Йаһоwа бона Сафикьрьна Мьн, Кʹәрәм сәр Мьнда Баранд

ӘЗ Һатьмә буйине сала 1934. Һьнге де-баве мьн Една у Фред Молоһан, ида 20 сал бу кö Мәсиһи бун. Әз гәләк рʹази мә, кö wана мьн öса мәзьн кьр, wәки әз Хwәде һʹьз бькьм. Әwана Леколинкʹаред Кʹьтеба Пироз бун (Шәʹдед Йаһоwа), йед кö пе хирәта хwә әʹйан бун. Малбәта мә Парсонседа, шәһәрәки бьчʹукда дьжит, кö Кансаса башура-рʹоһьлатеда йә. Щьвата мәда ниве зәʹф Мәсиһийед бьжарти бун. Малбәта мә тʹьме дьһатә сәр щьвате у хьзмәтийеда жи хирәт бу. Һәр Шәми мә дәʹне нивро башqә дькьр бона хьзмәтийа кʹуче, һьнге мә әw щурʹә хьзмәти нав дькьр, хьзмәтийа щийе кö гәләк мәрьв тʹоп дьбьн. Щара әм гәләк дьwәстийан, ле баве мьн тʹьме паши хьзмәтийе мәрʹа гöлмаст дькʹьрʹи, wәки әм ша бьн.

Щьвата мәйә бьчʹук щабдар бу бона мьһаләкә мәзьн. Чәнд шәһәред бьчʹук у öса жи гәләк кʹарханә дькʹәтьнә нава wе мьһале. Чахе мә тʹәсәлийа хwәйед кʹархане дькьр, гәләк щар wана дәwса кö бона әʹдәбйәтед мә мәрʹа пʹәра бьдьн, тьштед мале дьдан, мәсәлә хwарьна бостан, һекед мале (һәма жь һелуне), йан һәла һе жи мьришкед сах. Баве мьн бона wан әʹдәбйәта ида пешда пʹәрә qöрбан дькьр, ләма жи әw хwарьн чь мәрʹа дьдан, мә хwәрʹа дьһишт, сәва әʹбура хwә бькьн.

КАМПАНИЙЕД БОНА ШӘʹДӘТИЙЕ

Де-баве мьн хwәрʹа фонограф дәстхьстьбун, сәва хьзмәтийеда бьдьнә хәбате. Әз бьчʹук бум у мьн нькарьбу әв фонограф бьда хәбате, ле мьн шабунәкә мәзьн дьстанд кö али де-баве хwә дькьр, чахе wана wәʹде сәрледанед дöбарә у һинбунед Кʹьтеба Пироз, готаред Рутерфорд бьра ведьхьстьн.

Сала 1936-да, баве мьн жь әʹрәба хwә, әʹрәба дәнги чекьр, демәк әwи һащәте мәзьнә дәнгдәрхьстьне, бане әʹрәбева кьр. Әwе әʹрәбе гәләк кʹар дьани бона бәлакьрьна мьзгинийа Пʹадшатийе. Пешийе мә мьqам ведьхьст, сәва дина мәрьва бькʹьшиньн, у паше мә готаред сәр һʹиме Кʹьтеба Пироз ведьхьст. Чахе готар хьлаз дьбу, мә мәрьварʹа һʹәwаса кʹе жи дьһат, әʹдәбйәтед мә бәла дькьр.

Шәһәре бьчʹукда Череваледа (Кансас), полис баве мьнрʹа гот, wәки изьн тʹöнә әw әʹрәба дәнги парка шәһәрда бьдә сәкьнандьне, чьмки Ләʹде гәләк мәрьв wедәре һеса дьбьн. Ле полис изьн да, wәки әʹрәбе жь парке дәр бьдьн сәкьнандьне. Баве мьн qайил бу, у әʹрәбә кʹуче да сәкьнандьне, кʹижан кö һәма пешбәри ве парке бу. Жь wедәре жи дәнг һеса дьһатә мәрьвед паркеда. Гәләк мьн хwәш дьһат wи wәʹде һʹәwасда тʹәви баве хwә у бьре хwәйи мәзьн Щери хьзмәт кьм.

