Qәwата Сьлаве
«РʹОЖ БАШ, чаwани?»
Бешьк, һун гәләк щар сьлавед wи щурʹәйи дьдьнә мәрьва. Дьбәкә һун хенщи сьлава öса, дәсте хwә жи дькьнә дәсте һәв, йан жи һәв һʹәмез дькьн. Бәле, щурʹә-щурʹә щийада мәрьв бь щурʹә-щурʹә сьлаве дьдьнә һәв, ле нета сьлаве һʹәму щийа жи йәкә. Һәрге әм сьлаве нәдьнә мәрьва, мәрьв wе бьфькьрьн wәки һʹьзкьрьна мә тʹöнә йан жи әм бемәʹрифәт ьн.
Ле нә һʹәму мәрьварʹа хәйсәт ә кö сьлаве бьдьн. Һьнәк шәрм дькьн сьлаве бьдьнә мәрьва. Һьнәкарʹа жи чәтьн ә сьлаве бьдьнә мәрьвед жь мьләтед майин, һьнәк жи жь бо мәʹнийед дьн сьлаве надьн. Ле һәла һе сьлавәкә кьн жи дькарә сәр мәрьва гәләк qәwи һʹöкöм бә.
Һәла пьрсе бьдьнә хwә: «Гәло сьлав чь кʹаре тинә? У Хәбәра Хwәде дәрһәqа сьлаве чь мьн һин дькә?»
«ҺʹӘМУЙА» СЬЛАВ КЬН
Чахе Пәтрусе шанди щьвата Мәсиһитида щара пешьн Мәсиһийе нә жь мьләте щьһу qәбул кьр, наве кʹижани Корʹнелйо бу, әwи гот: «Хwәде рʹасти жи фьрqийе накә нава мьләта» (Кʹар. Шанд. 10:34). Паше, Пәтрус ньвиси кö Хwәде «дьхwазә wәки һʹәму жь гöнәкьрьне вәгәрʹьн» (2 Пәт. 3:9). Дьбәкә әм дьфькьрьн wәки әw гьлийед Пәтрус бона wан мәрьва нә, йед кö тʹәзә тенә нава рʹастийе. Ле Пәтрус öса жи Мәсиһи ширәт кьрьн: «Qәдьре һʹәмуйа бьгьрьн, хушк-бьра һʹьз бькьн» (1 Пәт. 2:17). Жь wан гьлийа әм дьвиньн, wәки әм гәрәке һʹәму мәрьва сьлав кьн, фьрqи тʹöнә әwана жь чь мьләти нә у жь кʹидәре нә. Wи щурʹәйи әм qәдьр у һʹьзкьрьне һьндава wанда дьдьнә кʹьфше.
Паwлосе шанди хушк-бьред щьватерʹа гот: «Һәвдö qәбул кьн, чаwа Мәсиһ әм qәбул кьрьн» (Рʹом. 15:7). Паwлос гәләк хәм дькьр бона wан бьра, йед кö аликʹарийа мәзьн данә wи. Илаһи иро чьqас хушк у бьра һʹәwще qәwикьрьне нә, чьмки Шәйтʹан мьqабьли щьмәʹта Хwәде дәрдькʹәвә (Колс. 4:11; Әʹйан. 12:12, 17).
Мәсәлед жь Кʹьтеба Пироз әшкәрә нишан дькьн, wәки сьлава мә нә кö тʹәне дьдә кʹьфше wәки әм мәрьва бь дьл qәбул дькьн, ле öса жи кʹарәкә мәзьн тинә.
КʹАРА СЬЛАВЕ
Чахе Йаһоwа сафи кьр, wәки Кöрʹе хwә дәрбази зьке Мәрйәме кә, әwи мьлйакʹәте хwә шандә бал wе, сәва жерʹа дәрһәqа ве йәке әʹлам кә. Мьлйакʹәт гьлийед хwә öса дәстпекьр: «Сьлав ль тә qизька кʹәрәм ле буйийе, Хöдан тʹәви тә йә». Мәрйәм паши wан гьлийа «тʹәвиһәв бу», чьмки ньзаньбу мьлйакʹәт чьрʹа тʹәви wе хәбәр да. Мьлйакʹәт әв йәк дит у жерʹа гот: «Мәрйәм, нәтьрсә! Чьмки тә кʹәрәм жь Хwәде станд». Әwи жерʹа шьровәкьр, wәки qьрара Хwәде һьндава wе әw ә, кö жь wе Мәсиһ бе буйине. Мәрйәм сәр wан гьлийа нә кö әʹщьз бу, ле бь дьл щаба wи öса да: «Әз щарийа Хöдан ьм. Бьра анәгори готьна тә бона мьн бьбә» (Луqа 1:26-38).
Бона мьлйакʹәт qәдьрәки мәзьн бу, wәки әʹламәтийа Йаһоwа дәрбази Мәрйәме кә. Ле әw нәфькьри wәки бона wи беһöрмәти йә кö тʹәви мәрьве гöнәкʹар хәбәр дә. Дәwсе, әwи гьлийед хwә бь сьлаве дәстпекьр. Әм чь дькарьн һин бьн жь ве йәке? Әм гәрәке һазьр бьн, wәки сьлаве бьдьнә һәвдö у wана бьшьдиньн. Щара әм дькарьн тʹәне бь чәнд гьлийа жи али мәрьва бькьн, wәки әwана qәwи бьн у хwә тʹәхмин кьн кö әwана жи пʹарәкә щьмәʹта Йаһоwа нә.
