрде, сәва тʹö кәс мә тʹәвайи нәвинә. Wи wәʹдәйи тʹәшкиләт бь наве «Ку Клукс Клан» (ККК), кʹижан кö пьштгьрийа расизме у зорбәтийе дькьр, гәләк навдар бу. Те бира мьн щарәке, мерькәк бәр мала хwә qöрʹә-qöрʹә рʹуньштьбу, у кʹьнщед мина йе әндәмед ККК ле бу. Ле хушк-бьра нәдьһиштьн, wәки тьштед öса рʹе wан бьгьрә qәнщийе һәвдöрʹа бькьн. Щарәке һавине, мәрʹа пʹәрә лазьм бу сәва һәрʹьнә щьвата серʹожи, у бьраки мә qайил бу wәки авта мә бькʹьрʹә, сәва әм һәрʹьнә щьвата мәзьн. Мәһәк дәрбаз бу, рʹожәке чахе әм qьжә-qьжә гәрмеда жь хьзмәтийа мал бь мал тенә мала хwә, бәр мала хwә пʹешкʹешәке дьвиньн! Әw авта мә бу. Сәр шуша авте кʹахаз һәбу у сәр ньвисар бу: «Әwе авта хwә жь мьн пʹешкʹеш һьлдьн. Бьре wә».

Qәнщик жи һʹәта иро бира мьн начә. Сала 1962, мьн тʹәглифи Мәкʹтәба Хьзмәтийе кьрьн ль Лансинга Башуре, (Нийу Йорк). Әw курс мәһәке бу бона бьред щабдар щьватада, öса жи бона бәрпьрсийаред мьһале у нәһийе бу. Чахе мьн тʹәглифкьрьн станд, әз бехәбат бум у алийе пʹәрәда чәтьнайед мә һәбун. Ле Пайн Блафеда компанийәкә тʹела гази мьн кьрьн, wәки тʹәви мьн хәбәр дьн дәрһәqа хәбате. Һәрге wана әз qәбул кьрама сәр ве хәбате, әзе ве компанийайеда мәрьве бь чʹәрме рʹәш йе пешьн бума. Ахьрийеда wана мьнрʹа гот, wәки qайил ьн әз wедәре бьхәбьтьн. Ле мьн чь кьр? Һьнге пʹәре мьн тʹöнә бу сәва һәрʹьм Нийу Йорке курсе дәрбаз бьм. Мьн дьхwәст бьхәбьтьм wи щийи у әз фькьрим нәчьмә мәкʹтәбе. У чахе әз ида һазьр бум wәки нәʹмә бьньвисьм кö әз нькарьм һәрʹьм мәкʹтәбе, ньшкева тьштәки öса qәwьми кö әзе тʹö щар бир нәкьм.

Хушкәк жь щьвата мә, мере кʹижане нәбаwәр бу, шәбәqе зу дәре мала мә хьст у конвертәк да мә, теда тʹьжә пʹәрә бу. Әw шәбәqе тʹәви чәнд зарʹед хwә, чәнд рʹожа рʹадьбу дьчу чоле, нава пәмбу зиwан дәрдьхьст, сәва кö пʹәра тʹоп кә, wәки әз һәрʹьм Нийу Йорке. Әwе готә мьн: «Һәрʹә мәкʹтәбе, у чьqас дькари рʹьнд һин бә, wәки вәгәрʹи у паше мә һин ки!». Паше, мьн жь ве компанийа тʹеле пьрси һәла әз дькарьм wедәре хәбате дәстпекьм пенщ һʹәфти шунда. Щаб гәләк сәрт бу: «На». Ле әз бәрхwә нәкʹәтьм. Мьн сафикьрьна хwә кьр, у әз пʹошман набьм wәки әз нәкʹәтьмә ве хәбате!

Глориа тинә бира хwә wәʹде хьзмәтийа мә Пайн Блафеда: «Мьн әw щи гәләк һʹьз кьр. Wедәре мьн 15 һʹәта 20 һинбуна Кʹьтеба Пироз дәрбаз дькьр. Ләма жи әм шәбәqе дьчунә хәбате, у паше тʹәмамийа рʹоже мә һинбунед Кʹьтеба Пироз дәрбаз дькьр. Щара әм еваре сьһʹәта 11 дьһатьнә мал. Хьзмәти гәләк һʹәwас бу! Мьн дьхwәст диса wи щийида бьмама. Әз рʹаст бежьм, мьн нәдьхwәст wәки кʹьфшкьрьна мә бе гöһастьне у шьхöле бәрпьрсийартийе бькьн, ле Йаһоwа бона мә диса тьштәк һазьр дькьр». У рʹасти жи öса бу.