Хьлазийа салед 1930-да, мә кампанийед мәхсус дәрбаз дькьр, wан мьһалада, кʹидәре мәрьв гәләк мьqабьли мә бун. Әм ниве шәве рʹадьбун (чаwа мә Жаплинеда дькьр), у һедика бәлавок дькьрә бәр дәред малед хәлqе. Паше, әм жь шәһәр дәр рʹасти һәв дьһатьн, сәва баwәр бьн кö полис тʹö кәс нәгьртийә.

Wан салада, мә бь щурʹе мәхсус жи хьзмәт дькьр, демәк пе плаката. Мә плакат сәр хwәва дькьр у әм дькʹәтьнә рʹезе, öса әм нав шәһәрда дьгәрʹийан, сәва мьзгинийа Пʹадшатийе бәла кьн. Те бира мьн щарәке һәвалед мә плакат сәр хwәва кьрьбун, кʹидәре ньвисибу «Религийа Тʹәльк у Дәрәwи йә», у нав шәһәре мә дьгәрʹийан. Әwана нав шәһәррʹа wәкә 1.6 километьр гәрʹийан у паше вәгәрʹийанә мала мә. Ча баш ә wәки әwана wәʹде ве хьзмәтийа пе плаката, рʹасти мьqабьлибуне нәһатьн, ле гәләк мәрьва пәй wан дьньһерʹин.

ЩЬВАТЕД МӘЗЬНӘ БӘРЕ

Малбәта мә гәләк щар жь шәһәре Кансасе дьчу Техасе сәр щьватед мәзьн. Баве мьн сәр рʹийа трене дьхәбьти, ләма жи мә дькарьбу бе пʹәрә пе трене һәрʹьн һьн мәрьвед хwә бьвиньн у һьн жи һәрʹьн сәр щьватед мәзьн. Хале мьни мәзьн, Фред Wисмар, у жьна wи Йулайла, Техаседа дьжитьн. Фред щаһьлтийеда дәстпека салед 1900-да рʹастийе пеһʹәсийа, һатә ньхöмандьне, у хушкед хwәрʹа жи дәрһәqа рʹастийе гьли кьр, демәк дийа мьнрʹа жи. Әw нав тʹәмамийа Техаса навинеда гәләкарʹа нас бу, чьмки әwи wедәре хьзмәт дькьр ча бәрпьрсийаре мьһале. Әw мәрьвәки һʹәйф у бәшәрхwәш бу, у мьнрʹа һʹәwас бу тʹьме тʹәви wи бьм. Әw рʹастийеда гәләк хирәт бу, у щаһьлтийеда мәсәла wи гәләк баш сәр мьн һʹöкöм бу.

Сала 1941-да, малбәта мә пе трене чу Ст. Луисе (Мисури), сәр щьвата мәзьн. Һʹәму зарʹ у щаһьларʹа готьн, wәки тʹәвайи незики сене рʹунен сәва готара Рутерфорд бьбьһен бь наве «Зарʹед Пʹадша». Хьлазийа ве готаре, һәр зарʹәке пʹешкʹеш станд, әw кʹьтеба тʹәзә бу бь наве «Зарʹ», кʹижан кö Рутерфорд у аликʹарчийед wи бәла дькьрьн. Wедәре 15 000 зедәтьр щаһьл бун, йед кö әw пʹешкʹеш стандьн.

Мәһа Нисане, сала 1943 әм чунә сәр щьвата мәзьн кö гәләк фәрз бу. Наве wе щьвата мәзьн «Һелан бона Шьхöлкьрьне» бу, кʹижан кö Кофейвиледа (Кансас) дәрбаз бу. Һьнге һʹәму щьватарʹа һатә әʹламкьрьне, wәки щьватеда Мәкʹтәба Даннасинкьрьне дәрбаз кьн. Мә öса жи буклет станд, кʹидәре кö 52 дәрс һәбун, сәва wәʹде ве мәкʹтәбе бьдьнә хәбате. Әw щьвата мәзьн бона мьн мәхсус бу, чьмки әз һатьмә ньхöмандьне тʹәви һьнәкед дьн, голәкә сарда кö бьчʹук бу у незики кʹарханәке бу.

