Хԝәрʹа Бькә Хәйсәт, кӧ Дәрәнги Нәкʹәви
1. Йаһоԝа чь мәсәләкә баш мәрʹа һишт?
1 Йаһоԝа тʹӧ щар дәрәнги накʹәвә. Мәсәлә, әԝ ԝәхтда аликʹарийе дьдә ԛӧльхкʹаред хԝә (Ибрн. 4:16). Әԝ ӧса жи «ԝәхтда хԝарьна» рʹӧһʹани дьдә (Мәт. 24:45). Ләма жи әм дькарьн гӧман бьн, кӧ рʹожа Хӧдан ԝе дәрәнги нәбә (Һәбԛ. 2:3). Әԝ йәк кӧ Йаһоԝа дәрәнги накʹәвә, мәрʹа кʹаре дьдә у мә аза дькә! (Зәб. 70:5). Әм мәрьвнә нәԛәданди нә у тʹьме тьштәкива мьжул ьн, ләма жи щарна мәрʹа гәләк чәтьн дьбә кӧ дәрәнги нәкʹәвьн. Ле гәло чьрʹа әм гәрәке хԝәрʹа бькьнә хәйсәт, кӧ дәрәнги нәкʹәвьн?
2. Чьрʹа чахе әм дәрәнги накʹәвьн, бь ве йәке әм Йаһоԝа һӧрмәт дькьн?
2 Ван рʹожед ахьрийе, мәрийарʹа бу хәйсәт, кӧ тʹьме дәрәнги кʹәвьн. Чьмки әԝана бунә хԝәһʹьз у кʹӧбар (2 Тимтʹ. 3:1-3). Чахе мәсиһи тʹьме ԝәʹдәда те ль сәр хәбата хԝә, щьвата йан жи щийед дьн, мәрьвед дор-бәр тʹьме дина хԝә дьдьнә ве йәке. Хенщи ве йәке бь шьхӧлед хԝәйә ӧса, әм Йаһоԝа һӧрмәт дькьн (1 Пәт. 2:12). Щарна дьбәкә тьштед ӧса тʹәви мә дьԛәԝьмә кӧ әм ԝәʹдәда тенә ль сәр хәбата хԝә, ле тедәрдьхьн кӧ әм дәрәнги дькʹәвьн ль сәр щьвата, йан жи щьватед сәва даннасинкьрьне. Әм гәрәке ль сәр хԝә бьхәбьтьн, ԝәки ль сәр щьвата дәрәнги нәкʹәвьн. Демәк әм гәрәке пешийа дәстпебуна кʹьламе у дӧакьрьне бенә щьвате. Чьмки бь ве йәке әм нишан дькьн, кӧ дьхԝазьн чʹәʹв бьдьнә Баве хԝәйи әʹзмана, йе кӧ Хԝәдайе пʹәргали у тʹәрбәтийе йә (1 Корн. 14:33, 40).
3. Чьрʹа чахе әм дәрәнги накʹәвьн, бь ве йәке дьдьнә кʹьфше, кӧ әм дәрһәԛа йед дьнена дьшьрмиш дьбьн?
3 Чахе әм дәрәнги накʹәвьн, бь ве йәке әм ӧса жи нишан дькьн кӧ дәрһәԛа йед дьнена жи дьшьрмиш дьбьн, у наве хԝә нагәрʹьн (Фили. 2:3, 4). Бәса хәбәре, чахе әм ԝәʹдәда тенә ль сәр щьвата у щьватед сәва даннасинкьрьне, бь ве йәке әм хушк-бьра әʹщьз накьн. Хенщи ве йәке, һәрге әм тʹьме дәрәнги дькʹәвьн, һьнге йед дьненарʹа ӧса те кʹьфше, кӧ әм ԝәʹде хԝә дьһа ԛимәт дькьн, нә кӧ әԝ ԝәʹдә йе кӧ щьватерʹа дькʹәвә. Чахе әм дәрәнги накʹәвьн әв йәк дьдә кʹьфше, ԝәки әм тʹәрбәтийе һʹьз дькьн, у ԝәки мәри дькарьн итʹбарийа хԝә мә биньн. Мәрьвед дор-бәр, гәләк әв хәйсәт ԛимәт дькьн.
4. Әм чь дькарьн бькьн, сәва кӧ дәрәнги нәкʹәвьн?
4 Һәрге тӧ тʹьме дәрәнги дькʹәви, дьшьрмиш бә кӧ мәʹнийа ве йәке чь йә. Хԝәрʹа бәрнамәкә ӧса чекә, йе кӧ ԝе али тә бькә, ԝәки дәрәнги нәкʹәви у ԝәʹдәда бейи ль сәр щийе кʹьфшкьри (Ԝаиз 3:1; Фили. 1:10). Жь Йаһоԝа аликʹарийе бьхԝазә (1 Йуһʹн. 5:14). Чахе әм хԝәрʹа дькьнә хәйсәт кӧ дәрәнги нәкʹәвьн, бь ве йәке әм нишан дькьн кӧ дьԛәдиньн дӧ тʹәмийед мәзьн. Әв тʹәми дәрһәԛа ԝе йәке йә, кӧ Хԝәде у һәвале хԝә һʹьз бькьн (Мәт. 22:37-39).