ХЬЗМӘТИЙА ШЬХÖЛЕ БӘРПЬРСИЙАРТИДА

Чахе мә Пайн Блафеда ча пешәнг хьзмәт дькьр, мә бланк тʹьжә кьр сәва бьбьнә пешәнгед мәхсус. Әм дьфькьрин wәки әме әʹсә бенә кʹьфшкьрьне, чьмки бәрпьрсийаре нәһийе дьхwәст, wәки әм ча пешәнгед мәхсус хьзмәт кьн сәва али щьвата шәһәре Техасда бькьн. У әw йәк гәләк мә хwәш дьһат, ләма жи әм гәләк wәхт һивийа щаба жь филиале бун, ле щаб нәдьһат. Ахьрийеда, щарәке нәʹмә һат, у әм һатьнә кʹьфшкьрьне шьхöле бәрпьрсийартийе бькьн. Әw сала 1965 бу, мәһа Чьләйе. Бьрак бь наве Леон Wивер, кö ньһа кординаторе Комитейа филиала Дәwләтед Йәкбуйи йә, әw жи һьнге һатә кʹьфшкьрьне ча бәрпьрсийаре мьһале.

Әз бәрхwә дькʹәтьм кö әз дьбумә бәрпьрсийаре мьһале. Саләк пешда йан дьбәкә һе зедә, бәрпьрсийаре нәһийе бь наве Щеймс А. Томсон, ньһерʹи һәла әз дькарьм бьбьмә бәрпьрсийаре мьһале. Әwи бь нәрми мьнрʹа нишан кьр, кö әз кʹижан тьштада гәрәке хwә бьгöһезьм, у гот кö кʹижан фәрәсәт лазьм ьн бона бәрпьрсийаред мьһале. Һьнә wәʹдә шунда паши ве кʹьфшкьрьне мьн фәʹм кьр, кö ширәтед wи чьqас мьнрʹа лазьм бун. Щара әʹwльн мьн тʹәви Томсон бьра хьзмәт дькьр, йе кö бәрпьрсийаре нәһийе бу. Әз жь wи бьре рʹöһʹани у амьн, гәләк тьшт һин бум.

Һьнге, бәрпьрсийаред мьһале зәʹф нәдьһатьнә һинкьрьне. Мьн һʹәфтеке дина хwә да бәрпьрсийаре мьһале гава әwи тʹәсәлийа щьвате дькьр. Паше әwи һʹәфтеке дина хwә да мьн, чахе мьн тʹәсәлийа щьвата дьн дькьр у әwи ширәт у рʹебәри да мьн. Паши ве йәке, әм ида хwәха сәри хwә бун. Те бира мьн чахе Глориайе мьнрʹа гот: «Һежа йә әw ньһа бьһелә һәрʹә?» Wәʹдә дәрбаз бу, мьн тьштәки фәрз фәʹм кьр. Тʹьме wе һәбьн бьра кö дькарьн али тә бькьн, ле тʹәне һәрге тö бьһели али тә бькьн. Әз гәләк дьшекьриньм кö мьн аликʹари станд жь бьред щерʹьбанди, мәсәлә жь Щ. Р. Браwн кʹижан кö һьнге бәрпьрсийаре нәһийе бу, у Фред Раск кö әндәме Бәйтʹәле бу.

Расизм wи wәʹдәйи гәләк бәлабуйи бу. Щарәке ККК нав шәһәре Теннесида кö әм wедәре бун, дьчун-дьһатьн. Öса жи те бира мьн чахе әм wәʹде хьзмәтийе кʹәтьнә ресторане сәва хwарьне бьхwьн. Гава әз дьчумә дәставе, мьн тедәрхьст кö пәй мьн мәрьвәк һерсә-һерс те дькʹәвә дәставе, жь татуировкед wийи сәр бәдәне дьһатә кʹьфше, кö әw мьqабьли мәрьвед бь чʹәрме рʹәш ә. Ле гава бьраки мә бь чʹәрме спи әw йәк дит, кʹижан кö жь мьн у жь wи мерьки гьртьр бу, пәй мә һат. Әwи жь мьн пьрси: «Һöрд бьра, һʹәму тьшт баш ә?» Әw мерьк жи кʹәрба зузу жь дәставә дәркʹәт, дәстав нә жи да хәбате. Нава гәләк салада әз дьвиньм, wәки мәʹнийа расизме нә кö рʹәнге чʹәрме мәрьва йә, ле мәʹни гöнә йә, кö мә һʹәмушка жь Адәм стандийә. У әз заньм wәки бона хушк-бьра фьрqи тʹöнә чʹәрме тә чь рʹәнги йә, әwана һазьр ьн, һәрге лазьм бә, әʹмьре хwә жи бона тә бьдьн.