МЬН ДЬХWӘСТ БӘЙТʹӘЛЕДА ХЬЗМӘТ КЬМ

Мьн сала 1951-да мәкʹтәб хьлаз кьр, у гәрәке әʹмьре хwәда һьнә сафикьрьнед фәрз бькьра. Мьн гәләк дьхwәст Бәйтʹәледа хьзмәт кьм, кʹидәре бьре мьн Щери хьзмәт дькьр, ләма мьн бланка Бәйтʹәле тʹьжә кьр. Әw сафикьрьна мьн ахьрийеда мьнрʹа алийе рʹöһʹанида гәләк кʹар ани. Wәʹдәки кьнда, мьн тʹәглифи Бәйтʹәле кьрьн. Әw 10 Адаре бу, сала 1952-да.

Мьн дьхwәст идара нәшьркьрьнеда бьхәбьтьм, кʹидәре журнал у әʹдәбйәтед мә дьһатьнә дәрхьстьне. Ле йазьх әз ча офисиант һатьмә кʹьфшкьрьне, у паше хwарьнгәһеда. Әw шьхöл мьн хwәш дьһат у әз гәләк тьшт wедәре һин бум. Йазьх әз тʹö щар идара нәшьркьрьнеда нәхәбьтимә. Ле ве кʹьфшкьрьна мьнда, wәʹде мьни зедә һәбу, у мьн әw wәʹдә хәрщ дькьр сәва кʹьтебханәйа Бәйтʹәледа леколинкьрьна шәхси дәрбаз кьм. Әw йәк гәләк али мьн кьр рʹöһʹанида пешда һәрʹьм у баwәрийа мьн qәwи бу. Әwе мәщале öса жи али мьн кьр, wәки һʹәта кö мьн дькарьбу, хwә хьзмәтийа Бәйтʹәлева бьгьрьм. Щери сала 1949-да жь Бәйтʹәле чу у зәwьщи тʹәви Патрисйайе, ле әwана незики Бруклине дьжитьн. Wәʹде дәстпека хьзмәтийа мьнә Бәйтʹәледа, wана гәләк али мьн дькьрьн у дьл дьданә мьн.

Wәʹдә шунда чахе әз һатьмә Бәйтʹәле, бьра һе зедә готарванед Бәйтʹәле дьгәрʹийан, сәва щурʹә-щурʹә щьватада готара бьхуньн. Әw бьред кö һатьнә бьжартьне, гәрәке нава саләкеда бьчуна wан щьвата, кʹижан кö жь Бруклине 322 километьр дур бун. Әw бьра гәрәке wан щьватада готар бьхwәндана у тʹәви щьвате дәркʹәтана хьзмәтийе. Әз жи һатьмә бьжартьне тʹәви wан бьра, чь кö бона мьн qәдьрәки мәзьн бу. Wәʹде готара хwәйә пешийе әз гәләк бәрхwә дькʹәтьм, чьмки һьнге готарәк сьһʹәтәк дькʹьшанд. Әз тʹьме пе трене дьчумә wан щьвата. Щарәке те бира мьн сала 1954, зьвьстане рʹожа Ләʹде, әз пе трене чумә Нийу Йорке. Әз гәрәке ида еваре вәгәрʹийама Бәйтʹәле. Ле фьртона бәрфе рʹабу у жь бо ве йәке трен һьнәк wәхт нәдьхәбьти. Ләма жи әз шәбәqе wәкә сьһʹәта пенща һатьмә щийе сәкьнандьна трена Нийу Йоркеда. Жь wедәре әз зу кʹәтьмә метройе кö дьчу Бруклине, у дәрберʹа чумә хwарьнгәһе. Әз һьнәки дәрәнг һатьм у гәләк wәстийайи бум, чьмки тʹәмамийа шәве әз рʹанәзабум. Ле әw бона мьн баргьрани нибу, чьмки wе Шәмийе у Ләʹде мьн тʹәви гәләк хушк-бьра хьзмәт кьр у һәвалед тʹәзә хwәрʹа дит.

