Диԝана Хԝәде: Гәло Хԝәде Тʹьме Епʹещә Ԝәʹдә Пешда Дәрһәԛа ве йәке Әʹлам Дькә?

МӘРЬВЕ кӧ дәрһәԛа һәԝайе пешда дьбежә, радаре леколин дькә. Әԝ дьвинә, ԝәки фьртонәкә мәзьн те сәр ԝи щийи, кʹидәре гәләк мәрьв дьжин. Әԝ фәʹм дькә, ԝәки әʹмьре мәрьва бьн хофеда нә, ләма жи һʹәму тьшти дькә, ԝәки һʹәта кӧ дәрәнг нинә, зу дәрһәԛа ве йәке пешда ԝанрʹа әʹлам кә.

Ԝи щурʹәйи, ньһа Йаһоԝа мәрьварʹа пешда дәрһәԛа «фьртоне» әʹлам дькә, кʹижан кӧ жь һәԝа хьраб хофтьр ә. Ле ча әԝ дәрһәԛа ве йәке әʹлам дькә? У чьрʹа әм дькарьн дӧдьли нәбьн, ԝәки әԝ епʹещә ԝәʹдә дьдә мәрьва, ԝәки әве әʹламәтийе ԛәбул кьн? Сәва щаба ԝан пьрса пебьһʹәсьн, ԝәрә әм пешийе чәнд мәсәла шеԝьр  кьн, кӧ ча Йаһоԝа бәре дәрһәԛа диԝана хԝә пешда әʹлам дькьр.

КʹӘНГЕ ХԜӘДЕ ДӘРҺӘԚА ДИԜАНА ХԜӘ ПЕШДА ӘʹЛАМ ДЬКЬР

Ԝәʹде бәре, Йаһоԝа дәрһәԛа щурʹә-щурʹә «фьртона», демәк дәрһәԛа диԝана хԝә пешда әʹлам дькьр ԝан мәрьварʹа, йед кӧ һʹәмде хԝә тʹәмийед ԝи пьшт гӧһе хԝәва дьавитьн (Мәтʹлк. 10:25; Йерәм. 30:23). Һәр дәрәщада, әԝи пешда мәрьвед нәгӧһдаррʹа дәрһәԛа диԝана хԝә әʹлам дькьр, ԝәки әԝана бенә гӧһастьне у гӧрʹа ԝида бьн (2 Пʹадш. 17:12-15; Нәһәм. 9:29, 30). Гәләк щар Хԝәде хьзмәткʹаред хԝәйи амьн дьда хәбате, ԝәки мәрьварʹа дәрһәԛа диԝана хԝә әʹлам кә, сәва әԝ мәрьв фәʹм кьн, кӧ дәрберʹа чь гәрәке бькьн (Амс. 3:7).

Мәрьвәки ӧса Нӧһе амьн бу. Гәләк сала әԝи бь мерхаси мәрьвед бенамус у зӧлмрʹа дәрһәԛа Селава кӧ гәрәке бьһата сәр дьнйайе, әʹлам дькьр (Дәстп. 6:9-13, 17). Әԝи ԝанрʹа ӧса жи дьгот, кӧ әԝана чь гәрәке бькьн, сәва ԝәʹде Селаве хьлаз бьн. Әԝи һаԛас ԝанрʹа дәрһәԛа ве йәке әʹлам дькьр, кӧ дәрһәԛа ԝи паше һатә готьне, ԝәки әԝи «рʹасти даннасин дькьр» (2 Пәт. 2:5).

Нӧһ чь жи дькьр, йәкә мәрьва әԝ әʹламәти дәрһәԛа һатьна Селаве пьшт гӧһе хԝәва дьавитьн. Баԝәрийа ԝан ԛә тʹӧнә бу. Ахьрийа ве йәке әԝ бу, кӧ лейи «рʹабу у һʹәму жи хәньԛандьн» (Мәт. 24:39; Ибрн. 11:7). Ԝана тʹӧ щар нькарьбу бьготана, ԝәки Хԝәде ԛә ԝанрʹа дәрһәԛа ве йәке пешда әʹлам нәкьр.

