Кʹи йә Пʹадше Пʹадшатийа Хԝәде?

• Алийе Хԝәдеда бьһата бьжартьне. «Мьн Пʹадше Хԝә тʹәстиԛ кьрийә, . . . Дә бькә Тӧ жь Мьн бьхԝазә, мьләта Әз Тәрʹа бькьм ԝарә, һәр чар ԛӧлбә Тәрʹа мал у мькʹане» (Зәбур 2:6, 8).

• Жь хәза Даԝьд Пʹадша буйа. «Бона мә зар′ок һатә буйине, кӧр′ мәр′а һатә дайине; . . . Сәрԝертийа ԝи ԝе пʹьрʹ зедә бә, у хьлазийа әʹдьлайе ԝе тʹӧнә бә, ль сәр тʹәхте Даԝьд у ль сәр ԝәлате ԝи» (Ишайа 9:6, 7, ДТʹ).

• Бәйтләһʹмеда бьһата буйине. «У тӧ, йа Бәйтләһәм . . . , зьламе кӧ бона мьн бьбә сәрԝере Исраеле, ԝе жь тә дәркʹәвә . . . Ԝе ньһа әв һʹәта сәре әʹрде мәзьн бә» (Миха 5:2, 4).

• Бьһата инкʹаркьрьне у кӧштьне. «Бьчʹук һатә дитьн у жь алийе мьрованва һатә бәрдан. . . У мә ԝи нәһʹәсьбанд. . . . Әԝ жь бәр гӧнәһед мә бьриндар бу, жь бәр фәсадийед [шашийед] мә, әԝ ешийа» (Ишайа 53:3, 5).

• Жь мьрьне бьһата рʹакьрьне у алийе Хԝәдеда бьһата рʹумәткьрьне. «Чьмки Те дийаре мьрийада мьн нәһели, нә жи бьһели амьне Тә горʹьстед бьбинә . . . Һʹәта-һʹәтайә хер у хԝәши дәсте Тәйи рʹастеда йә» (Зәбур 16:10, 11).

Иса Мәсиһ Сәрԝере Лайиԛ ә

Нава тʹәмамийа тʹәрихийеда тʹәне кәсәк һәбу, сәр кʹижани кӧ әԝ һʹәму тьшт һатьнә сери. Щарәке мәләкәки готә Мәрйәма дийа Иса: «Хӧдан Хԝәде ԝе тʹәхте баве ԝи Даԝьд бьдә ԝи. ... у хьлазийа Пʹадшатийа ԝи ԝе тʹӧнәбә» (Луԛа 1:31-33).

Иса тʹӧ щар нәбу пʹадше сәр әʹрде. Ле дәԝсе әԝ ԝе ча Пʹадше Пʹадшатийа Хԝәде жь әʹзмед сәр инсанәте сәрԝертийе бькә. Чьма әԝ ԝе Пʹадшаки лапи баш бә? Ԝәрен әм шеԝьр кьн, ԝәки Иса чь дькьр чахе сәр әʹрде бу.

• Иса сәва мәрьва хәм дькьр. Иса фьрԛи нәдькьрә ортʹа мәрьва, у али һʹәмуйа дькьр (Мәтта 9:36; Марԛос 10:16). Чахе мәрьвәки кʹоти жь Иса лава кьр: «Һәгәр тӧ бьхԝази, дькари мьн паԛьж ки», дьле Иса сәр ԝи шәԝьти у әԝи әԝ ԛәнщ кьр (Марԛос 1:40-42).

• Иса һин кьр ча дьле Хԝәде ша кьн. Әԝи гот: «Һун нькарьн һьн Хԝәдерʹа, һьн жи һәбукерʹа хӧламтийе бькьн». Әԝи ӧса жи һин дькьр, ԝәки әм гәрәке һьндава мәрьвада ӧса бьн, чаԝа кӧ әм дьхԝазьн әԝана һьндава мәда бьн. Әв принсип һатә навкьрьне, Ԛәйде Зерин. Хенщи ве йәке, әԝи да кʹьфше, ԝәки сәва Хԝәде нә тʹәне кьред мә фәрз ьн, ле ӧса жи фькьр у һәстед мә. Демәк, сәва кӧ дьле Хԝәде ша кьн, әм гәрәке фькьр у хԝәстьнед дьле хԝә контрол кьн (Мәтта 5:28; 6:24; 7:12). Иса ӧса жи да кʹьфше, ԝәки әм гәрәке пебьһʹәсьн Хԝәде чь жь мә дьхԝазә у ль гора ԝе йәке бьжин, чьмки бь рʹасти тʹәне әв йәк мә бәхтәԝар дькә (Луԛа 11:28).

• Иса һин дькьр чь те һʹәсабе һʹьз бькьн. Хәбәр у кьред Иса мәрьв һелан дькьрьн ль гора һинкьрьнед ԝи бьжин. «Әʹлаләт сәр һинкьрьна ԝи зәндәгьрти ман, чьмки әԝи мина йәки хԝәйиһ′ӧкӧм әԝ һин дькьрьн» (Мәтта 7:28, 29). Әԝи әԝана һин дькьрьн: «Дьжмьнед хԝә һʹьз бькьн». Әԝи һәла һе сәва ԝан жи дӧа дькьр, кʹе кӧ сәбәбе мьрьна ԝи бун. Әԝи гот: «Баво, бьбахшинә ван, чьмки ньзаньн чь дькьн» (Мәтта 5:44; Луԛа 23:34).

Тʹәне Иса дькарә бьбә Сәрԝере лапи баш, чьмки әԝ ԛәнщ ә у һазьр ә аликʹарийе бьдә. Ле әԝ ԝе чь чах дәстпекә сәрԝертийе бькә?