Дәстпека хьзмәтийа мьнә Бәйтʹәледа, мьн öса жи һәр һʹәфти сәр радийо стансйа мә, бь наве WBBR, һәвкʹари дькьр бәрнама һинбуна Кʹьтеба Пирозда. Студийед мә һьнге сәр qәте дöда бун, авайе 124 Колумбйа Һайтсда. А. Һ. Макмилан бьра, кʹижан кö гәләк сал Бәйтʹәледа хьзмәт дькьр, тʹьме бәрнамед радийойеда аликʹари дьда. Мә бь һʹьзкьрьне жерʹа дьгот Мак бьра. Әw бона мә бьред щаһьл, мәсәләкә qәwи бу, чьмки нава гәләк тәнгасийада Йаһоwарʹа амьн ма.

Сала 1958 кʹьфшкьрьна мьн һатә гöһастьне. Әз щабдар бум, wәки али wан хушк-бьра бькьм, йед кö тʹәзә Мәкʹтәба Гиләд хьлаз кьрьбун, сәва виза бьстиньн у бьгьһижьнә wан wәлата, кʹидәре һатьнә кʹьфшкьрьне. Һьнге билетед тәйаре гәләк бьһа бун, ләма тʹәне һьнәк дькарьбун пе тәйаре һәрʹьн. Һʹәчʹи зәʹф йед кö дьчунә Африкайе у Асйа Рʹоһьлате, пе гәмийед баркʹеш дьчун. Һьнә сал дәрбаз бун, у байе билетед тәйаре әрзан бун, ләма ида һʹәчʹи зәʹф мисйонер пе тәйаре дьчун wан wәлата кʹидәре һатьбун кʹьфшкьрьне.

РЕWИТИЙА СӘР ЩЬВАТЕД МӘЗЬН

Сала 1960-да, мьн щабдари станд, wәки рейсед пе тәйаре жь Амәрикайе һʹәта Әwропайе организә кьм, сәва wан хушк-бьра йед кö гәрәке сала 1961-да бьчуна сәр щьватед һʹәмдьнйайе. Әз хwәха жи пе тәйаре жь Нийу Йорке чум, сәр щьвата мәзьн Һамбургеда (Алманйа). Мьн у се бьред жь Бәйтʹәле паши щьвата мәзьн, әʹрәбә кʹьре һьлдан у Алманйайерʹа чунә Италйайе, сәва тʹәсәлийа филиала Рʹоме бькьн. Жь wедәре әм Чʹийайед Пирәнейерʹа чун Франсайе һʹәта Испанйайе, кʹидәре шьхöле мә qәдәхәкьри бу. Мә бьред Барселонерʹа әʹдәбйәт анин, кʹижан ча пʹешкʹеш пʹечʹайи бун. Чьqас баш бу кö әм рʹасти һәв һатьн у мә һәв нас кьр! Паши ве йәке әм чунә Амстердаме у жь wедәре пе тәйаре вәгәрʹийанә Нийу Йорке.

Wәкә саләке, шьхöле мьн Бәйтʹәледа әw бу, wәки аликʹарийе бьдьмә 583 хушк-бьра, сәва һәрʹьн щьватед һʹәмдьнйайейә мәхсус. Наве ве щьвате «Мьзгинийа Һʹәта-Һʹәтайе» бу кö сала 1963-да дәрбаз дьбу. Әw хушк-бьра гәрәке нав тʹәмамийа дьнйайе рʹеwити бькьрана, сәва һәрʹьнә щьвата мәзьн Әwропайе, Асйайе, у Окйануса Мәзьнә Башуре у паше бьчуна Һонолулу, Һаwаи, у Пасаденайеда (Калифорнйа). Әwана öса жи Лöбнане у Урдöнеда дьсәкьнин, сәва екскурсийа бькьн у бьньһерʹьн әʹрдед кö Кʹьтеба Пирозда те готьне. Идара мә нә кö тʹәне билетед тәйара у отел организә дькьр, ле öса жи щабдар бу бона һʹәму виза, кö лазьм бун чәнд wәлатада.