АХЬРИЙА ГӘШ

Әз 12 сала бәрпьрсийаре мьһале бум, у 21 сала жи бәрпьрсийаре нәһийе бум. Әw бона мә wәʹдәки гәләк хwәш бу, бь кʹәрәма тʹьжә, у öса жи гәләк qәwьмандьнед һʹәwас һәбун. Ле диса кʹәрәмәк жи мә станд. Сала 1997, мәһа Тʹәбахе, нета мә кö зудава дьле мәда бу, һатә сери. Мә тʹәглифи Бәйтʹәла Амәрикайе кьрьн. Бьдьнә һʹәсабе хwә, нета мә һатә сери 38 сал паши ве йәке, гава мә щара пешьн бланк тʹьжә кьр. Мәһәк дәрбаз бу у мә хьзмәтийа хwәйә Бәйтʹәледа дәстпекьр. Мьн тʹьре бьред щабдар дьхwазьн, wәки әз Бәйтʹәледа wәʹдәлу али wан бькьм, ле öса нибу ча әз дьфькьрим.

Әз Идара Хьзмәтийеда һатьмә кʹьфшкьрьне. Ве идареда әз гәләк тьшт һин бум. Бьред ве идареда пьрсед гәләк чәтьн дьстиньн. Әw пьрс жь кʹома рʹуспийа у жь бәрпьрсийаред мьһале нә, нав тʹәмамийа wәлатда. Мьн гәләк дьшекьранд сәбьр у аликʹарийа wан, чахе wан бьра әз һин дькьрьм. Ньһа һәрге мьн диса ве идареда кʹьфш кьн, әзе диса жи чаwа мәрьве тʹәзә гәләк тьшт wедәре һин бьм.

Әз у Глориа жийина Бәйтʹәле гәләк һʹьз дькьн. Әм тʹьме шәбәqе зу рʹадьбьн у әw хәйсәт Бәйтʹәледа гәләк кери мә те. Паши wәкә саләке, мьн дәстпекьр хьзмәт кьм ча аликʹарчийе Комитейа Хьзмәтийе йа Кʹома Рʹебәрийе. Паше, сала 1999-да, әз һатьмә кʹьфшкьрьне ча әндәме Кʹома Рʹебәрийе. Әз ве кʹьфшкьрьнеда гәләк тьшт һин бум, ле бона мьн дәрсәкә лапә мәзьн әw ә, кö сәре щьвата Мәсиһити, әw һәйә нә кö мәрьв, ле Иса Мәсиһ.

Чахе әз дәрһәqа әʹмьре хwәйи бәре дьфькьрьм, щара хwә мина пʹехәмбәр Амос тʹәхмин дькьм. Йаһоwа дина хwә да wи шьване мьлук, кʹижан кö шьхöләкә бьчʹук дькьр һәжир тʹоп дькьр. Һьнге һәжир һʹәсаб дькьрьн ча хwарьна кʹәсиба. Ле Хwәде Амос бьжарт, wәки әw бьбә пʹехәмбәре wи, у әw щабдари рʹасти жи гәләк мәхсус у qимәт бу (Амс. 7:14, 15). Йаһоwа öса жи дина хwә да мьн, кöрʹе мәрьвәки кʹәсиб кö кʹарханеда дьхәбьти, у гәләк кʹәрәм сәр мьнда баранд, һаqас кö нькарьм һʹәсаб кьм жи! (Мәтʹлк. 10:22). Әз тʹәхмин дькьм кö рʹаст ә әʹмьре мьн жь кʹәсибийе дәстпебу, ле ахьрийа мьн дәwләтийа рʹöһʹани йә, чь кö һәбукәкә мәзьн ә, кʹижан кö qә сәре мьнрʹа жи дәрбаз нәдьбу!