Паwлос нава Асйа Бьчʹук у Әwропайеда гәләк хушк-бьра нас дькьр. Нәʹмед wида гәләк сьлавед һʹәwас һәнә. Жь Рʹомайи сәре 16 әм дьвиньн кö әwи гәләк сьлав хушк-бьрарʹа дьшанд. Мәсәлә, әwи гот кö бьра «хушка» Фойбе, «бь наве Хöдан qәбул кьн, чаwа ль щьмәʹта Хwәде дькʹәвә у гава дьбә һʹәwще тьштәки, дәсте хwә дьрежи wе кьн». Әwи öса жи сьлав Прьскилайе у Әкиларʹа шанд, у гот wәки «нә кö тʹәне әз жь wан рʹази мә, ле тʹәмамийа щьвинед жь нәщьһуйа жи». Әwи öса жи Апенәторʹа сьлав шанд у сәр wи гот «дәлале мьн», у öса жи сьлав шанд Тьрифенайерʹа у Тьрифосайерʹа, «кʹижан бона наве Хöдан дьхәбьтьн». Бәле, Паwлос бь дьл у щан хушк-бьра сьлав дькьр (Рʹом. 16:1-16).
Бьдьнә бәр чʹәʹве хwә, әw хушк-бьра чьqас ша бун кö бира wида бун. Рʹасти жи wе һʹьзкьрьна wан һьндава Паwлос у һьндава һәвдö гәләк qәwи буйа! У чахе әw хушк-бьра дьбьһистьн әw сьлавед бь һʹьзкьрьн, бешьк әwе йәке wе али wан бькьра баwәрийеда qәwи бьминьн. Бәле, чахе әм һәвдö сьлав дькьн, әм нишан дькьн wәки бона һәвдö хәм дькьн, у әв йәк мә һелан дькә һәвалтийа хwә ортʹа һәвдö qәwи кьн у мә дькә йәктийе.
Чахе Паwлос гьһиштә Потийоле у паше гәрәке бьчуйа алийе Рʹоме, хушк-бьред wедәре һатьнә пешийа wи. Чахе Паwлос әwана дурва дитьн, әwи «шькьри да Хwәде у дьле wи шьдийа» (Кʹар. Шанд. 28:13-15). Щара дьбәкә әм тʹәне пе кʹәне хwә сьлаве дьдьнә кәсәки, йан жи дәсте хwә wанрʹа дьһәжиньн, ле һәла һе әw тьштед бьчʹук жи дькарьн мәрьва бьшьдиньн, илаһи мәрьве кö депресийеда йә йан жи мәʹдәкьри йә.
ДӘСТПЕКА БАШ
Аqубрʹа лазьм бу ширәтәкә сәрт бьдә һьнә Мәсиһийа, чьмки wана һәвалти тʹәви ве дьнйайе дькьрьн, чь кö зийан дьда рʹöһʹанийа wан (Аqуб 4:4). Ле дина хwә бьдьне кö әwи нәʹма хwә ча дәстпекьр:
«Жь Аqубе хöламе Хwәде у Хöдан Иса Мәсиһ: Сьлав ль wә һәр донздәһ әʹширед дьнйайеда бәлабуйи бә» (Аqуб 1:1). Әw хушк-бьред кö әw нәʹма wи хwәндьн, сьлава wида тʹәхмин кьрьн кö әwана жи гьшк бәр Хwәде йәк ьн, у жь бо ве йәке wанрʹа wе һеса буйа ширәта wи qәбул кьн. Бәле, сьлава бь мьлукти дькарә мәрьварʹа рʹе вәкә, wәки дәрһәqа тьштед фәрз хәбәр дьн.
Ле сәва сьлав кʹаре бинә, лазьм ә бь дьл у һʹьзкьрьне бә. Әw йәк гәрәке тʹьме öса бә һәрге жи мәрьв навиньн (Мәт. 22:39). Хушкәкә мә жь Ирләнде щарәке чахе һатә щьвате, щьват ида дәстпедьбу. Гава әw ләзә-ләз кʹәтә оде, бьраки алийе wе ньһерʹи у бь бәшәра хwәш жерʹа гот: «Рʹож баш. Әз ша мә тә бьвиньм». Әw хушк ләзә-ләз чу рʹуньшт.
Чәнд һʹәфти дәрбаз бун, әw незики wи бьрайи бу у гот, wәки һьнге малда проблемед wе һәбун у әw дьлтәнг бу. Әwе wирʹа гьли кьр: «Wе еваре мьн öса хwә хьраб тʹәхмин дькьр, wәки мьн нә жи дьхwәст бемә щьвате. Wе рʹоже найе бира мьн сәр щьвате чь һатә готьне, хенщи сьлава тә. Дьле мьн зәʹф гәрм бу, кö wә әз öса qәбул кьрьм. Әз жь тә зәʹф рʹази мә».
Әw бьра һаш пе жи тʹöнә бу, wәки әw сьлава wийә кьн ча qайим сәр wе һʹöкöм бьбу. Әw дьбежә: «Чахе әwе мьнрʹа гот кö әw чәнд гьлийед мьн бона wе чьqас фәрз бун, әз гәләк ша бум кö мьн әw сьлав кьрьбу у әз хwәха жи дьлгәрм бум».
Сьлеман ньвиси: «Нане хwә бавежә wәще аван; жь бәр кö тöйе ль пей пьрʹр рʹожан wе бьбинә» (Wаиз 11:1). Чахе әм сьлаве дьдьнә мәрьва, илаһи хушк-бьра, у qимәта сьлаве заньн, әм шабуне дьстиньн у һьн хwәрʹа һьн жи wанрʹа кʹаре тиньн. Ләма жи wәрә әм тʹö щар кʹара сьлаве пьшт гöһе хwәва нәвежьн.