ҺӘВАЛА МЬНӘ ТʹӘЗӘ РʹЕWИТИЙЕДА

Сала 1963 öса жи бона мьн мәхсус бу, чьмки әз зәwьщим тʹәви Лила Рощерсе, кö жь Мисурийе бу, йа кö се сал пешда бьбу әндәме Бәйтʹәле. Дәʹwата мә 29 Һʹәзиране бу. Һʹәфтек шунда паши дәʹwата мә, әз у Лила жи чун сәр ве щьвата мәзьн, у мә жи екскурсийа кьр Йунаньстанеда, Лöбнанеда у Мьсьреда. Әм жь Беруте пе тәйаре чунә аеропорта Урдöнейә гәләк бьчʹук. Wедәре шьхöле мә qәдәхәкьри бу, у мәрʹа готьн wәки wе визайе нәдьн Шәʹдед Йаһоwа, у мә ньзаньбу чахе әм бьгьһижьнә wи щийи, wе мә бәрʹдьн йан на. Ле әм чьqас ша бун у мәтʹал ман чахе әм һатьн у мә дит кö аеропортеда әʹлаләтәк пе плакатәкә мәзьн сәкьни бу, сәр кʹижани ньвисибу «Сәр Чʹәʹварʹа Шәʹдед Йаһоwа!». Һьн жи мә шабунәкә мәзьн станд, гава мә дит әw әʹрдед кö дәрһәqа wан Кʹьтеба Пирозда те гьликьрьне. Әм чун wан щийа, кʹидәре бавәшир дьжитьн, у öса жи кʹидәре Иса у шандийед wи хьзмәт дькьрьн, у кʹидәре Мәсиһийа дәстпекьрьбун һʹәта сәре дьнйайе мьзгинийе бәла кьн (Кʹар. Шанд. 13:47).

Ида 55 сал ә кö Лила һʹәму щурʹед кʹьфшкьрьна мьнда һәвалхәбаткʹара мьнә амьн ә. Әм чәнд щара чунә Испанйайе у Португале, чахе wедәре шьхöле мә qәдәхәкьри бу. Мә һәвалед хwә дьшьданд, у wанрʹа әʹдәбйәт у тьштед майин дьанин, кö әwана һʹәwщә бун. Мә һәла һе жи тʹәсәлийа бьра кьр, йед кö кәла Кадиседа (Испанйа) бун. Әз гәләк әшq у ша бум, кö мьн карьбу wанрʹа готаре бьхуньм, кʹижан дьле wан гәрм кьр у qәwи кьр.

Жь сала 1963 мьн организәкьрьна рʹеwитийа щьватед мәзьнә һʹәмдьнйайеда аликʹари дьда. Мәсәлә, Африкайеда, Австралйайеда, Амәрикайа Навин у Башуреда, Әwропайеда, Рʹожһьлата Дурда, Һаwаийеда, Зәланда Ну у Порто Рикода. Әw бона мьн qәдьрәки мәзьн бу. Лила у әз, әм тʹәвайи гәләк щар чунә сәр щьватед мәзьн, у йәк жь wан Wаршовада, (Полонистан) бу, сала 1989-да. Сәр ве щьвата мәзьн гәләк хушк-бьра жь Русйайе һатьн, у әwана щара пешьн һатьбун сәр щьвата мәзьн! Чәнд хушк-бьра рʹасти кʹижана әм һатьн, Совийетеда бь сала бона баwәрийа хwә кәледа бун.