Дәрәщед майинда, Йаһоԝа һьндьк ԝәʹдә пешда әʹлам дькьр дәрһәԛа «фьртоне», демәк диԝана хԝә. Ле диса жи әԝ ԝәʹдә тʹера ԝан дькьр, сәва тьштәки бькьн ԝәки хьлаз бьн. Мәсәлә, әԝи һʹәта кӧ Дәһ Бәла бьанийа сәр Мьсьра бәре, пешда әʹлам дькьр кӧ ԝе чь бькә. Бәʹса хәбәре, Йаһоԝа Муса у Һарун шандә бал Фьрәԝьн у хьзмәткʹаред ԝи, сәва ԝанрʹа дәрһәԛа бәла һʹәфта әʹлам кә, кӧ ԝе тәйрокәкә ԛайим бьбарә. Тәйрок гәрәке рʹожа дӧда бьбарийа, ле гәло әԝ ԝәʹдә тʹера ԝан дькьр, сәва щи-сьтʹаре бьвиньн у хԝә жь тәйроке хԝәй кьн? Кʹьтеба Пироз дьбежә: «Жь хӧламед Фьрәԝьн, кʹижан кӧ жь готьна Хӧдан дьтьрсийа, хӧламед хԝә у һʹәйԝанед хԝә бьрьнә һьндӧрʹ, ле кʹе гӧһдарийа готьна Хӧдан нәкьр, хӧламед хԝә у һʹәйԝанед хԝә чоле һьштьн» (Дәркʹ. 9:18-21). Әшкәрә йә, Йаһоԝа ԝанрʹа һаԛас ԝәʹдә да, ԝәки әԝана зу-зу тьштәки бькьн у хԝә жь ве бәлайе хԝәй кьн.

Фьрәԝьн у хьзмәткʹаред ԝирʹа дәрһәԛа бәла дәһа жи пешда һатә әʹламкьрьне. Ле ԝана сәрһʹьшки кьрьн у әԝ әʹламәти пьшт гӧһе хԝәва авитьн (Дәркʹ. 4:22, 23). Ахьрийа ве йәке әԝ бу, кӧ кӧрʹед ԝани ньхӧри мьрьн. Рʹасти жи ахьрикә чьԛас хьраб ә! (Дәркʹ. 11:4-10; 12:29). Ле гәло ԝәʹде ԝан һәбу, кӧ тьштәк бькьрана һʹәта дәрәнг нибу? Әре! Муса дәрберʹа Исраелийарʹа гот, ԝәки бәла дәһа ԝе һәбә у готә ԝан, кӧ ча әԝана дькарьн малбәтед хԝә хԝәй кьн (Дәркʹ. 12:21-28). Ле гәло чьԛас мәрьва гӧһ данә Муса? Ль гора һьнә леколина, се милйон мәрьв, ча Исраели у ӧса жи «әʹлаләтәкә гьран жь гәләк мьләта» у Мьсьри, жь диԝана Хԝәде хьлаз бун у жь Мьсьре дәркʹәтьн (Дәркʹ. 12:38).

Ча әԝ мәсәлә дьдьнә кʹьфше, Йаһоԝа тʹьме епʹещә ԝәʹдә дьда мәрьва, сәва әԝана жь диԝана ԝи хьлаз бьн (Ԛан. Дщр. 32:4). Ле чьрʹа Хԝәде тʹьме дәрһәԛа диԝана хԝә пешда әʹлам дькьр? Пәтрусе шанди шьровәкьр, ԝәки Йаһоԝа «нахԝазә тʹӧ кәс ӧнда бә, ле дьхԝазә ԝәки һʹәму жь гӧнәкьрьне вәгәрʹьн» (2 Пәт. 3:9). Бәле, Хԝәде мәрьва һʹьз дькә. Әԝи дьхԝәст, ԝәки һʹәта һатьна диԝана ԝи, әԝана гӧне хԝә биньн рʹуйе хԝә у бенә гӧһастьне (Иша. 48:17, 18; Рʹом. 2:4).

ИРО ХԜӘДЕ ЧА ДӘРҺӘԚА ДИԜАНА ХԜӘ ПЕШДА ӘʹЛАМ ДЬКӘ

Иро жи һʹәму мәрьв гәрәке гӧһ бьдьнә ве әʹламәтийе, кӧ нав тʹәмамийа дьнйайеда те бәлакьрьне. Иса чахе сәр әʹрде бу, әԝи пешда гот, ԝәки әԝ дьнйа иройин ԝе ахьрийеда ԝәʹде тәнгасийа мәзьнда бе кʹӧтакьрьне (Мәт. 24:21). Иса пʹехәмбәртийа дәрһәԛа диԝана ахьрийе һур бь һур шьровәкьр, кʹижан кӧ ԝе шагьртед ԝирʹа әʹйан кьра, ԝәки һивийа чь бьн у чь ԝе бьԛәԝьмә һʹәта әԝ ԝәʹдә незик дьбә. Иса дәрһәԛа ԛәԝьмандьнед мәзьн гьли кьр, кʹижан кӧ гәрәке дьнйайеда бьԛәԝьмийана, у әм иро пе чʹәʹве хԝә дьвиньн ԝан тьшта (Мәт. 24:3-12; Луԛа 21:10-13).

Ль гора ве пʹехәмбәртийе, Йаһоԝа иро һәр кәсирʹа әʹлам дькә, ԝәки жерʹа хьзмәт кьн у гӧрʹа ԝи бькьн. Әԝ дьхԝазә, ԝәки мәрьвед кӧ гӧрʹа ԝи дькьн, ча ньһа әʹмьре хԝә баш кьн, ӧса жи дьнйа тʹәзәда кʹәрәма бьстиньн (2 Пәт. 3:13). Йаһоԝа дьхԝазә, али мәрьва бькә, ԝәки баԝәрийа хԝә созед ԝи биньн. Ча? Йаһоԝа әʹламәтийа фәрз дьдә мәрьва, кʹижан кӧ әʹмьр хьлаз дькә. Әԝ һәйә «мьзгинийа Пʹадшатийе», кӧ Иса пʹехәмбәрти кьрийә «ԝе ль нав тʹәмамийа дьнйайе бе даннасинкьрьне, кӧ һʹәму мьләтарʹа бьбә шәʹдәти» (Мәт. 24:14). Хԝәде хьзмәткʹаред хԝә организә кьр ԝәки әԝ «шәʹдәти» бьдьн, демәк әв әʹламәтийа Хԝәде бәла кьн, ԝәкә 240 ԝәлатада. Йаһоԝа дьхԝазә, ԝәки гәләк мәрьв гӧһ бьдьнә ве әʹламәтийе у жь «фьртоне» бьрʹәвьн, демәк жь диԝана ԝийә һәԛ (Сефн. 1:14, 15; 2:2, 3).

Демәк, пьрса фәрз нә кӧ әԝ ә, ԝәки Йаһоԝа чьԛас ԝәʹдә дьдә мәрьва сәва жь диԝана ԝи хьлаз бьн. Гәләк избаткьрьн һәнә кӧ әԝ һәр гав епʹещә ԝәʹдә дьдә. Ле пьрса сәрәкә әԝ ә: Һʹәта ԝәʹдә һәйә, гәло мәрьв ԝе гӧһ бьдьнә әʹламәтийа диԝана Хԝәде? Ԝәрә әм ча әʹламәтчийед Хԝәде бәрдәԝам кьн чьԛас дькарьн али гәләк мәрьва бькьн, ԝәки ԝәʹде ԝеранкьрьна ве дьнйайе, хьлаз бьн.