Мә öса жи нав тʹәмамийа дьнйайеда тʹәсәлийа филиала дькьр, сәва дьл бьдьнә әндәмед Бәйтʹәле у мисйонера у wана бьшьдиньньн. Әм хwәха жи шабуне дьстиньн гава ве йәке дькьн. Мә щара пашьн тʹәсәлийа филиала Корейа Башуре кьр, у әм чунә шәһәре Сйусоне, сәва кәледа тʹәсәлийа 50 бьра бькьн. Әw һʹәму бьра шабуна хwә öнда накьн у бь дьл һивийа wи wәʹдәйи нә, чахе диса бь азайе Хwәдерʹа хьзмәт кьн. Әм гәләк шьдийан гава рʹасти wан һатьн! (Рʹом. 1:11, 12).

ПЕШДАЧУЙИНА ТʹӘШКИЛӘТЕ ШАБУНЕ ТИНӘ

Әз нава гәләк салада дьвиньм кö Йаһоwа ча щьмәʹта хwә кʹәрәм дькә, кö әw һе мәзьн у һе пешда дьчә. Жь сала 1943 чахе әз һатьмә ньхöмандьне, һʹәта рʹожа иро, жь 100 000 мәрьва гьһиштийә 8 000 000 зедәтьр кö Йаһоwарʹа хьзмәт дькьн нав 240 wәлатада. Ве пешдачуйинеда, һʹәчʹи зәʹф мисйонера аликʹари данә, йед кö Мәкʹтәба Гиләд хьлаз кьрьбун. Дьле мьн гәләк ша дьбә кö мьн тʹәви wан гәләк мисйонера нава салада һәвкʹари дькьр, у али wан дькьр wәки бьгьһижьнә щийед кʹьфшкьрьна хwә.

Әз тʹö щар пʹошман набьм, wәки щаһьлтийеда мьн сафи кьр әʹмьре хwә тʹәсмили Йаһоwа кьм у кö мьн хьзмәтийа Бәйтʹәле бьжарт. Йаһоwа нава wан салада гәләк кʹәрәм сәр мьнда баранд. Хенщи ве йәке, бь дәһа сала мьн у Лилайе хьзмәт кьрийә щьватед Бруклинеда, кʹидәре мә һәвалед незик хwәрʹа дитьн.

Әз һʹәта иро Бәйтʹәледа пе аликʹарийа Лилайе хьзмәт дькьм. Рʹаст ә әз ида 84 сали зедәтьр ьм, ле һʹәта иро дькарьм шьхöл бькьм у аликʹарийе дьдьмә филиале, кö сәр нәʹма щаба хwә дьдьм, у дьшиньм.

Әw öса баш ә, wәки әм нава тʹәшкиләта Йаһоwада ньн у зәлал дьвиньн фьрqийа ортʹа хьзмәткʹаред Йаһоwа у йед кö жерʹа хьзмәт накьн. Әм иро һе рʹьнд фәʹм дькьн гьлийед жь Малахи 3:18, кʹидәре те готьне: «Һуне фьрqийа ортʹа мәрьве рʹаст у мәрьве хьраб бьвиньн, ортʹа хьзмәткʹаре Хwәде у йед кö жерʹа хьзмәт накьн», ДТʹ. Һәр рʹож әм пе чʹәʹве хwә дьвиньн кö дьнйа Шәйтʹан һе хьраб дьбә, у гәләк мәрьв беһеви у бебәхт ьн. Ле әwед кö Йаһоwа һʹьз дькьн у жерʹа хьзмәт дькьн, һәла һе wан зәманед хьрабда жи, бәхтәwар ьн у һивийа ахьрийа баш ьн. Бона мә рʹасти жи qәдьрәки гәләк мәзьн ә wәки мьзгинийа Пʹадшатийе бәла кьн (Мәт. 24:14). Әм һивийа ве рʹоже нә, кö зутьрәке wе бе, демәк чахе Пʹадшатийа Хwәде wе qьрʹа ве дьнйа хьраб бинә у дьнйа тʹәзә wе бе, кʹидәре кö һʹәму созед wи бенә сери, демәк öса жи сьһʹәт-qәwата мәрьва wе баш бә у бьжин һʹәта-һʹәтайе. Паше һʹәму хьзмәткʹаред Йаһоwайи амьн, wе жийина хwәйә һʹәта-һʹәтайерʹа ша бьн!